27
Ara roo Ramatua Yesus leo gubernor Pilatus neu
(Markus 15:1; Lukas 23:1-2; Yohanis 18:28-32)
1 Bei balahaa aanaꞌ, te basa lahenda fo riꞌ urus dedea agama, raetuꞌ raan nau raisa Yesus. 2 Huu ria na, de ara heke roo Ni neu nataa gubernor Pilatus. Huu fo ara nau gubernor huku naisa Ni.*Tepoꞌ ria, lahenda Yahudi ra ta ranuu haak fo raisa lahenda. Huu ria na, de ara roo Ramatua Yesus leo mana pareta Roma neu.
Yudas londa naisa aon
(Lahenda Nadedenuꞌ ara Tutuin 1:18-19)
3 Yudas bubuluꞌ nae, Yesus hapu huhuku mamates, de ana nasale dale, nana huu ria riꞌ seꞌo heni Yesus. Boe ma ana fali leo malaka agama Yahudi malaka nara, ma lasiꞌ hadas ara neu, fo fee faliꞌ sira doi perak katelu hulun sira. 4 Ana nafada nae, “Au sala so, nana huu au fee heni Lahenda salaꞌ taaꞌ ia.”
Tehuu ara rataa rae, “Ae! Ami ta tao daleꞌ neuꞌ o soꞌ! O riꞌ lepa-masaa ma salaꞌ ria.” 5 Boe ma Yudas tuꞌu heni doiꞌ sira leo Uma Mamaso Yahudi Ina a daleꞌ reu, de ana kalua neu londa naisa aon.
6 Boe ma malaka agama Yahudi malaka nara reu hai ra doiꞌ fo riꞌ Yudas tuꞌu heni si a. Ara dedearao nara rae, “Ita ta bole peda faliꞌ doiꞌ ia ra leo peti doiꞌ daleꞌ reu, huu fo doi makekeo-makakanuꞌ ia. 7 Malole lenaꞌ ita teu asa ta mana tao ureꞌ daen bibia anaꞌ esa. Maneniko mate lahenda fui, ma lahenda ta ralelaꞌ ana, sona ita bisa tatoin neuꞌ naa.” 8 Boe ma ara pake doiꞌ sira, de reu asa ra dae ria. Huu ria na, losa besaꞌ ia lahenda hule dae ria rae, ‘Dae Daa’.✡Lahenda Nadedenuꞌ ara Tutuin 1:18-19
9 No ria na, ara tuka hata fo baꞌi Yeremia dedea memaꞌ nae,
“Ara pake doi perak katelu huluꞌ sira, de asa si reuꞌ dae.
Ara pake doiꞌ sira, nana huu asa lahenda sona beli na desi ria,
tuka lahenda Israel ara naetu na.
10 Ara asa dae ria neme mana tao ureꞌ mai,
tuka Manetualain pareta Na neuꞌ au.”†Sakaria 11:12-13; Yeremia 18:2-4; 19:1-11; 32:6-15
Ramatua Yesus nataa gubernor Pilatus
(Markus 15:2-5; Lukas 23:3-5; Yohanis 18:33-38)
11 Lahenda ra roo Yesus losa gubernor, boe ma ana natane Yesus nae, “Leoꞌ bea? Tebe-tebe O nana, lahenda Yahudi ra Mane na, do?”
Ana nataa nae, “Tebe. Papa dedea laꞌe ria so.”
12 Malaka agama Yahudi malaka nara, ma lasiꞌ hadas ara rapaneneoꞌ Yesus laꞌe-neuꞌ hihii-nanauꞌ dodouꞌ, tehuu Ana ta nataa hata-hata esa boeꞌ.
13 Boe ma gubernor a natane Ni nae, “O ta mamanene sira dedea na fa? Ara fee salaꞌ dodouꞌ soa-neuꞌ O. Tehuu ubeaꞌ taon de O ta sisipoꞌ asa fa!”
