1 ఈనె అమె సహించినారీనన్నా ఏతెస్సు పట్నంరె అమె జొన్నె ఈనెను తమ్మాసి బులి నిచ్చయించిగీకిరి, 2 యే హింసానే మూలముగా తొం బిత్తరె కేసె కూడ విస్వాసం విసయమురె తొమె పొచ్చుకు నాబాజీకుంటా ఆదరించితె, బలపరిచితె క్రీస్తు సువార్తరే పురువురొ సేవకుడు అం సంగరె పైటికొర్లా అన్నబయి యీలా తిమోతికు తొం పక్కు పొడిదీంచొ. 3 ఈనె ఏ సోదనానె అయిలాబెల్లె పొచ్చుకు నాబాజీకుంటా తైతే, యే కొస్టొనె అనుబవించిమంచి బులి పురువాకా నియమించిసి బులి తొమె తెలిసిగీండి. 4 అమె తొం పక్కరె తల్లాబెల్లె “అమె స్రమానె పొడిమాసి బులి” అగరాక తొం సంగరె కొయించొ నీనా! తొముకు తెలిసిలా పనాక ఉంచినె సాకిరాక జరిగిసి. 5 సడకాక మియ్యి ఇంక తన్నారికిరి, సోదకుడు తొముకు సోదించుసి కీవోబులి, అం ప్రయాస వ్యర్దమైజెవ్వొకీవో బులికిరి, తొం విస్వాసముకు క్యాకిరచ్చొ తెలిసిగిమ్మాసిబులి తిమోతికు పొడిదీంచి.

6 తిమోతి ఉంచినె తొం పక్కరతీకిరి అం పక్కు అయికిరి, తొం విస్వాస ప్రేమ గురించి అముకు కొయిసి. అమె తొముకు దిగిమాసిబులి ఆస పొడిలా పనాక తొమ్మంకా అముకు దిగిమాసిబులి ఆస పొడిలీసొ బులి, అముకు ప్రేమ సంగరె కెబ్బుకూ జ్ఞాపకం కొరిగిల్లీసొ బులి తొం గురించి సంతోసమైలా కబురు అముకు దన్నైసి. 7 సడవల్లరె అన్నబయినె అప్పబొయినీనె, అం యిబ్బంది సొబ్బిటిరె కొస్టొనె సొబ్బిటిరె తొం విస్వాసముకు దిక్కిరి తొం విసయమురె ఆదరన పొందించొ. 8 కైంకిబుల్నే, తొమె ప్రబువుబిత్తరె స్తిరముగా టారీకిరి తన్నే అమంకా సంతోసంగా జీకిరితల్లాపనాక.

9 పురువు అగరె తొం వల్లరె అమె కడిగిల్లాంచ యావత్తు ఆనందము సంగరె పురువుకు తగిలపనికిరి క్రుతజ్ఞతాస్తుతులు క్యాకిరి కొయిపారొ 10 అమె తొం మో దిక్కిరి తొం విస్వాసంరె రొల్లా లోపముకు తీర్చిలాపనికిరి అనుగ్రహించుబులి రత్తి, దూసు నాచడదిన్నూ పురువుకు మనుసుపూర్తిగా పొచ్చర్లించొ.

11 అం బో యీలా పురువొకు అం ప్రబువైల యేసుకు అముకు నిరాటంకముగా తొంపక్కు కొడిగీకిరి ఆసి.

12 తా పరిసుద్దులు సొబ్బిలింకె సంగరె మిసికిరి అయిలబెల్లె అం బో యీలా పురువు అగరె తొం హ్రుదయనె పరిసుద్దత విసయంరే నిందనీలపనికిరి రొల్లాపని ప్రబువు స్దిరపరచుసి.

13 సాకిరాక అం ప్రబువైలా యేసు తా పరిసుద్దులు సొబ్బిలింకు సంగరె అయిలాబెల్లె అం బో యీలా పురువు అగరె తొం మనుసూనెకు పరిసుద్దముగాను కెటువంటి నింద నీలాపనికిరి సెయ్యె తొముకు స్తిరపర్చుసి.