3
Lahenda ta nau ramanene neuꞌ Manetualain
1 Nemeꞌ basa banda fo MANETUALAIN tao naa si nai dae-bafoꞌ ia so, meke a riꞌ malela napuputa na seli. Laiꞌ esa de, meke a natane inaꞌ ria nae, “Tebe do? Manetualain horo nae, ‘Emi ta bole mia ai boaꞌ neme ai huuꞌ fo rai okaꞌ ia, hete?’ ”
2-3 Inaꞌ ria nataa natafaliꞌ nae, “Taꞌa! Ami bole mia! Tehuu noi ai huuꞌ esa nai okaꞌ a talada, riꞌ Manetualain horo ami mia ni. Ana nae ami ta bole mia ni, ma ta bole tototo laꞌe boa na, taꞌa sona ami mate.”
4 Tehuu meke ria nataa nae, “Ae, ria ta laꞌe fa! Emi ta mate fa! 5 Manetualain horo tao leoꞌ na, huu fo Ana bubuluꞌ nae, maneniko emi mia ai boaꞌ ria, sona emi malelaꞌ sama leoꞌ Ria. Neuꞌ ko emi bubuluꞌ bea riꞌ malole ma bea riꞌ tadaluꞌ.”
6 Basa de inaꞌ a mete neu te, ai huuꞌ ria malole a, ma boa na nonooꞌ nae malada na seli. Boe ma ana afi nae, “Maneniko au ua ai boaꞌ ia, tantu au dadi malelaꞌ.” Basa de ana etu na ai boaꞌ ria, boe ma naa. Basa de ana neni fee sao na, ma ana naa boe. 7 Raa basa, boe ma besaꞌ ko ara bululuꞌ rae, dua si poiraoꞌ. Huu ria na, de ara nato ai doo fo raꞌeoꞌ rapoti mamae nara.
8 Leodaen ria, boe ma ramanene MANETUALAIN laꞌo-laꞌo nai okaꞌ ria daleꞌ. Basa de ara reu tamaꞌ nai ai huuꞌ, fo ela MANETUALAIN bosoꞌ nita si. 9 Tehuu MANETUALAIN naloo touꞌ ria nae, “Ae! Adam, o nai bea?”
10 Touꞌ a nataa nae, “Au amanene Manetualain hara-oe ma nai ia. Tehuu au maeꞌ, huu fo au poꞌiraoꞌ. Huu ria na, de au tamaꞌ.”
11 Basa de Manetualain nae, “Bea riꞌ nafada nae, o poiraoꞌ? Leoꞌ bea? Tantu o mua ai boaꞌ fo Au horo a, hete?”
12 Ana nataa nae, “Inaꞌ fo Manetualain fee ela sama-sama no au a, ria riꞌ neni ai boaꞌ a de au ua!”
13 Basa boe ma MANETUALAIN dedea no inaꞌ a nae, “Ubeaꞌ taon de o tao leo naꞌ?”
Boe ma inaꞌ a nataa nae, “Te meke a eꞌediꞌ nalaꞌ au! Huu ria na, de au ua ai boaꞌ ria, so te.”
Manetualain kutuk asa
14 Basa ria, boe ma MANETUALAIN kutuk meke a nae,
“Huu no o nonoi-tataom ia, Au huku o. Neme basa banda fekeꞌ ara mai, adaꞌ noi o riꞌ hapu kutuk leo iaꞌ. Mulai neme besaꞌ ia mai losa o mate, o lodo muniꞌ ara dale ma, ma o malelaꞌ noi mua nai dae a. 15 Au tao o mo inaꞌ ia, emi mamusu ao maroo. Ma emi dua tititi-nonosi mara boe, leo naꞌ. O tititi-nonosim neuꞌ ko aa neuꞌ lahenda ei tika na. Tehuu ria tititi-nonosin esa neuꞌ ko tutu nasosopuꞌ o laka ma.”
16 Basa ria boe ma, Manetualain nafada inaꞌ a nae,
“Neuꞌ ko Au tamba fee o susa faiꞌ fo mairu, ma tamba hedis faiꞌ fo o boki a. Tehuu mae leoꞌ na boe, o dale ma bei mahiiꞌ maroo neuꞌ sao ma. Ma ria riꞌ ator o.”
17 Basa boe ma, Manetualain nafada touꞌ a nae,
“O ta tuka Au pareta ka, tehuu tuka sao ma hihii-nanaun, losaꞌ o mua ai boaꞌ fo Au horo ni a. Huu ria na, de o boe hapu huhukuꞌ. Ma dae a boe hapu huhukuꞌ. Mulai besaꞌ ia losaꞌ o mate, o muste moi-tao foi dae sota maan seli, fo o bisa hapu nanaaꞌ. No moi-tao leo naꞌ, besaꞌ ko o masoda. 18 Leo mae o sele-tande rupaꞌ ara, tehuu dae a namomoriꞌ adaꞌ noi ko-kauꞌ ma matemaꞌ. 19 Basa nana o muste moi-tao sota maan seli, besaꞌ ko dae a fee o mua. O muste moi-tao puse ma titi leoꞌ na losaꞌ mate. Au adu-tao o neme dae a mai. De o mate, o fali dadi dae seluꞌ bali.”
20 Basa ria boe ma Adam*Nai dedea Ibrani, ‘adam’ sosoa na nae, ‘lahenda’. foi sao na, nade ‘Hawa’ (sosoa na nae, ‘masodaꞌ’), huu fo ria nana basa lahenda fo rasoda a mama na.
21 Basa de MANETUALAIN tao papakeꞌ nemeꞌ banda a rou na mai, fo fee dua si pake.
Manetualain usi heni Adam no Hawa
22 Boe ma MANETUALAIN dedea nae, “Besaꞌ ia lahenda ia ra bubuluꞌ bea riꞌ malole, ma bea riꞌ tadaluꞌ, sama leoꞌ Ita so. Bosoꞌ losa sira boe raa ai boaꞌ fo fee si rasoda raroo.” 23 Basa boe ma, Ana usi heni si reme oka Eden ria mai, de ara leo mamana fekeꞌ reu, fo raue-raosa ela rasoda nemeꞌ dae a buna-boan mai. 24 Manetualain usi heni si, boe ma Ana nadenu eilaꞌo-limalope madila nara reme nusatetu-ikutemaꞌ a mai,†Dedea Ibrani nae, Manetualain eilaꞌo-limalope madilan reme nusatetu-ikutemaꞌ a, riꞌ ‘Kerubim’. fo ranea rai okaꞌ ria pooꞌ dulu. Ara hopu tafaꞌ ma lalaeꞌ ana neu-mai, pila loa-loa sama leoꞌ aipilaꞌ. Manetualain nadenu si ena etu enoꞌ fo leo okaꞌ daleꞌ neu, huu fo Ana ta nau lahenda ra etu ai boaꞌ fo fee si rasoda raroo.