1 أَوَارْنِي ڒَامِي إِكمّڒْ سُولِيمَانْ ڒبْنِي ن ثَادَّارْثْ ن سِيذِي ؤُ ڒبْنِي ن ثَادَّارْثْ ن ؤُجدْجِيذْ، وَاهْ، مَارَّا مِينْ ثُوغَا إِمّژْرِي ؤُ ثُوغَا إِخْسْ أَذْ ث إِڭّْ، ◘9:‏1 [2 إِم. 7‏:‏11‏-‏22] — 2 إِم. 7‏:‏11 2 إِبَانْ-د سِيذِي إِ سُولِيمَانْ إِ ثْوَاڒَا وِيسّْ ثْنَاينْ، أَمْ مَامّشْ إِ ذ أَسْ د-إِبَانْ ذِي جِيبْعُونْ. ◘9:‏2 1 إِج. 3‏:‏5 3 إِنَّا أَسْ سِيذِي: ”نشّْ سْڒِيغْ إِ ثْژَادْجِيثْ نّشْ ؤُ إِ ؤُحشّمْ نّشْ إِ زِي ثْحشّْمذْ زَّاثْ إِ وُوذمْ إِنُو. ثَادَّارْثْ إِ ثبْنِيذْ، سّْقدّْسغْ ت، حِيمَا أَذْ سّْمثْنغْ ذِينْ إِسمْ إِنُو إِ ڒبْذَا ؤُشَا ثِيطَّاوِينْ إِنُو ذ وُوڒْ إِنُو أَذْ ذِينْ إِڒِينْ إِ ڒبْذَا! ◘9:‏3 أَعَوذ. 12‏:‏11؛ 1 إِج. 8‏:‏29 4 مَاڒَا شكْ ثُويُورذْ زَّاثْ إِ وُوذمْ إِنُو أَمْ مَامّشْ ثُوغَا إِڭُّورْ بَابَاشْ ذَاوُوذْ س وُوڒْ إِمُونْ ؤُ س ڒصْفَايثْ، أَذْ ثڭّذْ أَمْ مَامّشْ مَارَّا إِ ذ أَشْ ؤُمُورغْ ؤُ أَذْ ثحْضِيذْ ثِيوصَّا إِنُو ذ لْفَارَايِيضْ  إِنُو، 5 خنِّي أَذْ سّْمثْنغْ ڒْعَارْشْ ن ثْڭلْذَا نّشْ خْ إِسْرَائِيل إِ ڒبْذَا، أَمْ مَامّشْ سِّيوْڒغْ غَارْ بَابَاشْ ذَاوُوذْ، نِّيغْ: ’وَارْ زَّايكْ إِتّْوَاقسِّي شَا ن ورْيَازْ زِي ڒْعَارْشْ ن إِسْرَائِيل!‘ ◘9:‏5 2 صم. 7‏:‏12، 16؛ 1 إِج. 6‏:‏12؛ 2‏:‏4؛ 1 إِم. 22‏:‏10؛ إِزهد. 132‏:‏12

6 مَاشَا مَاڒَا كنِّيوْ، شكْ ذ إِحنْجِيرنْ نْومْ، أَذْ ثْحيّْذمْ زِي ضفَّارْ إِنُو ؤُ كنِّيوْ وَارْ ثْحطَّامْ عَاذْ ڒُومُورَاثْ إِنُو ذ ثْوصَّا إِنُو نِّي وْشِيغْ زَّاثْ إِ وُوذمْ نْومْ، ؤُ كنِّيوْ أَذْ ثُويُورمْ أَذْ ثْسخَّارمْ إِ إِربِّيثنْ نّغْنِي، أَذْ أَسنْ ثْبنْذْقمْ، ◘9:‏6 2 صم. 7‏:‏14؛ إِزهد. 89‏:‏30، 31 7 خنِّي أَذْ قْضِيغْ إِسْرَائِيل زِي ثمُّورْثْ نِّي ذ أَسنْ وْشِيغْ ؤُشَا ثَادَّارْثْ-أَ إِ سّْقدّْسغْ إِ يِيسمْ إِنُو أَذْ ت مّنْضَارغْ زڭْ وُوذمْ إِنُو ؤُ إِسْرَائِيل أَذْ إِذْوڒْ ذ إِجّْ ن ؤُمذْيَا ذ إِشْثْ ن ڒْقشْعثْ ن ؤُسْثهْزِي جَارْ مَارَّا ڒڭْنُوسْ. ◘9:‏7 أَعَوذ. 28‏:‏37؛ إِرْم. 7‏:‏15 8 ؤُ خْ ثَادَّارْثْ-أَ ثنِّي يُوعْڒَانْ قَاعْ، مَارَّا وِي خَاسْ إِ غَا إِكّنْ، أَذْ إِثبْهثْ أَذْ إِصفَّارْ. نِيثْنِي أَذْ إِنِينْ: ’مَايمِّي إِڭَّا سِيذِي أَمُّو ذِي ثمُّورْثْ-أَ ؤُ ذِي ثَادَّارْثْ-أَ؟‘ ◘9:‏8 أَعَوذ. 26‏:‏19؛ 28‏:‏1؛ 29‏:‏23؛ 2 إِم. 7‏:‏21؛ إِرْم. 22‏:‏8 9 أَذْ إِنِينْ: ’مِينْزِي نِيثْنِي سمْحنْ ذِي سِيذِي، أَربِّي نْسنْ، ونِّي د-إِسُّوفّْغنْ ڒجْذُوذْ نْسنْ زِي ثمُّورْثْ ن مِيصْرَا، ؤُ مِينْزِي نِيثْنِي شبَّارنْ ذِي إِربِّيثنْ نّغْنِي، ؤُيُورنْ أَذْ أَسنْ بنْذْقنْ ؤُ أَذْ أَسنْعبْذنْ، خْ ؤُيَا إِسِّيوضْ سِيذِي مَارَّا ڒْغَارْ-أَ خَاسنْ.‘ “

