Injil Córif or Síyara
2 KÓRINTIÓL
Síyara dusára Kórintiól or foriso
E síyara 2 Kórintiól óilde ekkán ceñṛí. Yián or lekóya óilde sáhabi Pául. Ceñṛí yián ore Isá Mosih zormo ói tokoriban fonzaic-fañs ottu fonzaic-sów bosór baade leká gíyeh (1:1). Páule Kórin cóor or zomát or hañse leikkíl de ze ceñṛí ókkol añára ttu asé héntu yián óilde dusára gán. Ulema ókkole biccác goré de, Páule yaar age Kórintiól or hañse ekkán hora ceñṛí leikkíl. Lekin yóggwa ye (2:3-4) ot ze ceñṛír hotá hoiyé híyan or honó kofí añárar hañse nái. Beechíssa óitofare yóggwa ye e 2 Kórintiól ceñṛí gán ore Makedóniyat tákite leikkíl (2:13).
E 2 Kórintiól óilde eggwá alok síyara, kiyólla-hoilé yibát máze nizor dil or hotá edde josbar baabute asé. Páule Kórin ot asé de zomát or baabute Titus ottu ze bála hóbor fúinnil híyan or uore kúci zahér goijjé deh. E síyara wat Noya Niyom or nozoriya mozin sótka gorár baabute tofsil or sáañte asé. Rukú (8—9) ot mazé Páule Jerúsalem ot asé de imandár ókkol or hañse modot foóñsai bolla sañda tulíbar mocuwara diyé de lootfa zah. Óitofare, zomát or baár or hodún misá sáhabi ye zomát or kessú maincór duara Pául or ulḍa ducconi foida gorí nize barík kúwalat doijje. Ítara Pául or sáhabigirir adíkar or baabute cók-cubá ókkol foida goijjé; óitofare hétolla bouli Pául mojbur ói, yóggwa ttu Isá Mosihr sáhabi ísafe ze adíkar asé híyan ore e síyarar fúrantit máze mozbut gori zanaidiya foijjé deh.
Súrki ókkol
1. Zomát ore sólam díya (1:1-7)
2. Pául or sofór or erada bodolar, ítarar baabute ze hóbor faáil híin or, edde nizor agor ceñṛír zoriya ítara ziín goijjíl híin or baabute (1:8—7:16)
3. Jerúsalem ot asé de imandár ókkol olla sañda tulár baabute Pául or mocuwara (8—9)
4. Pául nizor sáhabigirir sófai, aar yóggwa ítarar héṛe arekbar zaibo de híyan or mutalek úñciyari ókkol (10:1—13:10)
5. Pául or ahéri sólam edde dua diya (13:11-14)
1
Sólam
1 Añí Pául, zibá Allar moncá mozin Mosih Isár ézzon sáhabi. Añárar bái Timóti yó añr fúañti asé.
Kórin cóor ot Allar ze zomát asé, yíbar hañse edde Akaya elakar agagurat asé de pak bonda beggún or hañse lekír.
2 Tuáñrar uore añárar Baf Allar edde Malik Isá Mosihr torfóttu rahámot edde cánti nazil óuk.
Allar hañse Pául or cúkurana
3 Añárar Malik Isá Mosihr Alla edde Baf or taarif óuk, zibá rahám or Baf edde hárr ḍóilla tosóllir Alla. 4 Íba ye añára re añárar hárr duk-mosibot ot tosólli déh, zeéne añára yó Allar torfóttu faiyí de hé tosólli lói uitará re tosólli dí fari zetará ze honó duk-mosibot ot asé. 5 Kiyólla-hoilé zendilla Mosihr duk añárar uore bicí, héndilla añárar tosólli yó toh Mosihr duara bicí. 6 Zeñtté añára duk-mosibot ot fori, añára tuáñrar tosólli edde nejat olla fori deh. Zeñtté añára tosólli fai, añára tuáñrar tosólli lla fai deh, ziíne sobór or sáañte duk uúin bordac gorí bolla modot goré ziín añára yó bordac gorír. 7 Tuáñrar baabute añárar acá mozbut, kiyólla-hoilé añára zani de, zendilla tuáñra añárar duk ókkol ot córik asó, héndilla tuáñra añárar tosóllit óu asó.
