8
Pê Jeju cahãj xyre ata te hipêr ampo kên ton nare xà caxuw hũtà
Jirô pê mã ri ikre wỳr mehcunea cutor, mã ma JejuPĩxô jõ kẽn wỳr mõ. Mã amcro nõ na, awcahti xà wỳr, Jeju te amji jaxàr, Pahpãm to me amji kam hapac xà jũrkwa wỳr, ne hàr ne jỹ. Mã me hàhtôa ne ahna me ipixêr, ne me xa, ne cuteampo to me cumã hahkre xà atajê na ame kampa. Mã cute me cumã Mojxe xwỳ jõ kàhhôc to hahkrecatêjê me, Parixêw catêjê te me pyjê nõ te ahti naimpjê kaj na jũm me nõ ata pro, ne ma me to mõ. Ne cute Jeju cuna mã me hãm xà caxuw, ame cumã quêt. Mã mehcunea jipôc ri hãm ne xa. Mã cute Jeju mã me harẽn to:
— Me Ikrã tũm, pom cahãjre ita ihtỳj ahti na mõ ne hũmre ita to nõ, impjên kaj na. Mã jũm te ajpẽn kam me hõmpun, wa ite mehpro, ne ajpên awỳr me to mõ. Ne pê Pahpãm jõ kàhhôc kam Mojxe xwỳ me pamã pyjê te hajỹrjê atajê kẽn to curan to hajỹr na, awjahkre he: “Quê ha pyjê nõ apu hajỹr to mõ ata ri kẽan to cutemehcuran xà” hane. Ne ca? Jũ mã ca ha cute hajỹr xà ita na me imã ihkôt harẽn to? — hane.
Ampo na pê pyjê nõ ata kôt ame Jeju mã harẽn tohane? Nee mã ampo na nare. Jeju te me hapackre xà nõ to ihcupan, mã cute mempar ne mehpro prãmte, pê tee ame to hahkre. MãJeju te cama hỹr ne me kam hapac, ne pjê na hikôt nehũhkrahhi to kam ihhôc to mõ. Mã mehcukij ita na. Mã cute amji capô ne hỹr pej, ne me cumã harkwa to:
— Por rỳ jũ caxuw me anõ te Pahpãm cuna mã ampo kênton nare ata, ca ha mam kẽn nõ to cahãjre ita kamawcapê, ate to ihcuran xà caxuw — hajỹr.
Jirô pê mã ri hacpỹa mã pjê na hikôt, ne ihtỳj jỹ ne kam ihhôc. Mã cute me Jeju te me cumã hũjarẽn to hajỹr na kamme hapac atajê, ma me pyxit ne me pra. Ne por mam jũm kàhtu ata ri mamam me cumã tẽ. Ne ahnaa me pyxit ne ajkôtmemprar ita kam me cutor. Mã ahte Jeju me jũm cahãjre ata pit jàhhuc. 10 Mã Jeju te amji capô ne hỹr pej, ne jũm cahãjre ata mã:
— Hàpà? Ne mẽr jõ ri mã kẽn to cute ame acapêr prãmatajê? Ne mẽr jõ ri mã ame akôt harẽn to kêanre atajê? — hajỹr.
11 Mã jũm cahãjre ata Jeju mã:
— Hamreare, nee jũm jàhhuc nare — hane. Mã cumã:
— Wa nee pa xwỳjê ato kên nare. Mẽr gapacta netẽ, ne nee hipêr mõ ne ampo kên tonnare — hane.
Jeju pê hàhcujro xà pyràac, ne me pamã ampo cunea to ajpẽ
12 Jeju te hipêr me hàhtôa mã ampo to hahkre kamihtẽm, ne me cumã amji jarẽn to hajỹr he:
— Ipê, pom hàhcujro xà ampo cuneacujro, ca me hõmpu ne me hahkre pej ita pyràac. Ipê Pahpãm wỳr me amã ijàhcujrocatê. Na ca ha ate me amji mã ito me ahimpej na, ca ha jũcaxuw awcapàtkôti kam, me apê amji jahkre kêatre kam, mePahpãm pê apictor xà ata kam ame apa nare — hajỹr.
13 Mã Parixêw catêjê kwỳ te me Jeju kam hapac ne mecumã:
— Ca ramã ca apu amji to acakôc, na ri acakôc xà itajêkôt hamreare — hajỹr.