10 أَوَارْنِي عِيشْرِينْ ن إِسڭّْوُوسَا إِ ذِي إِبْنَا سُولِيمَانْ ثْنَاينْ ن ثُوذْرِينْ، ثَادَّارْثْ ن سِيذِي ؤُ ثَادَّارْثْ ن ؤُجدْجِيذْ، إِمْسَارْ ◘9:‏10 [2 إِم. 8‏:‏1‏-‏18] — 2 إِم. 8‏:‏1 11 - أَمْ إِوْشَا حِيرَامْ، أَجدْجِيذْ ن صُورْ، إِ سُولِيمَانْ عْلَاحْسَابْ مژْرِي نّسْ أَكشُّوضْ ن ثْشجَّارْثْ ن ثنْڭلْثْ ذ ؤُكشُّوضْ ن ثْشجَّارْثْ ن ؤُمرْزِي ذ وُورغْ - أَقَا سُولِيمَانْ إِوْشَا إِ حِيرَامْ عِيشْرِينْ ن ثْندَّامْ ذِي ثمُّورْثْ ن لْجَالِيلْ. ◼9:‏11 ’أَمرْزِي‘ - نِيغْ ’أَمضْزِي‘. 12 حِيرَامْ إِفّغْ-د زِي صُورْ، حِيمَا أَذْ إِخْزَارْ ثِيندَّامْ نِّي ذ أَسْ إِوْشَا سُولِيمَانْ، مَاشَا ثُوغَا أَثنْثْ وَارْ شْنَانْثْ ذِي ثِيطَّاوِينْ نّسْ. 13 نتَّا إِنَّا: ”مَانَا ثِيندَّامْ-أَ إِ ذ أَيِي ثوْشِيذْ، أَوْمَا؟“ ؤُ نتَّا إِڒَاغَا أَسنْثْ: ’ثَامُّورْثْ ن كابُولْ‘. نِيثنْثِي تّْوَاڒَاغَانْثْ أَمُّو أَڒْ أَسّْ-أَ. 14 حِيرَامْ ثُوغَا إِسّكّْ إِ ؤُجدْجِيذْ مْيَا ؤُ-عِيشْرِينْ ثَالِينْثْ ن وُورغْ.

15 ذ وَا ذ أَوَاڒْ خْ لْجِيزْيَا إِ ثُوغَا إِسّْڭعّذْ ؤُجدْجِيذْ سُولِيمَانْ، مَاحنْذْ أَذْ إِبْنَا ثَادَّارْثْ ن سِيذِي ذ ثَادَّارْثْ نّسْ ذ لْقلْعَا ذ ڒْحِيضْ ن ؤُرْشَالِيمْ ذ حَاصُورْ ذ مَاجِيدُّو ذ جَازَارْ. 16 فِيرْعُونْ، أَجدْجِيذْ ن مِيصْرَا، ثُوغَا إِڭعّذْ، إِطّفْ جَازَارْ، إِقدّْ أَسْ ثِيمسِّي. إِنْغَا أَيْثْ ن كنْعَانْ إِ ثُوغَا إِزدّْغنْ ذِي ثنْذِينْثْ ؤُشَا إِوْشَا إِ-ت ذ ثَارْزفْثْ ن ثسْڒِيثْ إِ يدْجِيسْ، ثَامْغَارْثْ ن سُولِيمَانْ. 17 سُولِيمَانْ إِبْنَا خنِّي جَازَارْ ذ بَايْثْ-حُورُونْ ن وَادَّايْ 18 ذ بَاعْلَاثْ ذِي ثمُّورْثْ نِّي ذ ثَاذْمَارْ ذِي ڒخْڒَا ◘9:‏18 2 إِم. 8‏:‏4‏-‏6 19 ذ مَارَّا ثِيندَّامْ ن ڒخْزنْ نِّي غَارسْ غَارْ سُولِيمَانْ ؤُڒَا ذ ثِيندَّامْ ن إِكَارُّوثنْ ذ ثِيندَّامْ ن إِمْنَاينْ، ؤُ مَارَّا مِينْ ثُوغَا إِمّژْرِي سُولِيمَانْ أَذْ ث إِبْنَا ذِي ؤُرْشَالِيمْ، خْ إِذُورَارْ ن لُوبْنَانْ ؤُ ذِي مَارَّا ثَامُّورْثْ إِ خْ إِحْكمْ.

