4
Nitu ra malaka na soba Ramatua Yesus
(Lukas 4:1-13; Markus 1:12-13)
1 Basa ria, boe ma Manetualain Dula-dale Na napipipi-nalalaꞌo noo Yesus leo mamana lino-nees neu, ela nitu ra malaka na soba Ni.✡Ibrani 2:18; 4:15 2 Ana puasa nai naa hatu-leledon faiꞌ haa hulu. De Ana namalaa naan seli. 3 Fai fo Ana namalaa, boe ma nitu ra malaka bau-ina na mai soba Ni nae, “O ia nana tebe-tebe Manetualain Ana Na, hete? Maneniko tebe, sona pareta batu ia ra fo dadi reuꞌ nanaaꞌ leo.”
4 Tehuu Yesus nataa nae, “Manaduiꞌ nai Manetualain Susura Makamoi Na daleꞌ nae:
‘Lahenda dae-bafoꞌ a ta nasoda nemeꞌ noi nanaa-nininuꞌ a mai.
Tehuu sira boe muste ramanene Manetualain Dedea-nafadan,
ma tao tuka Ria hihii-nanaun.’ ”✡Tui Seluꞌ Laꞌe Neuꞌ Eno Sodaꞌ a 8:3
5 Boe ma nitu ria noo Yesus leo kota Yerusalem neu, Manetualain kota malalao-malalafu Na. Ma noo Yesus leo mamana madema lain neu nai Uma Mamaso Yahudi Ina. 6 Boe ma nitu ria nae, “Maneniko tebe-tebe Manetualain Anan O, sona soba paraboku daeꞌ muu leo. Huu fo manaduiꞌ nai Manetualain Susura Makamoi na nae,
‘Neuꞌ ko Manetualain pareta Ria eilaꞌo-limalope nara reme nusatetu-ikutemaꞌ a mai,
fo ranea O.’
Nai Manetualain Susura Makamoi na boe manaduiꞌ nae,
‘Neuꞌ ko ratanee ra O reniꞌ lima nara,
fo ela O ao-ina ma bosoꞌ hedis a, ma ta tetaꞌ laꞌe batu a boeꞌ.’ ”✡Sosoda Iꞌio-oꞌoaꞌ ara 91:11-12
7 Tehuu Yesus nataa nae, “Manaduiꞌ nai Manetualain Susura Makamoi Na daleꞌ boe nae,
‘Manetualain riꞌ nanuu haak fo pareta o.
Huu ria na, de o bosoꞌ soba Ni.’ ”✡Tui Seluꞌ Laꞌe Neuꞌ Eno Sodaꞌ a 6:16
8 Basa de nitu ria noo Yesus leo lete kademaina esa lain neu. Boe ma natudu basa nusaꞌ nai dae-bafoꞌ a, ma sira lole-napun katemaꞌ. 9 Nitu ria natudu basa sira, boe ma nafada nae, “Sadi O sundaꞌ undulaka ma fo doꞌo-tabe au, neuꞌ ko au fee katemaꞌ sira reuꞌ O.”
10 Tehuu Yesus nasapaa nae, “He, nitu on! O maheoꞌ meme iaꞌ mai! Huu fo Manetualain Susura Makamoi na nae,
‘O muste doꞌo-tabe Manetualain,
ma o muste malalau adaꞌ neuꞌ Ana.’ ”✡Tui Seluꞌ Laꞌe Neuꞌ Eno Sodaꞌ a 6:13
11 Nitu ria namanene leoꞌ na, boe ma ana laꞌo ela Yesus. Tehuu Manetualain eilaꞌo-limalope nara reme nusatetu-ikutemaꞌ a mai de urus Ana.
Ramatua Yesus mulai nanori-nafada nai Galilea
(Markus 1:14-15; Lukas 4:14-15)
12 Tepoꞌ ria, mane Herodes a ena Yohanis Mana Saraniꞌ a nai bui daleꞌ. Yesus namanene leoꞌ na, boe ma Ana fali leo Galilea neu.✡Mateos 14:3; Markus 6:17; Lukas 3:19-20 13 Ana leo koro Nasaret na neu, basa de Ana laꞌo naroo fo neu leo nai koro Kapernaum. Koroꞌ ria nai dano Galilea a suu na, nai Sebulon no Naftali oe-daen.✡Yohanis 2:12 14 No ria na, Ana tao tuka hata fo Manetualain mana nesi matan Yesaya duiꞌ memaꞌ nae,
15 “Sebulon oe-daen, ma Naftali oe-daen
fo raneneaꞌ dano Galilea, nai lee Yarden pooꞌ muri.
