١ خْزَارْ، مشْحَاڒْ ثمْغَارْ ثَايْرِي إِ زِي ذ أَنغْ إِتّخْسْ بَابَاثْنغْ، أَڒَامِي إِڒَاغَا ؤُ إِڭَّا أَنغْ ثَارْوَا. س ؤُينِّي دُّونشْثْ وَارْ ذ أَنغْ ثسِّينْ شَا، مِينْزِي وَارْ ث ثسِّينْ شَا. ◘3:‏1 يُوح. 1‏:‏12. ٢ أَ إِمْعِيزّنْ إِنُو، ڒخُّو نشِّينْ ذ ثَارْوَا ن أَربِّي إِ ندْجْ، وَارْ د-إِضْهَارْ عَاذْ مِينْ غَا نِيڒِي. أَقَا نسّنْ خْمِي د غَا إِبَانْ نتَّا، أَذْ نِيڒِي ذِي صِّيفثْ نّسْ، مِينْزِي أَذْ ث نْژَارْ أَمْ مَامّشْ إِدْجَا نتَّا. ◘3:‏2 إِشا. 56‏:‏5؛ مت. 5‏:‏12؛ يُوح. 1‏:‏12؛ رُوم. 8‏:‏15، 18؛ 2 كُور. 4‏:‏17؛ ڭال. 3‏:‏26؛ 4‏:‏6؛ فِيل. 3‏:‏21؛ كُول. 3‏:‏4. ٣ مَارَّا ونِّي غَارْ إِدْجَا ؤُسِيثمْ-أَ ذَايسْ ذڭْ وُوڒْ نّسْ، أَذْ إِسِّيزْذڭْ إِخفْ نّسْ، أَمْ مَامّشْ إِدْجَا نتَّا ذ أَمزْذَاڭْ. ٤ مَارَّا ونِّي إِتّڭّنْ دّْنُوبْ، إِتّڭّْ ڒْْمُوعْصِييّثْ، مِينْزِي مَارَّا دّنْبْ ذ ڒْْمُوعْصِييّثْ. ◘3:‏4 1 يُوح. 5‏:‏17. ٥ ثسّْنمْ بلِّي نتَّا إِبَانْ-د، حِيمَا أَذْ إِكّسْ دّْنُوبْ نّغْ: نتَّا وَارْ ذَايسْ بُو دّْنُوبْ. ◘3:‏5 إِشا. 53‏:‏9، 12؛ 2 كُور. 5‏:‏21؛ 1 بُط. 2‏:‏22؛ 1 تِيم. 1‏:‏15. ٦ مَارَّا وِي ذَايسْ إِ غَا إِقِّيمنْ، وَارْ إِتّڭّْ شَا دّْنُوبْ. مَارَّا وِي إِتّڭّنْ دّْنُوبْ، وَارْ ث إِژْرِي، وَارْ ث إِسِّينْ. ٧ أَ إِحنْجِيرنْ إِنُو، وَارْ تّجِّيمْ أَذْ كنِّيوْ إِخَارْوضْ حذْ. ونِّي إِتّڭّنْ ثَاسڭْذَا ذ نتَّا ذ أَمْسڭَّاذْ أَمْ مَامّشْ عَاوذْ لْمَاسِيحْ ذ أَمْسڭَّاذْ. ◘3:‏7 1 يُوح. 2‏:‏29.

٨ ونِّي إِتّڭّنْ دّْنُوبْ ذ نتَّا زِي شِّيطَانْ، مِينْزِي شِّيطَانْ ثُوغَا ذ أَمذْنُوبْ زڭْ ؤُمزْوَارُو. إِ مَانْ أَيَا إِ د-إِضْهَارْ مِّيسْ ن أَربِّي: حِيمَا أَذْ إِسّخْسَارْ ڒخْذَايمْ ن شِّيطَانْ.

