K'ipa TIMOTEO
2 de Timoteobi kallari parluguna
Kai cartadaga apóstol Pabloga Roma pueblobi kutin prezu gasha, paibuj churi shina Timoteomu kachashka (1.2; 2.1). Jatun manduj Nerón Roma llaktada mandaki Jesucristo wacharishka k'ipa sujta chunga kanchis (67) wata shinabimi escribishka yuyachin.
Kai cartaga Pablo wañukish Timoteo Alli Shimida katichun, Diosbujta alli rurachun, alli shungun yuyachichunmi escribishka. Shuj yachanagunaga kaibi tiyan: kabishka yachachishkada ima shina uyashkada kazusha Cristo Jesusta crishkan k'uyin katichun (1.8-15), tukigunan alli gaj, alli yachachi pudij, imamundash na ratu p'iñarijlla gachun (2.22-26), kushiyachisha na p'iñarishalla gushtulla yachachichun (4.1-5). Tuki Diosbuj Shimiga Dioslladi yuyida kusha escribichishkami nin. Chimunda Diosbujta ruruj imadabish alli rurachun allimi gan.
1
Pablo saludashkamunda
1 Ñukaga Dios munashkamunda Jesucristo <Kausida kusha> nishkada parlachun agllusha kachushka Pablomi gani. 2 Ñuka k'uyashka churi shina Timoteo: Taita Diosbish ñukuchida Mandaj Cristo Jesusbish kushka alligunada, llakinada, k'uilla kausidash kuchunmi munani.
Crishkabi katichinamunda
3 Tutash p'unllash Diosta mañagusha kanda yuyarishami <Diosolopai> nini. Ima layami ñukaj ñauba taitaguna linshu shungun Diosta katiga, shinaidi ñukash katini. 4 Ñukaga kan wakushkada yuyarigunillami. Shinusha kanda rikusha manchanai kushiyangajmi munani. 5 Kan tuki shungun alli crij gashkadami yuyarini. Sarunmundadi kambuj awila Loida, shinaidi kambuj mama Eunicesh alli crijkuna gaga. Shinushami kandash shinaidi ganada crini. 6 Chimundami ñuka kambuj jawabi makida churaki Dios kanmu kushka ruranadaga wañuguj nina shinada ashtan katichi, ninimi. 7 Shinami Diosga ñukuchimuga manchuj espiritudaga na kushkachu; ashtangarin jinchi tukuna, k'uyana, tuki na alli yuyigunada jarkarina espiritudami kuga. 8 Chimundami ñukuchij Manduj Jesusmunda parlanada, shinaidi ñuka Paibuj prezu tiyashkamundash ama pinganachichu, ashtangarin Alli Shimida parlushkamunda llakichikish Dios kushka ruri pudinanga ñuka laya apunguilla. 9 Dios ñukuchida kishpichishaga linshu kausida charichunmi kayuga. Na ñukuchi imada alli rurushkamundachu, ashtangarin Paibuj munushkan, kushka alligunan kayuga. Narij kai pachash tiyajllabidimi Cristo Jesusmunda ñukuchida k'uyasha alligunada kuga. 10 Ña kununga, ñukuchij Kishpichij Cristo Jesús shamuki chidaga rikuchishka. Paimi wañida tukuchishtaga, shinaidi Alli Shimimunda parlasha na wañuna kausida japina gashkada rikuchiga.
11 Kai Alli Shimimunda parlachun, yachachichunbish agllusha kachushkami gani. 12 Chi mingushkada japishkamundami kai llakida apani. Shinash ñukaga Pida crishkadash yachushami na pinganachini. Ñukamu mingashkada Pai shamuna p'unllagama wakichi pudij gashkada allimi yachani.
13 Ñukamunda ima shina kabishka yachachishkada uyashka shinada kazusha Cristo Jesusta crishkan k'uyin katilla. 14 Ñukuchibi kausuj Diosbuj Espirituj ayudashkan Dios kanmu mingushkagunada alli p'aktachingui.
15 Asia llaktamundaguna tukiguna, Figelosh, Hermogenesbish ñukada shitusha rishkadaga yachunguimi. 16 Onesíforo tauga kutin kushiyachishkamunda paida, paibuj familiadash Mandaj llakichun munani. Ñuka cadenashka tiyakish na pinganachishallami, 17 ashtangarin Romamu chayunmi ñukada japingama na shaikushalla mashkuga. 18 Éfeso pueblobi gaki Onesíforo ñukuchida ima laya ayudashkadash kanlladimi alli yachungui. Shinushami Mandaj Jesús shamuna p'unllabi paidaga ashtan llakichun munani.