1 Yesus nanori basa, boe ma Ana leo kota Kapernaum neu. 2 Nai na hapu soldadu Roma ra malakan esa. Nanuu ata kamaheren esa. Ata ria, namahedi de noi mamaten. 3 Faiꞌ ria malaka soldadu a namanene laꞌeneuꞌ Yesus, boe ma ana nadenu lasi Yahudi hida fo reu hule Ni mai puli na atan ria. 4 Ara hule Yesus, fo tuka no si neu puli na lahenda ria. Ara leleꞌo Ni rae, “Ramatuaꞌ! Lahenda Roma ia, lahenda malole! Ria naraa, Ramatuaꞌ tulu-fali ni. 5 Huu fo ana tao fee ita uma mamasoꞌ, te ana sue ita lahenda Yahudi a.” 6 Boe ma Yesus tuka no si.

Ara bei ta losa uma fa, tehuu malaka soldadu ria fee nonoo nara mai rafada Yesus rae, “Ramatuaꞌ *a bosoꞌ masosota aom mai bali, huu fo au ta araa sipoꞌ Ramatuaꞌ *a nai au uma ka fa. 7-8 Ma au ta araa leo Ramatuaꞌ *a mai boeꞌ. Makaledo na riꞌ rae, Ramatuaꞌ *a manuu kuasa. De, sadi mafada memeꞌ naꞌ mai, tantu au ata ka teꞌe na aon. Au bubuluꞌ hihii-nanauꞌ ia ra, huu fo au malaka kara ranuu kuasa fo pareta au. Ma au boe anuu kuasa fo pareta soldadu kara. Maneniko au pareta soldadu esa ae, ‘Leo eleꞌ muu!’ sona neu. Maneniko au ae, ‘Mai dei!’ tantu ana mai. Ma kalu au adenu ata ka ae, ‘Moi ia!’ tantu ana noi-tao ni. De, sadi Ramatuaꞌ *a moi mafadaꞌ a, tantu au ata ka ria, teꞌe na aon.”

9 Yesus namanene na ria, boe ma Ana heran. Ana lipe aon de nasare na lahenda kadodouꞌ fo riꞌ tuka Ni a, boe ma nae, “Heran, e! Doo-naru basa ia, tehuu Au bei ta parna aneta oi lahenda Yahudi esa namahere tebe-tebe sama leoꞌ lahenda Roma ia!”

10 De, Yesus nahaniꞌ na. Basa de, malaka soldadu a nonoo nara fali reus. Losa malaka a uma na, te rita ata ria teꞌe na aon so.

11 Balahaaꞌ, boe ma Yesus noo ana mana tuka dea nara leo koroꞌ esa reu, nade Nain. Lahenda dodouꞌ laꞌo sama-sama roo si. 12 Ara raneneaꞌ koroꞌ ria lelesu bafa na, boe ma lahenda bubuaꞌ esa rolo reni lahenda mana mateꞌ esa reu ratoi. Mana mateꞌ ria nana, ina-falu esa ana mane ise na. 13 Yesus nita ina-falu ria, boe ma noi sueꞌ ana. De Ana nafada neuꞌ inaꞌ ria nae, “Mama! Bosoꞌ boe dola bali!”

14 Yesus naneneaꞌ leo mata neu, de oi laꞌe tandu fo rapeuꞌ mana mateꞌ a neu lain. De, lahenda fo riꞌ rolo mana mateꞌ a ara rateꞌe. Yesus dedea no mana mateꞌ ria nae, “Ana tou anaꞌ on! Foa leo!” 15 Boe ma anaꞌ ria nasoda seluꞌ, ana foa de natuuꞌ ma mulai dedea no lahenda fo rapadeiꞌ eo ra ni a. Yesus nafada inaꞌ ria nae, “Mama! Sipoꞌ ma ana ma.”

16 Basa lahenda fo rai na ara bii raan seli! Boe ma ara io-oa neuꞌ Manetualain rae, “Manetualain nadenu mana nesi mata kahere Ni esa mai soaneuꞌ ita!” Fekeꞌ ara bali sona rae, “Manetualain mai nai ita basa talada, fo natudu dale malole Na!” 17 Boe ma tutuiꞌ ria beka ni nai propinsi Yudea, losa leo nusa fekeꞌ ara neu boe.

18-20 Yohanis Mana Saraniꞌ a ana mana tuka dea nara ramanene hihii-nanauꞌ fo Yesus tao ni a. De ara reu tui Yohanis nai bui daleꞌ. Boe ma ana nadenu lahenda dua reu ratane Yesus rae, “Tebe-tebe Papa nana Kristus fo riꞌ ami mahanin a? Do ami muste mahani lahenda fekeꞌ?”

