3
Juan Bautista Jordan mayu cuchuncunachö bautizarnincuna yachatsicun
(Mateo 3:1-12; Marcos 1:1-8; Juan 1:19-28)
1 Tiberio Cesar shutiyog runa, chunca pitsga watana Roma runacunapa mas mandacug reynin caycaptinmi, Judea marcachö Poncio Pilato mandacug cargan. Galilea provinciachönam Herodes, Iturea y Traconite provinciacunachönam Herodespa waugen Felipe y Abilinia provinciachönam Lisanias. 2 Jerusalénchönam llapanta mandagnin sacerdöticuna Anaswan Caifas caycäyargan. Tsay witsaymi tsunyacunachö Zacariaspa tsurin Juan Bautista päraptin, quiquin Dios Yaya Palabranta willacunanpag mandargan. 3 Tsaymi Jordan mayu cuchun marcacunapa purirnin, runacunata yachatsir nirgan: “Jutsayquicunapita dëjasquir arepenticurnin bautizacuyay, Dios Yaya perdonayäshunayquipag” nir.
4 Tsaynö Juan Bautista willacunanpagmi, Diospa Palabranta parlag Isaías gellgarnin nirgan:
“Tsunyacunachö purirmi juc runa willacurnin ninga:
‘Dios Yayapa Tsurin shamunanpag ichicllanam faltan.
Alli nänipa purignö alistacurnin shumag prevenicuyay.
5 Mana alli nänicunata parijarnin jircacunata pampatsagnö,
wicsu nänicunata derëchar rumi ruminta limpiagnö alistacuyay,
shongoyquicunachö mana alli rurayniquicunata dëjasquir.
6 Entëru munduchö maytsay marcacunachömi llapan runacuna musyayanga,
Dios Yayapita Salvador shamunganta.’ ”✡Is 40:3-5.
7 Tsaynö bautizacuyänanpag maytsicag runacuna Juanman maytsaypita shayämuptinmi nirgan: “Gamcunaga, venenösa vïborapa castan caycar, ¿imagtan nogaman shayämunqui? ¿Tsaynö caycarga, imanörag Dios Yayapa rabiayninwan condenacionpita geshpir salvacäyanqui? 8 Llapan jutsayquicunata dëjasquir arepenticurnin, allicagcunallatana rurayay. Ama gamcunaga niyaytsu, ‘Unay Abrahampa ayllun carmi, Diospana cantsic’ nirga. Tsaymi niyag: Dios Yaya munarga cay rumicunapitapis Abrahampa ayllunman ticratsinmanmi. 9 Imayca mana alli wayug jachacunata wallusquir ninachö waycangantsicnömi, Dios Yaya listo caycan mana criyicuyangayquipitawan mana alli rurayniquicunapita castigayäshunayquipag.”
10 Tsaynö niptinmi runacuna tapuyargan: “Tsaynö captinga, ¿imatatan rurayäshag?”
11 Juannam nirgan: “Ishcay camisayquicuna captinga, juccag camisayquicunata camisannagcagta garaycuyay. Tsaynölla micuyniquicuna captinpis, mallagaycagcunata garaycuyay” nir.
12 Contribucion cobragcunanam Juanman witirnin bautizacur, tapurnin niyargan: “Maestru, ¿imatatan nogacunaga rurayäshag?” nir.
13 Juannam nirgan: “Contribucionpita mastaga ama cobracuyanquitsu.”
14 Tsaynöllam soldäducunapis witiycur tapuyargan: “Nogacunaga, ¿imatatan rurayäshag?”
Paycunatanam nirgan: “Ama runacunapa imancunatapis amälasga gechuyanquitsu ni amenasarnin calumniäyanquitsu gellaynincunaraycu. Pägayäshungayquillawan conformacuyanqui.”
15 Juan yachatsicunganta runacuna wiyarmi, alläpa cushishga quiquillancunachö niyargan: “Diospa Tsurin shuyangantsic Cristoch cayga.” 16 Tsaynö niyanganta musyasquirnam, Juan Bautista nirgan: “Nogaga yacullawanmi bautizayag. Pero jucmi shamunga nogapita mas poderöso. Manam nogaga Paypa llangenpa watunta umpuycur pascanällapagpis servïtsu. Payga Espïritu Santota garayäshurniquim bautizayäshunqui lunyaycag ninawannö. 17 Ichicllanam faltan, ërata limpiarnin rurasquir trïguta wayragnö runacunata acrananpag. Trïguta gorisquir churagnömi criyicug runacunata apacunga. Pero mana criyig runacunatam sïga, imayca päjata waycagnö mana wañug ninachö rupatsinga.”
18 Tsaynö nisquirnam, Dios Yayapa Alli Willacuyninta tucuyläyapa alverticur willacurgan.
19 Tsaypitanam mandacug Herodesta Juan Bautista piñapar nirgan: “Ama waugeyquipa warminwan täcuytsu. Tsayga alläpa mana allim. Tsaynölla amana tucuyläya mana allicunata ruraynatsu.”
