١ بُولُوسْ، رَّاسُولْ إِتّْوَاڒَاغَانْ ذ إِتّْوَاسكّنْ ن يَاسُوع لْمَاسِيحْ عْلَاحْسَابْ مِينْ إِخْسْ أَربِّي، ذ ثَاوْمَاثْ سُوسْثِينِيسْ، ◼1:‏1 ’رَّاسُولْ‘ - نِيغْ ’أَمَازَانْ‘. ٢ إِ ثْمسْمُونْثْ ن أَربِّي إِ إِدْجَانْ ذِي كُورِينْثُوسْ، إِنِّي إِتّْوَاڒَاغَانْ ذ إِنِّي ذ إِمْقدَّاسنْ، إِنِّي إِتّْوَاقدّْسنْ ذِي يَاسُوع لْمَاسِيحْ، ؤُ إِ مَارَّا إِنِّي مَانِي مَا إِتّْڒَاغَانْ خْ يِيسمْ ن سِيذِيثْنغْ يَاسُوع لْمَاسِيحْ، ونِّي ذ سِيذِيثْسنْ ذ سِيذِيثْنغْ. ◘1:‏2 يُوح. 17‏:‏19؛ ڒخ. 15‏:‏9؛ رُوم. 1‏:‏7؛ أَفا. 1‏:‏1؛ 1 تس. 4‏:‏7؛ 2 تِيم. 2‏:‏22. ٣ أَذْ خَاومْ يِيڒِي أَرْضَا ذ ڒهْنَا زِي أَربِّي، بَابَاثْنغْ، ؤُ زِي سِيذِيثْنغْ يَاسُوع لْمَاسِيحْ. ◘1:‏3 رُوم. 1‏:‏7؛ 2 كُور. 1‏:‏2؛ أَفا. 1‏:‏2؛ 1 بُط. 1‏:‏2.

٤ نشّْ ڒبْذَا تّْقَاذِيغْ أَربِّي إِنُو ذِي طّْوعْ نْومْ خْ أَرْضَا ن أَربِّي إِ ذ أَومْ إِمّوْشنْ ذِي يَاسُوع لْمَاسِيحْ. ٥ مِينْزِي ذِي مَارَّا ثْذوْڒمْ زَّايسْ ذ تُّوجَّارْ، ذِي مَارَّا أَوَاڒْ ؤُ ذِي مَارَّا ثُوسّْنَا، ◘1:‏5 كُول. 1‏:‏9. ٦ مَاغَارْ شّْهَاذثْ ن لْمَاسِيحْ ثتّْوَاضْمنْ ذَايْومْ، ٧ مِينْزِي ؤُڒَا ذ إِجّْ ن زّْعَافْ ن ثوْهِيبِينْ نّسْ وَارْ ذَايْومْ إِقِّيمْ، أَمْ ثتّْرَاجَامْ أَسَارْڭَابْ ن سِيذِيثْنغْ يَاسُوع لْمَاسِيحْ، ◘1:‏7 فِيل. 3‏:‏20؛ ثِيث. 2‏:‏13. ٨ مِينْزِي نتَّا أَذْ كنِّيوْ إِضْمنْ عَاوذْ غَارْ ؤُنڭَّارْ، حِيمَا أَذْ ثِيڒِيمْ بْڒَا ڒْْعِيبْ ذڭْ وَاسّْ ن سِيذِيثْنغْ يَاسُوع لْمَاسِيحْ. ◘1:‏8 1 تس. 3‏:‏13؛ 5‏:‏23. ٩ أَربِّي ذ أَمْثِيقِّي، ذ ونِّي زِي ثتّْوَاڒَاغَامْ كنِّيوْ غَارْ ثْمُونْثْ أَكْ-ذ مِّيسْ يَاسُوع لْمَاسِيحْ، سِيذِيثْنغْ. ◘1:‏9 إِرْم. 32‏:‏40‏-‏44؛ يُوح. 15‏:‏5؛ 1 كُور. 10‏:‏13؛ ڭال. 2‏:‏20؛ 1 تس. 5‏:‏24؛ 1 يُوح. 1‏:‏3.

