١ مَارَّا ونِّي يُومْننْ بلِّي يَاسُوع ذ لْمَاسِيحْ، أَقَا نتَّا إِتّْوَاخْڒقْ-د زِي أَربِّي، ؤُشَا مَارَّا ونِّي إِتّخْسنْ ونِّي ث-إِ-د يجِّينْ، أَذْ إِخْسْ عَاوذْ ونِّي زَّايسْ د-إِتّْوَاخڒْقنْ. ◘5:‏1 يُوح. 1‏:‏12. ٢ زِي مَانْ أَيَا نسّنْ بلِّي نتّخْسْ ثَارْوَا ن أَربِّي، خْمِي نتّخْسْ أَربِّي ؤُ نتّڭّْ ثِيوصَّا نّسْ. ٣ مِينْزِي ثَا ذ ثَايْرِي ن أَربِّي، أَذْ نحْضَا ثِيوصَّا نّسْ، ؤُشَا ثِيوصَّا نّسْ وَارْ وْعَارنْثْ شَا. ◘5:‏3 مت. 11‏:‏29، 30؛ يُوح. 14‏:‏15؛ 15‏:‏10. ٤ مَاغَارْ مْكُوڒْ إِجّنْ إِ د-إِتّْوَاخڒْقنْ زِي أَربِّي أَذْ إِغلّبْ خْ دُّونشْثْ. ذ وَا ذ أَغْڒَابْ إِ إِتّْغلَّابنْ خْ دُّونشْثْ، أَقَا-ث ذ لْ-إِيمَانْ نّغْ. ◘5:‏4 يُوح. 16‏:‏33. ٥ مَانْ ونْ إِ غَا إِغلّْبنْ خْ دُّونشْثْ، مْغِيرْ ونِّي يُومْننْ بلِّي يَاسُوع ذ مِّيسْ ن أَربِّي! ◘5:‏5 1 كُور. 15‏:‏57؛ 1 يُوح. 4‏:‏15. ٦ ذ وَا إِ د-إِكِّينْ زڭْ وَامَانْ ذ إِذَامّنْ، يَاسُوع لْمَاسِيحْ. وَارْ د-يكِّي زڭْ وَامَانْ وَاهَا، مَاشَا زڭْ وَامَانْ ذ إِذَامّنْ. ٧ أَرُّوحْ ذ ونِّي إِشهّْذنْ، مِينْزِي أَرُّوحْ ذ ثِيذتّْ. ٨ أَقَا ذِينْ ثْڒَاثَا ن يِينِّي إِشهّْذنْ: أَرُّوحْ ذ وَامَانْ ذ إِذَامّنْ، ؤُشَا نِيثْنِي س ثْڒَاثَا ذڭْ إِجّنْ.

٩ مَاڒَا نقْبڒْ شّْهَاذثْ ن إِوْذَانْ، مشْحَاڒْ ذ ثَامقّْرَانْثْ شّْهَاذثْ ن أَربِّي. ثَا ذ شّْهَاذثْ ن أَربِّي ثنِّي إِشْهذْ خْ مِّيسْ. ١٠ ونِّي يُومْننْ ذِي مِّيسْ ن أَربِّي، غَارسْ شّْهَاذثْ-أَ ذڭْ إِخفْ نّسْ. ونِّي وَارْ يُومِيننْ شَا ذِي أَربِّي، أَقَا إِڭَّا إِ-ث ذ بُو-إِخَارِّيقنْ، مِينْزِي نتَّا وَارْ يُومِينْ شَا ذِي شّْهَاذثْ ثنِّي إِوْشَا أَربِّي خْ مِّيسْ. ◘5:‏10 يُوح. 3‏:‏36؛ رُوم. 8‏:‏16؛ ڭال. 4‏:‏6. ١١ ؤُشَا ثَا ذ شّْهَاذثْ: أَربِّي إِوْشَا أَنغْ ثُوذَارْثْ إِتّْذُومَانْ ؤُشَا ثُوذَارْثْ نِّي أَقَا-ت ذِي مِّيسْ. ◘5:‏11 يُوح. 1‏:‏4. ١٢ ونِّي غَارْ إِدْجَا مِّيسْ، غَارسْ ثُوذَارْثْ. ونِّي وَارْ غَارْ إِدْجِي مِّيسْ ن أَربِّي، وَارْ غَارسْ بُو ثُوذَارْثْ.