14 Tehuu Ana ta nataa baiꞌ boeꞌ, losaꞌ gubernor a heran.
Gubernor Pilatus naetuꞌ fo huku ramate Yesus
(Markus 15:6-15; Lukas 23:13-25; Yohanis 18:39—19:16)
15 Tuka-tuka teuꞌ, maneniko lahenda Yahudi ra tao feta Paska, sona lahenda kadodouꞌ ara biasa here lahenda mana hukuꞌ esa, ela gubernor a poꞌi ni. 16 Tepoꞌ ria, lahenda mana hukuꞌ esa, nade Barabas.‡Dudui dedea Yunani ruma duiꞌ rae, ‘Yesus Barabas’, ma ruma bali duiꞌ rae, ‘Barabas.’ Basa lahenda bubuluꞌ rae ria nana bea, huu fo makaresi na seli. 17 Faiꞌ ria boe, lahenda dodouꞌ leo gubernor Pilatus reu, hule fo ana poꞌi lahenda mana hukuꞌ esa sama leoꞌ bale-bale. Boe ma Pilatus natane si nae, “Malole! Tehuu au poꞌi bea? Nai ia, Barabas, ma Yesus fo riꞌ lahenda hule rae, Kristus, de here ao mara leo.” 18 (Gubernor dedea leo naꞌ, huu fo ana bubuluꞌ nae malaka agama Yahudi malaka nara roo Yesus feen leo ria neu, nana huu ara ramanasaꞌ Ana.)
19 Gobernor a bei parisaꞌ dedeaꞌ ria, boe ma sao na haitua feen haraoeꞌ nae, “Papa! Besa-besa oo, huu fo Yesus nana Lahenda sala taaꞌ ria. Huu fo no Ria, de leodaeꞌ a au alamei, mei-afes tadaluꞌ. Losaꞌ besaꞌ ia boe au bei ameda aan ta malole a.” 20 Tehuu malaka agama Yahudi malaka nara, ma lasiꞌ hadas ara duduku-papauꞌ lahenda kadodouꞌ sira, hule gubernor a fo poꞌi Barabas, ma huku namate Yesus. 21 Boe ma ana natane seluꞌ asa bali nae, “Neme lahenda ia ra dua si mai, au poꞌi bea?”
Basa si rataa belaꞌ a rae, “Barabas! Poꞌi Barabas!”
22 Ana natane si nae, “Maneniko leoꞌ na, sona Yesus fo riꞌ lahenda hule rae Kristus a, au taon leoꞌ bea?”
Basa si rahara belaꞌ a rae, “Paku maisa Ni neuꞌ ai kake a!”
23 Gubernor a natane bali nae, “Te Ana nasalaꞌ ubeaꞌ? Au parisaꞌ Ana so, tehuu au ta hapu Ni sala hata esa boeꞌ!”
Tehuu basa si rahara rambera bali rae, “Maisa Ni! Paku Ni neuꞌ ai kake a leo!”
24 Ta doo bea boeꞌ, te bubuluꞌ nae, ana ta bisa tao hata-hata esa so boeꞌ, huu fo lahenda kadodouꞌ sira sakaꞌ tao tasibuꞌ. Huu ria na, de hai na oe fo safe lima na nai sira matan, ma nafada nae, “Au ta lepa-asaa Lahenda ia mamate Na! Emi riꞌ lepa-masaa man!”✡Tui Seluꞌ Laꞌe Neuꞌ Eno Sodaꞌ a 21:6-9
25 Lahenda kadodouꞌ sira rataa rambera rae, “Hoo, nemeꞌ na! Ela ami mo upu-ana mara siꞌ lepa-masaa Ria daa Na!”
26 Pilatus namanene leoꞌ na, boe ma nae, “Neme emi mai!” Boe ma ana poꞌi Barabas, tuka sira hihii-nanaun. Boe ma ana pareta lahenda manea ra, fo fepa-liꞌu Yesus pake cambuk.§Soldadu Roma ra pake cambuk fo riꞌ tao nemeꞌ tali paa rouꞌ uraꞌ hida. Boe ma heke duiꞌ kokouꞌ, do, besi matande nai tali peda na. Maneniko liꞌu-fepa kose-kose pake cambuk ria, sona posu heni ita roun. Fepa-liꞌu basan, boe ma soldadu ra roo Yesus, fo sakaꞌ reu paku raisan nai ai kake.
