1 Toranoo susue kara emin! Tepoꞌ fo au nai naa, emi sama leoꞌ lahenda fo bei ta nabua-naesa natalolole noo Manetualain Dula-dale Na. Nana huu emi tuka noi hihii-nanau mesa mara, sama leoꞌ lahenda biasa. Huu ria na, de au ta bisa dedea oo emi, sama leoꞌ lahenda lasiꞌ, huu fo emi leoꞌ ana aanaꞌ. 2 Au muste anori-afada emi laꞌeneuꞌ hihii-nanauꞌ kafaꞌ, huu fo emi bei ta sadia sipoꞌ hihii-nanau beraꞌ, sama leoꞌ ana aanaꞌ de bei ta naa paaꞌ. Sekona te, emi muste dadi bara-aiꞌ, sama leoꞌ lahenda bauinaꞌ fo biasa naa paaꞌ. Tehuu besaꞌ ia emi bei sama leoꞌ ana boki beuꞌ fo ninu noi sosoeꞌ.✡Ibrani 5:12-13 3 Huu fo emi bei duꞌa-afi sama leoꞌ lahenda fo tuka noi sira hihii-nanau mesan. Maneniko lahenda bea lena neme emi mai, sona emi mamanasaꞌ, ma mareresiꞌ ii-onaꞌ! Huu ria na, de au ae emi tuka noi hihii-nanau mesa mara. No ria na, emi sama leoꞌ lahenda biasa nai dae-bafoꞌ ia. 4 Huu fo emi ruma mae, emi nana Paulus lahendan! Ma ruma mae, emi nana Apolos lahendan! Kalu emi dedea leo naꞌ, sona matudu mae emi sama leoꞌ lahenda fo ta malelaꞌ Kristus.✡1 Korintus 1:12

5 Sekona te, Apolos nana, bea? Paulus nana, bea? Huu fo ami dua nana, noi lahenda nadedenuꞌ. Ami riꞌ matudu enoꞌ fo emi bisa mamahere Kristus. Apolos nalalaꞌo nonoi lakaꞌ tuka Ramatuaꞌ a pareta Na. Ma au boe leo naꞌ! 6 Au riꞌ afada masososa emi laꞌeneuꞌ Kristus. Ria sama leoꞌ au sele-tande bini-kee. Boe ma Apolos mai nanori-nafada emi. Ria sama leoꞌ ria riꞌ tetee-totoli bini-kee fo au sele a. Tehuu Manetualain riꞌ namomori-nadadadiꞌ bini-kee ria de nambau-ina.✡Lahenda Nadedenuꞌ ara Tutuin 18:4-11, 24-28

7 De, neuꞌ lahenda manasele-manatande ma manatetee-manatotoli bini-kee, sosoa-raraa taaꞌ. Noi Manetualain riꞌ penting. Huu fo Ria riꞌ namomori-nadadadiꞌ bini-kee ria. 8 Lahenda manasele-manatande, ma lahenda manatetee-manatotoli ra roi-tao reuꞌ esa. Ma basa lahenda fo ralalaꞌo Manetualain nonoi-tataon, neuꞌ ko Ana balas sira sosotan. 9a Huu fo ami sama-sama dadi meuꞌ Manetualain lahenda mananoin. Ma emi dadi sama leoꞌ Manetualain oka-tinen fo riꞌ Ana nau noi-taon.

9b Leoꞌ na boe, emi sama leoꞌ uma fo riꞌ Manetualain nau nafoan. 10 Manetualain natudu dale malole Na neuꞌ au so. Huu ria na, au sama leoꞌ malaka tukan. Boe ma Manetualain tulu-fali au de neme masososa na mai, au anori-afada emi basa hihii-nanau huu-pedaꞌ, fo afoa fanderen tea-mepeꞌ nai emi masoda ma. Ma lahenda fekeꞌ boe ranori-rafada emi, ela ara rafoa neuꞌ fanderen fo au tao a. Tehuu tukan ara sira esa-esa muste tao ratalolole fo rafoa no matetuꞌ. 11 Hapu fanderen tea-mepeꞌ so. Riꞌ Yesus Kristus. De, ta hapu lahenda bisa nafoa fanderen fekeꞌ nai emi dale mara, huu fo Manetualain peda-fua fanderen matetuꞌ a so.

