37
Mehkrã kên mehkên mã me acjêj, ne mehkrã pej mempej mã me acjêj na mencrer
1 Ỹhỹ me ikwỳ,
nee ca mehkrã kên catêjê jũ na ame akrihkrit to me apa nare.
Ne nee ame hũ na cute mehkên ton atajê kĩn nare.
2 Ampo na? He me cupê ahtu te êê ne apu incrà pyràac,
quê ha me ahna ahtũm nare quê ha me hamre.
He ampeaj kam ri me cupê põre pit,
na quê haihtỳj me hamre tu.
3 Ca ha côjkwa kam me Pahhiti pê Pahpãm to amji mã me ahimpej,
ne me ampo pej pit ton to me apa.
Mã cute me amã pjê jõr, ca kam me akrĩ,
mãkam me atête ampo kên pê amtà.
Ne ca ha hàmtàr xà ata kĩan kam, kam me akrĩ.
4 Ca ha Pahhiti cukwa kam,
me amã amji kĩnti kam me apa na,
quê ha ihtỳj me amã,
ate amji mã me ampo na prãmti xà atajê cunea gõ.
5 Ne ca ha Pahhiti mã me ate amji kam me gapac xà cunea gõ,
mãr quê taa, ate amji kam me gapac xà to ihhimpej.
Ne ca ha ate amji mã me toahimpej to me apa na,
quê ha me ato impejti to hane he.
6 Pom quê pyt hapôj mã mehcunea me hàhcujro pupu,
ita jĩkjê na,
quê ha Pahhiti mehcunea te me apupun na me to,
mãr quê cutea me ana amji caxàr na me gahkre pej.
Ne me pahkrã jimoc kam pyt ihkrĩ, mã me ihprà pupu,
ita jĩkjê na,
quê ha Pahhiti ihtỳj mehcunea te catyt kam me apa na,
cute megahkre pej na me to,
quê ha me gahkre pej.
7 Na ca ha aracri, amji mã me aprĩa kam,
me Pahhiti te me atehcajpar xà na me hikaj.
Ne quê mehkrã kên catêjê
hãn ne me ampo kên ton to me ipa xà ata kôt,
amji to me cati to me ipa,
ca ha nee me hũ na ame akrihkrit to me apa nare.
8 Ne nee ca ame kam acryc, ne me kam acàcàc nare.
Ne nee ame hũ na ame akrihkrit nare.
Ampo na?
Ca ha ate, cute me ampo kên ton ata kam akrihkrit na,
quê ha ihtỳj ate ampo kên ton wỳr ato mõ.
9 Ne quê ha Pahhiti mehkrã kên atajê
mõr pejti kam, me to hamre hiahpuro.
Ne por ca quêt
me Pahhiti te mehkên mã me hàr xà pê
me hũtàr xà na me hikaj atajê,
quê ha ihtỳj cute pjê to me cumã hũjahkre ata kam
me amji to ajpa.
10 Ne quê ha mehkrã kên atajê na ahtũm nare,
quê ha me hamre partu.
Ca ha tee ame hapê, ne nee hipêr me jũm mã acator nare.
11 Ne quêt cute amji to mehkryjre prãm atajê,
quê ha ihtỳj cute pjê to me cumã hũjahkre ata kam me amji to ajpa.
Ne curia, quê ha mehcarĩcti kam,
nee amji mã me ampo kên cupa nare kam me ipa.
12 Ne mehkrã kên catêjê tee cute catyt kam me ipa itajê to kên prãmte,
ahna ame ajpẽn kampa.
Ne ihtỳj me kam incryac kam ame wa gyj to me ipa.
13 Ne Pahhiti mã ramã mehkrã kêanre atajê jamre xà jõ amcro jahkre pej,
na ri cama ame ahna acxa.
14 Ne ramã mehkrã kên catêjê te me hõ wapo xwahhihti tohpôj,
neramã me hõ cuhê na cute ame amji cohe,
cute me cupê hamreare atajê me,
catyt kam me ipa atajê jipej prãmte.
15 Cakrô, quê ha nee me to hajỹr nare.
He quê ha me hõ wapo xwahhihti atajêa
me ahna cuhkõnre japôc, ne me hõ cuhê itajê,
quê ha hanea ne me cupê impàt pa.
16 Pahpãm mãa, catyt kam me ipa itajê pê ampo crêre atajê ri,
mehkrã kên mã ampo jàhtôti itajê jirôa pê impej.
17 Ampo na?
He quê ha Pahhiti mehkrã kêanre atajê pê me carôt to hamre,
ne quêt catyt kam me ipa atajê,
quê ha mehtehcajpar to impeaj ne.
18 Quê ha Pahhiti amcro cunea kam,
catyt kam me ipa atajê jamãr to ipa,
quê ha ihtỳj cute me cumã pjê jõr xà ata kam,
amji to me ipijapar to me ipa rohnỳtti mã.
19 Ne quê ha me hỹrmã ampo kên catia te cator xà ata kam,
quê ha nee me to hamre nare.
Ne quê ha me hỹrmã prãm catia cato,
quê ha ihtỳj me cumã hõ.
20 Ne mehkrã kêanre catêjê,
quê ha me acto tu.
Ne Pahhiti curê xwỳn atajê,
quê ha me cupê põ kam pĩrã pejti atajê pyràac,
ne êê ne me hamre.
Ne me cupê cuhy kũm te apu hamre pyràac,
ne ma jũ kam me acto.
