16
Paulus haitua haraoe soda-moleꞌ fee toranoo fo rai Roma
1 Au nau fee emi malelaꞌ ita susin Febe tuka susuraꞌ ia, ma hule fo emi sipoꞌ ana. Ria riꞌ ara soꞌu ni ela tulu-fali mauli-malaka saraniꞌ nai kota Kengkrea. 2 Au hule fo emi mapela lima mara ela sipoꞌ ana no malole, sama leoꞌ naraa fee lahenda saraniꞌ ara, nana huu ria nanahekeꞌ noo ita Ramatua na. Ana parluu ubeaꞌ, sona tulu-fali ni. Huu fo neme uluꞌ mai, ria riꞌ tulu-fali au o lahenda dodouꞌ.
3 Au haitua haraoe soda-mole balaroe-balanauꞌ fee susi Priskila*Susura Makamoiꞌ dedea Yunani nai ia manaduiꞌ nae, “Priska”. Priska no Priskila nana, nadeꞌ dua, tehuu lahenda esa. ma saon aꞌa Akila. Ami sama-sama malalaꞌo Yesus Kristus nonoi-tatao kadodou Na.✡Lahenda Nadedenuꞌ ara Tutuin 18:2 4 Dua si hisadei na mate, nana huu ara nau tulu-fali ra au eme soe a mai. Tehuu ta noi au mesaꞌ ka riꞌ hule makasi neuꞌ asa fa. Lahenda fo ta Yahudi fa dadi lahenda saraniꞌ nai basa mamanaꞌ ara boe, hule makasi nana huu sira nonoi-tatao malolen.
5 Au haitua haraoe soda-mole fee basa lahenda fo rabua de masoꞌ rai Priskila no Akila uma na.
Au haitua haraoe soda-moleꞌ fee au nonoo ki, aꞌa Epenetus. Ria nana lahenda masososaꞌ fo namahere Kristus nai propinsi Asia.
6 Au haitua haraoe soda-moleꞌ fee susi Mia. Ana noi-tao sota nan seli soa-neuꞌ emi.
7 Au haitua haraoe soda-moleꞌ fee aꞌa Andronikus no susi Yunia.†Tuka lahenda malelaꞌ ara ramahere rae duduiꞌ fo duiꞌ ana ta sala bai boeꞌ neme Susura Makamoiꞌ dedea Yunani teteaꞌ a fo riꞌ manaduiꞌ nae, Yunia (nade inaꞌ ria). Ruma bali duiꞌ rae, susi Yulia (nade inaꞌ ria). Mulai neme abad kasanahulu telun (ka-13), ruma bali duiꞌ rae, aꞌa Yunias (nade touꞌ ria). Lasi Sarani fai uluꞌ ara afi rae, aꞌa Andronikus no susi Yunia nana saotou-saoinaꞌ fo riꞌ roi-tao soa-neuꞌ Manetualain, sama leoꞌ aꞌa Akila no susi Priskila. Sira nana, lahenda Yahudi sama leoꞌ au. Ara ramahere Kristus so, tepoꞌ fo au bei ta amahere. Maulu na, ara rai bui daleꞌ sama-sama roo au. Sira boe dadi reuꞌ Manetualain lahenda nadedenun, ma lahenda dodouꞌ ralelaꞌ asa.
8 Au haitua haraoe soda-moleꞌ fee aꞌa Ampliatus. Au sue ni, nana huu ana nanahekeꞌ noo ita Ramatua na.
9 Au haitua haraoe soda-moleꞌ fee aꞌa Urbanus. Ria boe sama-sama no ami malalaꞌo Kristus nonoi-tataon.
Au haitua haraoe soda-moleꞌ fee aꞌa susue ki Stakis.
10 Au haitua haraoe soda-moleꞌ fee aꞌa Apeles. Ana hapu sosobaꞌ, tehuu lui na aon. No ria na, ita bubuluꞌ tae, ana namahere tebe-tebe Kristus so.