Lahenda fo ta Yahudi fa, leo rai naa.
16 Ara rasoda nai maiuꞌ daleꞌ,
tehuu besaꞌ ia ara rita Makaledoꞌ a so.
Huu fo besaꞌ ia, Makaledoꞌ a nahaa
soa-neuꞌ basa lahenda fo bei ta ralelaꞌ Manetualain.”✡Yesaya 9:1-2
17 Neme tepoꞌ ria mai, boe ma Yesus mulai nanori-nafada lahenda nae, “Emi muste saledale-tuꞌetei mara, fo masoda lalao-lalafuꞌ leo! Huu fo besaꞌ ia basa lahenda ra bisa dadi reuꞌ Manetualain lahendan so.”✡Mateos 3:2
Ramatua Yesus naloo na lahenda manadolu-manadala haa fo tuka Ni
(Markus 1:16-20; Lukas 5:1-11)
18 Faiꞌ esa, boe ma Yesus laꞌo tuka dano Galilea a suu na. Ana nita lahenda dua aꞌa-fadiꞌ. Esa nade Simon, tehuu lahenda biasa raloo ni rae, Petrus. Ma fadi na nade Anderias. Dua si dala ikaꞌ nai dano a, nana huu sira dua, manadolu-manadala. 19 Yesus naloo si nae, “Ae, mai fo tuka Au leo! Emi biasa saka ikaꞌ, tehuu besaꞌ ia Au nau anori emi, ela dadi meuꞌ mana saka sumaneꞌ.” 20 Dua si ramanene leoꞌ na, boe ma foa ela sira dala na, de tuka tutiꞌ Yesus.
21 Yesus asa laꞌo raroo seluꞌ baiꞌ, boe ma Ana nita Sabadeus ana nara. Aꞌa a nade Yakobis, ma fadi na nade Yohanis. Dua si sama-sama roo papa na rahii ratalolole pukaꞌ nai ofaꞌ daleꞌ. Yesus naloo si fo tuka Ni. 22 Dua si ramanene leoꞌ na, boe ma ara foa ela papa na ma sira ofaꞌ na, de reu tuka tutiꞌ Ana.
Ramatua Yesus nanori-nafada lahenda ma puli na lahenda kamahedis ara
(Lukas 6:17-19)
23 Boe ma Yesus asa laꞌo rule-feo propinsi Galilea, fo Ana nanori-nafada nai lahenda Yahudi ra uma mamaso nara. Ana nanori-nafada laꞌe-neuꞌ Manetualain Tutui Malole Na, ma nafada eno na leo beaꞌ fo lahenda bisa tuka Manetualain pareta na. Ma Ana puli na basa lahenda ra reme hedi-raus rupa nara mai boe.✡Mateos 9:35; Markus 1:39 24 Ta doo bea boeꞌ, te tutuiꞌ laꞌe-neuꞌ Yesus tataon ria, tui-bekan losa rule-feo basa propinsi Siria. Lahenda ra roo sira lahenda kamahedi rupa nara, leo Ria neu. Ara roo lahenda nitu hekeꞌ, manahedeꞌ, ma lukuꞌ ara. Boe ma Ana puli na katemaꞌ asa. 25 Tepoꞌ ria, lahenda dodouꞌ mai tuka Ni. Ara reme propinsi Galilea, ma reme Dekapolis, fo riꞌ sosoa na nae, Kota Sanahulu. Ruma bali reme kota Yerusalem, reme propinsi Yudea, ma reme lee Yarden seriꞌ mai.
✡4:4 Tui Seluꞌ Laꞌe Neuꞌ Eno Sodaꞌ a 8:3
✡4:6 Sosoda Iꞌio-oꞌoaꞌ ara 91:11-12
✡4:7 Tui Seluꞌ Laꞌe Neuꞌ Eno Sodaꞌ a 6:16
✡4:10 Tui Seluꞌ Laꞌe Neuꞌ Eno Sodaꞌ a 6:13
✡4:12 Mateos 14:3; Markus 6:17; Lukas 3:19-20
✡4:13 Yohanis 2:12
✡4:16 Yesaya 9:1-2
✡4:23 Mateos 9:35; Markus 1:39