14 Mã Jeju me cumã:
— Pom wa ampeaj kam me amã amji jarẽn to ipa itajê kôt nee hamre nare. Ampo na? He ampeaj kam, wa nee apu ihêj xi nare. Ne pa ri quêt imã, por jũ rũmicator xà ata na amji jahkre pej, ne hanea ne imã hacpỹ mã ite amji jaxàr xà ata na amji jahkre pej. Ne me ca nare, me apê jũ rũm icator xà ata na ijahkre kêatre, ne hanea ne jũ kam itẽmxà ata na me apê ijahkre kêatre. 15 Na ca me ate amji kam me gapac xàa kôt, amji mã meikêanre na me ito hane, nare, mõrmõ ca amji mã me ipej na me ito hane. Ne imãa, ate me ijarẽn xà itajê cunea kôt hamreare. Ne nee cormã ite mehkênme, mempejti cukij ne me to ipicokjêr xà jõ amcro cator nare. 16 Wa ha ite ramã me ato ipicokjêr xà na mã, wa ha itỳj catyt kam me akên me, me apejti to ipicokjêr to ipa. Ampo na? He wa ha ite ton xà ata kam, nee ahte ton nare. Quê ha hanea ne, por Inxũ te ikujahêc ata icahê na jỹ, ne ite me atohajỹr xà to imã hahkre. 17 Ne Mojxe xwỳ te me amã incaca xà te hajỹr ata rer, na quê ha jũmjê ajkrut ne jũm te ampo ton xà ata na mehõmpu, ne cute me hõmpun xà ata na ajwar ajpẽan kôt me harẽn na, quê ha me amã ampeaj kam ri cute ton. 18 Ita jĩkjê na wa Inxũ te ikujahêc ata me ajwar me ijũjarẽn xà caxuwme ipijakrut, cwỳrjapê ca ha atỳj ite amji jarẽn xà itana me ikampa — hane.
19 Mã me cumã:
— Jõ ri mã apãm ita? — hane. Mã Jeju me cumã:
— He me apê Inxũ jahkre kêatre, ne hanea ne me apêijahkre kêatre, quê ha me amã ijahkre pej na mã, quê hahanea ne me amã Inxũ jahkre pej — hane.
20 Ne por cute Pahpãm to amji kam me hapac xà jũrkwa kam, cute me cumã ihporeto cuprõn xà ata cahê na, pê Jeju me cumã hũjarẽn xàitajê to awjarẽ. Mã nee cute mehpro ne me haxàr nare, mehacjên xà kam. Ampo na? Pêcormã nee cute mehpro xà jõ amcro hỹrmã cator nare, na pê.
Pê Jeju pahhi catêjê cunea mã amji jarẽ
21 Mã Jeju te hipêr me cumã amji jarẽn to:
— He wa ha ma tẽ, ca ha ate me ipupunprãmte, tee ame ijapê, ne nee me ipupun nare. Ampo na? Jũ wỳr ca me anõ, por wa ha curi tẽ ata ri, ikôt acato. Na ca ha ita ri ame apa, ne ca ha atỳj me akên itajêa kam ame ty. Ampo na? He Pahpãm te nee me amã me akên itajê to impej ne to tojnõ nare ata kam, ca ha ame ty — hajỹr.
22 Mã Juta catêjê ajpẽn mã me harẽn to:
— Jũ kam mã quê ha ajte tẽ? Cu ha nee hipêr mehõmpun nare? Xà quê ha ajkĩ amji cura? — hane.
23 Mã Jeju me cumã:
— He me apê pjê kam me apa catêjê, ne quêt ipê kỳj pê, côjkwa kam Pahpãm na mehkwỳ, na ri nee ipê pjê kam me akwỳ nare. Ne ate amji kam me gapac xà itajê pê pjê te amji kam hapac xà, ne ite amji kamijapac xà pê ri kỳj pê, côjkwa kam, Pahpãm te amji kam hapac xà. 24 Ca ate nee ite me amã amji jarẽn xà ita to amji mã me hajỹr nare, cwỳrjapê wa ite me akên atajêa kam me atyc na me amã harẽn. Ca me ate, por Pahpãm teajpên ikujahêc ata to amji mã me hajỹr nare, ne amji mã me ito ahimpej nare na, ca haatỳj me atyc partu, ne nee hacpỹa mã me atĩr ne Inxũ cahê na me akrĩ nare — hajỹr.
