١ أَ أَيْثْمَا، نشّْ وَارْ زمَّارغْ أَذْ كِيومْ سِّيوْڒغْ أَمْ إِوْذَانْ إِنِّي إِدَّارنْ عْلَاحْسَابْ أَرُّوحْ، مَاشَا أَمْ يِينِّي إِدَّارنْ عْلَاحْسَابْ أَيْسُومْ ن بْنَاذمْ وَاهَا، أَمشْنَاوْ إِسيْمَانْ ذِي لْمَاسِيحْ. ٢ أَقَا وْشِيغْ أَومْ أَذْ ثسْومْ أَغِي، وَارْ إِدْجِي ذ أَڒقِّيمْ إِمْثنْ، مِينْزِي ثُوغَا وَارْ ذ أَسْ ثْزمَّارمْ، أَڒْ إِ ڒخُّو ؤُ وَارْ ذ أَسْ ثْزمَّارمْ عَاذْ، ◘3:‏2 عبر. 5‏:‏12؛ 1 بُط. 2‏:‏2. ٣ س مِينْزِي كنِّيوْ عَاذْ ذڭْ ويْسُومْ. مَاغَارْ مَاڒَا ذِينْ عَاذْ جَارْ أَومْ ڒحْسذْ ذ إِمنْغَانْ ذ ؤُمْسبْضِي، مَا وَارْ ثدْجِيمْ عَاذْ ن دَّاثْ نِيغْ ثڭُّورمْ عَاذْ ذڭْ ويْسُومْ؟ ◘3:‏3 1 كُور. 1‏:‏11؛ ڭال. 5‏:‏19؛ يَاع. 3‏:‏16. ٤ مِينْزِي مَاڒَا إِجّنْ زَّايْومْ إِقَّارْ: ’نشّْ أَقَا أَيِي زِي بُولُوسْ!‘ ؤُ ونّغْنِي إِقَّارْ: ’نشّْ أَقَا أَيِي زِي أَپُولُّوسْ!‘، مَا خنِّي كنِّيوْ وَارْ ثدْجِيمْ شَا دَّاثْ؟ ◘3:‏4 1 كُور. 1‏:‏12. ٥ مَاغَارْ مِينْ إِعْنَا أَپُولُّوسْ ؤُ مِينْ إِعْنَا بُولُوسْ؟ أَقَا أَثنْ مْغِيرْ ذ إِمْسخَّارنْ إِ زِي ثْذوْڒمْ ثُومْنمْ، ؤُشَا كُوڒْ إِجّنْ أَمْ مَامّشْ ذ أَسْ إِوْشَا سِيذِي. ◘3:‏5 ڒخ. 18‏:‏24؛ 1 كُور. 1‏:‏12؛ 16‏:‏12. ٦ أَقَا نشّْ ژُّوغْ، أَپُولُّوسْ إِسُّو، مَاشَا أَربِّي إِسّغْمِي. ◘3:‏6 ڒخ. 18‏:‏26؛ 19‏:‏1. ٧ خنِّي ونِّي إِتّژُّونْ وَارْ إِدْجِي ذ شَا ؤُڒَا ذ ونِّي إِتّسُّونْ، مَاشَا أَربِّي ونِّي إِسّْغمَّاينْ. ٨ مَاشَا ونِّي إِتّژُّونْ ذ ونِّي إِتّسُّونْ ذ إِجّنْ، وَاخَّا كُوڒْ إِجّْ ثكَّارْ أَسْ-د ڒْْمُونثْ نّسْ أَمْ مَامّشْ ڒْْخذْمثْ نّسْ. ◘3:‏8 إِزهد. 62‏:‏13؛ إِرْم. 17‏:‏10؛ 32‏:‏19؛ مت. 16‏:‏27؛ رُوم. 2‏:‏6؛ 14‏:‏12؛ 2 كُور. 5‏:‏10؛ ڭال. 6‏:‏5؛ أَسَا. 2‏:‏23؛ 22‏:‏12. ٩ مِينْزِي نشِّينْ ذ إِمْسخَّارنْ أَكْ-ذ أَربِّي ؤُشَا كنِّيوْ ذ ثَافدْجَاحْثْ ذ ڒبْنِي ن أَربِّي إِ ثدْجَامْ. ◘3:‏9 2 كُور. 6‏:‏1؛ أَفا. 2‏:‏20؛ كُول. 2‏:‏7؛ 1 بُط. 2‏:‏5.

