1-2 Soda-moleꞌ neme au mai, Paulus. Au haitua susuraꞌ ia, fee basa toranoo sarani kamahereꞌ fo rai propinsi Galatia. Basa toranooꞌ, fo sama-sama roo au nai ia, ara haitua fee emi haraoe soda-moleꞌ boe.

Au fee emi nafarereneꞌ ae, Amaꞌ Manetualain no Yesus Kristus riꞌ radenu au, ta lahenda dae-bafoꞌ a fa. Yesus Kristus nana, Lahenda fo Manetualain feen mai so. Kristus maten, tehuu Manetualain feen nasoda seluꞌ. Boe ma Sira siꞌ radenu au fo u tui-beka fee lahenda ra Tutui Malole a.

3 Au hule-haradoi neuꞌ Manetualain, ita Aman, ma Yesus Kristus, ita Ramatua na. Ami hule ela Ara ratudu dale malole Nara reuꞌ emi, fo ela emi bisa masoda no tetu-temaꞌ, mole-dame, ma tesatei-tamadaleꞌ. 4 Kristus maten ela sae-safe heni ita sala nara, ma soi-tefa na ita temeꞌ tadaluꞌ fo nai dae-bafoꞌ besaꞌia. Basa sira, nana tuka Amaꞌ Manetualain hihii-nanaun. 5 Huu ria na, de ita muste io-oa taroo Ni! Tebe ria!

6 Toranoo kara emin! Au ta bisa bubuluꞌ emi soꞌ! Manetualain here emi, nana huu Ana nau emi malelaꞌ Ria dale malole Na. Tehuu ubeaꞌ taon, de emi lai-lai mamahere nanori fekeꞌ 7 fo riꞌ ta matetuꞌ fa? Maulu na, au anori-afada matetuꞌ laꞌeneuꞌ Yesus Kristus Tutui Malole na. Tehuu besaꞌ ia manatipu-manadaiꞌ ara mai, de tui pepekoꞌ Tutui Malole ria, losaꞌ tao ra emi laka mara dile.

8 Besa-besa! Neuꞌ ko Manetualain kutuk lahenda, fo mai nanori-nafada Tutui Malole fo ta sama leoꞌ maulu na ami manori-mafada a. Leo mae lahenda ria neme ami mai, do Manetualain eilaꞌo-limalopen esa neme nusatetu-ikutemaꞌ a mai, tantu ana hapu kutuk! 9 Neme uluꞌ mai ami mafada memaꞌ hal ia so. Tehuu besaꞌ ia au nau fee seluꞌ nafarereneꞌ bali, leo iaꞌ: maneniko lahenda mai nanori-nafada fekeꞌ neme Tutui Malole, fo maulu na emi sipo a, nemeꞌ na ela Manetualain kutuk ana boe.

10 Au aparani dedea ae leoꞌ na, nana huu au nau tao a Manetualain dale Na namahoꞌo, ta lahenda dae-bafoꞌ a dale na fa. Emi afi mae au nau asosoropoo nai lahenda dae-bafoꞌ a matan, do? Taꞌa! Maneniko au tao leo naꞌ, sona ta araa dadi uꞌ Kristus lahenda nadedenun.

11 Toranoo kara emin! Au nau afada ledo-ledo ae, Tutui Malole fo au anori-afadan neuꞌ emi a, ta lahenda dae-bafoꞌ a riꞌ aadun ria fa. 12 Au ta sipo nemeꞌ lahenda dae-bafoꞌ a mai, ma ta hapu lahenda ranori au. Tehuu au sipoꞌ noi neme Yesus Kristus mai.

13 Tantu emi mamanene tutuiꞌ laꞌeneuꞌ au masoda maulu ka so, tepoꞌ fo au bei homu agama Yahudi a, hete? Tepoꞌ ria, au ese-rumu a Ramatuaꞌ a lahenda nara seli, fo nau aisa si ela bosoꞌ ramahere Ramatuaꞌ.✡Lahenda Nadedenuꞌ ara Tutuin 8:3; 22:4-5; 26:9-11 14 Ma tepoꞌ ria boe, au amahana de anori laꞌeneuꞌ agama Yahudi a, lena neme lahenda Yahudi fekeꞌ fo dedena au a. Ma au riꞌ, makate alalaꞌo ami bei-baꞌi mara hada na, ma atoran agama a katemaꞌ.✡Lahenda Nadedenuꞌ ara Tutuin 22:3

15-16 Leo mae leoꞌ na, tehuu Manetualain naetuꞌ basa, fo fee au alelaꞌ Ana Na. Au mama ka bei ta boki au fa, te Ana here memaꞌ au so, nana huu Ana nau natudu Ria dale malole na neuꞌ au. Ana nadenu au boe, fo u anori-afada lahenda fo ta Yahudi ra fa. Tepoꞌ fo Ana nadenu au a, nana au ta u hule lahenda fekeꞌ lelea-nonoren fa.✡Lahenda Nadedenuꞌ ara Tutuin 9:3-6; 22:6-10; 26:13-18 17 Au ta u dama lasi saraniꞌ rai Yerusalem fo riꞌ dadi Yesus lahenda nadedenun raꞌuluꞌ au a, tehuu au leo dae Arab u. Basa ria, boe ma au atafali seluꞌ leo kota Damsik a mai bali.

18 Basa teuꞌ telu, boe ma au u dama Petrus*Duduiꞌ dedea Yunani nai lalaneꞌ ia pake nade Kefas, neme dedea Aram. Kefas nana Petrus nade feken. Nade ka duaꞌ sira, sosoaꞌ esaꞌ a, riꞌ “batu” nai Yerusalem ela saka tutuiꞌ nemeꞌ ana mai. De au leo lalai oo ni nai naa, losa faiꞌ sanahulu lima.✡Lahenda Nadedenuꞌ ara Tutuin 9:26-30

19 Tepoꞌ ria, au dama oo Ramatua Yesus fadi bokin Yakobis boe. Tehuu au ta dama oo Ramatuaꞌ a lahenda nadedenu feke nara fa. Adaꞌ noi sira dua. 20 Hata fo au duiꞌ ia, nana tebe leoꞌ na! Au ta apuputaꞌ fa! Manetualain bubuluꞌ!

21 Basa boe ma, au leo propinsi Siria no propinsi Kilikia u. 22 Tepoꞌ ria, Kristus lahendan fo rai Yudea bei ta ralelaꞌ au fa. 23 Ara ramanene noi haraꞌ rae, “Lahenda ria riꞌ maulu na tao na ita doidoso a, besaꞌ ia ana nanori-nafada Kristus Tutui Malole na. Sekona te maulu na ria riꞌ nau naisa ita.” 24 Basa si ramanene au amahere Yesus Kristus so, de ara io-oa Manetualain nade Na.