Injil Córif or Síyara
GALATIÓL
Síyara Galatiól or Foriso
E síyara Galatiól óilde ekkán ceñṛí. Yián or lekóya óilde sáhabi Pául (1:1). Ceñṛí yián ore Isá Mosih zormo ói salic-añcṭo bosór ottu fonzaic-háñt bosór or dormiyan ot leká gíyeh. Galatiól óilde manúc uitará zetará Galatíya elakat tákito, ziyán ore Romi córkare hókumot goittó. E ceñṛí gán lekíbar októt Pául háṭi hoṛé accíl de híyan ulema ókkole sóiyigori no zane, montor Ífisas edde Kórin cóor ottu honó ekkán ot accíl de óitofare.
Páule e ceñṛí gán Galatíya elakat accíl de Isáyi Yohúdir edde Beyohúdir zomát ókkol or hañse leikkíl deh. Yián lekár háas moksót óilde e búl cíkka gán ore hétap gorón, ki hoilé, Isáyi ókkol ottu Furana Niyom ot asé de Yohúdir córiyot ókkol amól gorár zorur, yáni ázomi gorár gán. Héṛe Isáyi ókkol or bútore Judáizer nam or eggwá dol accíl, zibá ye hoó de, Beyohúdi Isáyi ókkol ottu ázomi gorón fóros. Ítara Pául or sáhabigirir baabute yó súwal ókkol tuillíl, hétolla Páule nizor kessú kaháni hoói nizor sáhabigirir baabute sófai díyl (1:11—2:14). Yóggwa ye endilla hoói kúchóbor or baabute yó sófai díyl, ki hoilé, nejat hásil gorí fare de siríf Isá Mosihr uore iman aníle (2:16). Híyan óilde Allar rahámot or hádiya, manúc or no.
Súrki ókkol
1. Galatíyat asé de zomát ókkol ore Pául or sólam (1:1-5)
2. Kúchóbor siríf ek ḍoilla (1:6-10)
3. Sáhabi ísafe Pául or adíkar (1:6—2:21)
4. Córiyot edde rahámot (3—4)
5. Isáyi ókkol or azadi edde zimma (5:1—6:10)
6. Ahéri úñciyari edde nosíyot (6:11-18)
1
Sólam
1 Añí Pául, eggwá sáhabi. Añí e sáhabigiri honó ḍaáir torfóttu yáh honó ezzon or torfóttu faiyí de no, bólke Isá Mosihr torfóttu edde Baf Alla, zibá ye Íba re mora ttu zinda goijjé Íbar torfóttu faiyí deh.
2 Añí edde añr fúañti asé de imandár báiboináin*Girík zuban ot imandár ókkol ore báiyain hoói estemal gorá gíyeh, héṛe mayafuain edde morotfuain duní gún gólaiya asé, zetará Allar futzíyain; aró soó ayat 11; aar 3:15; 4:12, 28, 31; 5:11, 13; 6:1, 18. beggúne, Mosihr ze zomát ókkol Galatíyat asé híin or hañse lekír.
3 Tuáñrar uore añárar Baf Allar edde Malik Isá Mosihr torfóttu rahámot edde cánti nazil óuk. 4 Añára re toh e hóraf zobana ttu basai bolla hé Mosih ye añárar Baf Allar moncá mozin añárar guná lla Nizor zan diyé. 5 Abadulabad Allar taarif ówat tákouk. Aamin.
Ar honó kúchóbor nái
6 Añí bicí taajup óiyi, kiyólla-hoilé Zibá ye tuáñra re Mosihr rahámote ḍaikké Íba re tuáñra bicí hára sári, arek ḍoilla kúchóbor or híkka zoórgoi. 7 Asóle kúchóbor arek ḍoilla nái. Toóu endilla hodún manúc asé zetará tuáñra re oulzóul ot félaider, aar Mosihr kúchóbor bodoli félaito sár. 8 Montor ze kúchóbor añára tuáñrar hañse tobolik goijjí, hé kúchóbor or ulḍa zodi honókiye tuáñrar hañse arek ḍoilla kúchóbor tobolik goré, híyan añára nize gorí yáh asman or honó fírista ye goré, yóggwar uore gozzob forouk. 9 Añára age zendilla hoóilam héndilla ehón óu hoóir, zodi honókiye tuáñra kobul goijjó de hé kúchóbor or ulḍa arek ḍoilla kúchóbor tuáñrar hañse tobolik goré, yóggwar uore gozzob forouk.
10 Híyan hoói añí har taarif faito saáir deh, insán or né náki Allar? Aar náki añí maincóre kúci gorí bolla saáir de? Zodi añí aijjó foijjonto maincóre kúci goittó saitám, añí Mosihr gulam no óitam.
Pául keéngori sáhabi boinné
11 Báiboináin ókkol, añí tuáñra re yián zanaidir, ze kúchóbor añí tobolik goijjí híyan insán or banaouti no, 12 kiyólla-hoilé añí toh híyan no honó insán or torfóttu faiyí, aar no honókiye añré cíkaiye, bólke Isá Mosih Nize híyan añr hañse zahér goijjé deh.
13 Tuáñra de fúinno, ek hale añí Yohúdir dórmot táite añár solasol hondilla accíl, Allar zomát ore añí hotó zulúm goijjílam edde híyan ore dónco gorífelaito saáilam, 14 aar Yohúdi dórmo manat añí añr boccá Yohúdi ókkol or túaro uore accílam, aar añr dada-bafdadar rosóm ókkol olla añár ttu ódorbaára jus accíl. 15 Lekin Alla ye añré añr maar feṛot tákite lóti háas gorí raikkíl edde Nizor rahámote ḍaikkíl. Zeñtté Íba ttu fosón laiggé 16 Íbar Fua re añr hañse zahér gorí bolla, zeéne añí Beyohúdi ókkol or hañse hé Fua re kúchóbor ísafe tobolik gorí, héñtte añí honó insán ottu mocuwara nó lói, 17 aar zetará añr age lóti sáhabi asé, ítara llói milto Jerúsalem ot óu nó zai, bólke Arob dec ot giílamboi, yárbaade abar Damáskas cóor ot waafes aiccílam.
18 Tarfore tin bosór baade, Kéfas†Íba óilde Fitor lói milto añí Jerúsalem ot giílam, aar íbar fúañti héṛe fundóro din táikkilam; 19 montor sáhabi gún ottu ar honó sáhabi lói mili nó fari. Héṛe añí Malik or bái Yakub loi yó millílam. 20 Añí Alla re muúntu gorí hoóir, añí tuáñrar hañse ziín lekír híin misá no.
21 Baade añí Siíriyar edde Kilicíya elaka ókkol ot giílam. 22 Héñtte Yohúdiya elakat ze zomát ókkol Mosihr bútore asé híine añré muk siná no sintó. 23 Ítara siríf fúinto de, “Age ze manúc cwa ye añára re zulúm goittó, íba ye yala iman waán or tobolik gorér ziyán ore íba ye foóila dónco gorífelaito saáil.” 24 Baade ítara añr zoriya Allar taarif goittó.