1 Toranoo kara emin! Hapu lahenda dodouꞌ nau ranoriꞌ lahenda kamahereꞌ ara. Ria malole a boe! Tehuu mafarereneꞌ, huu fo neuꞌ ko Manetualain parisa lutuꞌ lahenda fo nanori lahenda kamahereꞌ ara. De, ta bole sudi bea oo nanori-nafada.

2 Ita basa tasalaꞌ nai hihii-nanauꞌ rupaꞌ ara. Tehuu lahenda bea nanea nala maa na, de ta dedea nasalaꞌ, sona ria nauli nala masoda na katemaꞌ. 3 Hai natutuduꞌ neme dara a mai. Dara kabaꞌuina a, ita hela noi tali rapa a boe, bisa tauli talan. 4 Natutudu fekeꞌ nemeꞌ ofaꞌ a mai. Leo mae ani a nasaꞌ, de ofaꞌ a naeroꞌ boe, tehuu jurumudi a nauli nala ofaꞌ kabaꞌuina ria tuka hihii na neniꞌ noi uli aanaꞌ a. 5 Leo mae ita maa na aanaꞌ a, tehuu noi-tao hihii-nanauꞌ bauinaꞌ!

Ria sama leoꞌ ai-pilaꞌ buna anaꞌ esa boe, bisa naa heni nura a katemaꞌ. 6 Ita maa na boe sama leoꞌ ai-pilaꞌ. Ita pake ita maa na fo tao talutu hihii-nanauꞌ dodouꞌ, ma ana bisa tao nalutu ita masoda na katemaꞌ. Hihii-nanauꞌ tadaluꞌ dodouꞌ nai dae-bafoꞌ ia kalua remeꞌ lahenda maa na mai. Ma nitu ra malaka na boe, pake lahenda maa na fo nalalaꞌo ria nonoi-tataon.

7 Lahenda parna ralililiꞌ rala banda fui rupaꞌ ara: banda manalodo-manaraeꞌ, manupuiꞌ, ma ikaꞌ fo rai tasiꞌ daleꞌ. 8 Tehuu beita hapu lahenda esa parna nalililiꞌ nala maa na boeꞌ. Huu fo maa a nana hata tadaluꞌ esa rian, de ator doaꞌ ana. Ria sama leoꞌ raso, de bisa namate lahenda.

9-10 No maa a boe, lahenda io-oa ma doꞌi-ali. Ita pake maa ia ela io-oa neuꞌ Amaꞌ Manetualain. Ma noo maa a boe, ita doꞌi-ali lahenda, fo riꞌ Manetualain adu naa si tuka Ria mata-idun. Ubeaꞌ taon de bisa leo naꞌ?✡Tutui Masososaꞌ 1:26

11 Nasasamaꞌ leoꞌ oe mataꞌ a. Ta hapu oe mamis ma oe masiꞌ bubu reme oe mataꞌ esa mai. 12 Nasasama fekeꞌ bali: ai-kaꞌ ta bisa naboa pao boaꞌ, do anggor ta bisa naboa ai-kaꞌ boaꞌ? Huu fo ai-huuꞌ ara raboa tuka sira rupa na.*Dedea Yunani a nae, lahenda ta bisa seu συκῆ (sukei) a boa na neme ai-huuꞌ ἐλαία (elaia), ma ta bisa seu ἄμπελος (ampelos) boa na neme ai-huuꞌ συκῆ (sukei). Ria sosoa na nae, ai-huuꞌ rupaꞌ esa ta bisa naboa ai-huuꞌ rupa fekeꞌ a boa na. Huu fo ta laꞌe fa! Leoꞌ na boe, maneniko lahenda esa pake maa na, fo io-oa neuꞌ Ramatuaꞌ a, basa nana ana pake maa ni ria boe, fo doꞌi-ali lahenda. Ria, ta naraa fa. Ita ta bisa aso oe mamis neme dano fo oe na masiꞌ a.

13 Lahenda duduꞌa-aafi naruꞌ ma nanuu rolu-dame, bosoꞌ nadedema aon, huu fo ria malela na nemeꞌ Ramatuaꞌ a mai. De, ela ria natudu malela na neniꞌ ana nasoda roo-tetuꞌ. 14-15 Tehuu maneniko emi manuu dale eteꞌ ao ma matetuꞌ noi hihii-nanauꞌ mesa mara, sona bosoꞌ koao mae emi lahenda malelaꞌ, huu fo ria sama leoꞌ emi mapuputaꞌ. Hada-parii leo naꞌ a ta neme Manetualain mai. Tehuu hada-parii ria neme dae-bafoꞌ a mai, neme lahenda hihii-nanaun ma neme nitu ra mai. 16 Huu fo maneniko hapu eteꞌ ao a, ma nafaduli noi ao-ina heheli, tantu hapu nahuu-nalenaꞌ, ma lahenda ra tao tadalu rupaꞌ ara.

17 Tehuu duduꞌa-aafi naruꞌ fo onda neme Manetualain mai, leo iaꞌ: masososa na, tao na ita tasoda malalao-malalafuꞌ. Boe ma mole-dame, naloe-nadae aoꞌ, dale naneneteꞌ ma balaroe-balanauꞌ. Buna-boa nemeꞌ dale malole riꞌ: tulu-fali lahenda, ta mete mataꞌ, ma ta masarole-masaraliꞌ. 18 Lahenda fo natudu eno mole-dame sama leoꞌ lahenda sele-kari bini-kee, de neuꞌ ko ana hapu buna-boa malole.