Injil Córif or Síyara
1 TISÓLONIÓL
Síyara foóila Tisóloniól or foriso
E síyara 1 Tisóloniól óilde ekkán ceñṛí. Yián or lekóya óilde sáhabi Pául (1:1). Óitofare, Pául or ze ceñṛí ókkol Baibél ot asé híin or bútore yián óilde Pául or foóila cúrur ceñṛí. Ceñṛí yián ore Isá Mosih zormo ói tokoriban fonzaic-ek bosór ot leká gíyeh. Pául Kórin cóor ot accíl zeñtté yóggwa ye e ceñṛí gán Tisólonika cóor ot asé de Isáyi zomát or hañse leikké. Hé zomát twa re Páule oñtté banaáil zeñtté yóggwa dusárabar tobolik or ham ot giíl (Hamól 17:1-10). Síyara Hamól or zikír mozin, hé zomát twa kessú Yohúdi edde boóut Girík manúc lói bana giyéh.
Hé zomát twa banai baade, Pául Tisólonikat bicí din táki nó fare, hétolla bóuli forezai yóggwa ye e ceñṛí gán héṛiyar imandár ókkol ore tosólli dí bolla foóñsaiye deh. Ceñṛí yián ot máze bicí mouzú ókkol edde Isáyi zindigi haṛar baabute nosíyot ókkol asé. Yibát Páule Mosih dusárabar aár baabute yó hétap goijjé. Tisólonikar zomát or imandár ókkole háasgori hé mouzú gán or uzu díyan dito de óibo. Hétolla Páule Mosih dusárabar aár baabute lekí ítara re josba diyé deh, zeéne ítara Allar fosóndar zindigi haṛa (5:6-8).
Súrki ókkol
1. Zomát twa re Pául or sólam edde Alla re cúkurana (1:1-10)
2. Páule goré de boiyan edde Timóti ye ainníl de hóbor (2:1—3:13)
3. Isáyi ókkol olla Isá Mosih dusárabar aáre monot rakí zindigi haṛar nosíyot ókkol (4:1—5:15)
4. Zomát twa re sólam edde ceñṛí yián imandár beggún or muúntu forí bolla ítara re hókum (5:16-28)
1
Sólam
1 Añí Pául, añr fúañti Sílwanus edde Timóti yó asé.
Tisólonika cóor ot asé de zomát or hañse lekír, zetará añárar Baf Allar uore edde Malik Isá Mosihr uore iman ainné:
Tuáñrar uore rahámot edde cánti nazil óuk.
Tisóloniól or iman
2 Añára tuáñra re añárar duat mazé yaad rakí tuáñra beggún olla Alla re hámica cúkuriya gorí. 3 Tuáñra imane goijjó de ham ore, muhábbote goijjó de meénnot ore, edde añárar Malik Isá Mosihr uore acá rakí asé de sobór ore Baf Allar muúntu dua goríbarcot añára nitti monot rakí; 4 kiyólla-hoilé, ó báiboináin ókkol, Allar adorbon ókkol, añára zani, Íba ye tuáñra re basíloiye. 5 Kiyólla-hoilé añára toh tuáñrar hañse kúchóbor tobolik goijjí de siríf hotáye no, bólke kudurute, Pak-Ruhr bole, edde furafuri ekin or sáañte yó. Tuáñra toh zano, añára tuáñrar fúañti tákite tuáñrar wasté hondilla gori zindigi haṛaáilam. 6 Tuáñra ḍoóñr mosibot ot úddwa, Pak-Ruhr diiya kúciye añárar boiyan kobul gorí añárar edde Malik or nomuna mozin zindigi haṛaáila. 7 Híyan lói tuáñra Makedóniya edde Akaya elakar tamám imandár ókkol olla nomuna bonigiyógoi. 8 Tuáñrar héntu Malik or kalam siríf Makedóniyat edde Akayat fóligiyoi de no, bólke tuáñra ttu Allar uore asé de iman or hóbor hárr zagat eén fóligiyoi, añára ttu híyan or baabute honó kessú howá no fore. 9 Kiyólla-hoilé añára tuáñrar héṛe aiccílam de híyala tuáñra añára re hondilla gori kobul goijjíla de, aar tuáñra keéngori mutti fuñza bad di Allar uzu fíri aái zinda edde sóiyi Allar hédmot gorát asó de, híin manúc ókkole nize añára re hoó, 10 ítara yián óu hoó de ki, tuáñra Allar Fua asman ottu aibár entezar ot asó, zibá re Íba ye mora ttu zinda goijjé, yáni Isá re, zibá ye añára re aibó de gozzob ottu basaibó.