Injil Córif or Síyara
1 YOHÁNNA
Síyara foóila Yohánnar foriso
E síyara 1 Yohánna óilde ekkán ceñṛí. Yián or lekóya óilde sáhabi Yohánna. Ceñṛí yián ore Isá Mosih zormo ói fonzaic ottu ek cót bosór or dormiyan ot leká gíyeh. Yohánna ye lekóya bouli foriso nó deh, montor foóila rukút boiyan goijjé de, lekóya wa óilde Isár zindigir edde Íba mora ttu zinda ówar baabute sukdahá gobá (1:1-3). E síyara 1 Yohánnar lekár ḍók óu síyara Yohánnar ḍók lói ek ḍoilla. Maincé biccác goré de, Yohánna ye síyara Yohánna re edde 1 Yohánna, 2 Yohánna, 3 Yohánna ceñṛí gún ore Ífisas cóor ot tákite leikké.
Yohánna ye e ceñṛí gán tamám Isáyi ókkol or hañse oñtté leikkíl, zeñtté Isáyi zomát ókkol “Nosṭik” hoó de dol loi ferecanit foijjíl. Manúc híine biccác goré de, Isá óilde furafuri Alla, montor Íba jisím edde lou loi insán boni duniyait nú aiyé. Hétolla bouli Yohánna ye leikké de, yóggwa óilde Isár zindigir baabute ezzon sukdahá gobá aar yóggwa nize Isá re áte dóijje (1:1-5). Yohánna ye e ceñṛí gán etollá leikké, zeéne yóggwar kúci fura ó (1:4), zeéne imandár ókkol ore guná gorá ttu oóñsi fare (2:1), zeéne imandár ókkol ore gollot taalim ottu héfazot rakí fare (2:26), aar zeéne imandár ókkol ore ítara sóiyi-sóiyi nejat faiyé de híyan zanaidi fare (5:13).
Súrki ókkol
1. Ceñṛí gán or foriso edde moksót (1:1-4)
2. Alla óilde Nur, aar añára ttu Isár ḍóilla zindigi haṛar zorur (1:5—3:10)
3. Ezzon ore ezzone muhábbot gorá foribó de híyan yaad goráidiya (3:11—5:12)
4. Ofúrani zindigir zankari (5:13-21)
1
Zindigi-dooya Kalam
1 Añára tuáñrar hañse Ubár baabute lekír, zibá foóila cúru ttu lóti asé, zibár muk zoban añára fúinni, zibá re nizor suké deikkí, zibá re kíyal góri saái yore nizor áte dóijji, yáni zindigi-dooya Kalam or baabute. 2 Hé zindigi zahér óiye; añára híyan deikkí aar híyan or baabute gobá díh. Añára tuáñrar hañse ofúrani zindigir baabute boiyan gorír deh, ziyán Baf or fúañti accíl aar añárar hañse zahér óiye. 3 Añára ziín deikkí edde ziín fúinni, tuáñrar hañse híin beh boiyan gorír, zeéne tuáñra ttu yó añára llói taalukat táke. Becók añárar taalukat toh Baf loi edde Íbar Fua Isá Mosih llói éna. 4 Añára tuáñrar hañse iín etollá lekír, zeéne añárar kúci fura ó.
Alla óilde Nur
5 E hotá añára Íba ttu fúinni aar tuáñrar hañse boiyan gorír, ki hoilé, Alla óilde Nur, Íbar bútore honó andár nái. 6 Añára andár ot zindigi haṛai zodi endilla hoói, añára ttu Íba llói taalukat asé, tóoile toh añára misá hotá hoóir, aar sóiyi gán no gorír. 7 Montor zodi añára Nur ot zindigi haṛai, zendilla Íba Nize yó Nur ot asé, tóoile toh añára ezzon ottu ezzon loi taalukat asé aar Íbar Fua Isár lou wé añára re hárr guná ttu pak-sáf goré. 8 Añára zodi hoói, añára ttu honó guná nái; tóoile toh añára nizoré fáki dír deh, aar dahá zah de, añárar bútore sóiyi nái. 9 Montor zodi añára añárar guná Allar hañse cíkar gorí, tóoile Íba ye añárar guná maf gorídibo, aar añára re hárr kuham ottu pak-sáf goríbo, kiyólla-hoilé Íba biccácdar; Íba ye honódin nainsáfi no goré. 10 Añára zodi hoói, añára honó guná nó gorí; tóoile toh añára Íba re misákur banair, aar añárar dil ot Íbar kalam nái.