Injil Córif or Síyara
1 TIMÓTI
Síyara foóila Timótir foriso
E síyara 1 Timóti óilde ekkán ceñṛí. Yián or lekóya óilde sáhabi Pául. Yóggwa ye e ceñṛí gán nizor cárit Timótir hañse leikké deh. Ceñṛí yián ore Isá Mosih zormo ói tokoriban háiṭ-dui ottu háiṭ-sair bosór baade leká gíyeh. Óitofare e síyara wa lekér de októt Pául or hóiyat fúrai aiccé. Pául ottu Timóti llói bála taalukat accíl aar íba re boóut bar añr fua bouli hoiyé de asé (1:2; 1:18); (Filíppaiól 2:22).
Yián óilde Páule ze sair gán ceñṛí zomát or hañse no ói zon-zon or hañse leikkíl, héntu ekkán. Zon-zon or hañse leikkíl de oinno tin nán ceñṛí híin óilde, 2 Timóti, Titus, edde Filimon. E síyara yibát boóut cíkka ókkol asé, zendilla niki, ebaadot goríbar sóiyi torika (2:1-15), zomát or neta óibar zoruriyot ókkol (3:1-13), edde gollot taalim-doya ókkol olla úñciyari ókkol (1:3-11; 4:1-5; 6:2-5). Híine dahá de, Páule Timóti re zomát ókkol or neta ói bolla hondilla gori torbiyot diyé. E síyarat bicí niyom edde hédaiyot ókkol asé, ziíne añárar zobanar zomát or neta ókkol ore zomát or hédmot gorí bolla modot goríbo.
Súrki ókkol
1. Timóti re Pául or sólam (1:1-2)
2. Gollot taalim-doya ókkol or baabute úñciyari (1:3-11)
3. Allar rahám olla Pául or cúkurana (1:12-19)
4. Ebaadot or edde zomát or neta ówar baabute cíkka (2—3)
5. Timóti re kessú hókum ókkol (4—6)
1
Sólam
1 Añí Pául, añárar Nejatdoya Allar edde añárar acá Mosih Isár hókum mozin Mosih Isár éggwa sáhabi.
2 Timótir hañse lekír, zibá iman or hé rúwate añr sóiyi fua.
Tor uore Baf Allar edde añárar Malik Mosih Isár torfóttu rahámot, meérbani, edde cánti nazil óuk.
Gollot taalim-doyar baabute úñciyari
3 Añí Makedóniya elakat zaibarcót toré zendilla aros goijjílam héndilla Ífisas cóor ot ták, zeéne héṛe hodún manúc zetará gollot taalim ókkol deh ítara re maná gorí faros. 4 Ítara re hoibí de, banaouti kissá ókkol or uzu edde lamba-lamba háandan or lecṭír uzu díyan no di bolla, ziíne ḍoilla-boḍoilla barábari beh foida goré. Híin lói Allar niyot buzí fara no zah, buzí fara zah de siríf imane. 5 Añr e hókum or moksót óilde, cáda dil ottu, bála hélom ottu, edde háṭi iman ottu muhábbot foida gorón. 6 Montor hodún manúce híin bad di behazor gof ókkol ot lagi táikke. 7 Ítara ttu monehoór de, Córiyot or alem óito; montor ítara ziín hoó yáh ziín ekin or sáañte dabi goré híin nize úddwa no buzé.
8 Añára zani, Córiyot gom, zodi sóiyi torika loi estemal goré. 9 Añára yián óu zani de ki, Córiyot forhésgar ókkol olla diiya gyíl de no bólke Allar niyom báñgoya ókkol olla, Allar nafórman ókkol olla, bedini ókkol olla, gunágar ókkol olla, nafak ókkol olla, forhésgar no de ítara lla, baf ore yáh maa re kotól-goróya lla, kúni ókkol olla, 10 zenákur ókkol olla, morote-morote edde maya ye maya ye zená-goróya ókkol olla, gulam códor ókkol olla, misákur ókkol olla, misá gobá ókkol olla, edde ar badbaki zedúne sóiyi taalim or muhálef goré ítara lla, 11 ze taalim óilde taarifdár Allar torfóttu ḍoóñr kúchóbor, ziyán tobolik goríbar zimma añré diiya giyéh.
Allar rahám olla cúkur gorá
12 Añárar Malik Mosih Isá zibá ye añré toóufik diiyé, añí Íbar cúkur gorír, kiyólla-hoilé Íba ye añré biccácdar báfi Íbar ham ot lagaiyé. 13 Zodi añí ek hale kuféri-goróya, zulúmkur, edde zaalem accílam de óile yo, toóu añr uore rahám gorá gíyeh, kiyólla-hoilé híin toh añí imandár nó óite no buzí goijjílam deh. 14 Añárar Malike añr uore ódorbaára rahámot goijjé, aar Mosih Isár hañsóttu foida ó de iman edde muhábbot óu furafuri diiyé.
15 E hotá yián sóiyi aar furafuri kobul or laayek de ki, Mosih Isá duniyait aiccíl de gunágar ókkol ore basaitó, zetarár bútore ebbe ḍoóñr gunágar gwá añí. 16 Lekin Alla ye añr uore etollá rahám goijjé, zeéne añí zibá ebbe ḍoóñr gunágar, añr bútore Mosih Isá ye Nizor ocímana sobór ore zahér gorí fare, aar híyan zen uitará lla ekkán nomuna bone, zetará Íbar uore iman aní ofúrani zindigi faibo. 17 Becók, Zibá abadulabadi Baáñcca, Zibá fána no, Zibá noirahar, hé siríf Allar izzot edde mohíma abadulabad foijjonto ówat tákouk. Aamin.
18 Ó añr fua Timóti, yaar age tor baabute ze agun hotá howá gíyl, hé mozin añí toré e hókum man dir, zeéne tui hé agun hotá monot rakí bála laráit*Timótir zimma accíl de kúchóbor tobolik gorón edde gollot taalim ókkol ore sóiyi gorón. Híyan óilde ékkan laráir moidan ot laimmé fán. dile-zane larái gorí faros, 19 aar tor iman edde bála hélom zen zari táke; kiyólla-hoilé hodún maincé nizor hélom or hédaiyot nó mane de hétolla, nizor iman zaáñs báñge fán báñgigiyoi. 20 Ítarar bútore Huminayus edde Alexzendar óu cámil asé, zetará re añí Cóitan or át ot gosáidiyi, zeéne ítara kuféri no gorá cíke.
*1:18 Timótir zimma accíl de kúchóbor tobolik gorón edde gollot taalim ókkol ore sóiyi gorón. Híyan óilde ékkan laráir moidan ot laimmé fán.