Soldadu ra ramumulu-ramamaeꞌ Ramatua Yesus
(Markus 15:16-20; Yohanis 19:2-3)
27 Boe ma soldadu ra hela roo Yesus leo sira kota musu na kintal maloa na neu. Nai naa, ara raloo ra sira nonoon batalyon esa.*Soldadu ra mamanan ria ara hule tuka dedea Latin sona rae, praetorium. Soldadu ra mamanan ria, noo uma mana pareta a mamanaꞌ esa. Susura Makamoiꞌ dedea Yunani nae ara raloo sira nonoon speira esa. Speira esa, sona dedesi na soldadu natun nee. 28 Ara fee Ni pake badu manaru pilas makaderaꞌ esa.†Mateos duiꞌ nae, badu manaru ia ‘pilas makadera’. Markus duiꞌ nae, ‘pilas barakeoꞌ’. 29 Ara hai ra ai makouꞌ a rana na, de ralanen tao silaka. Boe ma ara poroꞌ silaka makouꞌ ria neuꞌ Yesus laka Na, fo ramiminaꞌ Ana sama leoꞌ sakaꞌ soꞌu mane bebeuꞌ pake silaka mana pareta. Ara feen homu ai esa nai lima ona Na, sama leoꞌ teteꞌe mana pareta. Ara sundaꞌ undulaka nara rasare raan, ma ramumulu-ramamaeꞌ Ana rae, “Hada-horomata neuꞌ lahenda Yahudi ra Mane na.” 30 Ara mudi radiu Ni ape, ma hai ra teteꞌe ria nemeꞌ lima Na mai, fo fepa ramiminaꞌ laka Na. 31 Soldadu ra ramumulu-ramamaeꞌ basa Ni, boe ma ara olu heni badu manaru ria. Ara fee Ni pake seluꞌ Ria kakao-papaken. Basa de ara roo Ni leo kota Yerusalem a deaꞌ neu, fo nau reu paku Ni nai ai kake a losaꞌ maten.
Ara paku Ramatua Yesus nai ai kake
(Markus 15:21-32; Lukas 23:26-43; Yohanis 19:17-27)
32 Ara roo Yesus, losa eno taladaꞌ ara raneta ro lahenda kota Kirene esa nade Simon, besaꞌ ko sakaꞌ masoꞌ leo kota daleꞌ neu. Ara raseti ni fo nasaa Yesus ai kake Na. 33 Ara losa mamanaꞌ esa, nade Golgotaa. (Dedea Aram, ria sosoa na nae, “Mamana laka duiꞌ.”) 34 Nai naa ara nau fee Yesus ninu anggor fo mana epoꞌ no modo-aidoo maliꞌ, ela Ana bisa nanenete hedis. Yesus mutiꞌ na baiꞌ, boe ma Ana natipa.✡Sosoda Iꞌio-oꞌoaꞌ ara 69:22
35 Boe ma ara paku Ni nai ai kake a. Basa de ara hela lot fo nau bubuluꞌ bea riꞌ hapu Ria kakao-papaken.✡Sosoda Iꞌio-oꞌoaꞌ ara 22:19 36 Ara ratuu ranea Ni nai naa. 37 Ara duiꞌ nai papaꞌ esa boe nae,
“IA NANA YESUS, LAHENDA YAHUDI RA MANE NA”
Ara paku papaꞌ ria neuꞌ Ria laka Na pooꞌ lai, fo dadi nafafadaꞌ nae tute na huu ubeaꞌ de ara huku ramate Ni.