21 Ne mehkrã kên catêjê hãn ne mehkwỳ pê ampo cwa,
ne nee hacpỹ mã me hõr na me amji to hũjahkre ata na,
me amji jarkwa par nare.
Ne quêt catyt kam me ipa catêjê ri me hàhcajrẽan kam,
ampo to mehkwỳ tehcajpar to me ipa.
22 Pahhiti te mehkrã kam harcô mẽn atajê,
quê ha pjê to cute me cumã hũjahkre ata kam
me amji to ipijapar rohnỳtti mã,
ne mehkĩnte,
cute mencrôn atajê, quê ha me mõr pejti kam me to hamre.
23 Ne quê ha Pahhiti pry kam jũm mẽ ata,
quê ha catyt kam pry ata kôt ipa,
quê ha jũm ata mã cute amji kam hapac xà kĩn hyre nare.
24 Ne Pahhiti me hũhkra na cucwa ita kam, quê ha me ajhu,
ne nee me ipihur tu nare.
25 Pê wa icuprỳ pê mã,
Pahhiti te jũmjê pejti te catyt kam me ipa atajê mã hikran na
me hõmpun nare,
ne ahnaa ramã iwej.
Ne nee hanea ne,
rỳ ite mehkra nõ te apu hõ na hàhwỳr to mõr na hõmpun nare.
26 Ne ihtỳj cumã ampo,
mã hàhcajrẽnti kam to mehkwỳ tehcajpar to ipa.
Ne quê ha Pahhiti ihtỳj mehkra itajê to impej,
ne ma me hamã.
27 Ne ca ha ate ampo kên ton to apa ata pê amji to awpjê,
ne quêt ate ampo pej pit ton to apa xà ata kam,
quê ha Pahhiti ihtỳj gõ pjê kam me akrĩ rohnỳtti mã na me ato,
ne ampo kên cunea pê atête hàmtàr to ipa.
28 Ampo na?
He Pahhiti mã catyt kam, cute mehkwỳ to impejti atajê kĩn,
mã me to impejti to ipa.
Na quê ha nee cute amji mã me to hajỹr to ipacatêjê mã hikran nare,
ne ma mentête ampo kên pê hàmtàr to ipa rohnỳtti mã.
Ne quê ha mehkĩnte
mehkrã kên tàmxwỳ atajê me mõr pejti kam,
mehcunea me hamre.
29 Ne catyt kam me ipa atajê,
quê ha Pahhiti te me cumã pjê to hũjahkre ata mã me axà,
ne kam mehkrĩ rohnỳtti mã.
30-31 Ne catyt kam me ipa catêjê kam ri,
ihtỳj hõ Pahpãm te amji kam hapac xà,
na quê ha nee catyt kam ipa xà ita to ihcupan nare.
Ne ihtỳjmehcakôc xà te amji jahkre pejti to mehcakôc to me ipa,
ne cute me hapackre xà atajê, quê ha mehcajpuaw.
32 Ne mehkrã kêanre atajê ri,
ihtỳj pry cahtiri,
catyt kam me ipa atajê jikaj, cute me hipej prãmte.
33 Cakrô, quê ha nee Pahhiti mehkrã kên jũhkra mã,
catyt kam me ipa atajê incjêj na me hamãr nare.
Quê ha ma cute mehcukij catêjê wỳr me to axà,
quê ha Pahhiti, cute mehkên mã me mẽn xà ata na
nee me hamãrnare,
ne taa mentête amtà.
34 Ca ha atỳj me Pahhiti jikaj,
ne cute amji kam hapac xàa kôt me apa.
Quê ha ihtỳj jũ caxuw ato acati,
ne cute amã pjê to hũjahkre ata, quê ha ihtỳj amã cugõ,
ca ha to gõ tekjê.
Ne quê ha akam mare mã, mehkrã kênmõr pejti kam me hipej.
35 He pê wa ramã ito jĩa to, cute ita ton na hõmpu.
Pê hũmre nõ ata ihkrã kêanre,
ne hàprêa kam ajco mehkwỳ to kên to ipa.
Ne cute me to kên to ipa xà ata kôt,
cute amji to cati to hajỹar,
pom quê pjê impejti kam pĩ ihkà to ipa,
ne catia to cati he.
36 Cakrô, mã ahna ahtũm nare, mã hamre,
ata jĩkjê na ri cute hajỹr.
Wa tee apu hũmre ita krĩxà japê,
mã ramã hamre, wa nee ite hipêr hõmpun nare.
37 Ne ca ha catyt kam me ipa catêjê me, mempejti,
ne nee ame ipijapu to ipa nare atajê kôpĩr to me apa.
Quê ha ihtỳj cumã mehtàmxwỳ hàhtôa.
38 Ne mehkĩnte, cute mehkên ton to me ipa catêjê atajê,
quê ha ihtỳj me to hamre.
Quê ha mehkĩnte nee me cumã mehtàmxwỳ nare.
39 Ne quê ha ihtỳj Pahhiti,
ampo kên pê catyt kam me ipa catêjê pytà,
ne ampo kên te me hỹrmã hapôj xà atajê kam,
quê ha cupê ikre tỳjti ata pyràac, ne ihtỳj mentête amtà.
40 Ne ma Pahhiti te mentête hàmtàr xà ata wỳr me pra,
quê ha taa mehtehcajpa,
ne mehkrã kêanre atajê pê me hũtà, ne mentête amtà.