Ipê me gõ Pahhiti pê me Apãm Cati. Ne imã me akwỳ kĩan to me akĩn. Cwỳrjapê wa ite Ejit jõ pjê pê me ato icator, por curi me apê cama mecumã me gàpên catêjê ata pĩn. Na wa itea me amã amji jõr, ne amji to me gõ Pahhiti. Na ca ha nee iràn xà na, hipêr amji mãme jũm to me gõ pahhiti prãm nare. Ne imã me pahte ajpẽn kĩnti ita na me ato prãm.

Ne pa wa ha ampo kên cunea pê me apytàr to ipa, ne me atehcajpar to ipa. Na ca ha nee ame apãm cahàc krekà itajê to amji kam me gapac nare, ne nee hanea ne ame ampo carõ kên pê cupẽjarôti ata to amji kam me gapac nare, ne nee cute me atehcajpar xà na ame ahna gàhwỳr nare. Nãmri ca ha ate iràn xà na amji mã me jũm to hajỹr na, ca hama ramã ame icaca, wa ha itỳj ahna ame akam icryc, ne hahpan xà na ame ato kên. Ne por pjê cunea kam me cumã ikĩnti, mã ijarkwakam me hapac to me ipa atajê, wa ha imã mehkĩn, ne me caprĩ.

Ne imã me akwỳ kĩnti incwỳrjapê wa ite me amã ijarkwa me ijaprỳ jõr. Na waha me amã gaprỳ to “Me cupê Pahpãm tekjê”. Cwỳrjapê ca ha ijaprỳ to me amji jamãr peaj ne. Ne catyt kam me apa, ne nee ame ampo kênton to me apa nare. Nãmri ca ha ame ampo kên ton tome apa, quê ahna me apupu, ne ito amji kam me hapac to: “Mõrmõ me Hũm ita kêanre na mã, ihkôat mehkêanre” hane. Nãmri ca ha ate me ipar nare, ne mãnea mã ate meampo kên ton to me apato hajỹr na, wa ha itỳj hahpan xà na ame akam icryc, ne ame ato kêanre ne.

Imã me akwỳ kĩnti na pê wa, ite me amã pjê me ampo cunea impejti itajê jõr xà caxuw, to ijàpêan to amcro to xêj. Ne pom amcro te xetata to, wa ite ajteare mã, kam me pahkôt xà na. Na ca haatỳj me to amji japackrea ne, ne icuxà amcro te xêj itajê kam ca ha me apê, ne cute xet ita kam, ca ha nee ame gàpên nare, ne cama me kôt. Ne amcro ata kam, ito pit mã me amji kam gapac to me apa.

Imã me akwỳ kĩnti incwỳrjapê wa ite me amã me apãmjê me, me axyrxwỳ jõr, cute me gapackre xà caxuw. Ca ha pjê ita kam, amã amji toapijapar to irya to prãm na, ca ha atỳj me apãmjê me, me axyrxwỳ kampa ne amji mã me hũpa.

Imã me akwỳ kĩnti incwỳrjapê, pê wa pa amji mã me ato, ate amji to me apijapar xà caxuw. Na ca ha nee jũ caxuw me jũm curan nare.

Imã me akwỳ kĩnti incwỳrjapê wa ite ahpỹanre na me axũmre mã, me aprõ jõr par. Ne hanea ne ahpỹanre na me apyjê mã, me apjê jõr par, ahte ate ame apa cupate, ate me ajpẽn kĩn, ne ajpẽn na me gũjaxôr prãmte. Na ca ha nee amji jũ na ame aprõ kĩn nare, quê ha pyjê xwỳjê nee amji jũ na amempjê kĩn nare, ne nee ajpẽn pê ame amji caxun nare.

Imã me akwỳ kĩnti incwỳrjapê wa ite me amã ampo kwỳ cunea jõr, ate me to atekjêa to prãm to. Na ca ha atỳj ajpẽn mã me ampo itajê na pahti ne, ne nee jũ caxuw jũm pê ampo to me gàhkĩj nare.

Imã me akwỳ kĩnti incwỳrjapê, ca gapacta ne atỳj amji mã me ikampa. Ampo na? Wa hãn ne ampo to icakôc, ne nee apu ihêj xi to icakôc nare. Na ca ha icuxà, nee ame ahêj xi jarẽn nare. Ne nee me akwỳ kên mã me irẽn prãmte, ame to ahêj xi to me apa nare.

Ne imã me akwỳ kĩnti incwỳrjapê ri imã me akwỳ me, me amã me ajpẽnkĩnti na me ato prãm. Na ca ha nee me akwỳ mã ampoatajê na ame amji caprẽp nare. Ne ampo itajê pê, me hũrkwa me, hĩxi me, cumã me hàpên catêjême, cute ampo to me ipijapar xà me, ampo pej itajê cunea me.

Hõhõ, ita to pê Pahpãm Mojxe mã ihcakôc. Mã pjê kam me hàhtôti atajê te mepahhàjê jàhcuxê me, kẽn kam ihkũmti ata pupun, ne kam me hàhkrihkrit me, hõhhi jàkôrti catia ata kam me hapac, ne hũpa te amehtertet. Ne ampỳa mã amehcuhhê, ne cute me Mojxe mã me amji jarẽn to:

— Ca ha caa me imã Pahpãm jarkwa to acakôc, wa ha itỳj me akampa. Ne nee me inaPahpãm te me imã ihcakôc na hamãr nare. Quê me imã ihcakôc, wa me icunea ame ty — hajỹr.

Mã Mojxe te me cumã harkwa to:

— Nee ame amji mã pa nare. Ampo na? He nee Pahpãm me amã ihkênjõr nare. Ne cama cute me acapi, ne ate amji mã me to ahimpej kam me to acràna, cute me gahkre pej prãmte ri me amã carôt tỳjti ita to ipipẽ to mõ. Ca hame hõmpun to mõ, ne me hahkre pej, ne amji mã me hũpahti to me apa. Ne ca hanee cuna mã ame ampo kên ton nare, ne atỳj ame apej mã me apỳpỳm — hajỹr.

Mã ampỳa mã amehcuhhê, mã ma awcapàtkôti ata mãMojxe pyxit peaj ne Pahpãm wỳr hàr. Mã hipêr Pahpãm te me hapackre to hàhtôa to hàhtô.