١ زِي جِّيهثْ مِينْ ذ أَيِي ثُورِيمْ، أَقَا مْلِيحْ إِ بْنَاذمْ وَارْ إِتّْحِيذِي شَا ثَامْغَارْثْ. ٢ مَاشَا زِي سِّيبّثْ ن فَارْقْ-شّْغڒْ، كُوڒْ أَرْيَازْ أَذْ يَاوِي ثَامْغَارْثْ نّسْ ؤُشَا كُوڒْ إِشْثْ ن ثمْغَارْثْ أَذْ ثطّفْ أَرْيَازْ نّسْ. ٣ أجّْ أَرْيَازْ أَذْ إِسّْشنْ إِ ثمْغَارْثْ نّسْ ثَايْرِي إِ ذ أَسْ د-يُوسِينْ، أَمُّو عَاوذْ ثَامْغَارْثْ إِ ورْيَازْ نّسْ. ◘7:‏3 1 بُط. 3‏:‏7. ٤ ثَامْغَارْثْ وَارْ ثتّْضبَّارِي شَا ذِي أَرِّيمثْ نّسْ، مَاشَا أَرْيَازْ نّسْ. ؤُشَا أَمُّو عَاوذْ أَرْيَازْ وَارْ إِتّْضبَّارِي شَا ذِي أَرِّيمثْ نّسْ، مَاشَا ثَامْغَارْثْ نّسْ. ٥ وَارْ ت قطّْعمْ شَا خْ وَايَاوْيَا، مْغِيرْ مَاڒَا ثكّْسمْ ذڭْ وَاوَاڒْ شَا ن ؤُمُورْ حِيمَا أَذْ شغْڒمْ س ؤُژُومِّي ذ ثْژَادْجِيثْ. أَوَارْنِي مَانْ أَيَا مُونمْ عَاوذْ مَاحنْذْ أَذْ ثَاوْيمْ أَرِيقِّي إِ ڒمْرَاشْ، حِيمَا وَارْ كنِّيوْ إِتّْجَارِّيبْ شِّيطَانْ زِي سِّيبّثْ ن مژْرِي ن أَرِّيمثْ. ◘7:‏5 يُووِ. 2‏:‏16. ٦ قَّارغْ مَانْ أَيَا ذِي طّْوعْ ن يِينِّي إِضعْفنْ، وَارْ إِدْجِي س ڒُْومُورْ. ٧ خْسغْ عَاذْ مْلِيحْ مَاڒَا مَارَّا إِوْذَانْ أَذْ إِڒِينْ أَمْ نشّْ ذِي ثَازْذُوڭِي، مَاشَا كُوڒْ إِجّْ غَارسْ ثَاوْهِيبْثْ نّسْ إِ ذ أَسْ إِوْشَا أَربِّي، إِجّنْ أَمُّو، ونّغْنِي أَمُّو. ◘7:‏7 مت. 19‏:‏12؛ ڒخ. 26‏:‏29؛ 1 كُور. 12‏:‏11.

٨ مَاشَا إِ يِينِّي وَارْ غَارْسنْ بُو ثمْغَارْثْ ؤُ إِ ثِيجَّاڒْ قَّارغْ، أَقَا مْلِيحْ إِ نِيثْنِي مَاڒَا قِّيممْ أَمْ نشّْ. ٩ مَاشَا مَاڒَا وَارْ زمَّارنْ أَذْ قِّيمنْ طّْفنْ ذِي مَانْ أَيَا، أجّْ إِ-ثنْ أَذْ مڒْشنْ، مِينْزِي إِحْڒَا أَذْ أَوْينْ ثَامْغَارْثْ خْ وشْمَاضْ ن نّشْوثْ. ◘7:‏9 1 تِيم. 5‏:‏14.

١٠ مَاشَا إِ يِينِّي يِيوْينْ إِشْثْ ن ثمْغَارْثْ، ؤُمُورغْ، وَارْ إِدْجِي ذ نشّْ، مَاشَا سِيذِي إِنُو، بلِّي ثَامْغَارْثْ وَارْ ثْبطِّي خْ ورْيَازْ. ◘7:‏10 مـَال. 2‏:‏14؛ مت. 5‏:‏32؛ 19‏:‏9؛ مك. 10‏:‏11؛ لك. 16‏:‏18. ١١ ؤُشَا مَاڒَا ثبْضَا، أَذْ ثقِّيمْ بْڒَا أَرْيَازْ، نِيغْ أَذْ ثمّسّصْڒحْ أَكْ-ذ ورْيَازْ نّسْ، ؤُشَا أَرْيَازْ وَارْ إِتّجِّي ثَامْغَارْثْ نّسْ.