38 Nai naa, ara paku lahenda parampok dua nai ai kake a boe. Esa nai Ria boboa onan; esa nai boboa ii Na.
39 Basa lahenda fo laꞌo resiꞌ naa, rita Ni. Ara peko bafa nara ma ramumulu-ramamaeꞌ Ana.‡Lahenda Yahudi ra biasa na, leleuꞌ laka nara fo dadi tanda nae ara ramamaeꞌ lahenda. ✡Sosoda Iꞌio-oꞌoaꞌ ara 22:8; 109:25 40 Ara bobouꞌ Ana rae, “He! O mae bisa fate heni Manetualain Uma Mamaso Yahudi Ina Na, boe ma noi faiꞌ teluꞌ a, te mafoa maan seluꞌ, hete? Kalu tetebes ara Manetualain Anan O, sona soba poꞌi ma aom fo onda memeꞌ ai kake ria mai leo.”✡Mateos 26:61; Yohanis 2:19
41 Leoꞌ na boe, malaka agama Yahudi malaka nara, mesen agama, ma lasi hadas nara, ramamaeꞌ Ana rae, 42 “Ana poꞌi-tata naa lahenda fekeꞌ a, tehuu Ana ta bisa poꞌi-tata naa ao-ina heheli Na. Ana nae, Ria nana lahenda Israel Mane na! Kalu leoꞌ na, sona malole lenaꞌ Ana onda nemeꞌ ai ria mai. Kalu ita tita leo naꞌ, besaꞌ ko tamahere Ni. 43 Tebe-tebe Ria nana Manetualain Anan, sona ela
‘Ana namahena neuꞌ Manetualain.
De maneniko Manetualain nahiiꞌ Ana,
nemeꞌ na fo ela Manetualain riꞌ poꞌi-tata naa Ni.’ ”✡Sosoda Iꞌio-oꞌoaꞌ ara 22:9
44 Lahenda parampok sira dua boe, ramamaeꞌ Ana leo naꞌ.
Ramatua Yesus mamate Na
(Markus 15:33-41; Lukas 23:44-49; Yohanis 19:28-30)
45 Boe ma maiuꞌ a napoti na mamanaꞌ ria neme ledo a namatetu losa liꞌu telu leodaen. 46 Liꞌu telu leodaen, boe ma Yesus naloo nambera pake dedea Aram nae, “Eli! Eli! Lema sabaktani?” (Sosoa na nae, “Au Manetualain Ka! Au Manetualain Ka! Ubeaꞌ taon, de Papa foa ela Au leoꞌ ia?”)✡Sosoda Iꞌio-oꞌoaꞌ ara 22:2
47 Lahenda hida raneneaꞌ rai naa ramanene Ria haraoe Na. Boe ma ara rae, “Ae! Emi nenene dei. Ana naloo Elia, Manetualain mana nesi mata fai ulu na!” 48 Lahenda esa nalai neu hai lopu fo naboron leo anggor maꞌeis daleꞌ neu. Boe ma ana pau lopu ria neuꞌ teteꞌe a peda na, de loo ni neuꞌ Yesus bafa na, ela Ana nasamusi.✡Sosoda Iꞌio-oꞌoaꞌ ara 69:22
49 Tehuu lahenda fekeꞌ ruma bali dedea rae, “Tahani fo ela mete tasudi, Elia nau mai poꞌi-tata naa Ni do, taꞌa?”
50 Yesus naloo nambera seluꞌ bali, boe ma mate Ni.
51 Nai Uma Mamaso Yahudi Ina a, tema bau-inaꞌ esa nanapepeleꞌ fo babaa Manetualain Kama Malalao-malalafuꞌ a. Naraa laꞌe Yesus maten, boe ma temaꞌ ria sii bati duan, neme lain losa daeꞌ. Dae a natakeko, losaꞌ batu bau-inaꞌ ara ratahea.✡Kalua reme Masir 26:31-33 52 Rates ara boe ratahuꞌa. Manetualain lahendan fo mate si a, Ana fee ruma rasoda seluꞌ. 53 Fai fo Yesus nasoda seluꞌ, boe ma ara kalua reme rates ara daleꞌ mai, de masoꞌ leo kota Yerusalem reu. Lahenda dodouꞌ rita si rai naa.
