19
Pahpãm te ampo cunea ton atajê me pamã catihti na harẽn na me pancrer
1 Ỹhỹ me ikwỳ,
wa ha me amã ite Pahpãm to amji kam ijapac xà na harẽ.
Cu me côjkwa pupu ita,
ihtỳj hirã pê me pamã Pahpãm catia to cati naharẽ.
Ne Pahpãam te ri kam caxêre me, kam ampo itajê cunea ton.
2 Ne cu hãn ne amcro cunea kam,
me pyt japôj xà na me hõmpu, ne amji mã me harẽn to:
“Ampeaj kam ri Pahpãm mã ihtỳj ampo cunea ton xà” hane.
Ne hanea ne cu caxwari côjkwa kam me caxêre me, putwrỳ pupu,
ne hacpỹ ma mã me amji mã:
“Nee Pahpãm mã ampo pyxit ne hahkre pej nare,
ne cumã ampo cunea ton jahkre pej” hane.
3 He nee côjkwa kam ampo ihkrĩ itajê me pamã harkwa to ihcakôc nare,
cakrô cu me rĩt ne me hõmpu atajê kôat,
ramã me pamã Pahpãm catia to cati na hahkre pej.
4 Ne côjkwa kam ampo pejti catihti itajê te amcro me caxwa cunea kam,
ramã pjê cunea kam Pahpãm catia to cati na harẽn cràn.
Ne nee jũ ri me cupê ita jahkre kêatre nare,
ne mehcunea te me hahkre pej xà.
Ne Pahpãm te côjkwa kam pyt mã ihkrĩ xà ton, mã kaam ihkrĩ.
5 Ne pom cu me pajikwa tuw xà wỳr,
me pamã amji kĩan kam me pahprõ wỳrme pra ita na ri cute,
ne amcro cunea kam, ihkrĩ xà pê hapôj,
ne cumãamji kĩan kam catyatre na ma hàpir to impraar to pra.
6 Ne me pahnõ imprar tỳjti,
mã ihcuhhê pê cumã ipicahur prãmti, jĩkjê na mã,
hãn ne pyt hapôj pê ma cumã côjkwa cahpêrkàr toprãam kam,
ihtỳj catyatre na ihcahpêrkà.
Ne jũ wỳr quê jũm apu amji mã hamã,
ne cacro pê amji to amxu, quê nee cacro nare.
7 Ỹhỹ me ikwỳ, pom wa ite me amã harẽn ita jĩkjê na,
cu nee me pahnõ amji mã hamã, ne Pahpãm pê me papimxur nare.
Cwỳrjapê cu ha pahtỳj mepajõ Pahhiti jarkwa pejti,
kam ampo kên nare ata kam,
me pajapac na me amji to prãm.
Ne cute me pajapackre xà ata, ihtỳj me pamã me pahcarôt to intuw.
Ne quê ha me pahnõ pê hahkre kêatre,
quê ha me pajõ Pahhiti te ampeaj kam
me pamã harkwa jirên atajê pictor,
ne ihkôt hamre xà nare atajêa to cumãhahkre,
quê ha hahkre pej,
na cu ha pahtỳj amji mã me to pahhimpej.
8 Ne me pajõ Pahhiti te me pamã ampo to hahkre xà ata ri
quêt catyt kam ihcuhtacti.
Ne pahte me kam pajapac catêjê ri,
ampeaj kam me pajakry.
Ne cute me pajapackre xà kam ampo kên nare itajê,
ihtỳj pahte ampo cunea jahkre pejna me pahto,
cu me hahkre pej.
9 Cu ha pahte amji mã Pahhiti cupahti to me papa na,
cu ha kam me pajapac to me papa rohnỳtti mã.
Ne me pajõ Pahhiti ita pê ihhêj xi jahkre kêatre,
ne cumã ampo cunea jahkre pej.
Cwỳrjapê quê ha mehcukij xà jõ amcro kam,
cute jũm pejti na harẽn to:
“Ampeaj kam jũm ita pej” hane.
Ne hanea ne jũm krã kên ata jarẽn to:
“Jũm ita krã kêanre” hane.
10 Ne cu wakỳre prà tepti pê ôr na hĩ jàhwỳrti ata jirôa pê
me Pahpãm jarkwa na prãm.
Ne pen cacô jirôa pê ri Pahpãm jarkwa me pahcajpuaw.
11 Ỹhỹ côjkwa kam ijõ Pahhiti pê Pahpãm.
Ate ijapackre xà itajê teipê ampo kên cunea cawpa,
ne ikên mã ixàr cupate, cute intête ito hũjawry tu.
Ne wa itỳj amji mã acupahti to ipa, ca cormã ita jipy,
hahpan xà na ito impej. 12 Ne wa hãn ne me to ihcupan xà na
me amji jahkre pej nare kam,
me to ihcupa,
ne hãn ne imã garkwa itajê jahkrepej nare kam,
hirô pê me ipỳpỳm to ipa atato tojnõ,
ne nee ca hahpan xà na ito kên nare.
13 Ne hanea ne ite garkwa jirô pê ipỳpỳm,
ne garkwa kaj na ampo kên tonprãmti ata na ijamãr,
wa ton nare.
Ne intête ipê amtà,
mãr quê nee ampo kên itajê ito ihhimpej nare.
Ca ha ito hane, wa ha itỳj amã ipej,
nenee ampo kên pyxitre nõ ton nare,
ca ha ina amji capa.
14 Ijõ Pahhiti, apê ikên pê itête gàmtàr catê,
na ca atỳj ikên xà cunea pê ipytà.
Imã icakôc xà me,
ite amji kam ijapac xà cunea teacajpuaw na to prãm.