Injil Córif or Síyara
MOTI
Síyara Motir Foriso
Síyara Moti óilde Noya Niyom or eggwá síyara, zibát Isá Mosihr zindigir baabute boiyan goijjé. Háasgori, Noya Niyom or foóilar sairó síyara re “Injil” bouli hoó, ziyán or maáni “Kúchóbor” yáni “Gom Hóbor.” Síyara híin ore Isá mori baade Moti, Markus, Lukás, edde Yohánna ye leikké. Síyara Moti hoñtté leikké híyan or tarík ulema ókkole sóiyigori no zane, montor óitofare Isá Mosih zormo ói háiṭ-bosór baade. Síyara Moti re hon zagat leikké de híyan óu no zane, lekin boóut maincé ṭáare de, yibá re Filístin elakat yáh Jerúsalem cóor ot leká gíyeh.
Síyara yibár lekóya óilde Moti, zibá ézzon Isá ye ḍaki nizor ummot óito hoibár age házana-tulóya accíl. Yóggwa re Leévi yó ḍake. Baró zon sáhabir bútottu Moti yó ézzon sáhabi accíl, yóggwa ye e síyara wa Yohúdi foróya ókkol olla leikké. Híyan yóggwa ye furana niyom ottu háiṭ twar túaro bicí ayat ore háwala díye de híyan lói sáf góri zana zah. Moti ye Isá Mesáiya de, yáni Allar basí raikká basailoya de híyan daháito saiyé, zibár baabute agun hotá hoiyá asé. Moti ye Allar raijjor baabute yó bicí leikké. Yohúdi ókkol ottu acá accíl de, Mesáiya síasi raijjor baáñcca bonibó. Montor Moti ye Allar ruúhanir raijjor baabute mozbut gori boiyan gorí ítarar acá gollot de híyan sábut goijjé.
E síyara Motit háwala díya gíyeh de Furana Niyom or ayat beggún or zoriya, Noya Niyom ore síyara yíba llói cúru goitté gom. Síyara Moti yibá ye Furana Niyom ore Noya Niyom loi zura deh. Ulema ókkole rai diyé de, Furana Niyom or foóilar fañs swá síyara ziín Muúsar Tourat, Moti ye híin mozin e síyara wa lekíto saiyé. Zaitun faár ot Isá ye taalim dyíl de híin lói (5—7) edde Muúsa re Alla ye Córiyot díyl de híin lói borabor gorá zah (Córiyot-nama 19:3—23:33).
Súrki ókkol
1. Isár háandan or foriso edde Isár zormo (1—2)
2. Yaháyar tobolik (3:1-12)
3. Isár bápṭisma edde Íba re entán gorá (3:13—4:11)
4. Galil ot beggún or muúntu Isár ham (4:12—18:35)
5. Galil ottu Jerúsalem or uzu Isár rowana (19—20)
6. Jerúsalem or ḍáke edde bútore Isár ahéri háfta (21—27)
7. Isá mora ttu zinda ówa edde maincóre dahá díya (28)
1
Isá Mosihr fissán
(Luk 3:23-38)
1 Isá Mosih*Mosihóilde eggwá Girík lofzó aar Hibrú zuban ot ‘Mesáiya’ hoó, duníyan or maáni óilde ‘Basíloiya wa’ óilde Dawud or nosól or, aar Dawud óilde Ibrahím or nosól or. Isá Mosihr fissán or foriso endilla:
2 Ibrahím or fua Isahák;
Isahák or fua Yakub;
Yakub or fua Yohúdah edde yóggwar báiyain.
3 Yohúdahr fua Fares edde Zera, aar ítarar maa accíl Tamar;
Fares or fua Hisron;
Hisron or fua Ram.
4 Ram or fua Amminadab;
Amminadab or fua Nacon;
Nacon or fua Sálmon.
