Injil Córif or Síyara
TITUS
Síyara Titus or Foriso
E síyara Titus óilde ekkán ceñṛí. Yián or lekóya óilde sáhabi Pául. Yián óilde yóggwa ye zomát or hañse no ói zon-zon or hañse leikké de sair gán ceñṛí ttu ekkán. Zon-zon or hañse leikkíl de oinno tin nán ceñṛí híin óilde, 1 Timóti, 2 Timóti, edde Filimon. Páule e ceñṛí gán Titus or hañse lekíle yo, beggún or muúntu ḍoóñr-ḍoóñr góri forí fare fángori leikké. Añára híyan zani fari de, Páule nizor sáhabigirir zimma buzáidiye de hétolla, ziín Tituse age lóti zainto. Óitofare e ceñṛí gán Isá Mosih zormo ói háiṭ-tin bosór ottu háiṭ-fañs bosór or dormiyan ot leká gíyeh.
Keret ḍiyar uore Mosihr ze zomát ókkol accíl, híin ore solai bolla Páule Titus ore aráil de asé. Páule e ceñṛí gán leikké de, Titus ore zomát or murubbi-neta ókkol basíbar edde ítara re torbiyot dibar cíkka díto. Yóggwa ye ekí ḍóilla cíkka Timótir hañse ze ceñṛí gún leikké híin ot óu diyé. Yóggwa ye e ceñṛít buzáiye de, zomát or neta ókkol ore hottór mana zaybo. E zobanar zomát ókkol óttu edde zomát or neta ókkol óttu hé zoruriyot ókkol or uzu bálagori díyan diyar zorur.
Súrki ókkol
1. Dindár neta ókkol tulíbar baabute (1:1-16)
2. Dindári zindigi haṛaibár torbiyot diyar baabute (2:1—3:11)
3. Kessú ahéri hotá edde sólam (3:12-15)
1
Sólam
1 Añí Pául, Allar gulam edde Isá Mosihr éggwa sáhabi. Añr zimmadari óilde, Allar basíloiya bonda ókkol ore iman or foñt ot anón edde dindári zindigi haṛaibár ze sóiyi asé hé sóiyi ítara re zanaidon. 2 Hé sóiyiye ítara re ofúrani zindigir acá diibo; ze Alla ye bilkúl misá hotá no hoó Íba ye hé zindigi diibar waada duniyai foida goríbar age lóti goijjíl, 3 aar borabor októt Nizor hé kalam ore tobolik or duara zahér goijjé, ze tobolik or zimma añí añárar Nejatdoya Allar hókume faiyí.
4 Titus or hañse lekír, zibá Mosihr uore añárar ḍóilla iman ainné de hé rúwate añr sóiyi fua.
Tor uore Baf Allar edde Mosih Isá añárar Nejatdoyar torfóttu rahámot edde cánti nazil óuk.
Murubbi-neta óibar zoruriyot ókkol
5 Añí toré Keret ḍiyat etollá eri aiccí, zeéne ziín goríbar baki táigiyegoi híin tui ṭík gorífelai faros edde añí toré zendilla hókum díyi hé mozin hárr cóor or zomát ot murubbi-neta ókkol tulí faros. 6 Monot rakíc, ze manúc ore tulíbi íba behosúr ówa foribó, ek bou wór hócom ówa foribó, íbar fuain imandár ówa foribó zetarár ayacir edde nafórmanir honó elzam nái. 7 Kiyólla-hoilé zomát or neta re Allar torfóttu zimma diiya giyéh ísafe, íba behosúr ówa foribó, ekguañjja no ówa foribó, bánggori guccá-goróya no ówa foribó, nicákur no ówa foribó, maramari-doya no ówa foribó, nazayes nofár lalósbon no ówa foribó, 8 bólke íba meémandari-goróya ówa foribó, gom ham ore fosón-goróya ówa foribó, akkól góri soloya ówa foribó, forhésgar ówa foribó, pak ówa foribó, aar nizoré sóoñli-faroya ówa foribó. 9 Íba ttu kalam uúin ot lagi táka foribó ziín biccácdar aar añára di de taalim or mozin, zeéne íba ye sóiyi taalim or duara nosíyot ókkol gorí fare aar zetará hé taalim or muhálef goré ítarar gollot sábut gorí fare.
10 Kiyólla-hoilé ámana-goróya, galu edde dagabaz ókkol toh boóut zon asé, háasgori ázomi goijjá gún or bútore. 11 Ítarar muk bon gorár zorur, kiyólla-hoilé ítara nazayes nofá hásil gorí bolla fura gór-gór endilla taalime borbad diféler ziín ítara ttu no don accíl. 12 Ítarar nizor ek nobi ye hoóil de ki, “Kereti ókkole hámica misá hotá hoó; ítara faári januwar or ḍóilla alcí edde ḍain.” 13 Hotá híyan bilkúl sóiyi. Hétolla tui horar sáañte ítarar golti daháide, zeéne ítarar iman furafuri sóiyi óizagoi, 14 aar ítara zen Yohúdi ókkol or banaouti kissá ókkol or uzu edde ze manúc ókkol sóiyi ttu lorigiyói ítarar hókum or uzu han no deh. 15 Zetará pak, ítara lla toh hárr kessú pak; montor zetará nafak edde iman sára, ítara lla honó kessú pak nái, kiyólla-hoilé ítarar zehén, hélom, duníyan nafak óigiyoi. 16 Ítara Alla re zani hoói dabi goré, montor nizor hamhorose Íba re inkar goré. Ítara nafórot or laayek, nafórman, aar honó gom ham or kaabel no.