1 Fãs din bade ḍõr imam Ananiyase hozon Ihudi murubbi edde Tertullus name ekzon ukilore loi Sesariyat giye. Ar Paulosor berudde govarnoror hãse nališ goijje. 2 Paulosore zehon ḍaki ana oiye, Tertulluse endilla hoi Paulosor keisore Feliksor sarme ainne: "Ijjotdar Feliks, õnor anḍare ãra bout din dori kub šantit asi. Õne õnor giyanor zoriya ei zatir bout unnoti goijjo. 3 Etolla ãra har šomot hár zagat õnore ãrar dilor butottu šukurana guzar gori. 4 Kintu beši hota hoi õnor šomoi nošto goitto no sai, ar hetolla foriyad gorir, õne meherbani gori hotun ãrar hotagun baiṭṭat funiba.

5 "Ãra dekir ei manušwa ek afod, šob šomoi hite gulmal gorat take. Šara duniyair Ihudi okkolor maze ite gulmal bazai de. Ite Nasaratiyo dolor neta. 6-7 Ar ite dórmogór foijjonto napak gorito kušiš goijje, hetolla ãra hitare doijji. 8 Ãra hitare ze šob hosuri dir, hin õne nize hitare zera gorile hár kissu zani fariba."

9 Ihudi okkole o fũwati hosuri diye edde hin soiyi boli hoiye.

10 Hetunot Governore Paulosore išara goijje hota hoibolla, toi Paulose hota howa šuru goijje: "Ãi zani, õne bout bosor dori ei Ihudi zatir bisar gori aiyor, hetolla ãi kuši oiyore nizor fokke hota hoir. 11 Aijja baro dinottuwaro beši no o, ãi ebadot goribolla Zeruzalem gilamde, zasai gorile õne hiyan asanir sãte zani fariba. 12 Ãre zara hosuri der hitara dórmogórot ãre honokiyore loi bosa bosi goridde no deke otóba sinagogot ba šohorot, oinno hono mikka manušore uskani diyide o no deke. 13 Ar ehon itara ze ãr berudde hosuri dehar hinor forman o hitara õnor hãse di no faribo. 14 Zen oibo ok, ei hota ãi šikar gorir, ze Isa Mosir fõt, ziyanore itara dórmo berudi fõt ho, ãi he fõtot ãr bafdada okkolor Allar ebadot gori. Kiyollahoile Torah edde Nobi okkolor kitabot za kissu leka ase ãi hin beggunore biššaš gori, 15 ar hitara zendilla aša gore ãttu o hendilla Allar uwore ei aša ase ze, soiyi otóba na soiyi beggunore morattu abar uwafes zinda gora oibo. 16 Hetolla ãi Allah edde manušor hãse hár šomot ãr biyasanare foriškar rakibolla kušiš gori.

17 "Bout bosor bade ãi Zeruzalem gilam zene ãi ãr zatir gorib manušore kissu ṭĩya foiša di fari edde zanuwar kurbani di fari. 18 Hitara ãre dórmogóror uṛanot lot failde he šomot, ãi nizore pak saf goijji, ar heṛe ãre loi mainšor hono genzam, gulmal hono kissu no o. 19 Kintu heṛe Ešia dešor hoekzon Ihudi aššil, hitarattu õnor hãse aiyon aššil. Ar ãr hono hosuri dibar takile, hitarattu diya forito. 20 Ar no oile eṛe zara hazir ase hitara hok, ãi zẽtte ḍõr šobar sarme tiya aššilam hẽtte ki hitara ãr hono hosuri fail. 21 Bolke ei ekkan hotar babute hitara ãre hosuri di fare, ze ãi hitarar sarme tiyaiyore guzori hoilam, 'Mora okkol abar zinda oi uṛibar babute loi aijja tũwarar sarme ãr bisar or.'"

22 Isar fõtor babute Felikse kub bala gori zanito. Hite bisar gora bon gori diyore hodde, "Šena komonḍar Lysiyas aile bade ãi tũwarar bisar šeš goriyum." 23 Hite Paulosore fahara dibolla ofisarore hokum diye, kintu hibare kissu azadi edde hibar hono nizor bondu bando okkole hibar šeba zotton gori farefan ezajot diye.

24 Ho ekdin bade Felikse hitar Ihudi bou Drusillare fũwati gori aišše. Hite Paulosore ḍakito defeṛaiye edde Paulosottu Mosir uwore biššašor hota okkol fuinne. 25 Paulose zehon soiyi bafe sola edde nizore sõli raka edde hãšoror bisaror dinor hota hoiye, hetunot Felikse ḍoraiye, edde hodde, "Tui ehon za, ṭaim mozin ãi tore abar ḍakium" 26 Hite aša goijjil Paulose hitare guš dibo. Hetolla bar bar Paulosore ḍakai ani hite hiba loi hota hoito de.

27 Dui bosor farai zaigoi bade Feliksor zagat Porkius Festus aišše. Feliks Ihudi okkolore kuši goribolla Paulosore ziyolhanat raki gilgoi.