10
1 Toranoo kara emin! Au ahii lahenda Israel ara dadi leo beaꞌ? Au hule-haradoi fo ela ara rataaꞌ Manetualain poꞌi-tata naa si reme sala-siko nara mai. Maneniko dadi leo naꞌ, besaꞌ ko au dale ka namahoꞌo!
2 Au bisa afada laꞌe-neuꞌ lahenda ia ra hada-pariin: ara makate nau tuka Manetualain. Leo mae ara makate leoꞌ na, tehuu ara ta bubuluꞌ eno matetuꞌ a. 3 Nana huu ara ta bubuluꞌ eno fo tao na lahenda bisa malole ro Manetualain. Huu ria na, de ara soi ao nara enoꞌ, fo soba-soba nau malole ro Ni. No ria na, ara ta nau ramanene neuꞌ Ana. [Huu no ara ta bubuluꞌ eno masoda matetuꞌ fo riꞌ tao naa si bisa malole roo Manetualain, de ara soba-soba soi ao nara enoꞌ ela nau malole roo Ni. No ria na, ara ta nau ramanene neuꞌ Ana.]
4 Maneniko lahenda tao tuka adaꞌ noi Atoran na, fo ela Manetualain sipoꞌ asa, sona ria bei ta namanoꞌu-namadai. Huu ria na, de Kristus tao natetu Manetualain atoran nara, fo ela ita bisa malole to Manetualain. Basa lahenda fo ramahere Yesus, bisa malole ro Manetualain.
Manetualain nau poꞌi-tata naa basa lahenda reme sala-siko nara mai
5 Fai a ulu na baꞌi Musa natudu enoꞌ nai Susura Makamoiꞌ a so, ela lahenda bisa malole ro Manetualain, sadi ara tao tuka Manetualain Atoran nara katemaꞌ. Ana duiꞌ nae, “Lahenda fo tuka Atoran ia ra katemaꞌ, neuꞌ ko ara hapu soda matetuꞌ a.”✡Malaka Agama ra Atoran 18:5
6 Tehuu Manetualain Susura Makamoi Na natudu eno fekeꞌ boe nae, lahenda bisa malole ro Manetualain sadi ara ramahere Kristus. Manaduiꞌ nae, “Bosoꞌ matane mae, ‘Bea riꞌ bisa ae leo nusatetu-ikutemaꞌ a neu?’ ” (Ria nonooꞌ leo lahenda nau ae neu nafada Kristus nae, ita lahenda dae-bafoꞌ a tahiiꞌ Ana onda mai ela poꞌi-tata naa ita.) 7 Susura Makamoiꞌ a boe manaduiꞌ nae, “Bosoꞌ matane mae, ‘Bea riꞌ nau onda leo Bolo Naraka neu, nai lahenda mana mateꞌ ara mamana na?’ ” (Ria nonooꞌ leo lahenda nau onda neu fo no Yesus ae faliꞌ neme mamate Na mai ela poꞌi-tata naa ita.)
8 Ta parluu leo naꞌ fa! Huu fo Susura Makamoiꞌ a nafada basa laꞌe-neu Manetualain hehelu Na. De heheluꞌ ria nai emi matam, nai emi bafam ma nai emi dale mara so. Heheluꞌ fo riꞌ ita tafada lahenda tae, “Maneniko emi nau hapu popoꞌi-tatataꞌ, sona muste mamahere Kristus.”✡Tui Seluꞌ Laꞌe Neuꞌ Eno Sodaꞌ a 30:12-14 9 Maneniko o manaku mae, “Yesus nana, au Ramatua ka,” ma o mamahere nai dale ma mae, Manetualain fee Yesus nasoda seluꞌ neme mamate Na mai, sona Manetualain poꞌi-tata naa o meme sala-sikom mai. 10 Maneniko o tebe-tebe mamahere Kristus nai dale ma, sona Manetualain tao o neuꞌ lahenda dale roos fo malole mo Ni. Ma kalu o manaku mae, Yesus dadi neuꞌ o Ramatua ma, sona Manetualain poꞌi-tata naa o meme sala-siko mara mai. 11 Nai Manetualain Susura Makamoi Na manaduiꞌ nae, “Lahenda fo namahere Manetualain, neuꞌ ko ta maeꞌ, huu fo Manetualain nau tao nadadiꞌ basa hata fo Ana nafada so a.”