8 Báiboináin ókkol,*Girík zuban ot imandár ókkol ore báiyain hoói estemal gorá gíyeh, héṛe mayafuain edde morotfuain duní gún gólaiya asé, zetará Allar futzíyain; lofzó yíba ayat iín ot óu lootfa zah: 8:1; 13:11. añára no saái, tuáñra Ecíya elakat añárar uore óiye de duk-mosibot ókkol or baabute ozana táko. Añárar uore ettór ḍoóñr sab foijjíl ziyán bordac or baáre óigilgoi, aar añára zane basi tákar acá úddwa háraifelailam. 9 Becók, añára ṭáaijjilam de, añárar uore moot or hókum óigiyoi. Montor héndilla etollá óiye, zeéne añára nizor uore no bólke mora re zinda goré de hé Allar uore bóraca rakí. 10 Íba ye añára re héttor ḍoóñr mooti docá ttu basaiyé, aar basaibó yó. Íbar uore añárar e acá raikkí de, Íba ye añára re basat tákibo. 11 Tuáñra yó toh añára re dua loi modot goró, zeéne boóut zon or duar usílaye añára faiyí de niyamot olla boóut zon or duara añárar bodol Allar cúkuriya adai ó.
Pául or erada bodola
12 Añárar borái óilde yián ziyán níki añárar hélome yó gobá déh, ki hoilé, añára duniyait mazé paki edde dindárir ehélase zindigi haṛaiyí, háasgori tuáñrar dormiyan ot. Añára héndilla goijjí de hóno duniyaibi giyane no, bólke Allar rahámote. 13 Kiyólla-hoilé tuáñra ziín forí faro edde buzí faro, yár baáre añára tuáñrar hañse kessú no lekír. Añí acá gorír, tuáñra ahéri foijjonto buzíba, 14 zodi yala añára hoóir de híin beggún no buzíle yo. Kiyólla-hoilé beggún buzíle, añárar Malik Isá aibár din ot añára óiyum de tuáñrar borái, zendilla tuáñra añárar borái óiba.
15 Híyan or ekine añí erada goijjí de, age tuáñrar héṛe ai bolla, zeéne tuáñra dui gun aiborhot foo; 16 yáni, Makedóniyat zaite tuáñrar héṛe góli bolla aar Makedóniya ttu aité yó tuáñrar héṛe góli bolla, baade tuáñra añré Yohúdiyat zaibar sofór ot rowana gorídiba. 17 Héndilla erada goróne kí añí tooñcá gorír bouli sábut ó? Añí kí duniyaibi manúc or ḍóilla niyot goijjí fán óiye, zetará ekbar ói ói bouli hoó arekbar no no bouli hoó?
18 Montor Alla zendilla biccácdar, yián óu héndilla de ki, tuáñrar hañse añárar hotá ekbar “ói” edde arekbar “no” lói no. 19 Kiyólla-hoilé Allar Fua Isá Mosih, zibár baabute añára, yáni añí, Sílwanus edde Timóti ye tuáñrar hañse tobolik goijjílam, Íbar bútore toh “ói” edde “no” duníyan nu accíl, bólke Íbar bútore “ói” hoilé hámica ói. 20 Allar tamám waada ókkol Íbar bútore “ói.” Hétolla Íbar usílaye añára “Aamin” hoói, zeéne Allar taarif ó. 21 Zibá ye añára re edde tuáñra re Mosihr bútore mozbut goré edde añára re basíloiye Íba óilde Alla. 22 Íba ye añárar uore Nizor moór lagaidiye, edde boona ísafe añárar dil ot Pak-Ruh diiyé.
23 Montor añí Alla re gobá gorí añr zindigir hosóm hái hoóir, añí Kórin ot abar nú aiyí de tuáñra re basai rakí bolla. 24 Añára tuáñrar iman or uore hókumot solair de no, bólke tuáñrar fúañti tuáñrar kúci lla ham gorír deh; kiyólla-hoilé tuáñra toh imane mozbut gori tíyaiya asó.
*1:8 Girík zuban ot imandár ókkol ore báiyain hoói estemal gorá gíyeh, héṛe mayafuain edde morotfuain duní gún gólaiya asé, zetará Allar futzíyain; lofzó yíba ayat iín ot óu lootfa zah: 8:1; 13:11.