25 Mã cute me Jeju cukij to:
— Ne mẽr me anõ mã ca? — hajỹr. Mã Jeju me cumãamji jarẽn to:
— He ipê, por pê wa mam ramã me amã amji jarẽ ata, nepa wa cormã. 26 Ne wa ha cormã, hipêr me amã me ate me akên ton itajê cunea jarẽ. Ne nee wa ahte cama me amãme akên xà itajê to icakôc to ipa nare. Ampo na? He wa, por Inxũ Cati pê cute amji jarkwa par catê, ne catyt kam ipa, ne ajpên cute ikujahêc atajarkwa to, wa pjê kam mehkrĩ atajê cunea mã icakôc to ipa. Ne wa ha itỳj jũ caxuw amjia kôt me amã me akên xà ton itajê cunea jarẽ — hane.
27 Pê nee cute me cumã côjkwa kam Hũm to ihcakôc xà ata na me hahkre pej, ne me kam hapac nare. 28 Cwỳrjapê pê Jeju me cumã amji jarẽn to:
— He ca ha jũ caxuw, ipê me Ahàkà te me hũmre na amji jahkre, mã cute pĩ na menxôr na me hõmpu, ne cormã me ijahkre pej pej. Na wa nee amjia kôt ampo itajê ton to ipa nare, ne Inxũ te ahna imã harkwa ne to imã hahkre atajê to pit mã ijàpên to ipa. 29 Ne ampo na ri ajpên cute ikujahêc ata nee amji pê irer nare, ne ihtỳj apuicahê na ipa? Wa cumã cute amji mã ampo na prãmti xàatajê to pit mã ijàpên to ipa na ri — hane.
30 Ne Jeju te ihcakôc xà to hajỹr jirô pê mã ri mehàhtôa te cupê Pahpãm kra na amji mã me toihhimpej kam mehtẽm.
Jeju pê me pahcunea pytàr catê
31 Mã Jeju te Juta catêjê kwỳ te amji mã me to ihhimpej kam mehtẽm atajê mã:
— Ca ha ate amji mã me ito ahimpej kam me to acrà na, caha me apê ikôt me apa catêjê impej pit. 32 Na ca ha me ite amji kam me ijapac xà impejti itajê cunea jahkre pej partu. Na ca ha nee me apê cama me jũm jarkwa kôt me cumã hàpêncatêjê atajê pyràc nare, ne atỳj quêt ameapa — hajỹr.
33 Mã me cumã:
— He me ipê Aprãw xwỳ tàmxwỳ tàmxwỳ, mã nee rỳ jũcaxuw jũm te amji mã me ito cama me harkwa kôt me cumã hàpên catêjê nare, ne wa itỳj ameipa, nõ na mã ca ajte jũmpê ate me ipytàr na amji jarẽ? — hane. 34 Mã Jeju me cumã:
— Jũ wỳr quê cama jũm pê me cumã hàpên catê ataapu hàpên to mõ, ne amjia kôt hicu. Quêha hõ pahhi cute hicu na cumã harkwa, quê ha cormã hicu. Ita jĩkjê na mã, me pahcurê xwỳn pê Xatanaj me ato hane, ne ihtỳj cormã me ato ihhimpej ita kam, ca nee me akên ton jicunare. Ne ampeaj kam wa me amã awjarẽ, wa nee ame amã ihêj xi jarẽn nare. 35 Ne ihnõ xwỳjê te hajỹar he. Quê ha nee cama me hõ pahhi jarkwa kôt me cumãhàpên catêjê nõ hõ pahhi jũrkwa kam ihkrĩ kam incrànare. Ampo na? Quê ha ramã hõ pahhi mã ihkĩn nare, quêha ihtỳj hũrkwa tête cator, ne jũ kam ihkujate. Ne quêtihkra ata quê nee amji tête cator nare, ne nee jũm mã ihpore na to hàhpan nare. Ampo na? Cupêihkra, na quê ha hũrkwa kam ihkrĩ rohnỳtti mã. 36 Ne ipêa ri Inxũ Cati kra. Nãmri wa ha itea me acurê xwỳn pê Xatanaj pê me apytàr na, ca ha atỳj cama ame apa rohnỳtti mã, quê ha nee iràn xà na hipêr jũm me ato ihhimpej nare.
