Injil Córif or Síyara
2 TISÓLONIÓL
Síyara dusára Tisóloniól or foriso
E síyara 2 Tisóloniól óilde ekkán ceñṛí. Yián or lekóya óilde sáhabi Pául (1:1). Páule 1 Tisóloniól ceñṛí gán lekí baade hom ṭaim or bútore e ceñṛí gán leikké, yáni Isá Mosih zormo ói tokoriban fonzaic-ek bosór ot. Pául héñtte fóijjonto Kórin cóor ot accíl zeñtté yóggwa ye e ceñṛí gán Tisólonika cóor ot asé de Isáyi zomát or hañse leikkíl. Ze zomát twa re Páule oñtté banaáil zeñtté yóggwa dusárabar tobolik or ham ot giíl (Hamól 17:1-10). Síyara Hamól or zikír mozin, hé zomát twa kessú Yohúdi edde boóut zon Girík manúc lói bana giyéh.
Tisóloniól or zomát ottu ahérot or edde Mosih dusárabar aár baabute sintabáfana accíl de óibo, kiyólla-hoilé Páule Tisóloniól or hañse leikkíl de duní ceñṛít híin or baabute bicígori leikké. E 2 Tisóloniól ceñṛí gán ekdók foijjonto ahérot or baabute. E ceñṛít Páule isarbisar sára solasol or baabute yó úñciyari díye aar hoiyé de, fottí ekzon ottu nizor hánar zuu nize hamai gorá foribó (3:6-10).
Súrki ókkol
1. Pául nizor edde nizor sáañti ókkol or foriso (1:1-2)
2. Tisólonikat asé de zomát olla Allar cúkur góra, aar ítara lla dua gorá (1:3-12)
3. Ahérot or baabute (2:1-17)
4. Isarbisar sára góri no soilto edde meénnot goittó (3:1-15)
5. Zomát twa re abar sólam (3:16-18)
1
Sólam
1 Añí Pául, añr fúañti Sílwanus edde Timóti yó asé.
Tisólonika cóor ot asé de zomát or hañse lekír, zetará Alla añárar Baf or uore edde Malik Isá Mosihr uore iman ainné.
2 Tuáñrar uore añárar Baf Allar edde Malik Isá Mosihr torfóttu rahámot edde cánti nazil óuk.
Allar ahérot or bisar
3 Báiboináin ókkol, añára ttu tuáñra lla Allar hañse hámica cúkuriya gorár zorur. Héndilla gorón etollá sóiyi, kiyólla-hoilé tuáñrar iman bicí barér aar tuáñra fottíkiyor muhábbot afós ot zetó éto bicí ór. 4 Hétolla bóuli Allar zomát ókkol or hañse añára tuáñra re lói borái gorí fari, ki hoilé, tuáñra foór de tamám zulúm edde mosibot ot úddwa nizor sobór edde iman ore ṭikai raikkó.
5 Híin beggúne sábut goré de, Alla ye hók bisar goré, hétolla tuáñra re Allar raijjor laayek bouli gona zaybo, ziyán olla tuáñra duk foór. 6 Allar hók bisar óilde, zetará tuáñra re duk deh, Íba ye ítara re duk dibo, 7 aar tuáñra zetará duk foór, Íba ye añárar fúañti tuáñra re yó aram dibo, oñtté zeñtté Malik Isá Nizor taakotwala fírista ókkol ore fúañti looi zoler de ooin ot gori asman ottu zahér óibo, 8 uitará re sáñza dí bolla zetará Alla re no siné aar zetará añárar Malik Isár kúchóbor ore amól no goré. 9 Manúc ítara Malik or cáikka ttu edde Íbar mohímar taakot ottu dur ói sáñza ísafe abadulabadi dónco faibo, 10 oñtté zeñtté Íba ye Nizor pak bonda ókkol or hañse nizor mohíma zahér gorá zay bolla edde Íbar uore iman ainné de ítara beggún or hañse taajuippa ói bolla aibó. Ítarar bútore tuáñra yó asó, kiyólla-hoilé tuáñra de añárar gobá fúni iman ainnó.
11 Híin monot rakí añára hámica tuáñra lla dua gorí de, Alla ye tuáñra re Íbar ḍak or laayek bouli gonouk, aar tuáñra ttu asé de bálai goríbar hárr azzu edde iman or amól ókkol ore Nizor kudurute fura goróuk, 12 zeéne añárar Allar edde Malik Isá Mosihr rahámote tuáñrar duara añárar Malik Isár nam or taarif ó, aar Íbar duara tuáñrar taarif ó.