16
Aagaar ma Ismaael
1 Saaraai, a taulaa anun Aabraam, pa i buta paa ta naat. Anuna raa tultul na tabuan taangirong Aaigipto a iaana Aagaar. 2 Ma Saaraai i piri taan Aabraam naa, “A Tadaaru ut maa i naagagon taai baa pang babuta. Io, koina baa un inep ungaai ma anung tultul Aagaar kupi in buta taa anung ta naat.”
Ma Aabraam i paami lenmaa Saaraai i pir taai taana. 3 Saaraai i tula taa Aagaar, anuna tultul taangirong Aaigipto, karom Aabraam kupi in taulaa mai. A utnaa mi i waan paat baa i 10 kilaala baat Aabraam irong Kaanaan. 4 Aabraam i inep ungaai ma Aagaar, ma namur Aagaar i kipbaala.
Baa i kariaanai naa ia kipbaala, i turpaa milikuaana Saaraai, anuna mukmuga. 5 Saaraai i piri karom Aabaraam lenbi, “Ui maa u kabina maa Aagaar i milikuaana iaau. Iaau taar taa a tabuan mi taam, iaku mi ia kipbaala, io, i milikuaana iaau maku. Iaku a Tadaaru ut in naagagon kado daar.” 6 Aabraam i piri karom Saaraai naa, “Ui ut u naagagon anum tultul. Aawa baa u nemi un paami uni, un paami ku.” Ma Saaraai pa i koina paa ma Aagaar, io, Aagaar i kalaa ino paa koni.
7 Aangelo anu ra Tadaaru i waan paat karom Aagaar marawaai naan raa mataana daanim lik u ra bil na wanua, naa ra aakapi urong Sur. 8 Ma i piri taana naa, “Aagaar, ui a tultul anun Saaraai, u waan taangawaai mi, ma un waan ma uwaai?” Aagaar i baalui naa, “Iaau welulu ino kon Saaraai, anung mukmuga.”
9 Aangelo anu ra Tadaaru i piri taana naa, “Un waan talili balet kup anum mukmuga, ma un taraam taana.” 10 I piri kaai taana naa, “Iaau ut ang wangaala paa a kum taptabum namur, kupi diat a bure aakit ma pa te in luk laar pa diat.”
11 Aangelo anu ra Tadaaru i piri kaai taana lenbi,
“U aa kipbaala,
ma un buta paa a naat muaana.
Ma un waatung taa a iaana baa Ismaael,*Ismaael a kukuraaina baa “God i walangoroi”
maa a Tadaaru ia walangoro taa anum niluan u ra kum mawaat baa u kariaanai.
12 Ismaael in welaar ma ra lomlom na dongki,
in weweium ungaai ma ra taara raap,
ma ra taara kaai diat a weweium ungaai mai,
ma in ki na ebaar ma ra kum tateina liklik raap.”
13 Ma Aagaar i waatung a iaa ra Tadaaru baa i pirpir paa karomi naa, “Ui a God baa u babo iaau.” Maa i piri naa “Iaau aa babo taa ia baa i bababo iaau.” 14 Io, di waatung a daanim maa baa “Biaar Laakaairoi.”†Biaar Laakaairoi a kukuraaina baa “a daanim anun ia baa a Lalaaunina baa i babo iaau” Kurong utbaai a daanim maa, i ki naliwan taan Kaades ma Bered.
15 Gal 4:22Io, Aagaar i buta taa raa naat muaana un Aabraam, ma Aabraam i waatung taa a iaana baa Ismaael. 16 A kilaala na lalaaun anun Aabaraam i welaar ma 86 baa Aagaar i babuta taau uni.