1 Ỹhỹ, ijõ Pahhiti pê Inxũ Cati,

me icurê xwỳn itajê kêanre, ne ampeaj kam mehhêj xi,

ne nee me ato amji japackre prãm nare.

Ne cute me ijarẽn to kêanre atajê pê ipytà.

Ne me cumã ijarẽn to:

“Imãa cupê jũm pejti ata” hane.

2 He pom apê ampo kên pê ipytàr catê ita?

Nõ na mã ihhêj ne ate imã hikran.

Mã me icurê xwỳn imã amji kĩn nare na me ito,

wa imã amji kĩn nare kam ipa,

ca ihhêj ne nee ita na ito amji japackre nare.

3 Pom hãn ne hàhcujro xà,

awcapàtkô kam jũm pictor ata tehcajpa

mã hacpỹa mã pry kam ajhu,

ita kôpit na, ca ha iwỳr garkwa te ijapackre xà nõ hêj xi nare,

pê ihhêj rũm gàhcujro xà nõ ata kujate,

mãr quê hacpỹa mã awỳr ito amji jaxà.

Ne ate ijapackre xà ita kôt,

wa ha hacpỹa ne Xijãw jõ hàpkàjti na

ite atoamji japackre xà jũrkwa kam akrĩ xà ata wỳr amji jaxà.

4 Ne ate imã amji kĩnti wỳr

ito amji jaxàr xà ata pyrên ijakryti,

ne hahpan xà na wa itỳj amã ampo gõ.

Ne amã ijàkôr xà cakô, ne amã icrer to:

“Apê imã amji kĩnti jõr catê xakat” hane.

5 Ne mẽr ampo na mã wa imã amji kĩn nare

ne ikrihkrit ita na ipa?

Xà quê ha ajkĩ Inxũ Catihti ita hipêr itehcajpar nare?

Hãpà! Quê ha ihtỳj hacpỹa mã itehcajpa ne imã amji kĩnti na ito.

Cwỳrjapê wa ha hacpỹa mã Inxũ Cati to amji mã ihhimpej,

ne to amji japackre, ne to cati prãmte wa hacumã:

“Apeaj to apej.

Ne apê Inxũ Cati pê Pahpãm pê ikên pê ipytàr catê rohnỳtti mã” hane.