٩ مَارَّا ونِّي د-إِتّْوَاخڒْقنْ زِي أَربِّي، وَارْ إِتّڭّْ شَا دّْنُوبْ، مِينْزِي زَّارِيعثْ نّسْ أَقَا-ت ذَايسْ ؤُشَا وَارْ إِزمَّارْ أَذْ إِخْضَا، مِينْزِي إِتّْوَاخْڒقْ-د زِي أَربِّي. ◘3:‏9 1 بُط. 1‏:‏23؛ 1 يُوح. 5‏:‏18. ١٠ ذِي مَانْ أَيَا أَذْ د-ضْهَارنْ ثَارْوَا ن أَربِّي ذ ثَارْوَا ن شِّيطَانْ: مَارَّا ونِّي وَارْ إِتّڭّنْ ثَاسڭْذَا ؤُ وَارْ إِتّخْسنْ ؤُمَاسْ، وَارْ إِدْجِي شَا زِي أَربِّي. ١١ مَاغَارْ ثَا ذ ثَاوْصِييّثْ إِ ثُوغَا ثسْڒِيمْ زڭْ ؤُمزْوَارُو بلِّي أَذْ ثخْسمْ إِجّنْ ونّغْنِي!‘ ◘3:‏11 يُوح. 13‏:‏34؛ 15‏:‏12؛ 1 يُوح. 3‏:‏23. ١٢ وَارْ إِدْجِي أَمْ قَايِينْ ونِّي إِدْجَانْ زڭْ ؤُمْعفَّانْ ؤُشَا إِنْغَا ؤُمَاسْ. مَايمِّي إِنْغَا ؤُمَاسْ؟ س مِينْزِي ڒخْذَايمْ نّسْ ثُوغَا أَثنْثْعفّْننْثْ ؤُشَا ثِينِّي ن ؤُمَاسْ سڭّْذنْثْ. ◘3:‏12 أَمز. 4‏:‏8؛ 27‏:‏41؛ عبر. 11‏:‏4. ١٣ وَارْ ثذْهِيشمْ شَا، أَ أَيْثْمَا، مَاڒَا دُّونشْثْ ثْشَارْهْ إِ كنِّيوْ. ◘3:‏13 يُوح. 15‏:‏18. ١٤ نشِّينْ نسّنْ، أَقَا نژْوَا زِي ڒْْموْثْ غَارْ ثُوذَارْثْ، مِينْزِي نخْسْ أَوْمَاثنْ نّغْ. ونِّي وَارْ إِتّخْسنْ ؤُمَاسْ، أَذْ إِقِّيمْ ذِي ڒْْموْثْ. ◘3:‏14 1 يُوح. 2‏:‏10. ١٥ مَارَّا وِي إِشَارّْهنْ ؤُمَاسْ ذ أَقتَّاڒْ، ؤُشَا كنِّيوْ ثسّْنمْ بلِّي ثُوذَارْثْ إِتّْذُومَانْ وَارْ ثْزمَّارْ أَذْ ثقِّيمْ ذڭْ إِجّْ ن ؤُقتَّاڒْ. ◘3:‏15 مت. 5‏:‏21؛ ڭال. 5‏:‏21. ١٦ زِي مَانْ أَيَا نسّنْ ثَايْرِي نّسْ إِ نشِّينْ، أَقَا نتَّا إِسَّارْسْ ثُوذَارْثْ نّسْ ذڭْ ومْشَانْ نّغْ. عَاوذْ إِتّْخصَّا أَنغْ نِيشَانْ أَذْ نسَّارْسْ ثُوذَارْثْ نّغْ خْ أَيْثْمَاثْنغْ. ◘3:‏16 يُوح. 15‏:‏13؛ أَفا. 5‏:‏2. ١٧ ونِّي غَارْ إِدْجَا أَڭْڒَا ن دُّونشْثْ ؤُشَا إِتّْوَاڒَا ؤُمَاسْ إِزْڒضْ، خنِّي إِقّنْ خَاسْ ؤُڒْ نّسْ، مَامّشْ إِ غَا ثزْذغْ ثَايْرِي ن أَربِّي ذَايسْ؟ ◘3:‏17 أَعَوذ. 15‏:‏7؛ لك. 3‏:‏11؛ يَاع. 2‏:‏15.

١٨ أَ إِحنْجِيرنْ إِنُو، أجّْ أَنغْ وَارْ نتّخْسْ إِجّنْ ونّغْنِي س وَاوَاڒْ نِيغْ س إِڒسْ، مَاشَا س ڒخْذَايمْ ؤُ ذِي ثِيذتّْ. ١٩ س مَانْ أَيَا نسّنْ أَقَا نشِّينْ زِي ثِيذتّْ ؤُشَا أَذْ نسّقْنعْ ؤُڒَاونْ نّغْ قْبڒْ إِ د غَا يَاسْ. ٢٠ مِينْزِي مَاڒَا إِحْكمْ وُوڒْ نّغْ خَانغْ، مشْحَاڒْ ذ أَمقّْرَانْ أَربِّي خْ وُوڒْ نّغْ! أَقَا نتَّا إِسّنْ مَارَّا. ٢١ أَ إِمْعِيزّنْ إِنُو، مَاڒَا ؤُڒْ نّغْ وَارْ خَانغْ إِحْكمْ، أَقَا غَارْنغْ تِّيقّثْ زَّاثْ إِ أَربِّي، ٢٢ ؤُشَا مَانْ ڒْْحَاجّثْ إِ غَا نتَّارْ، أَذْ ت نكْسِي زَّايسْ، مِينْزِي نشِّينْ نْحطَّا ثِيوصَّا نّسْ ؤُشَا أَذْ نڭّْ مِينْ غَا يَارْضَانْ قِيبَاتْشْ نتَّا. ◘3:‏22 إِرْم. 29‏:‏12؛ مت. 7‏:‏8؛ 21‏:‏22؛ مك. 11‏:‏24؛ لك. 11‏:‏9؛ يُوح. 14‏:‏13؛ 16‏:‏24؛ يَاع. 1‏:‏5؛ 1 يُوح. 5‏:‏14. ٢٣ ذ ثَا ذ ثَاوْصيّثْ نّسْ بلِّي أَذْ نَامنْ ذڭْ يِيسمْ ن مِّيسْ يَاسُوع لْمَاسِيحْ ؤُشَا أَذْ نخْسْ إِجّْ ونّغْنِي أَمْ مَامّشْ إِ ذ أَنغْ يُومُورْ. ◘3:‏23 لَاوِي 19‏:‏18؛ مت. 22‏:‏39؛ يُوح. 6‏:‏29؛ 13‏:‏34، 35؛ 15‏:‏12؛ 17‏:‏3؛ أَفا. 5‏:‏2؛ 1 تس. 4‏:‏9؛ 1 بُط. 4‏:‏8؛ 1 يُوح. 4‏:‏21. ٢٤ ونِّي إِحطَّانْ ثِيوصَّا نّسْ، أَذْ زَّايسْ إِتّْوَاحْضَا ؤُ نتَّا إِزدّغْ ذَايسْ. س مَانْ أَيَا نسّنْ بلِّي نتَّا إِتّْغِيمَا ذَايْنغْ، زِي أَرُّوحْ نّسْ إِ ذ أَنغْ إِوْشَا. ◘3:‏24 يُوح. 14‏:‏23؛ 15‏:‏10؛ 1 يُوح. 4‏:‏12.