Pahpãm pê me pajõ Inxũ Cati
37 — He ampeaj kam ri me apê me panquêt xwỳ Aprãw tàmxwỳ tàmxwỳ, wa ramã ite me gahkre pej. Nõ na mã ca ajte ame icuran prãm. Ne mẽr ampo na mã ca ame icuran prãm? Nee mã ampo na nare, ca ma ame ite me amã ampo to hahkre xà itajê caca, na ca ame icuran prãm. 38 Ne Inxũ te imã ampo jahkre, ne imã to hahkre xà atajêa na wa to icakôc to ipa. Ne me amã ajtea mã, me apãm pê Xatanaj ata ihkrĩ, ne me ato ihhimpej. Na ca ihkôat me amjikampa, ne atỳj me ampo kên ton to me apa — hane.
39 Mã me Jeju mã:
— He me ipãm pê Aprãw xwỳ — hane. Mã Jeju me cumã:
— Quê ha me apê Aprãw xwỳ kra na mã, ca ha cute amjikam hapac xàa to amji kam me gapac to me apa. Ne imãa, neeme apê ihkra nare. Ampo na? Ca nee me cute amji kam hapac xà to me amji kam gapac nare. 40 Na wa ite ampeaj kam me amã Inxũ te imã ampo to hahkre na harẽn. Atajê jarẽn cwỳrjapê mã, ca ame icuran prãm. He pê Aprãwxwỳ nee jũ caxuw jũm pejti curan prãm nare. 41 Ne ajteare mã, Inxũ Cati kaj na me apãm te me amã ampo ton to hahkre xà atajêa mã, ca me ton to me apa he — hane. Mã Juta catêjê Jeju mã:
— Ne nee me ipê jũm mã ajteare mã hũm ata nare. He Pahpãm ita pê ri me ipãm, wa me to amji mã me ijõ Pahpãm, ne me ipê mehkra impeaj wa me — hane.
42 Mã Jeju me cumã:
— Hamreare, me apê Pahpãm pê Inxũ Cati kra nare. Quê ha me apêPahpãm kra na mã, quê ha ihtỳj me amã ikĩn. Ampo na? He ihpĩan wa icator. Ne nee wa amjia kôt apu ipa nare, necute amji kam hapac xàa to wa apu ipa. Ne cutea ri ajpênikujahêc. 43 Ne ampo na mã ca nee me icakôc xà itajê impar jahkre pej nare? Nee mã ampo nanare. Ca nee caxwãm catia mã ito amji kam me gapac prãm nare. Cwỳrjapê ca ha nee me icakôc xà itajê impar jahkre pej nare. 44 Ne me apê Pahpãm curê xwỳn pê Xatanaj ata kra, na ca cumã ampo kĩnti itajê to pit mã me gàpên to me apa. Ne cute amji kam hapac xàato, ca me amji kam gapac to me apa he. Ne pjê te amji ton pê mã, pê ramã me apãm ita mehcuran kam tẽ. Ne nee cupê catyt kam, ampeaj kam ampo to ihcakôc catê nare, ne amji cãmtàa rũm ri cupêampo cunea to ihhêj xi to ihcakôc to ipa catê. Ne cupê ampo cunea hêj xi pãm, na ri ampo hêj xi xà to pit mã ihcakôc to ipa. Ne rỳ jũ caxuw ampeaj kam ampo to ihcakôc nare. Ne ramã cute me acaxuwincaca xà ita ton to amji pyràc tu. 45 Ne wa quêt catyt kam, ampeaj kam ampo hêj xi xà nare to ijũjarẽn to ipa, ca ampo ita naajte ma ame ipar caca. Ampo na? Ca nee caxwãm catia mã itoamji mã me ahimpej, ne me ipar nare to prãm to mã caame hane. 46 Ne gapacta ne ite ampo to kên japê ameamji cukij, ca ha nee me anõ amji mã ite ampo to kên xà nõ na ijarẽn nare. Ampo na? He wa rỳ jũ caxuw ite ampo kên ton nare. Na wa hãn ne catyt kam ampo atajê jarẽ, ca ma ajte ame ipar caca. Ne mẽr ampo na mã ca ajte nee amji mã ito me ahimpej nare? 47 Ne me cupê Pahpãm kra catêjê ihtỳj amji mã meharkwa cunea na me kampa, ne mempar to kênre nare. Ne me ca nare, nee me apê ihkra nare, na ca ma amempar caca — hane.
