5
Dios Yayapa Cordërun pergashpita rölloshga libruta quichangan
1 Tsaypitam trönochö jamaycagpa derëchucag maquinchö pergashpita libruta ricaycurgä, jananpawan rurinpapis gellgashga, röllornin ganchis sëlluwan sëllushgata. 2 Tsaynöllam ricargä juc poderöso angel tapucurnin jinchicuycur caynö ninganta: “¿Pitan puedin llapan sëllunta rachishquir, cay libruta quichamuyta?” nir. 3 Pero manam cieluchö ni cay patsachö ni patsa rurinchöpis cargantsu, tsay libruta quichayta ni imapag gellgashga canganta ricaytapis. 4 Tsaymi mana ni pipis quichaytawan ni ricayta merëcinganta ricar, alläpa mantsacarnin mana päraypa wagargä. 5 Tsaynö wagaycaptïmi, tsay ishcay chunca chuscu (24) respetashga auquincunapita jucnin nimargan: “Ama wagaynatsu, canan masqui ricanqui Judápa castanpita Leonnin, rey Davidpa ayllunmi llapanta venceshga. Tsaymi cananga Payga ganchis sëlluta rachiyta merëcin, tsay pergashpita rölloshga libruta quichamunga” nir.
6 Tsaychö caycangäpitam trönopa y chuscun cawagcunapawan ishcay chunca chuscu (24) respetashga auquincunapa puntanchö Dios Yayapa Cordërunta ricaycurgä. Tsay llapancunapa puntanchömi Dios Yayapa Cordërun llapan jutsantsicraycu wañunganpita ichiraycargan. Ñawinwan wagranpis ganchismi cargan. Tsay ganchis ñawinga ganchis wagranmi Dios Yayapa Espïritu Santonpa ganchis yachayninwan cay patsachö llapan imaycata ricaycämungantam musyatsicun. 7 Tsaymi Dios Yayapa Cordërun aywaycur, jamacunachö jamaycagpa derëchucag maquinpita libruta chasquisquirgan. 8 Tsaynö libruta chasquisquiptinmi, chuscun cawagcunawan ishcay chunca chuscu respetashga auquincunapis, Dios Yayapa Cordërunpa puntanman gongorpacuyargan. Tsaychömi llapan auquincunapis maquincunachö cada ünu arpancunawan y goripita cöpa junta incienciuncuna aptashga caycäyargan. Tsay incienciuga cargan, Dios Yayaman llapan criyicugcunapa mañacuynincunam. 9 Cay mushog cantutam llapan cantayargan:
“Gammi cruzchö yawarniquita jicharnin wañur,
Dios Yayapa runancuna cäyänapag rantiyämashcanqui.
Llapan naciunpa marcancunapitam,
tucuyläya castacunawan tucuyläya parlagcunapis salvayämashcanqui.
Tsaymi gamlla cay libruta achcuyta puedirnin,
Sëlluntapis quichayta merëcinqui. 10 Gammi sacerdöticunata churashcanqui Mandacuy Reynoyquichö
Dios Yayantsicta imayyagpis serviyänanpag.
Tsaymi cananga cay llapan patsachö mandacuyänanpag churashcanqui.”
11 Tsaypitam ricaycurgä trönopa entëruncunachö y chuscun cawagcunapawan ishcay chunca chuscu (24) respetashga auquincunapa wagtancunachö tumat alläpa atsca waranga waranga mana yupaytapis puedïpag angelcunata. 12 Tsaymi jinchi gayaycachar alabarnin cantar niyargan:
“¡Dios Yayapa Cordërun wañugllam,
llapantsic alabanata merëcin!
¡Payllam llapan podertawan imayca riquësata,
llapan yachaycunawan callpata
y gloriachö llapan adoraciontapis chasquiyta merëcin!” 13 Tsaynöllam wiyargä, llapan imaycata Dios Yaya camanganwan janag patsa cieluchö y cay patsachö y patsa rurinchö y lamar rurinchö caycagcunapis cantaycäyagta:
“¡Alabashga catsun, jamacuna trönochö jamaycagwan
Dios Yayapa Cordërunpis, llapan cuyacuy cushicuynintsicwan
Gloriachö alabashga cäyätsun,
llapan adoracionnintsicwan
poderöso canganpita!
¡Tsaynölla imayyagpis catsun!” 14 Tsaychö chuscun cawagcunam niyargan: “¡Tsaynö caycullätsun!” nirnin.
Tsay ishcay chunca chuscu (24) respetashga auquincunapis, llapanmi gongorpacuycur adorayargan.