Injil Córif or Síyara
ÍFICIÓL
Síyara Íficiól or Foriso
E Síyara Íficiól óilde ekkán ceñṛí. Yián or lekóya óilde sáhabi Pául (1:1). Ceñṛí yián ore Íficiól or hañse borabor oh októt leikkíl, ze októt Kolóciól ceñṛí gán leká gíyl, yáni Isá Mosih zormo ói tokoriban háiṭ bosór baade. Zodi e ceñṛít máze síyara Kolóciól ot asé de héndilla sólam zanaiyé de lootfa no zaylé yo, beecbák ulema ókkole razi ó de ki, e Íficiól ceñṛí gán Páule beh leikké. Híyane dahá de, óitofare e ceñṛí gán hé elakar hookkán Isáyi zomát ot gúribar niyote leikkíl. Ceñṛí yián lekíbarcot Pául ziyól ot accíl bóuli nizebaze boiyan goijjé (3:1; 4:1; 6:20). Páule e ceñṛí gán Tukikus or áta foóñsail, zeñtté íba Ífisas cóor ot zaar (6:21-22).
Ífisas óilde ekkán bicí ḍoóñr cóor, ar Ecíya Mainar ot híyan óilde Romi ókkol or rasdáni. Ífisas cóor ot devi Artemis or mondir accíl ísafe híyan bicí mocúr (Hamól 19:23-31). Ífisas cóor or zomát twa cúrut bicí mozbut accíl, montor forezai bicí gaáli óigilgoi (Zahéri 2:1-7).
E ceñṛír foóilar ekdók híssat Páule buzáiye de, Alla ye keéngori Nizor bonda ókkol ore basíloiye edde Isá Mosihr duara guná ttu nejat diyé. Yóggwa ye Isáyi zomát ore gaa edde billíng lói fúwan goijjé, aar hoiyé de, Mosih óilde zomát or matá edde zomát or fattór ebbe zoruri wa. Ceñṛír dusára ekdók híssat Páule Isáyi ísafe zindigi haṛaibár baabute cíkaidiye.
Súrki ókkol
1. Pául or foriso edde Íficiól ore sólam (1:1-2)
2. Mosih llói zomát or kii bazá (1:3—3:21)
3. Isáyi ókkol ottu hondilla gori zindigi haṛa foribó (4:1—6:20)
4. Kessú mocuwara ókkol (6:21-24)
1
Sólam
1 Añí Pául, Allar moncá mozin Mosih Isár éggwa sáhabi.
Ífisas cóor ot Allar ze pak bonda ókkol asé ítarar hañse lekír, zetará Mosih Isár bútore imandár.
2 Tuáñrar uore Alla añárar Baf or edde Malik Isá Mosihr torfóttu rahámot edde cánti nazil óuk.
Mosihr duara ruúhani borhot ókkol
3 Añárar Malik Isá Mosihr Alla edde Baf or taarif óuk, zibá ye níki hárr ḍóilla ruúhani borhot ókkol asmani zagat añára re Mosihr usílaye diiyé, 4 zendilla Íba ye Íbar usílaye añára re duniyair foidayecir age lóti basí raikké, zeéne añára Íbar nozor ot pak edde behosúr óizaygoi. Muhábbote 5 Íba ye Nizor kúci edde moncá mozin age lóti añárar fáisela gorí raikké de, Isá Mosihr duara añára re Íbar fuain banaitó; 6 hétolla yala Íbar rahámot or mohímar taarif óibo, ziyán Íba ye añára re Íbar Adorja war usílaye goijjé. 7 Híyan óilde, añára hé Mosihr lou wór usílaye azad óiyi, yáni añárar guná-háta ókkol maf faiyí. Allar hé rahámot hotó ḍoóñr, 8 ziyán Íba ye añárar uore ódorbaára nazil goijjé. Nizor furafuri giyane edde buzá lói 9 Íba ye kúcir sáañte Nizor gufon moncá re añárar hañse zahér goijjé, ziyán Íba ye Mosihr duara fura goríbar fáisela goijjíl. 10 Híyan óilde, sóiyi októ furafuri ailé, asman zobin ot ziín asé híin beggún ore Mosihr bútore ektofák ot anón.
11 Zibá ye hárr kessú Nizor moncár erada mozin goré, Íba ye Nizor moksót mozin age lóti añárar ze fáisela gorí raikké, híyan olla bóuli añára Mosihr zoriya ekkán miras or bági yó óiyi, 12 zeéne añára zetará Mosihr uore agor ttu acá raikkí, añárar duara Íbar mohímar taarif ó. 13 Tuáñra yó toh sóiyi kalam, yáni tuáñrar nejat or kúchóbor fúni hé Mosihr uore iman ainnó. Zeñtté tuáñra iman ainnó, Íbar zoriya tuáñrar uore yó waada goijjá Pak-Ruh moór lagaidiya giyéh, 14 zibá óilde añárar miras or boona, otódin foijjonto lla zetódin Allar kinna bonda ókkol ore furafuri hálas gorífela nó zah, zeéne Íbar mohímar taarif ó.
Pául or dua
15 Hétolla toh tuáñra ttu Malik Isár uore ze iman asé edde Allar tamám pak bonda ókkol olla ze muhábbot asé, híin añí fúinni lóti, 16 tuáñra lla cúkuriya gorá bon gorí nó felai, bólke añr duat tuáñra re yaad rakí. 17 Añí magi de, añárar Malik Isá Mosihr Alla, zibá mohímar Baf, Íba ye tuáñra re giyan or edde Alla re zahér goré de Ruh dee fán, zeéne tuáñra Íba re beétor sinó. 18 Añí aró dua gorí de, tuáñrar dil or suk kún kúlouk, zeéne tuáñra zano de, Íba ye tuáñra re ze acá dii ḍaikké híyan kii, Íba ye Nizor pak bonda ókkol olla ze taajuippa miras raikké híyan hotó ḍoóñr, 19 aar Íbar ze kudurut añára imandár ókkol or hañse ham gorér híyan keén címa sára ḍoóñr. Híyan óilde ḍoóñr kudurut waán, 20 ziyán estemal gorí Íba ye Mosih re mora ttu zinda goijjé aar asmani zagat Íba re Nizor den ḍák ottu buágaraiye, 21 hárr ḍóilla hókumot or uore, adíkar or uore, taakot or uore, sóddarir uore edde zetó ḍóilla nam túwa gíyeh híin beggún or uore, siríf e jáhan ot no bólke aibó de jáhan ot óu. 22 Alla ye hárr kessú Íbar foor tole gorídiye, aar Íba re hárr kessúr matá banai zomát ore diifélaiye; 23 zibá óilde Íbar gaa; Íba zibá ye níki beggúlla beggún furaiféle, Íba hé zomát lói beh furafuri ó.