Injil Córif or Síyara
2 FITOR
Síyara dusára Fitor or Foriso
E síyara 2 Fitor óilde ekkán ceñṛí. Yián or lekóya sáhabi Fitor bóuli lowa zah. Bicí ulema ókkol or biccác óilde, Fitor nize yián leikké de no, bólke Fitor or bodol ar ezzone leikké deh. Lekóya ye hoiyé de, íba óilde Isá Mosihr zindigir baabute sukdahá gobá, háasgori Isár súrot bodoligiyói de híyan or (1:17-18). E ceñṛí gán zodi Fitore leikké de óile, tóoile yóggwa no moribár age Rom cóor ot tákite leikkíl deh, Isá Mosih zormo ói háiṭ-fañs ottu háiṭ-now bosór or dormiyan ot. Fitore e ceñṛí gán nizor dusára ceñṛí bouli hoiyé (3:1) ziyán lói foriso diyé de, yián ore 1 Fitor baade leikké deh. Yóggwa ye e ceñṛí gán tamám Isáyi ókkol or hañse leikké.
Fitore e ceñṛí gán leikké de, imandár ókkol ore bála zindigi haṛaibár buz dito edde misá ustat ókkol or hotá no manibár úñciyari dito (2). Yóggwa ye ítara re manúc uitará re inkar goittó nosíyot goijjé, zetará Isá Mosih abar aité deri gorér bouli hoó. Montor hoiyé de, Íba aité der gorér de no, bólke Íba ye sar de, beggúne zen nejat fouk (3:8-9). Híyan óilde bála zindigi haṛaibár ekkán wajá (3:14).
Súrki ókkol
1. Fitor or foriso (1:1-2)
2. Alla re siní zindigi haṛaibár yaad goráidiya (1:3-21)
3. Misá ustat ókkol ottu úñciyar tákibar baabute (2:1-22)
4. Mosih aibár din olla toiyari (3:1-18)
1
Sólam
1 Añí Sáimon Fitor, Isá Mosihr éggwa gulam edde sáhabi.
Uitarár hañse lekír zetará añárar Alla edde Nejatdoya Isá Mosihr forhésgarir usílaye añárar gán or ḍóilla ekkán kimoti iman faiyé:
2 Alla re edde Isá añárar Malik ore sinóne tuáñrar uore rahámot edde cánti bicígori nazil óuk.
Imandár ore Allar ḍak edde basílowa
3 Ubár illayi kudurute toh añára re zindigi edde dindári lói taalukat goré de híin beggún dan goijjé, zibá ye añára re Nizor mohímaye edde bálaiye ḍaikké Íbar re sinár zoriya. 4 Híin or duara Íba ye añára re Nizor kimoti edde ḍoóñr waada ókkol diyé de asé, zeéne híin or usílaye tuáñra illayi fítorot or bági óizogoi, ontú hári ze borbadi niki duniyait hóraf azzu ókkole foida goijjé.
5 Hétolla tuáñra furafuri kucíce, nizor iman ot bálai, bálait giyan, 6 giyan ot forhés, forhés ot sobór, sobór ot dindári, 7 dindárit báiyali meérbani, edde báiyali meérbanit muhábbot baró. 8 Zodi tuáñra ttu híin táke edde barér de óile, híine tuáñra re añárar Malik Isá Mosih re sinát behar edde befózul óito no dibo. 9 Montor zar ttu híin nái yóggwa ye duré no deké, hoitó sailé añdá, aar nizoré nizor agor guná ókkol ottu pak-sáf gorífela gíyeh de híyan foóraifelaiye.
10 Hétolla, ó báiboináin,*Girík zuban ot imandár ókkol ore báiyain hoói estemal gorá gíyeh, héṛe mayafuain edde morotfuain duní gún gólaiya asé, zetará Allar futzíyain. Alla ye tuáñra re ḍaikké de edde basíloiye de híyan fakkagori bolla aró becábicí kucíc goró. Kiyólla-hoilé zetókkal tuáñra híin gorát táko, tuáñra bilkúl ujáṭ no háyba, 11 bólke héndilla óile toh tuáñra re añárar Malik edde Nejatdoya Isá Mosihr ofúrani raijjot becábicí izzote góla zaybo.
12 Hétolla añí tuáñra re híin hámica yaad goráidiyat tákiyum, tuáñra híin zainna de edde nize faiyó de sóiyit máze ṭiki asó de óile yo. 13 Añí yián ṭík bóuli báfi de ki, zetókkal añí e ṭambur ḍóilla haiyaye así, tuáñra re híin yaad goráidi foṭfoiṭṭa gorón, 14 kiyólla-hoilé añí zani, hára añr ttu añár e ṭambu eri zaagói foribó, zendilla añré añárar Malik Isá Mosih ye yó sáf-sáf góri zanaidiyé. 15 Añí furafuri kucíc goríyum de ki, tuáñra zen añr entehal or baade yó híin hámica yaad rakí faro.
Mosihr cáan or sukdahá gobá
16 Kiyólla-hoilé añára toh tuáñra re añárar Malik Isá Mosihr taakot or edde Íba aibár baabute zanaidiyí de híin saláki gori banaiya kaháni no, bólke añára óilam de Íbar cáan or sukdahá gobá. 17 Íba ye Alla Baf ottu oñtté izzot edde mohíma faiyé zeñtté Íbar hañse hé Ḍoóñr Mohíma-wala ttu e abas swá aiccé, “Ibá óilde Añr adorja Fua, zibá re lói Añí bicí kúci.” 18 Asman ottu aiccíl de hé abas yíba añára nizebaze fúinni, híyala añára Íbar fúañti pak faár or uore.
19 Aar añárar hañse nobi ókkole hoói gíye de hotá yó asé ziíne aró fakka goré. Andár zagat suk zendilla serak or foór or uzu táke, borabor héndilla zetún fózor nó fáṛe aar tuáñrar dil ot sút-tara nó ulé, tuáñra híin or uzu kíyal dilé tuáñra bála goríba. 20 Montor age yián zanilo de ki, pak-kalam or honó poigam insán or buzá ttu aiccé de no. 21 Kiyólla-hoilé honó poigam insán or moncá ttu aiccé de nái, bólke insáne Pak-Ruh ye solaiyé de mozin Allar torfóttu hoiyé deh.
*1:10 Girík zuban ot imandár ókkol ore báiyain hoói estemal gorá gíyeh, héṛe mayafuain edde morotfuain duní gún gólaiya asé, zetará Allar futzíyain.