١٠ مَاشَا تّْزَاوَاڭغْ كنِّيوْ، أَ أَيْثْمَا، س يِيسمْ ن سِيذِيثْنغْ يَاسُوع لْمَاسِيحْ، أَذْ ثسِّيوْڒمْ مَارَّا س إِجّْ ن وَاوَاڒْ، وَارْ ثتّمْسبْضِيمْ جَارْ أَومْ، مَاشَا إِڒِيمْ ثْمُونمْ نِيشَانْ س نّيّثْ ذ إِشْثنْ ذ ؤُخَارّصْ ذ إِجّنْ. ◘1:‏10 رُوم. 12‏:‏16؛ 15‏:‏5؛ فِيل. 2‏:‏2؛ 3‏:‏16؛ 1 بُط. 3‏:‏8. ١١ مِينْزِي سَّارْڭْبنْ أَيِي إِنِّي زِي ثَادَّارْثْ ن كْلُووِي، أَ أَيْثْمَا إِنُو، بلِّي جَارْ أَومْ إِمنْغَانْ. ١٢ خْسغْ أَذْ إِنِيغْ، أَقَا شَا زَّايْومْ قَّارنْ: ’نشّْ أَقَا أَيِي زِي بُولُوسْ!‘ ؤُ شَا نّغْنِي: ’نشّْ زِي أَپُولُّوسْ!‘، ؤُ شَا نّغْنِي عَاوذْ: ’نشّْ زِي كِيفَا!‘، ؤُ شَا نّغْنِي قَّارنْ: ’نشّْ زِي لْمَاسِيحْ!‘ ◘1:‏12 ڒخ. 18‏:‏24؛ 1 كُور. 3‏:‏4؛ 16‏:‏12. ١٣ مَا أَقَا لْمَاسِيحْ إِتّْوَابْضَا ذ إِوثْوِيثنْ؟ مَا ثُوغَا بُولُوسْ إِتّْوَاصلّبْ ذِي سِّيبّثْ نْومْ؟ نِيغْ ثُوغَا كنِّيوْ ثتّْوَاسّْغضْصمْ س يِيسمْ ن بُولُوسْ؟ ١٤ نشّْ تّْقَاذِيغْ أَربِّي إِنُو وَارْ سّْغضْصغْ ؤُڒَا ذ إِجّْ زَّايْومْ مْغِيرْ كْرِيسْپُوسْ ذ خَايُوسْ وَاهَا، ◘1:‏14 ڒخ. 18‏:‏8؛ رُوم. 16‏:‏23. ١٥ أَڒَامِي ؤُڒَا ذ إِجّنْ أَذْ يِينِي بلِّي سّْغضْصغْ ذڭْ يِيسمْ إِنُو. ١٦ عَاوذْ سّْغضْصغْ ثَاوَاشُونْثْ ن سْثِيفَانُوسْ، خنِّي وَارْ سِّينغْ شَا، مَا سّْغضْصغْ حذْ نّغْنِي. ◘1:‏16 1 كُور. 16‏:‏15، 17. ١٧ مَاغَارْ لْمَاسِيحْ وَارْ ذ أَيِي د-إِسّكّْ حِيمَا أَذْ سّْغضْصغْ، مَاشَا حِيمَا أَذْ بَارّْحغْ س ڒخْبَارْ أَصبْحَانْ، وَارْ إِدْجِي س ثِيغِيثْ ن وَاوَاڒنْ، حِيمَا وَارْ إِتّتّْوَاسّْبطّڒْ صَّالِيبْ ن لْمَاسِيحْ. ◘1:‏17 1 كُور. 2‏:‏1، 4؛ 2 بُط. 1‏:‏16.

١٨ مِينْزِي أَوَاڒْ ن صَّالِيبْ ذ ثُوبُّوهڒْيَا ذِي ثِيطَّاوِينْ ن يِينِّي إِ غَا إِودَّارنْ، مَاشَا إِ نشِّينْ، إِنِّي إِدَّارنْ، مَانْ أَيَا ذ جّهْذْ ن أَربِّي. ◘1:‏18 رُوم. 1‏:‏16. ١٩ مِينْزِي ثُورَا:

”أَذْ أَردّْدْجغْ ثِيغِيثْ ن إِمِيغِيسنْ

ؤُشَا أَذْ كّْسغْ ڒفْهَامثْ ن إِفهَّامنْ.“ ◘1:‏19 أَيُوبْ 5‏:‏12؛ إِشا. 29‏:‏14.