١٠ عْلَاحْسَابْ أَرْضَا ن أَربِّي إِ ذ أَيِي إِمّوْشنْ، نشّْ، أَمْ ڒمْعدْجمْ أَبنَّايْ أَمِيغِيسْ، ڭِّيغْ ذْسَاسْ ؤُ ونّغْنِي أَذْ خَاسْ إِبْنَا. أجّْ كُوڒْ إِجّْ أَذْ إِحْضَا مَامّشْ خَاسْ إِ غَا إِبْنَا. ١١ مِينْزِي ؤُڒَا ذ إِجّنْ وَارْ إِزمَّارْ أَذْ إِڭّْ ذْسَاسْ نّغْنِي خْ ونِّي إِمَّارْسنْ، أَقَا-ث ذ يَاسُوع لْمَاسِيحْ. ◘3:‏11 إِشا. 28‏:‏16؛ مت. 16‏:‏18. ١٢ ؤُشَا مَاڒَا إِبْنَا حذْ خْ ذْسَاسْ نِّي س وُورغْ، نُّوقَارْثْ، إِژْرَا إِغْڒَانْ، ثفْڒَاوْثْ. ڒُْومْ نِيغْ س ؤُخشْخُوشْ، ١٣ ڒْْخذْمثْ ن كُوڒْ إِجّنْ أَذْ ثْبَانْ، مِينْزِي أَسّْ أَذْ ت إِسّْشنْ. مِينْزِي س ثِيمسِّي أَذْ إِتّْوَاسّضْهَارْ مَامّشْ ثدْجَا ڒْْخذْمثْ ن كُوڒْ  إِجّْ، ثِيمسِّي أَذْ ت ثْفَارْزْ. ◘3:‏13 إِشا. 8‏:‏20؛ 48‏:‏10؛ إِرْم. 23‏:‏29؛ 1 بُط. 1‏:‏7؛ 4‏:‏12. ١٤ مَاڒَا ثقِّيمْ ڒْْخذْمثْ ن ڒبْنِي إِ خَاسْ ثُوغَا إِبْنَا شَا ن إِجّنْ، أَقَا نتَّا أَذْ إِطّفْ ڒْْمُونثْ نّسْ، ١٥ ؤُ مَاڒَا ثشْمضْ ڒْْخذْمثْ ن شَا ن إِجّنْ، أَقَا نتَّا أَذْ يَارْبُو ثَاخسَّارْثْ نّسْ، مَاشَا نتَّا سِيمَانْثْ نّسْ أَذْ إِنْجمْ أَخْمِي إِكَّا ثِيمسِّي.

١٦ مَا وَارْ ثسِّينمْ شَا بلِّي ثدْجَامْ ذ زَّاوشْثْ ن أَربِّي ؤُشَا بلِّي أَرُّوحْ ن أَربِّي إِزدّغْ ذَايْومْ؟ ◘3:‏16 1 كُور. 6‏:‏19؛ 2 كُور. 6‏:‏16؛ عبر. 3‏:‏6؛ 1 بُط. 2‏:‏5. ١٧ مَاڒَا يَاريّبْ حذْ زَّاوشْثْ ن أَربِّي، أَربِّي أَذْ ث يَاريّبْ، مِينْزِي زَّاوشْثْ ن أَربِّي، ثنِّي ثدْجَامْ كنِّيوْ، ثْقدّسْ إِ ثدْجَا.

١٨ وَارْ تّجِّي حذْ أَذْ إِخدّعْ إِخفْ نّسْ! مَاڒَا ذِينْ حذْ جَارْ أَومْ إِتّْغِيڒْ أَسْ إِخفْ نّسْ ذ أَمِيغِيسْ ذِي دُّونشْثْ-أَ، أجّْ إِ-ث أَذْ إِذْوڒْ ذ أَبُوهَاڒِي مَاحنْذْ أَذْ يِيڒِي ذ أَمِيغِيسْ. ◘3:‏18 أَوڒن. 3‏:‏7؛ إِشا. 5‏:‏21. ١٩ مِينْزِي ثِيغِيثْ ن دُّونشْثْ-أَ ثدْجَا ذ ثُوبُّوهڒْيَا غَارْ أَربِّي، مِينْزِي ثُورَا:

”إِطّفْ إِمِيغِيسنْ س ثحْرَايْمشْثْ نْسنْ!“، ◘3:‏19 أَيُوبْ 5‏:‏13.

٢٠ ؤُشَا عَاوذْ:

”سِيذِي إِسّْننْ أَقَا إِخَارِّيصنْ ن إِمِيغِيسنْ ذ ڒْْبَاطڒْ.“ ◘3:‏20 إِزهد. 94‏:‏11.

٢١ س ؤُيَا، ؤُڒَا ذ إِجّنْ وَارْ إِسّمْغَارِي شَا زڭْ إِوْذَانْ، مِينْزِي مَارَّا نْومْ، ٢٢ مَا ذ بُولُوسْ، نِيغْ ذ أَپُولُّوسْ، نِيغْ ذ كِيفَا، نِيغْ ذ دُّونشْثْ، نِيغْ ذ ثُوذَارْثْ، نِيغْ ذ ڒْْموْثْ، نِيغْ ذ إِضَا نِيغْ ذ ثِيوشَّا، أَقَا مَارَّا نْومْ، ٢٣ مَاشَا كنِّيوْ ن لْمَاسِيحْ ؤُشَا لْمَاسِيحْ ن أَربِّي.