5
Ihkàhhôc na hê xà te xet atajê
1 Wa ite Pahhiti krĩ xà kam jũm jỹ ata jũhkra kam, awpôc rũm, ihkàhhôc krãre ata pupun. Mã ihkàhhôc ata kam ihhôc te hũjê, caquẽc kam ihhôc, ne hanea ne hõkwa kam ihhôc. Mã ahna hê xà te xet atajê te ahna hê. 2 Ne hanea ne ite Pahpãm mã memprar catê nõ tỳjti ata pupun, mã ihkrãhhia kam cute hàhcukjêr to:
— Jũm ri ihkàhhôc ita tête ahna hê xà itajê jirên xà caxuw impej, quê hihê mẽ? — hajỹr.
3 Mã nee côjkwa kam ihkàhhôc ata caxuw jũm hamreare, ne nee pjê kam caxuw jũm hamreare, ne hanea ne nee pjê krac ri caxuw jũm hamreare, cute ihkàhhôc atatête ahna hê xà na ihtô xà itajê jirên, ne caxwãm pê hõmpun xà caxuw. 4 Pê wa ajco amrãa to amrã. Ampo na? Pê nee ihkàhhôc na hê xà jirênxà ata caxuw jũm impej nare, cute ahna hê xà atajê jirên, ne caxwãm pê irĩt ne cute hõmpun xà caxuw. 5 Mã pahhi na mehkwỳ nõ ata te imã:
— Apu acwỳr nare, hõmpu he, Juta na mehkwỳ jõ Pahhiti pê rop cahàcti jõkre hôhti pyràcti ita ri me hirôa pê carôt tỳj. Ne cupê pahhi Tawi xwỳ tàmxwỳtàmxwỳ, Juta tàmxwỳ, ne taa mã quê ha ihtỳj ihkàhhôc na ihtô xà te xetitajê jirên pa, ne capô ne hõmpu — hajỹr.
Jeju pê carà cahàcre kra nõ pyràc, mã jũm jaxà kam cute mehcuran xà
6 Wa pea ite carà cahàcre hôhti kra xũmre nõ pupun, mã Pahhiti krĩ xà cuna mã xa. Mã cute me cwat atajê me, pahhi catêjê atajê te mehkrã. He pê ihhêj ne jũm carà cahàcre kra xũmre ata cura, mã hacpỹa mãihtĩr ne xa ata pê me pajõ Pahhiti pê Jeju. Ne kam hĩpàr te xet, ne kam into te xet. Ne cukrã xà te xet atajêpê Pahpãm Carõ Pejti caca xà te xet atajê, mã pjê wỳr hãn ne mehkujate, atajêa ri. 7 Mã pea Caràcahàcre Kra ita mõ, ne cute, por Pahhiti hỹr xà kam jỹata pê awpôc rũm hũhkra kam ihkàhhôc ata caxàr. 8 Mã pea, pom cute me cwat itajê me, pahhite winticwat atajê me, cuna mãmehkõn krã na mehpỳm. Ne pê ahpỹanre name cumã me hàkôr xà. Ne ahpỹanrena me cumã ampo kũm cuxwati atajê te wakỳre pràti atajê to hipu partu atajê pê Pahpãm na mehkwỳ te me to cumã mehcakôc xà pyràc.
Ihkàhhôc jihê mẽn xà caxuw Jeju pej
9 Pê ajco mencrer tuw to mencrer to me hane he:
“Ate ihkàhhôc ita pyr ne hihê mẽn xà caxuw ampeaj kam apej!
Ampo na?
Pê ca ty, ne acaprô jaxwỳ.
Ne acaprô jaxwỳr ata to Pahpãm mã pjê kamkrĩxàre cunea pê mehkwỳ japrô,
ampo kra me, me harkwa pihho to mehcakôc catêjême,
pjê cunea kam atajê cunea pê ca me haprô.
10 Ne amji mã mehcunea to amã me hàpên catêjê.
Ne me taa mã quê ha mehkwỳ to me amã mehcakôc,
ne me taa pjê cunea to mehhimpej” hane.
Pjê me côjkwa kam mehcunea ame Jeju catia to me cumã ihcakôc
11 Wa hipêr irĩt ne ite Pahpãm mã memprar catêjê jàhtôa to hàhtô ne me hõmpun, ne me hàhtôti atajê pê jũm te me cahyt par xà nare. Mãcute Pahhiti krĩ xà me, cute me cwat itajê me, me pahhi itajê krã tu ne me to xa, ne kỳj cati pêa mã cute me cumã harẽn to:
12 “Apê Caràcahàcre Kra pê Jeju.
Pê ca amji to me ikritxwỳ, pê ca ijaxà kam ty ne apeaj to apej.
Ne me hirôa pê atỳj, ne me hirôa pê gakràj, ne me hirôa pê ate amji jahkre pej, ne me hirôa pê ahihtỳj!
Mã pjê cunea kam amji mã me acupa, ne mehcunea mã apejti na gahkre pej, ne me imã mehcunea te acatihti me apejti name garẽn na me to prãm!” hajỹr.
13 Ne pea ite ampo pryre cunea increr na kam ijapac. Côjkwa kam cuwênti me, pjê kam pryre me, pjê krac ri pryre itajê me, côxwakam tep me, pjê cunea kam, pryre cunea increr na kam ijapac. Mã cute mencrer to hajỹr he:
“Por ca ajỹr xà kam jỹ ata me,
Caràcahàcre Kra ata me,
wa acatihtiimpejti na me garẽn to prãm.
Mã pjê cunea kam amji mã me acupa,
ne mehcunea mã apejti na me gahkre pej,
ne mehcunea jirôa pê me acarôt tỳj rohnỳtti mã” hajỹr.
14 Mã cute me cwat itajê me kampa ne me cumã:
— Ỹhỹ, ampeaj kam! — hane. Mã pahhi atajê mehkõn krã na mehpỳpỳm, ne catihti impejti na me harẽ.