١٢ خنِّي إِ إِنّغْنِي قَّارغْ نشّْ، وَارْ إِدْجِي سِيذِي: مَاڒَا إِجّْ ن ثَاوْمَاثْ غَارسْ ثَامْغَارْثْ وَارْ إِتِّيمْننْ، ؤُشَا نتَّاثْ ثقْبڒْ أَذْ ثزْذغْ أَكِيذسْ، وَارْ ت إِنطَّارْ شَا. ١٣ ؤُشَا مَاڒَا إِشْثْ ن ثمْغَارْثْ ثنِّي غَارْ إِدْجَا ورْيَازْ وَارْ يُومِيننْ، ؤُ نتَّا إِخْسْ أَذْ كِيذسْ إِزْذغْ، وَارْ ثْسمّحْ شَا نتَّاثْ ذڭْ ورْيَازْ نّسْ. ١٤ س مِينْزِي أَرْيَازْ وَارْ يُومِيننْ إِتّْوَاقدّسْ ذِي ثمْغَارْثْ ثنِّي يُومْننْ، ؤُڒَا ذ ثَامْغَارْثْ وَارْ يُومِيننْ ثتّْوَاقدّسْ ذڭْ ورْيَازْ إِ يُومْننْ، مَاڒَا مَامّشْ نّغْنِي أَذْ إِڒِينْ إِحنْجِيرنْ نْومْ ذ إِمنْڭَاسْ، مَاشَا ڒخُّو أَقَا نِيثْنِي ذ إِمزْذَاڭنْ.

١٥ مَاشَا مَاڒَا ونِّي وَارْ إِتِّيمْننْ أَذْ إِدْجفْ، أجّْ إِ-ث أَذْ إِدْجفْ. خنِّي ثَاوْمَاثْ نِيغْ ثَاوتْشْمَاثْ وَارْ تّْوَاقّْننْ شَا ذِي ڒْْحَاڒْ نِّي. أَقَا أَربِّي إِڒَاغَا أَنغْ-د غَارْ ڒهْنَا. ١٦ مِينْزِي مَانِيسْ ثسّْنذْ شمْ، أَ ثَامْغَارْثْ، أَذْ ثسّْنجْمذْ أَرْيَازْ نّمْ؟ نِيغْ مَانِيسْ ثسّْنذْ شكْ، أَ أَرْيَازْ، أَذْ ثسّْنجْمذْ ثَامْغَارْثْ نّشْ؟ ◘7:‏16 1 بُط. 3‏:‏1.

١٧ مَاشَا كُوڒْ إِجّْ أَمْ مَامّشْ ذ أَسْ إِوْشَا سِيذِي، أَمْ مَامّشْ إِ ذ إِڒَاغَا أَربِّي إِ كُوڒْ إِجّْ، أجّْ إِ-ث أَذْ إِدَّارْ أَمُّو. أَمُّو إِ ؤُمُورغْ إِ مَارَّا ثِيمسْمُونِينْ. ١٨ مَاڒَا إِتّْوَاڒَاغَا إِ ورْيَازْ إِتّْوَاخثْننْ غَارْ ؤُمُونِي أَكْ-ذ لْمَاسِيحْ، وَانِيثَا وَارْ يَارزُّو أَذْ د-إِذْوڒْ غَارْ بْڒَا أَخْثَانْ نّسْ، ؤُشَا مَاڒَا إِتّْوَاڒَاغَا إِ حذْ بْڒَا أَخْثَانْ، أجّْ إِ-ث وَارْ يَارزُّو أَذْ ث خثْننْ. ١٩ أَخْثَانْ ذ وَالُو ؤُ بْڒَا أَخْثَانْ ذ وَالُو، مَاشَا أَحطُّو ن ثْوصَّا ن أَربِّي، وَاهْ! ٢٠ أجّْ كُوڒْ إِجّنْ أَذْ إِقِّيمْ ذِي ثْڒَاغِيثْ إِ زِي د-إِتّْوَاڒَاغَا. ◘7:‏20 أَفا. 4‏:‏1؛ فِيل. 1‏:‏27؛ كُول. 1‏:‏10؛ 1 تس. 2‏:‏12. ٢١ مَاڒَا ثُوغَا شكْ ثتّْوَاڒَاغِيذْ-د ذ إِسْمغْ وَارْ ثسّْحِيسِّيفذْ شَا إِ مَانْ أَيَا، مَاشَا مَاڒَا ثْزمَّارذْ أَذْ ثتّْوَاسَّارْحذْ، إِخْضَارْ خنِّي س يِيخفْ نّشْ، مَاحنْذْ أَذْ ثْسخَّارذْ. ٢٢ مِينْزِي ونِّي إِتّْوَاڒَاغَانْ ذِي سِيذِيثْنغْ أَمْ ثُوغَا ذ إِسْمغْ، أَقَا-ث ذ أَحُورِّي ن أَربِّي، أَمْ مَامّشْ ونِّي إِتّْوَاڒَاغَانْ ذ أَحُورِّي، أَقَا-ث ذ إِسْمغْ ن لْمَاسِيحْ. ٢٣ أَقَا ثمّسْغمْ-د س تَّامَانْ، خنِّي وَارْ إِعدّڒْ أَذْ ثِيڒِيمْ عَاذْ ذ إِسمْغَانْ ن إِوْذَانْ. ◘7:‏23 1 كُور. 6‏:‏20؛ عبر. 9‏:‏12؛ 1 بُط. 1‏:‏18. ٢٤ أَ أَيْثْمَا، أجّْ كُوڒْ إِجّنْ أَذْ إِسِيغِي أَكْ-ذ أَربِّي ذڭْ وبْرِيذْ نِّي ذِي د-إِتّْوَاڒَاغَا.