12 Tantu lahenda nau nafoa neuꞌ fanderen ria pake hata rupaꞌ ara. Ruma nau pake hata mabeli, leo-leoꞌ lilopilas, lilofulaꞌ, do batu makadilaꞌ. Ruma nau pake hata biasa, leo-leoꞌ ai-batu, nau, do fii. 13 Tehuu tukan ara nonoi-tataon neuꞌ ko nananitaꞌ, ma basa lahenda ra bubuluꞌ ria nonoi-tataon malole, do taꞌa. Huu fo neuꞌ ko dae-bafoꞌ a nonoen, Manetualain nau teteni ni, sama leoꞌ Ana pake aipilaꞌ fo natudu fee lahenda ra esa-esa nonoi-tataon tea-mepeꞌ, do taꞌa. 14 Kalu fefei-fofora lahenda esa nonoi-tataon pake ai-pilaꞌ, ma hata fo ana pake ni a bei tea-mepeꞌ, neuꞌ ko Manetualain feen seseba-babaeꞌ nai nusatetu-ikutemaꞌ. 15 Tehuu maneniko fefei-fofora lahenda nonoi-tataon pake ai-pilaꞌ, ma hata fo riꞌ ana paken nafoa neuꞌ fanderen ria lain a, ai-pilaꞌ a naa henis, sona Manetualain ta fee lahenda ria seseba-babaeꞌ hata esa boeꞌ. Tehuu tukan ria bei nasoda, leo mae sama leoꞌ lahenda nalai kalua neme uma fo ai-pilaꞌ a naa henin, ma ria kura baiꞌ maten.

16 Emi muste bubuluꞌ mae, emi boe sama leoꞌ Manetualain uma mamason esa, ma Ria Dula-dale Na boe leo-naparasa nai daleꞌ.*1 Korintus 6:19; 2 Korintus 6:16 17 Ma kalu lehenda tao nalutu Manetualain uma mamason, fo riꞌ Ria mamana leleo-naparasan, sona besa-besa o! Neuꞌ ko Manetualain tao nalulutuꞌ ana boe! Huu fo Manetualain uma mamaso na, lalao-lalafuꞌ, de emi boe muste lalao-lalafuꞌ.

18 Emi bosoꞌ edi-fule seluꞌ ao-ina mara! Maneniko o tao aom malelaꞌ, ma bubuluꞌ basa-basan tuka lahenda dae-bafoꞌ besaꞌ ia rolu-malelan, sona tea na nana riꞌ o ta bubuluꞌ hata esa boeꞌ. Maneniko mameda maan mae, o ta bubuluꞌ hata-hata esa boe, besaꞌ ko o bisa mulai manori. 19 Duduꞌa-aafi tandeꞌ lahenda dae-bafo besaꞌ ia a, Manetualain tao si reuꞌ pakanaaꞌ. Sama leoꞌ manaduiꞌ nai Susura Makamoiꞌ a nae:

20 Nai babati fekeꞌ manaduiꞌ nae,

21-22 De, emi bosoꞌ soꞌu-fua lahenda esa mae, ria kahereꞌ. Huu fo Manetualain riꞌ soꞌu lahenda fo nauli-nalaka emi. Basa-basan dadi reuꞌ emi nuum so. De, emi mauli-malaka mara, leo-leoꞌ; au, aꞌa Apolos, ma aꞌa Petrus,§Susura Makamoiꞌ dedeaꞌ Yunani manaduiꞌ nae, Kefas. Kefas nana, Petrus nade feke na. ami basa dadi meuꞌ emi nuum. Ma basa hihii-nanauꞌ nai dae-bafoꞌ ia boe, dadi reuꞌ emi nuum, leo mae emi mate do masoda, leo mae besaꞌ ia do ledo-fai bea, basa-basan dadi reuꞌ emi nuum so. 23 Ma emi dadi meuꞌ Kristus nuun. Ma Kristus dadi neuꞌ Manetualain nuun.