١٣ ؤُرِيغْ أَومْ-د مَانْ أَيَا، حِيمَا أَذْ ثسّْنمْ بلِّي غَارْومْ ثُوذَارْثْ إِتّْذُومَانْ، كنِّيوْ إِنِّي إِتَّامْننْ ذڭْ يِيسمْ ن مِّيسْ ن أَربِّي. ◘5:‏13 يُوح. 20‏:‏31.

١٤ ذ ثَا ذ تِّيقّثْ ثنِّي غَارْنغْ ذَايسْ، مَاڒَا نتَّارْ زَّايسْ شَا ن ڒْْحَاجّثْ عْلَاحْسَابْ مِينْ إِخْسْ نتَّا، نتَّا أَذْ غَارْنغْ إِسڒْ. ◘5:‏14 إِرْم. 29‏:‏12؛ مت. 7‏:‏8؛ 21‏:‏22؛ مك. 11‏:‏24؛ لك. 11‏:‏9؛ يُوح. 14‏:‏13؛ 15‏:‏7؛ 16‏:‏24؛ يَاع. 1‏:‏5؛ 1 يُوح. 3‏:‏2. ١٥ مَاڒَا نتّْوَاسّقْنعْ نِيشَانْ أَقَا أَذْ أَنغْ إِسڒْ مِينْ مَا ذ أَسْ نتَّارْ، خنِّي نتِّيقّْ بلِّي أَقَا يُوسَا-د أَنغْ مِينْ ذ أَسْ نتَّارْ.

١٦ مَاڒَا حذْ إِژْرَا ؤُمَاسْ إِخطَّا، إِجّْ ن ؤُخطُّو وَارْ إِهْذِيجنْ شَا ڒْْموْثْ، أجّْ إِ-ث أَذْ إِژَّادْجْ ذِي طّْوعْ نّسْ، ؤُشَا أَذْ أَسْ ثمّوْشْ ثُوذَارْثْ، إِ ونِّي وَارْ إِخطِّينْ شَا أَڒْ ڒْْموْثْ. أَقَا ذِينْ أَخطُّو أَڒْ ڒْْموْثْ، وَارْ قَّارغْ شَا أَقَا إِتّْخصَّا أَذْ إِژَّادْجْ إِ مَانْ أَيَا. ◘5:‏16 ڒخْڒ. 15‏:‏30؛ 1 صم. 2‏:‏25؛ مت. 12‏:‏31؛ مك. 3‏:‏29؛ لك. 12‏:‏10؛ عبر. 6‏:‏4؛ 10‏:‏26؛ 2 بُط. 2‏:‏2. ١٧ مَارَّا ڒْْمُوعْصِييّثْ، أَقَا-ت ذ دّنْبْ ؤُشَا أَقَا ذِينْ دّنْبْ إِ وَارْ إِدْجِينْ شَا أَڒْ ڒْْموْثْ. ◘5:‏17 1 يُوح. 3‏:‏4.

١٨ نسّنْ بلِّي كُوڒْ إِجّنْ ونِّي د-إِتّْوَاخڒْقنْ زِي أَربِّي، وَارْ إِخطِّي شَا، مِينْزِي ونِّي د-إِتّْوَاخڒْقنْ زِي أَربِّي أَذْ إِحْضَا إِخفْ نّسْ ؤُ أَمْعفَّانْ وَارْ ث إِتّْحِيذِي.◘5:‏18 1 يُوح. 3‏:‏9. ١٩ نسّنْ، أَقَا أَنغْ زِي أَربِّي ؤُشَا دُّونشْثْ مَارَّا أَقَا-ت ذڭْ إِفَاسّنْ ن ؤُمْعفَّانْ. ٢٠ نسّنْ بلِّي مِّيسْ ن أَربِّي أَقَا يُوسَا-د ؤُشَا إِوْشَا أَنغْ-د ڒفْهَامثْ حِيمَا أَذْ نسّنْ ونِّي إِدْجَانْ ذ ثِيذتّْ ؤُ حِيمَا أَذْ نِيڒِي ذڭْ ونِّي ذ ثِيذتّْ، ذِي مِّيسْ يَاسُوع لْمَاسِيحْ. ذ وَا ذ أَربِّي س ثِيذتّْ ذ ثُوذَارْثْ إِتّْذُومَانْ. ◘5:‏20 إِشا. 9‏:‏5؛ 44‏:‏6؛ 53‏:‏11؛ 54‏:‏5؛ لك. 24‏:‏45؛ يُوح. 20‏:‏28؛ رُوم. 9‏:‏5؛ 1 تِيم. 3‏:‏16.

٢١ أَ إِحنْجِيرنْ إِنُو، حْضَامْ إِخفْ نْومْ زڭْ وعْبذْ ن لْ-أَصْنَامْ!