٢٥ ذڭْ وَازَّايْ ن ثُوعزْرِييَا، أَقَا وَارْ غَارِي بُو ڒُْومُورْ ن أَربِّي، مَاشَا أَذْ وْشغْ أَرَّايْ إِنُو، أَمْ وِي يِيوْضنْ س أَرْضَا ن أَربِّي حِيمَا أَذْ يِيڒِي ذ أَمْثِيقِّي. ٢٦ إِتّْغِيڒْ أَيِي مْلِيحْ إِ ڒغْبنْ إِ إِدْجَانْ ذِي ڒْوقْثْ-أَ، بلِّي أَقَا إِشْنَا إِ بْنَاذمْ أَذْ إِقِّيمْ أَمْ إِدْجَا. ٢٧ مَا ثْڒصْقذْ ذِي ثمْغَارْثْ؟ وَارْ أَرزُّو شَا أَذْ زَّايسْ ثنّْفكّذْ. مَاڒَا شكْ وَارْ ثْڒصْقذْ ذِي ثمْغَارْثْ؟ وَارْ أَرزُّو خْ ثمْغَارْثْ. ◼7:‏27 ’مَا شكْ وَارْ ثْڒصْقضْ ذِي ثمْغَارْثْ؟‘ - أَوَاڒْ-أَ إِخْسْ أَذْ يِينِي: ’مَا شكْ بْڒَا ثَامْغَارْثْ؟‘ ٢٨ مَاشَا مَاڒَا ثِيوْيذْ ثَامْغَارْثْ، وَارْ ثْخطِّيذْ. ؤُشَا مَاڒَا ثَاعْزَارشْثْ ثذْوڒْ غَارْ ورْيَازْ، نتَّاثْ وَارْ ثْخطِّي شَا. مَاشَا إِنِّي إِقّْننْ إِ وَايَاوَايَا س ڒمْڒَاشْ، ثتّْرَاجَا إِ-ثنْ ڒْْمحْنثْ ذِي أَرِّيمثْ، ؤُشَا خْسغْ أَذْ ت خَاومْ كّْسغْ.

٢٩ ذ مَانْ أَيَا إِ قَّارغْ، أَ أَيْثْمَا، أَقَا ڒْْحَاڒْ إِمْژِي. س ؤُينِّي إِنِّي غَارْ إِدْجَا ثمْغَارْثْ، أجّْ إِ-ثنْ أَذْ إِڒِينْ أَخْمِي وَارْ غَارْسنْ ثدْجِي، ٣٠ إِنِّي إِتّْرُونْ أَخْمِي وَارْ تّْرُونْ، إِنِّي إِفَارّْحنْ أَخْمِي وَارْ فْرِيحنْ، إِنِّي إِسَّاغنْ أَخْمِي وَارْ ملّْكنْ، ٣١ ؤُ إِنِّي إِسْثنْفَاعنْ زِي دُّونشْثْ-أَ، إِتّْخصَّا وَارْ تَّاڭّْوِيجنْ خْ ؤُسْثنْفعْ إِ د-إِتّْڒِيقنْ، مِينْزِي ؤُذمْ ن دُّونشْثْ أَيَا أَذْ إِعْذُو. ◘7:‏31 إِشا. 40‏:‏6؛ يَاع. 1‏:‏10؛ 4‏:‏14؛ 1 بُط. 1‏:‏24؛ 1 يُوح. 2‏:‏17.

