2
Yunus foikamboror munazat
1 Tehon Yunus oi masor feṛottu tai Allah Mabudor hãse munazat goijjil, tãi hoil:
2 Mabud, ãi tũware bifodot ḍakilam
ar tũi ãr ḍak funila;
ãi hoboror murottu tai tũware ḍakilam,
ar tũi ãr foriyad funila.
3 Tũi ãre mur fanit doriyar bukot felaidila,
zeṛe sairo mikka fani,
tũwar har goiror fanir zalazontrona
ãr uwottu guzorigilgoi.
4 Ãi hoilam,
ãre tũwar nozoror tolottu dure loi za oiye,
ãi ki tũwar fobitro dórmogóror uzu
hono din suk tuli sai no faijjum neki?
5 Doriyar faniye ãre giridoijje,
foran foijjonto zar zar oiye,
doriyaye ãre sairomikkattu giridoijje,
ãr matat heṛiyar fezalota okkol beraiye.
6 Ãi ḍufizaiore faharor gura foijjonto gilamgoi,
ãr fise duniyair doroza sirohalolla ṭalamara oiye,
tarfore o, oh ãr Allah Mabud,
tũi ãr foranore morattu uwafes tuli anila.
7 Ãr foran zẽtte zarzar oiye,
hẽtte ãi Mabudore monot goillam,
ãr munazat tũwar hãse,
tũwar fobitro kaba górot fõssil.
8 Zara misa devdevire fũze,
tara tarar asol muhabbotottu durezagoi.
9 Kintu ãi tũwar namor tarif šoho
kurbani goriyum;
ãi ze manoš goijji hiyan furon goriyum;
ar uddar gora šudu Mabudor ham.
10 Bade Mabud he masore hokum dil, ar he mase Yunus nobire fuwana zagar uwore hogori bairgoridil.