Lahenda sira dua losa Yesus, boe ma ratanen rae leoꞌ na.

21 Fai fo lahenda nadedenuꞌ sira rai na, nana Yesus puli na lahenda dodouꞌ reme hedi rupa nara mai. Ma usi kalua nitu reme lahenda nitu hekeꞌ ara mai. Puli na lehenda pokeꞌ ara de bisa rita dae.

22 Boe ma Yesus nafada Yohanis lahenda nadedenu nara nae, “Emi fali meu mafada aꞌa Yohanis basa-basan fo riꞌ emi mita mataꞌ ma mamanene a, sama leoꞌ Manetualain mana nesi matan Yesaya duiꞌ nae,

23 Ma fali meu mafada aꞌa Yohanis mae, ‘Tebe maua-manaleꞌ neuꞌ lahenda fo namahere tebe-tebe neuꞌ Au.’ ”

24 Basa de Yohanis lahenda nadedenu nara fali, boe ma Yesus dedea no lahenda kadodou inaꞌ sira laꞌeneuꞌ Yohanis nae, “Tepoꞌ fo emi meu saka Yohanis nai mamana lino-nes a, emi afi mae meu te mita mo lahenda rupa leo bea nai na. Emi ta meu fo mita lahenda rupa na leoꞌ oo a, de ani a fuun sona naleuꞌ neu-mai. 25 Emi ta meu mita lahenda pake bua-loa mabeli, huu fo lahenda rupaꞌ leo naꞌ a leo nai uma maneꞌ a. 26 De, emi meu dama bea nai na? Emi afi mae meu saka Manetualain mana nesi matan? Tebe! Tehuu ria nana mana nesi mata nanuu kuasa bauinaꞌ. 27 Huu fo mana duiꞌ memaꞌ nai Susura Makamoiꞌ a laꞌeneuꞌ Yohanis nae,

28 Nai dae-bafoꞌ ia, ta hapu lahenda esa bau lena heni Yohanis boeꞌ. Tehuu nai Manetualain nusa-namon, lahenda hihika-rereka taꞌ a nanuu kuasa lena neme Yohanis mai.”

29 Lahenda kadodouꞌ sira ma mana susu bea ra oo ramanene Yesus dedea-nafadan, boe ma bubuluꞌ rae, Manetualain nana eno masoda matetuꞌ a. Huu fo maulu na Yohanis sarani si ma nanori-nafadas. 30 Tehuu lahenda agama Farisi, ma lahenda malela atoran agama Yahudi ra, ta nau tuka Manetualain hihii-nanaun soꞌ. Huu ria na de, ara ta hule Yohanis sarani si fa.✡Mateos 21:32; Lukas 3:12

31 Boe ma Yesus natane nae, “Au nau araraaꞌ lahenda besaꞌ ia a, no ubeaꞌ? Lahenda rupa leo beaꞌ ia ra? 32 Sira nana, sama leoꞌ ana aanaꞌ ara fo ratuu kukuaꞌ nai pasar a. Ara raloloo aoꞌ ma esa namuu esa rae,

33 Huu fo Yohanis Mana Saraniꞌ a ta ninu anggor fa, ma nahiiꞌ puasa sona emi mae, ‘Nitu ra heke raa ni!’ 34 Tehuu besaꞌ ia Au, Ana Lahenda, inu anggor ma ua roti leoꞌ bale-bale. Boe ma emi mafada Au mae, ‘Iku a lahenda maoroꞌ a! Mana mafu beraꞌ a! Neu natiaꞌ no mana susu bea ra! Ma partei esa no lahenda papake taꞌ ara bali! Ta dodoo aon nae bea ria fa!’ 35 Tehuu emi tanda Au dedea-nafada Ki, ee! Lahenda fo bubuluꞌ no matetuꞌ, ara tuka Manetualain hihii-nanaun.”

