Injil Córif or Síyara
HIBRANIÓL
Síyara Hibraniól or Foriso
E síyara Hibraniól óilde hímmot dede ekkán ceñṛí, ziyáne dahá de ki, Isá ye keéngori Furana Niyom or hodún poigam ókkol fura goijjé. E síyara Hibraniól ot Furana Niyom ore háiṭ bar foijjonto háwala goijjé, ziyáne sáf-sáf góri dahá de, Isá ye keéngori Yohúdir boro imam or baabute poigam edde zimma ókkol fura goijjé. Hétolla e síyara wa óilde Yohúdi Isáyi ókkol ore hímmot dede síyara. E síyara Hibranióle dahá de, Isá ye keéngori Córiyot adai goijjé zeéne imam ókkol ottu ar kurbani peec gorá no fore. Isá óilde hárr gunár kurbani, ekbar ot hámica lla. Añárar zobanar Isáyi ókkole yó e síyara Hibraniól ottu bol faa, Isá Mosihr fisáli dóri táki bolla, zibá ye añára Allar uore bóraca gorí fari fán edde lagatar bóraca gorát táki fari fán gorídiye (12:2).
E síyara Hibraniól lwár lekóya hon honókiye no zane, montor ulema ókkol or mocuwara óilde, sáhabi Pául, Lukas, edde Bárnabas or bútottu honó ek zone leikké. E síyara wa hoñtté leikké yó honókiye no zane, montor boóut kiyé biccác goré de, Isá Mosihr zormo ttu lóti hóittor bosór nó óite leká gíyeh. Jerúsalem ore hóittor bosór ot beh báñgifela gíyeh, montor zibá ye e síyara wa leikké, yóggwar leká mozin yibá leikké de októt Jerúsalem báñgi nó fele. Síyara Hibraniól yibá Rom cóor ot beh leikké (13:24) aar óitofare hookkán Isáyi zomát ot yibá gúrat accíl.
Súrki ókkol
1. Allar nobi ókkol edde fírista ókkol or túaro Isá ḍoóñr (1:1—4:13)
2. Jerúsalem cóor ot asé de baitul-mukaddos ot ze imam ókkole háademi goré ítarar túaro Isá ḍoóñr. (4:14—7:28)
3. Alla ye Muúsa re diíl de Córiyot or duara Nizor koum loi ze razinama age goijjíl, híyan or túaro Isár hédmotdari ḍoóñr (8:1—10:31)
4. Isá hárr mikká ttu ḍoóñr de híyan or baabute edde hookkán meésal dí nosíyot (10:32—13:19)
5. Dua diya edde ahéri hotá (13:20-25)
1
Alla ye Nizor Fuar duara hotá hoiyé
1 Agor zobanat Alla ye dada-bafdada ókkol or hañse nobi ókkol or duara boóut kessú boóut torikaye hoóil de asé, 2 montor e ahéri zobanat Íba ye añára llói Íbar Fuar duara beh hotá hoiyé, Zibá re Íba ye hárr kessúr mirasdár banaiyé edde Zibár usílaye Íba ye duniyai yó foida goijjé. 3 Aar Íba óilde Allar tozollir nur edde Íbar fura sóbi; Íba ye hárr kessú Nizor taakoti kalame sóoñli raké. Íba ye añárar guná ókkol dúifelai baade asman ot Alla Tálar den ḍák ottu boói táikke. 4 Hé ísafe, hé Fua fírista ókkol or túaro boóut bicí ḍoóñr óigiyoi, zendilla Íba ye miras ot híin or túaro boóut ḍoóñr nam faiyé.
Hé Fua fírista ókkol or túaro ḍoóñr
5 Kiyólla-hoilé Alla ye Íbar honó fírista re honódin eén hoiyé de asé né,
“Tuñí óilade Añr Fua,
aijja Añí Tuáñr Baf óiyi”*Zobur 2:7?
Yáh eén hoiyé de,
“Añí Íbar Baf óiyum,
aar Íba Añr Fua óibo”†2 Sémuel 7:14; 1 Itihác-nama 17:13?
6 Bólke zeñtté Íba ye Nizor foóila Fua re duniyait difeṛár, Íba ye hoór de,
“Allar tamám fírista ókkole Íba re sóida goró.”
7 Fírista ókkol or baabute Íba ye hoór de,
“Íba ye Nizor fírista ókkol ore boiyar bana,
aar Nizor háadem ókkol ore ooin or zilha bana.”‡Zobur 104:4
8 Montor Fua re Íba ye hoór de,
“Ó Alla, Tuáñr toktó abadulabad foijjonto hámica zari tákibo,
aar insáfir laṛí óilde Tuáñr raijjor laṛí.
9 Tuñí forhésgari re muhábbot goró aar bedini re nafórot goró;
hétolla, Alla, Tuáñr Alla ye Tuáñr uore kúcir tel di basíloi yore
Tuáñre Tuáñr sáañti ókkol or túaro uore goijjé.”§Zobur 45:6,7
10 Íba ye aró hoór de,
“Ó Malik, foóila cúrut duniyair buniyadi ḍáillo de Tuñí,
aar asman ókkol óilde Tuáñr át or toiyari.
11 Híin toh nac óizayboi, montor Tuñí ṭiki tákiba;
híin beggún hoor or ḍóilla furan óizayboi.
12 Tuñí híin ore saddor or ḍóilla boṛifelaiba,
aar híin ore bodoliféla zaybo.
Montor Tuñí hámica ek ḍoilla tákiba,
aar Tuáñr hóiyat honódin no fúraibo.”*Zobur 102:25-27
13 Montor Íba ye honó fírista re honódin eén hoiyé de asé né,
“Añr den ḍák ottu boiyó,
zetukkún foijjonto Añí Tuáñr duccon ókkol ore
Tuáñr foor tole gorí nó felai”†Zobur 110:1?
14 Fírista ókkol beggún kí hédmot goré de ruh no, ziín ore uitarár hédmot goittó difeṛá gíyeh zetará nejat miras faibo?