20 Tsaynö ninganpitam, mana allita rurangancunapita mas peor mana allita rurarnin, Herodes Juanta carcelman gaycascatsirgan.
Juan Bautista Señor Jesucristota bautizan
(Mateo 3:13-17; Marcos 1:9-11)
21 Rey Herodes manarag prësu achcutsiptinmi, llapan runacuna bautizacuyanganchö Señor Jesucristopis bautizacurgan. Tsaychö Señor Jesucristo Dios Yayaman mañacuycaptin cielu quichacasquiptinmi, 22 imayca palomanö Espïritu Santo ricaraycäyaptin urämur, Señor Jesucristoman chämurgan. Tsaynam cielupitanam Dios Yaya nimurgan: “Gamga cuyay Tsurïmi canqui. Gamtam quiquï acrashcag cushitsimänanpag.”
Señor Jesucristopa puntacag aylluncuna
(Mateo 1:1-17)
23 Señor Jesucristo quimsa chunca watayog caycarnam, Dios Yayapa Alli Willacuyninta willacur gallaycurgan. Tsaymi runacuna yarparnin criyiyangannö Señor Jesucristoga Josépa tsurin cargan.
Joséga Elípa tsurinmi.
24 Elíga Matatpa tsurinmi.
Matatga Levípa tsurinmi.
Levíga Melquípa tsurinmi.
Melquíga Janapa tsurinmi.
Janaga Josépa tsurinmi.
25 Joséga Matatíaspa tsurinmi.
Matatíasga Amóspa tsurinmi.
Amósga Nahúmpa tsurinmi.
Nahúmga Eslipa tsurinmi.
Esliga Nagaipa tsurinmi.
26 Nagaiga Mahatpa tsurinmi.
Mahatga Matatíaspa tsurinmi.
Matatíasga Semeipa tsurinmi.
Semeiga Josecpa tsurinmi.
Josecga Judápa tsurinmi.
27 Judága Joanánpa tsurinmi.
Joanánga Resapa tsurinmi.
Resaga Zorobabelpa tsurinmi.
Zorobabelga Salatielpa tsurinmi.
Salatielga Neripa tsurinmi.
28 Neriga Melquípa tsurinmi.
Melquíga Adipa tsurinmi.
Adiga Cosampa tsurinmi.
Cosamga Elmadampa tsurinmi.
Elmadamga Erpa tsurinmi.
29 Erga Josuépa tsurinmi.
Josuéga Eliézerpa tsurinmi.
Eliézerga Jorimpa tsurinmi.
Jorimga Matatpa tsurinmi.
30 Matatga Levípa tsurinmi.
Levíga Simeónpa tsurinmi.
Simeónga Judápa tsurinmi.
Judága Josépa tsurinmi.
Joséga Jonampa tsurinmi.
Jonamga Eliaquimpa tsurinmi.
31 Eliaquimga Meleapa tsurinmi.
Meleaga Menapa tsurinmi.
Menaga Matatapa tsurinmi.
Matataga Natánpa tsurinmi.
32 Natánga Davidpa tsurinmi.
Davidga Isaípa tsurinmi.
Isaíga Obedpa tsurinmi.
Obedga Boozpa tsurinmi.
Boozga Salmon tsurinmi.
Salmon Nahasónpa tsurinmi.
33 Nahasónga Aminadabpa tsurinmi.
Aminadabga Adminpa tsurinmi.
Adminga Arnipa tsurinmi.
Arniga Esrompa tsurinmi.
Esromga Farespa tsurinmi.
Faresga Judápa tsurinmi.
34 Judága Jacobpa tsurinmi.
Jacobga Isaacpa tsurinmi.
Isaacga Abrahampa tsurinmi.
Abrahamga Tarépa tsurinmi.
Taréga Nacorpa tsurinmi.
35 Nacorga Serugpa tsurinmi.
Serugga Ragaupa tsurinmi.
Ragauga Pelégpa tsurinmi.
Pelégga Heberpa tsurinmi.
Heberga Salapa tsurinmi.
36 Salaga Cainánpa tsurinmi.
Cainánga Arfaxadpa tsurinmi.
Arfaxadga Sempa tsurinmi.
Semga Noépa tsurinmi.
Noéga Lamecpa tsurinmi.
37 Lamecga Matusalénpa tsurinmi.
Matusalénga Enocpa tsurinmi.
Enocga Jaredpa tsurinmi.
Jaredga Mahalaleelpa tsurinmi.
Mahalaleelga Cainánpa tsurinmi.
38 Cainánga Enóspa tsurinmi.
Enósga Setpa tsurinmi.
Setga Adánpa tsurinmi.
Adánga Dios Yaya camanganmi cargan.