36 Nai kota ria, hapu lahenda Farisi esa, nade, Simon. Laiꞌ esa de, ana hule Yesus asa mai raa-rinu nai uma na. Yesus asa sipo ra nalooꞌ ria, boe ma ara reu fo sakaꞌ ratuuꞌ raa-rinu. 37 Tepoꞌ ria, hapu ina mana sosoa esa namanene nae, Yesus sakaꞌ neu naa-ninu nai na. Boe ma ana mai, ma homu neni mina maboo-meni mabeli boto esa. 38 Ana mai naneneaꞌ leo Yesus neu, nesiꞌ dea Na. Boe ma sundaꞌ undulaka na nai Yesus eidae na. Tutiꞌ a ana dola losaꞌ luu na titi laꞌe Yesus ei na. Ana seka Yesus ei na neniꞌ lakadoo na, ma deꞌi nasarerei Yesus ei na. Boe ma ana poꞌa mina maboo-meniꞌ ria neuꞌ Yesus ei Na.✡Mateos 26:7; Markus 14:3; Yohanis 12:3

39 Simon bubuluꞌ inaꞌ ria leleo-lalaꞌon, de nita leoꞌ na, boe ma dodoo nai dale na nae, “Kalu tebe-tebe Yesus nana Manetualain mana nesi matan, sona Ana bubuluꞌ nae, inaꞌ fo riꞌ tatai laꞌe Ni ia, ina mana sosoa. Ia dadi buti so, Manetualain mana nesi matan ta ia fa! Huu fo lahenda malalao-malalafuꞌ ta bole nabua no lahenda masala-masikoꞌ ara!”

40 Tehuu Yesus lees nala hata fo Simon afi nan, boe ma Ana nae, “Aꞌa Simon! Leo iaꞌ. Au nau afada aꞌa ka hihii-nanauꞌ esa.”

Boe ma Simon nataa nae, “Neuꞌ! Papa Mesen, mafada leo.”

41 Tutiꞌ a Yesus tuꞌu dedeaꞌ fee ni nae, “Hapu lahenda esa, biasa fee lahenda fekeꞌ a tonda doi nara. Ana parna fee lahenda dua tonda doi nara. Esa tonda na doifulaꞌ natun lima, ma esa sona noi lima huluꞌ a. 42 Tehuu losa fai na, boe ma dua si ta rabeꞌi fee faliꞌ doiꞌ sira so. Huu ria na, lahenda fo riꞌ fee dua si tonda doiꞌ a noi sueꞌ asa, de ana ta fee dua si bae huta nara soꞌ. Kalu tuka aꞌa Simon dale dodoo ma, neme lahenda mana tonda doiꞌ sira dua mai, bea riꞌ sue kadodou na neuꞌ lahenda fo fee si tonda doiꞌ a?”

43 Simon nataa tutiꞌ a nae, “Tantu lahenda fo riꞌ huta na dodouꞌ a!”

Yesus nataa nae, “Tebe leoꞌ na, aꞌa!”

44 Boe ma Ana lipe aon, de nasare na inaꞌ ria, ma nafada Simon nae, “Soba aꞌa Simon mete masudi inaꞌ ia. Bisinaꞌ a Au masoꞌ leo o uma ma mai a, aꞌa ka ta sadia oe, ela Au safe ei ka tuka ita hada na. Tehuu inaꞌ ia sona, naꞌoe Au ei ka neniꞌ ria luu na, ma ana seka makamomoi ni neniꞌ lakadoo na. 45 Ma bisinaaꞌ a, aꞌa Simon sipoꞌ Au leo uma ma daleꞌ mai a, ta deꞌi Au tuka ita biasa na fa. Tehuu mulai Au masoꞌ leo uma ia daleꞌ mai, inaꞌ ia ta hahae dedeꞌi Au ei ka fa. 46 Bisinaꞌ a Au masoꞌ mai a, aꞌa Simon mafarene heni hadas a, de ta poꞌa mina neuꞌ Au laka Ka. Tehuu inaꞌ ia poꞌa mina maboo-meni mabeli neuꞌ Au ei Ka. 47 Aꞌa Simon nenene matalolole! Tebe inaꞌ ia sala na dodouꞌ, tehuu Manetualain sae-safe heni si katemaꞌ so, huu fo Ana natudu susue na no tanda makasi kadodou na neuꞌ Au. Lahenda fo nameda aon nae, ana ta tao salaꞌ dodouꞌ, sona ria boe ta hapu ampon dodouꞌ fa. Huu ria na, de ana ta sue ma ta hule nalelaꞌ makasi neuꞌ Manetualain.”

48 Boe ma Yesus nafada inaꞌ ria nae, “Au sae-safe heni o sala mara so!”

49 Lahenda fo ratuuꞌ raa-rinu belaꞌ a rai na a, esa nabobotoꞌ esa rae, “Ae! Te nae Ria nana bea? Ana naparani fee ampon neuꞌ lahenda salan, oo! Sekonaa te noi Manetualain riꞌ nanuu hak fo sae-safe heni lahenda salan!”

50 Tehuu Yesus nafada inaꞌ ria nae, “Huu no o mamahere neuꞌ Au, de Manetualain fee o sodaꞌ a so. Fali muuko no mole-dame leo!”