Pê Jeju Aprãw xwỳ pupu
48 Mã me Jeju mã:
— Nee mã apê Juta catêjê kra impeaj nare, ne me ikĩnteapê Krĩrĩtpej jõ pjê catêjê nõ, ne ihpĩan pê ca acato, ne akam ampo carõ kên te hipu tu — hane.
49 Mã Jeju me cumã:
— Hamreare, ikam quêt ampo carõ kên hamreare, na waquêt amji mã, por Inxũ te ajpên ikujahêc ata pit cupahtito ipa, ne ma haprỳ to cati to ipa. Ne me ca nare, ca ajte nee amji mã me icupa nare, ne cama me ito icrire to prãm. 50 He wa nee cute amji mã me icupa to prãm to icator nare cakrô, quê ha ihtỳj Inxũ Cati ata, por nee amji mã me icupanare itajê cukij, ne mehkên mã me cumẽ. 51 Ne ampeaj kam wa ha me amã awjarẽ. Por quê ha meijarkwa kampa, ne amji mã me icupahti to me ipa atajê, quê ha jũ caxuw amehtyc nare, ne mehtĩr ita na ame iparohnỳtti mã, Pahpãm cahê na — hane.
52 Mã me cumã:
— Hamre, ita caxuw wa ite me akam ampo carõ kên na megahkre pej pejtu. Ne pê ramã Aprãw xwỳ me, por me cupêPahpãm jarkwa to mehcakôc catêjê catia atajê mehtycpartu. Nõ na mã ca ajte amji jarẽn to: “Quê ha jũm amji mã ikampa, ne cute ijarkwa kôt ipa na, quê ha nee jũ caxuw ihtyc nare” hane? 53 Pom me ipãmjê pê Aprãw me, cute Pahpãm jarkwa tomehcakôc catêjê atajê ihtỳj ramã amehtyc par ita? He xà ajkĩ me hirôa pê acati? Jũ mã mã ca apu amji to, amji kam gapac xà itajê to? Mõrmõ ca atỳj apu amji catia na amji cãmjĩ? — hajỹr.
54 Mã Jeju me cumã:
— He wa ha ipyxit peaj ne amji mã ipejti to icakôc to ipa na mã, quêha icakôc xà atajê kôt hamreare ne. Ne pom ca Inxũ toamji mã me Apãm ata ri ihtỳj ijaprỳ to cati to mõ. 55 Ne ikĩnte me apê Pahpãm jahkre kêatre, ne imãa riquêt hahkre pej. Wa ha ipê hahkre kêatre na amji jarẽ namã, wa ha ipê me apyràac ne ampeaj kam ihêj xi. Ne neeite hajỹr nare, ne itỳj quêt imã hahkre pej, na wa amji mã harkwa na kampa, ne amji mã hũpahti to ipa. 56 Ne me aquêt xwỳ pê Aprãw ata pê ramãicator xà ata na ipupu ne ijahkre pej, cwỳrjapê pê ampeaj kam hũrên hakry — hane.
57 Mã me Jeju mã:
— Pỳhàpà? Xà pê ca atỳj ajte Aprãw xwỳ pupu? Pomnee cormã ana caku te xĩncwẽnta nare ita? Ne cormã atuwre, nõ na mã ca ajte ate Aprãw xwỳ pupun na amjijarẽ? — hane.
58 Mã Jeju me cumã:
— He wa ha ampeaj kam me amã amji jarẽ. Pê wa ramãAprãw pỳm xwỳjrea na apu ipa, ne cormã apu ipa rohnỳtti mã — hane. 59 Mã Juta catêjê te mempar, ne caxuw kẽn to me amjitỳj, cute me to kam hũcapêr, ne to mehcuran prãmte. Ampo na? Cupê Pahpãm pyràac ne rỳ pêa mã mam ipa rohnỳttimã na cute amji jarẽn, na ri kẽn to amehcuran prãm. Mã me cupê Jejupimxur ne ma Pahpãm jũrkwa pê cator ne tẽ.