Au haitua haraoe soda-moleꞌ fee aꞌa Aristobulus kileoboboki nara katemaꞌ.
11 Au haitua haraoe soda-moleꞌ fee aꞌa Herodion. Ria lahenda Yahudi, sama leoꞌ au.
Au haitua haraoe soda-moleꞌ fee katemaꞌ Narkisus kileobobokin fo ramahere Kristus so a.
12 Au haitua haraoe soda-moleꞌ fee susi Trifena no susi Trifosa. Sira boe ralalaꞌo ita Ramatua na nonoi-tataon.
Au haitua haraoe soda-moleꞌ fee au tia ki, susi Persis. Huu fo ria boe noi-tao sota nan seli fee ita Ramatua na.
13 Au haitua haraoe soda-moleꞌ fee aꞌa Rufus. Ita Ramatua na here nan so.
Au haitua haraoe soda-moleꞌ fee mama na boe. Ria nana, sama leoꞌ au mama boki ka.✡Markus 15:21
14 Au haitua haraoe soda-moleꞌ fee aꞌa Asinkritus, aꞌa Flegon, aꞌa Hermes, aꞌa Patrobas, aꞌa Hermas, ma basa toranooꞌ fo sama-sama roo si a.
15 Au haitua haraoe soda-moleꞌ fee aꞌa Filologus, susi Yulia, aꞌa Olimpas, aꞌa Nereus no fadi ina na, ma basa lahenda saraniꞌ fo sama-sama roo si a.
16 Maneniko emi mabua, fo esa sipoꞌ esa pake nadeꞌi lalao-lalafuꞌ fo naraa soa-neuꞌ lahenda kamahereꞌ ara. Kristus lahenda saranin fo rai ia ara haitua haraoe soda-mole balaroe-balanauꞌ fee emi boe.✡1 Korintus 16:20; 1 Tesalonika 5:26
Paulus fee si lelea-nonoreꞌ
17 Toranoo kara emin! Au hule emi besa-besa, o! Manea matalolole, huu fo lahenda tao ra emi tapasara, fo nau rahihiiꞌ ratuda emi. Hata fo ara rafada emi a, nana naseiꞌ no hata fo ami manori-mafadan neuꞌ emi so a. De bosoꞌ matiaꞌ mo lahenda rupa leo naꞌ ara! 18 Ara ta roi-tao soa-neuꞌ ita Ramatuan Yesus Kristus. Ara roi-tao fo noi sira mesaꞌ asa siꞌ hapu ria buna-boan. Sira lalame maa nara ro lahenda fo bei ta ralelaꞌ bea riꞌ malole, ma bea riꞌ tadaluꞌ. Ara lalame maa nara fo tipu-dai lahenda.
19 Basa lahenda ra ramanene rae, emi tuka mahere Manetualain hihii-nanaun so. Huu ria na, de au amahoꞌo-atadale nana huu emi. Au nau emi malelaꞌ laꞌe-neuꞌ hata malole, ma bosoꞌ seseo-babaliꞌ moo hata tadaluꞌ ara. 20 Manetualain, riꞌ bisa fee ita tasoda no tetu-temaꞌ, mole-dame, ma tesatei-tamadaleꞌ. Ria riꞌ neuꞌ ko nalulutuꞌ nitu ra malaka bau-ina na kuasan, ma natudu nae, emi riꞌ maseki. Ria ta dooꞌ a soꞌ. Au hule-haradoi fo ita Ramatuan Yesus Kristus natudu dale malole Na neuꞌ emi.
21 Fadi ki Timotius, fo noi-tao sama-sama no au, ana haitua fee emi haraoe soda-moleꞌ.
Aꞌa Lukius, aꞌa Yason, ma aꞌa Sosipater boe haitua haraoe soda-moleꞌ. Sira nana, lahenda Yahudi sama leoꞌ au.✡Lahenda Nadedenuꞌ ara Tutuin 16:1
22 (Au, Tertius, fo riꞌ duiꞌ susuraꞌ ia tuka hata fo aꞌa Paul nadenu au duiꞌ a. Soda-moleꞌ neme au mai, huu fo au boe ita Ramatua na lahendan.)
