FILEMÓN
Filemonbi kallari parluguna
Kai cartadaga apóstol Pabloga carcelbi gasha, Filemonmu kachasha Jesucristo wacharishka k'ipa sujta chunga shuj (61) wata shinabimi escribishka yuyachin. Filemonga Colosas pueblobi kausasha shuj sirvichun randishka esclavoda charijmiga. Kai Onésimo shuti runaga mitikusha, Romamu rishka. Chibi gashami Pablo Diosbuj Shimida parlaki crij tukushka. Chi k'ipa Pabloda alli ayudajmi gaga. Shina gakish Roma llakta mandashkabi nishka shinaga shujbuj esclavodaga na charigunallachu gashka, ashtanbish amomunmi vueltachina gashka. Pabloga Filemondaga “Onésimo kanmungarin yalli k'uyashka gaki ñukada japijma laya paida japingui,” nisha escribisha kachashka.
1
Pablo saludashkamunda
1 Cristo Jesusta parlushkamunda prezu tiyaguj Pablomi kai cartadaga wauki Timoteon ñukuchin igulda ruruj k'uyashka Filemonmu, 2 shinalladi kambuj wasibi tandanukuj crijkunamu, pani Apiamu, ñukuchi laya soldado shina wauki Arquipomush kachanchi. 3 Ñukuchij Taita Dios shinaidi Manduj Jesucristosh Paibuj kushka alligunada k'uilla kausidash kangunamu kuchun.
Filemonbuj k'uyimundash alli crishkamundash
4-5 Manduj Jesusta kan alli crisha shinaidi tuki linshuyachishkagunadash k'uyuj gashkadami uyugani. Shinushkamundaga Diosta mañusha kanda yuyarishaga Diosta <Diosolopai> nigunillami. 6 Cristobi tuki alligunada charishkada kan illijta intindingu Paida crishkada parlachun Diosta mañani. 7 Wauki Filemón, linshuyachishkagunaj shunguda kan kushiyachishkamundaga kambuj k'uyimi ñaubujmu rinada ñukamu manchanaidi kushiyachin.
“Onesimoda kutin japibai,” nishkamunda
8 Chimunda ñuka Cristobi gasha kan imada ruranada jinchi shimigunan mandi pudini; 9 shina gakish k'uyin gashkamundaga ashtan kanda rugaguni. Ñukaga ruku Pablomi gani. Cristo Jesusta parlashkamunda kununga prezush tiyaguni. 10 Shinushaga ñukaj churi laya Onesimomunda kanda rugani. Carcelbi gasha crinabi paibuj taita laya*1.10 Onesimoga Pablo carcelbi gasha parlakimi crij tukuga. tukugani. 11 Sarunga paiga kanmunga imakish na vali esclavomiga; kununga kanmush ñukamush imadash rurusha ayudangami.
12 Ñuka manchanaidi k'uyashkadaga paidadimi kambujmu kachani. 13 Alli Shimida parlushkamunda prezu tiyashkabi kambuj randi ñukada kaibi ayudasha ñukan sakirichunmi munugani. 14 Shinash ñuka rugushka, ama mandushkallamunda ashtangarin kan kikin munin rurashka gachunmi, narij kan <ari> nijllabidijka imadash na rurush niganichu. 15 Onésimo kambujmunda asha p'unllagunada laduyashkaga†1.15 Onésimo mitikusha rikish Diosga Filemonbuj Onesimobukish allibujtaga ruraguga. Ro 8.28 paida na tukuribujta kan japichun chibujchari tukuga. 16 Kununga paiga ña na watashka shinachu, ashtanbish watashkada yalli gashash munushka shuj wauki shinami. Ñukamunga manchanaidi alli munashkami, ashtan kanmungarin yalli alli rijsishka gashkamunda, Manduj Jesusta crij gashkamundash yalli k'uyashkami.
17 Shinakiga kan ñukan igulda purij gashkamundaga, ñukada japijma laya paida japingui. 18 Pai ima na allida rurashkakish na gashaga imada vueltachina gakish ñukada cobrangui. 19 Ñuka Pablolladimi kaida ñukaj makin escribini. Chi cobrashkada ñuka pagashami. Kangarin, mushuj kausida japishkamunda ñukamu dibinguimi, shinash ña na parlushachu. 20 Ari, wauki, Manduj Jesusbi kai mañushkada ñukamu rurusha, Cristobi ñukaj shunguda kushichibai. 21 Kan kazunada crisha, kai ñuka mañashkada ashtan yalli ruranada yachusha escribini.
22 Kanguna Diosta mañagushkamunda kangunada rikuchun Pai ñukada kachachunmi shuyaguni. Shinusha maibi ñuka samarinadash parijangui.
Tukurina yuyigunamunda
23-24 Cristo Jesusta parlushkamunda ñukan igulda carcelbi tiyuj Epafrasbish, shinaidi ñukan igulda rurujkuna Marcos, Aristarco, Demas, Lucasbish saludangunami.
25 Manduj Jesucristo kushka alliguna kangunan gachun.