20 مَارَّا ڒْڭنْسْ إِ إِقِّيمنْ ن إِمُورِييّنْ، إِحِيتِّييّنْ، إِفِيرِيزِييّنْ، إِحِيوِييّنْ ذ إِيابُوسِييّنْ، إِنِّي وَارْ إِدْجِينْ شَا زڭْ أَيْثْ ن إِسْرَائِيل، 21 ثَارْوَا نْسنْ نِّي إِقِّيمنْ أَوَارْنِي أَسنْ ذِي ثمُّورْثْ، إِنِّي وَارْ زمَّارنْ أَيْثْ ن إِسْرَائِيل أَذْ ثنْ حَارّْمنْ إِ ؤُثحِّي، إِڭَّا خَاسنْ سُولِيمَانْ لْجِيزْيَا ن ثسْمُوغِي أَڒْ أَسّْ-أَ. 22 زڭْ أَيْثْ ن إِسْرَائِيل وَارْ إِڭِّي سُولِيمَانْ ؤُڒَا ذ إِجّْ ذ إِسْمغْ، مِينْزِي نِيثْنِي ثُوغَا أَثنْ ذ إِعسْكَارِييّنْ ذ إِمْسخَّارنْ نّسْ ذ ڒْحُوكَّامْ نّسْ ذ إِنغْرَافنْ نّسْ ن ڒْعسْكَارْ ذ إِمقّْرَاننْ ن إِكَارُّوثنْ نّسْ ذ إِمْنَاينْ نّسْ. ◘9:‏22 لَاوِي 25‏:‏39 23 إِنَا ذ إِمحْضَاينْ إِمقّْرَاننْ نِّي ثُوغَا إِتّْوَاڒقّْمنْ خْ ڒْخذْمثْ ذِي طّْوعْ ن سُولِيمَانْ، خمْسَا-مْيَا ؤُ-خمْسِينْ ن يرْيَازنْ نِّي ثُوغَا إِضبَّارنْ خْ ڒْڭنْسْ نِّي ثُوغَا إِتّطّْفنْ ذِي ڒْخذْمثْ.

24 مَاشَا يدْجِيسْ ن فِيرْعُونْ ثْڭعّذْ زِي ثنْذِينْثْ ن ذَاوُوذْ غَارْ ثَادَّارْثْ إِ ثُوغَا إِ ذ أَسْ إِبْنَا. ڒخْذنِّي إِبْنَا لْقلْعَا. ◘9:‏24 2 إِم. 8‏:‏11

25 ثْڒَاثَا ن ثْوَاڒَاوِينْ ذڭْ ؤُسڭّْوَاسْ إِسّْڭعّذْ سُولِيمَانْ ثِيغَارْصَا ن وشْمَاضْ ذ ثوْهِيبِينْ ن ڒهْنَا خْ ؤُعَالْطَارْ إِ ثُوغَا إِبْنَا إِ سِيذِي. عَاوذْ إِسّْبخَّارْ خْ ؤُعَالْطَارْ ن ڒبْخُورْ نِّي إِدْجَانْ زَّاثْ إِ وُوذمْ ن سِيذِي، ؤُشَا أَمُّو إِ إِسلّمْ نتَّا ثَادَّارْثْ أَمْ ثكْمڒْ إِ سِيذِي.

26 أَجدْجِيذْ سُولِيمَانْ إِبْنَا ؤُڒَا ذ إِجّْ ن وَاڭْرَاوْ ن إِغَارُّوبَا ذِي عِيصْيُونْ-جَابَارْ إِ إِدْجَانْ غَارْ إِلَاثْ، غَارْ ثْمَا ن ڒبْحَارْ ن ثلْڭَا، ذِي ثمُّورْثْ إِذُومْ. 27 حِيرَامْ إِسّكّْ إِمْسخَّارنْ نّسْ س وَاڭْرَاوْ ن إِغَارُّوبَا نِّي، إِبحْرِييّنْ إِنِّي إِسّْننْ ڒبْحَارْ، جْمِيعْ أَكْ-ذ إِمْسخَّارنْ ن سُولِيمَانْ. 28 نِيثْنِي إِوْضنْ غَارْ ؤُفِيرْ ؤُ كْسِينْ سّنِّي أَربْعَا-مْيَا ؤُ-عِيشْرِينْ ثَالِينْثْ ن وُورغْ ؤُ إِوْينْ ث غَارْ ؤُجدْجِيذْ سُولِيمَانْ.