23 Au leo lalai nai aꞌa Gayus uma na. Basa lahenda saraniꞌ fo rai ia, biasa rabua fo masoꞌ rai uma na. Ria boe haitua haraoe soda-moleꞌ.
Aꞌa Erastus, fo dadi mana homu doiꞌ nai bendar a, ma ita toranoon Kuartus, boe haitua haraoe soda-moleꞌ.✡Lahenda Nadedenuꞌ ara Tutuin 19:29; 1 Korintus 1:14; 2 Timotius 4:20
24 [Au hule fo ita Ramatuan Yesus Kristus natudu dale malole Na neuꞌ emi basa. Noi ri naꞌ so!]‡Susura Makamoiꞌ dedea Yunani paraaꞌ, ma maloleinaꞌ a ta duiꞌ lalaneꞌ kadua hulu haan (ka-24).
Manetualain, kahereꞌ nan seli!
25 Io-oa Manetualain! Ria riꞌ nanuu kuasa de tao na emi dadi tea-mepeꞌ. Ria Tutui Malole Na nae leoꞌ na, ma tepoꞌ fo au afada si laꞌe-neuꞌ Yesus Kristus, au anori-afada lahenda leo naꞌ boe. Manetualain riꞌ nafada fee ita basa laꞌe-neuꞌ Kristus, fo lahenda fai uluꞌ ara ta bubuluꞌ, nana huu bei nino. 26 Tehuu besaꞌ ia, hata fo Manetualain mana nesi mata fai ulu nara duiꞌ asa rai Susura Makamoiꞌ a daleꞌ nana, makaledoꞌ so. Manetualain fo masodaꞌ losa doo-doo naa neu, Ria riꞌ ator ela lahenda reme basa nusaꞌ ara mai bisa ralelaꞌ hata fo fai a ulu na bei nafuniꞌ. No ria na, ara bisa ramahere Ni, ma tao tuka Ria hihii-nanaun. 27 Adaꞌ noi Ria riꞌ, Manetualain. Adaꞌ noi Ria riꞌ mana bubuluꞌ basa hata a. Au ahiiꞌ io-oa Ni, nana huu Yesus Kristus nonoi-tataon! Tebe ria!
Au susura ka teꞌe adaꞌ ia,
Soda-moleꞌ,
Paulus
*16:3 Susura Makamoiꞌ dedea Yunani nai ia manaduiꞌ nae, “Priska”. Priska no Priskila nana, nadeꞌ dua, tehuu lahenda esa.
✡16:3 Lahenda Nadedenuꞌ ara Tutuin 18:2
†16:7 Tuka lahenda malelaꞌ ara ramahere rae duduiꞌ fo duiꞌ ana ta sala bai boeꞌ neme Susura Makamoiꞌ dedea Yunani teteaꞌ a fo riꞌ manaduiꞌ nae, Yunia (nade inaꞌ ria). Ruma bali duiꞌ rae, susi Yulia (nade inaꞌ ria). Mulai neme abad kasanahulu telun (ka-13), ruma bali duiꞌ rae, aꞌa Yunias (nade touꞌ ria). Lasi Sarani fai uluꞌ ara afi rae, aꞌa Andronikus no susi Yunia nana saotou-saoinaꞌ fo riꞌ roi-tao soa-neuꞌ Manetualain, sama leoꞌ aꞌa Akila no susi Priskila.
✡16:16 1 Korintus 16:20; 1 Tesalonika 5:26
✡16:21 Lahenda Nadedenuꞌ ara Tutuin 16:1
✡16:23 Lahenda Nadedenuꞌ ara Tutuin 19:29; 1 Korintus 1:14; 2 Timotius 4:20
‡16:24 Susura Makamoiꞌ dedea Yunani paraaꞌ, ma maloleinaꞌ a ta duiꞌ lalaneꞌ kadua hulu haan (ka-24).