Injil Córif or Síyara
2 TIMÓTI
Síyara dusára Timótir Foriso
E síyara 2 Timóti óilde ekkán ceñṛí. Yián or lekóya óilde sáhabi Pául. Yián óilde yóggwa ye nizor cárit Timótir hañse leikké de dusára ceñṛí. Páule ceñṛí yián ore nizor hóiyat fúrai accíl de októt leikkíl. Héñtte yóggwa Rom cóor ot ziyól ot accíl (1:16). Pául ottu Timóti llói bála taalukat accíl, aar íba re boóut bar añr fua bouli hoiyé de asé (Filíppaiól 2:22; 1 Timóti 1:2; 1:18).
Yián óilde Páule ze sair gán ceñṛí zomát or hañse no ói zon-zon or hañse leikkíl, héntu ekkán. Zon-zon or hañse leikkíl de oinno tin nán ceñṛí híin óilde, 1 Timóti, Titus, edde Filimon. E síyara wa lekér de októt, ze Isáyi ókkol Romi hókumot or tole accíl ítara zulúm faar. Óitofare hétolla bóuli Pául ore yó ziyól ot díya gíyl deh, aar héntu tái Timóti re duk ókkol bordac goittó nosíyot goijjíl deh. Zendilla síyara 1 Timótit Páule Timóti re, gollot taalim-doya ókkol or baabute boóut úñciyari ókkol dyíl (1 Timóti 1:16-18). Yóggwa ye Timóti re yián óu hoóil de ki, muúntu ḍoóñr mosibot aibár asé (3:1).
Súrki ókkol
1. Timóti re Pául or sólam edde kessú tuaijjo (1:1-2; 1:3-18)
2. Timóti re duk ókkol bordac goittó mozbut óito howá (2:1-13)
3. Timóti re kessú úñciyari (2:14-26)
4. Timóti re muúntu óibo de híin or edde héñtte kii gorá foribó de híin or úñciyari (3:1—4:8)
5. Timóti re kessú nosíyot (4:9-22)
1
Sólam
1 Añí Pául, Allar moncá mozin edde Mosih Isár hañse asé de zindigir waada mozin Mosih Isár éggwa sáhabi.
2 Añr adorja fua Timótir hañse lekír.
Tor uore Baf Allar edde Mosih Isá añárar Malik or torfóttu rahámot, meérbani edde cánti nazil óuk.
Cúkuriya adai gorá edde tuaijjo
3 Ze Allar ebaadot añí añr dada-bafdada ókkol or ḍóilla sáf dil ottu gorí, añí toré añr duat hámica yaad gorí hé Allar cúkur gorí. 4 Tor hañdani monot uṛí añr ttu toré saitó kúb monehoór, zeéne añí kúciye bóri zaygoi. 5 Tor háṭi iman or baabute añr ttu monot asé, ziyán age tor nani Lowis ottu edde tor maa Eunik ottu yó accíl. Añr ttu furafuri ekin asé de ki, héndilla iman tor ttu yó asé.
6 Hétolla añí toré yaad goráidir, tor uore añr át díyaye Allar torfóttu tui ze niyamot faiyós, híyan ore aró zolai tul. 7 Kiyólla-hoilé Alla ye toh añára re ḍoor or ruh diiyé de no bólke taakot, muhábbot, edde nizoré sóoñlibar ruh diiyé deh.
8 Hétolla añárar Malik or gobá díte no córmaic, aar añí zee niki Íbar wasté bon así, añré lói yó no córmaic, bólke Allar diiya taakote kúchóbor tobolik gorí bolla añr fúañti duk faa. 9 Kiyólla-hoilé Alla ye toh añára re nejat diyé aar pak zindigi haṛai bolla ḍaikké; héndilla goijjé de añárar honó ham or zoriya no, bólke Íbar erada edde rahámot mozin, ze rahámot añárar uore duniyair foidayecir age lóti Mosih Isár usílaye óiye, 10 aar yala híyan añárar Nejatdoya Mosih Isá aiyóne añárar hañse zahér óiye. Hé Mosih ye moot ore dónco gorífelaiye, aar zindigi edde omoroni re kúchóbor or duara zahér gorídiye, 11 ze kúchóbor tobolik gorí bolla añré tobolik-goróya, sáhabi edde ustat ísafe basíloiye. 12 Hétolla bóuli añí e duk iín beggún fair; toóu añí córminda no, kiyólla-hoilé añí zani añí har uore iman ainní deh, aar furafuri ekin asé de ki, añí Íbar át ot ziyán gosáidiyi híyan ore Íba ye Íbar waafesir din foijjonto héfazot rakí faribó.
13 Tui añr torfóttu ziín or taalim faiyós híin ore sóiyi taalim ísafe dóri rak, aar Mosih Isár uore asé de imane edde muhábbote zindigi haṛa. 14 Ze amanot toré diiya giyéh híyan ore, añárar bútore táke de Pak-Ruhr bole héfazot rak.
15 Tui toh zanos, Ecíya elakar manúc beggún añr ttu alok óigiyoi, ítarar bútore Fugilas edde Hirmuginas óu asé.
16 Unisífaras or gór ṭíya re Malike rahám goróuk, kiyólla-hoilé yóggwa ye añr mon ore boóut bar foṭfoiṭṭa goijjé, aar añí bon así bouli íba córminda nó, 17 bólke Rom cóor ot aái yóggwa ye añré bicígori tuwai añr lói dola óiye. 18 Malike goróuk, yóggwa ye zen Malik or waafesir din Íba ttu rahám faa. Tui to bálagori zanos, yóggwa ye añré Ífisas cóor ot hotó modot goijjíl.