٣٢ س ؤُينِّي خْسغْ أَذْ ثِيڒِيمْ بْڒَا أَمْنُوسْ، مَاغَارْ ونِّي وَارْ غَارسْ ثدْجِي ثمْغَارْثْ، أَذْ إِخَارّصْ ذِي مِينْ إِدْجَانْ ن سِيذسْ ذ مَامّشْ غَا يَارْضَا سِيذسْ. ◘7:‏32 1 تِيم. 5‏:‏5. ٣٣ مَاشَا ونِّي غَارْ ثدْجَا ثمْغَارْثْ، أَذْ إِكْسِي س ومْنُوسْ إِ ثْمسْڒَايِينْ ن دُّونشْثْ-أَ ؤُ مَامّشْ غَا يَارْضَا ثَامْغَارْثْ نّسْ.

٣٤ أَقَا ذِينْ إِجّْ ن ڒْْفَارْقْ جَارْ ثمْغَارْثْ ذ ثعْزَارشْثْ. ثنِّي وَارْ غَارْ إِدْجِي ورْيَازْعمَّارْصْ، أَذْ ثْخَارّصْ ذِي سِيذسْ، حِيمَا أَذْ ثِيڒِي ثْقدّسْ أَمْ ذِي أَرِّيمثْ أَمْ ذِي أَرُّوحْ، مَاشَا ثنِّي غَارْ ثدْجَا ورْيَازْ، أَذْ ثْخَارّصْ ذِي ثْمسْڒَايِينْ ن دُّونشْثْ، إِ مَامّشْ غَا ثَارْضَا أَرْيَازْ نّسْ. ٣٥ ذڭَّا قَّارغْ أَومْ-د إِ ثِيزِي نْومْ، وَارْ إِدْجِي حِيمَا أَذْ أَومْ ڭّغْ ڒْْفخْ، مَاشَا نِّيغْ ث حِيمَا أَذْ ثقِّيمنْ ذ إِمْثِيقَّانْ إِ سِيذِيثْومْ خْ ؤُبْرِيذْ نِيشَانْ، أَمْ وَارْ ثْسڒْهِيمْ أَكْ-ذ دُّونشْثْ.

٣٦ مَاشَا مَاڒَا إِخَارّصْ حذْ بلِّي أَقَا سْثْهزَّانْ زَّايسْ زِي سِّيبّثْ ن يدْجِيسْ ثَاعْزَارشْثْ، ثنِّي خْ عْذُونْ وُوسَّانْ ن ثمْژِي نّسْ أَمْ وَارْ ت إِسّمْڒشْ عَاذْ إِ ورْيَازْ، ؤُشَا إِتّْغِيڒْ أَسْ نِيشَانْ أَذْ ت إِسّمْڒشْ، نتَّا وَارْ إِخطِّي شَا. أجّْ إِ-ت أَذْ ثْمڒْشْ. ٣٧ مَاشَا وِي إِدْجَانْ نِيشَانْ ذڭْ وُوڒْ نّسْ، بْڒَا مَا يُوشَا س ؤُزِييَّارْ، ؤُشَا غَارسْ صُّولْطَا خْ يِيخفْ نّسْ، إِكّسْ ذڭْ وُوڒْ نّسْ أَذْ يجّْ ثَاعْزَارشْثْ نّسْ ثصْفَا، مْلِيحْ إِ يڭَّا. ٣٨ س ؤُينِّي، ونِّي إِسّْمڒْشنْ يدْجِيسْ ثَاعْزَارشْثْ إِڭَّا مْلِيحْ، ؤُ ونِّي وَارْ إِسّْمدْجِيشنْ يدْجِيسْ ثَاعْزَارشْثْ، إِڭَّا مْلِيحْ أَطَّاسْ.

٣٩ ثَامْغَارْثْ ثقّنْ غَارْ ورْيَازْ نّسْ س شَّارِيعَا مِينْ غَا يكّْ ورْيَازْ نّسْ إِدَّارْ، مَاشَا مَاڒَا أَرْيَازْ نّسْ إِمُّوثْ، أَقَا-ت ثْسَارّحْ زَّايسْ، ثْزمَّارْ أَذْ ثمْڒشْ أَكْ-ذ وِي ثخْسْ، مَاشَا ذِي سِيذِيثْنغْ وَاهَا. ◘7:‏39 رُوم. 7‏:‏2. ٤٠ مَاشَا نشّْ غَارِي، أَقَا نتَّاثْ أَذْ ثتّْوَابَاركْ كْثَارْ مَاڒَا ثقِّيمْ أَمنِّي. ؤُ أَقَا نشّْ تّْوَاڒِيغْ أَرُّوحْ ن أَربِّي إِخدّمْ عَاوذْ ذَايِي. ◘7:‏40 1 تس. 4‏:‏8.