7
Israel casta runacunapita juc pachac chuscu chunca warangalla señalashga cayangan
Tsaycuna llapanta ricasquirmi, chuscu angelcuna cay mundupa chuscunlä esquïnancunachö ichiraycäyagta ricaycurgä. Tsay chuscun angelcunam, cay patsaman, lamarman ni jachacunamanpis, chuscunlädopa shamug wayrata mana juc wayrämunanpag tsaparaycäyargan. Tsaynöllam juc angeltapis rupay yargamunan lädupita cawag Dios Yayapa sëllunta catsirnin shamuycagta ricargä. Tsay angelmi jinchicuycur gayargan, cay patsatawan lamarcunata mana allita rurarnin yagatsinanpag podernincuna chasquishga chuscun angelcunata: “Dios Yayapa servicugninta manarag Diospa sëllunwan urcuncunachö señalayaptïga, amarag cay patsatawan lamarcunata ni juc jachacunallatapis, mana allita rurarnin yagatsiyanquiragtsu.”
Tsaypitam llapanta yupar acrarnin señalayanganta wiyargä: Juc pachac chuscu chunca chuscu warangallata llapan Israel casta runacunapita. Chunca ishcay warangatam Judápa castanpita señallargan,
chunca ishcay warangatam Rubénpa castanpita,
chunca ishcay warangatam Gadpa castanpita.
Chunca ishcay warangatam Aserpa castanpita,
chunca ishcay warangatam Neftalípa castanpita,
chunca ishcay warangatam Manaséspa castanpita.
Chunca ishcay warangatam Simeónpa castanpita,
chunca ishcay warangatam Levípa castanpita,
chunca ishcay warangatam Isacarpa castanpita.
Chunca ishcay warangatam Zabulónpa castanpita,
chunca ishcay warangatam Josépa castanpita,
chunca ishcay warangatam Benjamínpa castanpita
Chaquincuna puntanyag maytsicag yurag llatapashgacuna
Tsaypita ricchacusquirnam maytsay naciun marcapita maytsicag runacuna yuriscayämugta ricargä, tucuyläya castawan tucuyläyata parlagcunatapis. Jamacuna trönochö jamaycagpawan Dios Yayapa Cordërunpa puntanchö llapan ichiraycäyagta, alläpa maytsicam cayargan, manam ni pipis yupayta puediyargantsu. Tsay llapan runacunam yurag llatapashga maquincunachö palmapa rämanta aptashga cayargan. 10 Llapancunam alläpa jinchi gayaycachar niyargan:
“Jamacuna trönochö jamaycag Dios Yayawan,
Paypa Cordërunlla alabashga cayätsun,
Japallan salvamagnintsic canganpita.”
11 Llapan angelcunam ichiraycäyargan jamacunapa, auquincunapa y chuscun cawagcunapa entëru wagtancunapa tumat. Tsaymi jamacunachö Dios Yayata adorarnin, puntanman llapan gongorpacuyargan gagllancunapis patsaman changanyag. 12 Tsaymi Dios Yayata alabarnin adorar niyargan:
“¡Tsaynö caycullätsun!
Llapan alabacioncunawanmi,
cushicuy yachayniquipita agradëcicuyag,
llapan poderniquiwan yanapacuyniqui,
cushicuy adorayäshungayquiwan
llapan callpayog, Dios Yaya,
imayyagpis mana ushacag alabashga caycullay.
¡Tsaynö caycullätsun! ¡Amen!”
13 Tsaypitam juccag respetashga auquin tapumargan: “¿Picunatan cay llapan yurag llatapashgacuna cayan, maypitatan shayämushga?” 14 Tsaynam contestargä: “Taytay, gammi tsaytaga musyanqui.”
Tsaymi nimargan: “Llapan caycunam alläpa mantsaypag sufrimientu tiempucuna päsashga cayan. Tsaymi cananga Dios Yayapa Cordërunpa cawag yawarninwan chaquincuna puntanyag llatapancunata tagsharnin yuragyätsiyashga. 15 Tsaymi tsay limpiu llatapayogcunaga,
Dios Yayapa jamacuna trönonpa puntanchö caycäyan.
Paycunam pagasta junagtatapis cielu gloria templunchö Dios Yayata serviyan.
Tsay jamacunachö caycagmi llapan puntanchö caycagcunata
imayca juc carpanö llapan mana allicunapitapis tsapanga.
16 Paycunaga mananam mallagaytawan
yacunaytapis mastaga ni imaypis sufriyanganatsu.
Tsaynöllam rupaywan tucuyläya achachaycunapis
manana rupanganatsu ni achachayninpis däñanganatsu.
17 Jamacuna tröno pullanchö caycag Dios Yayapa Cordërunmi
paycunataga imayca üshacunatanö mitsignö cuidanga.
Tsaynöllam alläpa chuya cawatsicug yacuman llapanta pushanga.
Tsaymi Dios Yayapis llapan wegencunata
maquinwan pitsarnin tsaquitsinga.”