✡Yesaya 28:16 12 Lahenda Yahudi ra, ro lahenda fo ta Yahudi ra fa, sama. Ta esaꞌ ko enon fa. Huu fo Ramatuaꞌ noi esaꞌ a, ma Ana dadi Ramatuaꞌ soa-neuꞌ basa lahenda nusaꞌ. Ana nau natudu dale malole Na soa-neuꞌ basa lahenda fo hule tutulu-fafaliꞌ neuꞌ Ana. 13 Sama leoꞌ manaduiꞌ nai Susura Makamoiꞌ a nae, “Basa lahenda fo hule tutulu-fafaliꞌ neuꞌ Ramatuaꞌ a, neuꞌ ko Ana poꞌi-tata naa si reme sala-siko nara mai.”✡Yoel 2:32
14 Tehuu tao leoꞌ bea fo lahenda bisa hule tutulu-fafaliꞌ neuꞌ lahenda esa, kalu ara bei ta ramahere ni? Ma tao leoꞌ bea fo ara bisa ramahere ni, kalu ara bei ta parnaa ramanene laꞌe-neuꞌ ana? Tao leoꞌ bea fo ara bisa ramanene laꞌe-neuꞌ ana, kalu lahenda ta nafada si? 15 Tao leoꞌ bea fo ara bisa rafada lahenda, kalu ta hapu esa nadenu si leoꞌ na? Nai Susura Makamoiꞌ a manaduiꞌ nae, “Maneniko lahenda neni Tutui Malole mai, sira mamain ria, malole a nan seli!”✡Yesaya 52:7
16 Tehuu emi bubuluꞌ mae, lahenda Israel ruma ta nau ramanene Manetualain Tutui Malole Na. Manetualain mana nesi matan Yesaya duiꞌ nae,
“Ramatuaꞌ!
Lahenda ra ta nau ramahere heheluꞌ
fo ara ramanenen neme ami mai so a!”✡Yesaya 53:1
17 De Lahenda muste ramanene laꞌe-neuꞌ Kristus dei, besaꞌ ko bisa ramahere Ni. Ma muste tui-beka Manetualain Dedea-nafadan dei besaꞌ ko lahenda bisa ramanene.
18 Au atane soba, leo iaꞌ: bate emi afi mae, lahenda Israel ara ta parnaa ramanene laꞌe-neuꞌ Kristus, do? Tantu ara ramanene so! Sama leoꞌ manaduiꞌ neme uluꞌ mai nai Manetualain Susura Makamoi Na daleꞌ nae,
“Manetualain mana nesi mata nara helu laꞌe-neuꞌ Ramatuaꞌ a
nanatui-nanabekaꞌ nai dae-bafoꞌ ia katemaꞌ so;
Sira dedea-nafadan
losa nai dae-bafoꞌ a bukun haas so.”✡Sosoda Iꞌio-oꞌoaꞌ ara 19:5
19 Au nau atane seluꞌ hata esa ae, “Lahenda Israel ara ta bubuluꞌ Manetualain eno Na, do?” Taꞌa! Baꞌi Musa nana, lahenda masososaꞌ fo duiꞌ laꞌe-neuꞌ hata ria nae, Manetualain nafada lahenda Israel ara leo iaꞌ:
“Au nau tao hata esa
soa-neuꞌ lahenda nusa fekeꞌ ara.
Hata ria neuꞌ ko tao na emi eteꞌao mara.
Ma Au nau tao hata esa,
soa-neuꞌ lahenda fo emi afi mae, sira koa-pakanaꞌ.
Hata ria neuꞌ ko tao na emi heku nisi mara.”✡Tui Seluꞌ Laꞌe Neuꞌ Eno Sodaꞌ a 32:21
20 Nai mabui baꞌi Yesaya naparani duiꞌ laꞌe-neuꞌ lahenda fo ta Yahudi fa nae,
“Lahenda fo fai a ulu na ta saka Au,
tehuu ara raneta ro Au so.
Lahenda fo fai a ulu na ta hule ela rita Au,
tehuu Au atudu ao-ina ka neuꞌ asa so.”✡Yesaya 65:1
21 Tehuu laꞌe-neuꞌ lahenda Israel, Manetualain nafada nae leo iaꞌ:
“Hatu-leledon, Au apela lima dale Ka,
fo ahani lahenda Israel ara leo Au mai.
Tehuu ara ta nau ramanene neuꞌ Au,
ma sira boe rahiiꞌ ralena laka neuꞌ Au.”✡Yesaya 65:2