54 Nai Golgotaa, malaka soldadu a no ria ei-liman ranea Yesus ai kake Na. Ara rita dae-bafoꞌ a natakeko, ma basa hihii-nanauꞌ mana dadiꞌ sira, boe ma bii raan seli. Ara dedearao nara rae, “Awii! Tebe-tebe Lahenda ia nana, Manetualain Anan!”
55 Inaꞌ hida rai naa boe, ara rita Yesus mamate Na, tehuu mete reme dooꞌ a mai. Ara tuka Ni neme Galilea, huu fo sira siꞌ ralalau-raoonon neme uluꞌ mai. 56 Inaꞌ sira nana Maria neme koro Magdala, Maria esa bali (fo riꞌ Yakobis no Yusuf maman), ma Sabadeus sao na (fo riꞌ Yakobis no Yohanis maman).✡Lukas 8:2-3
Ara ratoi Ramatua Yesus
(Markus 15:42-47; Lukas 23:50-56; Yohanis 19:38-42)
57 Nai naa lahenda kamasuꞌi esa nade Yusuf, neme koro Arimatea mai. Ana tuka Yesus nanori-nafadan dooꞌ a so. Yesus mamate Na, laꞌe soda Limaꞌ. Balahaaꞌ laꞌe lahenda Yahudi ra fai huhule-haradoin. Huu ria na, de ledo a sakaꞌ tena, boe ma Yusuf saka enoꞌ fo nau naonda memaꞌ Yesus popora Na neme ai kake a mai. 58 Ana leo gubernor Pilatus neu, fo hule Yesus popora Na. Gubernor pareta fo ara fee ni poporaꞌ ria. 59 Boe ma Yusuf leo Golgotaa neu. Ana naonda Yesus popora Na neme ai kake ria mai. Ana poti natalolole poporaꞌ ria neniꞌ tema bebeuꞌ mabeli. 60 Tepoꞌ ria, lahenda ra besaꞌ ko paa basa boloꞌ esa nai lete batu, fo sadia memaꞌ bolo natoiꞌ fee Yusuf no kileoboboki nara, kalu ara mate. De Yusuf asa oꞌo reni Yesus popora Na, de rapeuꞌ Ana neuꞌ boloꞌ ria daleꞌ. Ara loli ra batu bau-inaꞌ esa, de tatana matalolole boloꞌ ria. Basa boe ma Yusuf asa fali.
61 Faiꞌ ria, Maria neme Magdala ma Maria fekeꞌ, tuka losa naa boe. Ara ratuu rasare leo boloꞌ ria reu.
Gubernor nadenu lahenda ra fo ranea nai Ramatua Yesus rates Na
62 Balahaꞌ, naraa laꞌe lahenda Yahudi ra fai hahae aon. Boe ma malaka agama Yahudi malaka nara ro lahenda Farisi ra leo gubernor a reu. 63 Ara rafada rae, “Papa gubernor, ami mafarene tepoꞌ fo manatipu-manadaiꞌ ria bei nasoda a, ana parnaa nae leoꞌ ia: ‘Tebe Au mate, tehuu basa faiꞌ telu, te Au asoda seluꞌ.’✡Mateos 16:21; 17:23; 20:19; Markus 8:31; 9:31; 10:33-34; Lukas 9:22; 18:31-33 64 Huu ria na, papa madenu soldadu ra fo ranea ratalolole rates ria losa faiꞌ telu. No ria na, Ria ana mana tuka dea nara ta bisa ramanaꞌo ra popora Na, fo tipu lahenda rae, Ana nasoda seluꞌ so. Huu fo maneniko ara tipu leoꞌ na, sona sira tipu-dain ria tadalu lena neme maulu na sira manaku rae Ria nana Kristus.”