5 Sálmon or fua Boaz, yóggwar maa accíl Rahába;
Boaz or fua Obed, yóggwar maa accíl Ruút;
Obed or fua Jesi.
6 Jesir fua baáñcca Dawud.
Dawud or fua Sóloman, yóggwar maa óilde Borcíba, zibá age Uriyar bou accíl.
7 Sóloman or fua Rehobom;
Rehobom or fua Abiya;
Abiyar fua Asa.
8 Asar fua Jehócafat;
Jehócafat or fua Joram;
Joram or fua Uziya.
9 Uziyar fua Jotam;
Jotam or fua Aház;
Aház or fua Hézekiya.
10 Hézekiyar fua Manasé;
Manasér fua Amon;
Amon or fua Josíya.
11 Josíyar fua Jekoníya edde yóggwar báiyain. Ítarar zormo oñtté óoil zeñtté Isráil koum ore bondi banai Babilon dec ot loizar.
12 Iín óilde ítara re bondi banai Babilon ot loizai baade:
Jekoníyar fua Cáltiyel,
Cáltiyel or fua Zerubabel.
13 Zerubabel or fua Abihúd;
Abihúd or fua Eliyakím;
Eliyakím or fua Azor.
14 Azor or fua Sádok;
Sádok or fua Akim;
Akim or fua Elihúd.
15 Elihúd or fua Eliyazar;
Eliyazar or fua Matan;
Matan or fua Yakub.
16 Aar Yakub or fua óilde Moriyam or hócom Yusúf. Hé Moriyam ottu Isá zormo óoil, zibá re Mosih bóuli hoó.
17 Héndilla góri Ibrahím ottu lóti Dawud foijjonto soiddó fissán. Dawud ottu lóti Babilon ot bondit loiza foijjonto soiddó fissán; aar bondi banai Babilon ot loiza ttu lóti Mosih foijjonto soiddó fissán.
Isá Mosihr zormo
(Luk 2:1-7)
18 Isá Mosihr zormo endilla gori óiye: Íbar maa Moriyam or zuragatá Yusúf lói óoil, montor ítara milmilab goríbar age, Pak-Ruhr kudurute híba hámil óiye de faa giyéh. 19 Híbar hócom Yusúf forhésgar manúc accíl. Yóggwa ttu zettót Moriyam ore maincór muúntu córom díto mone no hoór, híba ttu zuitégori alok óizaytoi niyot goijjíl.
20 Yóggwa ye híyan báfer de októt, Mabud or ek fírista ye yóggwa re cóppon ot dahá dí hoór de, “Ó Dawud or nosól Yusúf, Moriyam ore biyá goitté no ḍooraiyó, kiyólla-hoilé híbar feṛot ze Fua óiye Íba Pak-Ruhr kudurute óiye deh. 21 Híba ttu éggwa Morotfua óibo, tuñí Íbar nam Isá†Isánam or maáni óilde ‘Nejatdoya’ yáh ‘Basailoya’ rakíba, kiyólla-hoilé Íba ye Nizor manúc ókkol ore ítarar guná ttu basaibó.”
22 Híin beggún etollá óiye, zeéne Mabude nobir duara hoóil de yián fura ó, 23 “Soó, ek kuwári‡Abiyáta mayafua zibá ye honókiyo llói milmilab goijjé de nái, híba re hoó de kuwári mayafua hámil óibo, aar híba ttu éggwa Morotfua óibo, ítara Íbar nam rakíbo de Immanuel,”§Yesáyah 7:14 ziyán or torjuma óilde, ‘Alla añárar fúañti.’
24 Baade Yusúfe gúm ottu uṛí undilla goijjé zendilla gorí bolla Mabud or fírista ye yóggwa re hókum díyl, yóggwa ye Moriyam ore biyá gorífelaiye, 25 montor híba ttu Fua wa zormo nó óiyo foijjonto híba llói milmilab nó goré. Baade yóggwa ye Fua war nam Isá raikkíl.