٢٠ مَانِي إِدْجَا ؤُمِيغِيسْ؟ مَانِي إِدْجَا ؤُمْسڒْمَاذْ ن إِذْلِيسنْ؟ مَانِي إِدْجَا بُو-ؤُمْحَارْوضْ ن دُّونشْثْ-أَ؟ مَا وَارْ إِسّْشنْ أَربِّي بلِّي ثِيغِيثْ ن دُّونشْثْ-أَ ذ ثُوبُّوهڒْيَا؟ ◘1:‏20 إِشا. 33‏:‏18. ٢١ مِينْزِي ذِي ثِيغِيثْ ن أَربِّي، دُّونشْثْ وَارْ ثسِّينْ شَا أَربِّي زِي سِّيبّثْ ن ثِيغِيثْ ن يِيخفْ نّسْ، أَقَا ثُوغَا يَارْضَا أَربِّي أَذْ إِوْشْ ثُوذَارْثْ إِ يِينِّي يُومْننْ س ثُوبُّوهڒْيَا ن ثْبَارّحْثْ. ◘1:‏21 مت. 11‏:‏25؛ لك. 10‏:‏21. ٢٢ مِينْزِي ؤُذَاينْ تَّارنْ ڒعْڒَامَاثْ ؤُ إِرَامِييّنْ أَرزُّونْ ثِيغِيثْ، ◘1:‏22 مت. 12‏:‏38؛ 16‏:‏1؛ يُوح. 4‏:‏48. ٢٣ مَاشَا نشِّينْ نتّْبَارّحْ لْمَاسِيحْ، ذ ونِّي إِتّْوَاصلّْبنْ، أَقَا-ث ذ ثَاعنْكْرِيفْثْ إِ وُوذَاينْ، ذ ثُوبُّوهڒْيَا إِ إِرَامِييّنْ، ◘1:‏23 مت. 11‏:‏6. يُوح. 6‏:‏60، 66. ٢٤ مَاشَا إِ يِينِّي إِتّْوَاڒَاغَانْ، أَمْ وُوذَاينْ أَمْ إِرَامِييّنْ، أَقَا لْمَاسِيحْ ذ جّهْذْ ن أَربِّي ذ ثِيغِيثْ ن أَربِّي. ◘1:‏24 كُول. 2‏:‏3. ٢٥ مِينْزِي ثُوبُّوهڒْيَا ن أَربِّي ذ ثْمِيغِيسْثْ خْ إِوْذَانْ، ؤُ ثُوضْعفْثْ ن أَربِّي ثجْهذْ خْ إِوْذَانْ.

٢٦ خنِّي، أَ أَيْثْمَا، خْزَارمْ مَامّشْ ثدْجَامْ غَارْ وَاسّْ ن ثْڒَاغِيثْ نْومْ، أَقَا وَارْ ثدْجِيمْ ذ أَطَّاسْ ن إِمِيغِيسنْ عْلَاحْسَابْ بْنَاذمْ، نِيغْ ذ أَطَّاسْ ن يِينِّي غَارْ ثدْجَا صُّولْطَا، نِيغْ ذ أَطَّاسْ ن ثَارْوَا ن ثَاصِيڒثْ. ◘1:‏26 يُوح. 7‏:‏48؛ يَاع. 2‏:‏5. ٢٧ مَاغَارْ أَربِّي أَقَا إِفَارْزْ إِپُوهَاڒِييّنْ ن دُّونشْثْ، حِيمَا أَذْ زَّايْسنْ إِسّحْشمْ إِمِيغِيسنْ، ؤُشَا إِمُوضْعِيفنْ ن دُّونشْثْ إِفَارْزْ إِ-ثنْ أَربِّي، حِيمَا أَذْ زَّايْسنْ إِسّحْشمْ أَيْثْ ن بُو-صُّولْطَا. ٢٨ ؤُشَا يِينِّي د-إِخڒْقنْ أَمْ وَارْ غَارْسنْ شَا ذِي دُّونشْثْ، ذ يِينِّي إِتّْوَاسّحْقَارنْ، ذ يِينِّي وَارْ إِدْجِينْ ذ شَا، أَقَا إِفَارْزْ إِ-ثنْ أَربِّي، حِيمَا أَذْ إِبْضڒْ إِنِّي إِدْجَانْ ذ شَا، ٢٩ حِيمَا ؤُڒَا ذ إِجّْ ن بْنَاذمْ ن ويْسُومْ، وَارْ إِتّْفيّشْ شَا زَّاثسْ. ٣٠ مَاشَا كنِّيوْ ثدْجَامْ زَّايسْ ذِي يَاسُوع لْمَاسِيحْ، ونِّي ذ أَنغْ إِذوْڒنْ ذ ثِيغِيثْ ن أَربِّي ذ ثْسڭْذَا ذ ثُوقدّْسِي ذ ؤُسنْجمْ، ◘1:‏30 إِرْم. 23‏:‏5؛ يُوح. 17‏:‏19. ٣١ أَمْ مَامّشْ ثُورَا: ”أجّْ ونِّي إِسّمْغَارَانْ، أَذْ إِسّمْغَارْ ذِي سِيذِي.“ ◘1:‏31 إِشا. 65‏:‏16؛ إِرْم. 9‏:‏22‏-‏23؛ 2 كُور. 10‏:‏17.