65 Gubernor namanene leoꞌ na, boe ma nataa nae, “Malole a boe! Tehuu emi manuu lahenda manea. De malole lenaꞌ mafada si, fo reu ranea ratalolole mamanaꞌ ria.”
66 Ara roo sira lahenda manea nara leo mamanaꞌ ria reu. Losa naa, boe ma ara segel raisaꞌ batu fo nai rates a bafa na.§Lahenda malela atoran ara rae, ara segel reniꞌ eno na riꞌ, fefeo aba-dooꞌ esa neuꞌ boloꞌ a suu na no batu fo nai boloꞌ a bafa na, besaꞌ ko didite raneten. Ara radenu lahenda sira fo ranea rahere mamanaꞌ ria, ela lahenda fekeꞌ bosoꞌ mai oꞌo ra poporaꞌ ria.
*27:2 Tepoꞌ ria, lahenda Yahudi ra ta ranuu haak fo raisa lahenda. Huu ria na, de ara roo Ramatua Yesus leo mana pareta Roma neu.
✡27:8 Lahenda Nadedenuꞌ ara Tutuin 1:18-19
†27:10 Sakaria 11:12-13; Yeremia 18:2-4; 19:1-11; 32:6-15
‡27:16 Dudui dedea Yunani ruma duiꞌ rae, ‘Yesus Barabas’, ma ruma bali duiꞌ rae, ‘Barabas.’
✡27:24 Tui Seluꞌ Laꞌe Neuꞌ Eno Sodaꞌ a 21:6-9
§27:26 Soldadu Roma ra pake cambuk fo riꞌ tao nemeꞌ tali paa rouꞌ uraꞌ hida. Boe ma heke duiꞌ kokouꞌ, do, besi matande nai tali peda na. Maneniko liꞌu-fepa kose-kose pake cambuk ria, sona posu heni ita roun.
*27:27 Soldadu ra mamanan ria ara hule tuka dedea Latin sona rae, praetorium. Soldadu ra mamanan ria, noo uma mana pareta a mamanaꞌ esa. Susura Makamoiꞌ dedea Yunani nae ara raloo sira nonoon speira esa. Speira esa, sona dedesi na soldadu natun nee.
†27:28 Mateos duiꞌ nae, badu manaru ia ‘pilas makadera’. Markus duiꞌ nae, ‘pilas barakeoꞌ’.
✡27:34 Sosoda Iꞌio-oꞌoaꞌ ara 69:22
✡27:35 Sosoda Iꞌio-oꞌoaꞌ ara 22:19
‡27:39 Lahenda Yahudi ra biasa na, leleuꞌ laka nara fo dadi tanda nae ara ramamaeꞌ lahenda.
✡27:39 Sosoda Iꞌio-oꞌoaꞌ ara 22:8; 109:25
✡27:40 Mateos 26:61; Yohanis 2:19
✡27:43 Sosoda Iꞌio-oꞌoaꞌ ara 22:9
✡27:46 Sosoda Iꞌio-oꞌoaꞌ ara 22:2
✡27:48 Sosoda Iꞌio-oꞌoaꞌ ara 69:22
✡27:51 Kalua reme Masir 26:31-33
✡27:63 Mateos 16:21; 17:23; 20:19; Markus 8:31; 9:31; 10:33-34; Lukas 9:22; 18:31-33
§27:66 Lahenda malela atoran ara rae, ara segel reniꞌ eno na riꞌ, fefeo aba-dooꞌ esa neuꞌ boloꞌ a suu na no batu fo nai boloꞌ a bafa na, besaꞌ ko didite raneten.