١ ذڭْ ؤُسڭّْوَاسْ وِيسّْ ثْمنْطَاشْ ن ؤُجدْجِيذْ يَارُوبْعَامْ، مِّيسْ ن نَابَاطْ، إِذْوڒْ أَبِييَامْ ذ أَجدْجِيذْ خْ يَاهُوذَا. ◘15:‏1 [2 إِم. 13‏:‏1‏-‏23] — 2 إِم. 13‏:‏1 ٢ نتَّا إِحْكمْ ثْڒَاثَا ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ مَاعْكَا، يدْجِيسْ ن أَبِيشَالُومْ. ◘15:‏2 2 إِم. 13‏:‏2 ٣ نتَّا يُويُورْ ذِي مَارَّا دّْنُوبْ ن بَابَاسْ نِّي ثُوغَا إِڭَّا قْبڒْ نّسْ ؤُشَا ؤُڒْ نّسْ وَارْ ثُوغِي شَا إِشْضَارْ غَارْ سِيذِي، أَربِّي نّسْ، أَمْ وُوڒْ ن بَابَاسْ ذَاوُوذْ. ٤ مَاشَا ذِي طّْوعْ ن ذَاوُوذْ إِوْشَا أَسْ سِيذِي، أَربِّي نّسْ، إِجّْ ن ڒفْنَارْ ذِي ؤُرْشَالِيمْ ؤُمِي إِڭَّا أَذْ إِسّكَّارْ مِّيسْ أَوَارْنِي أَسْ، ؤُ ؤُمِي إِڭَّا أَذْ ثقِّيمْ ثْبدّْ ؤُرْشَالِيمْ، ◘15:‏4 1 إِج. 11‏:‏36 ٥ مَاغَارْ ذَاوُوذْ ثُوغَا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي ؤُ نتَّا ثُوغَا وَارْ إِحيّذْ ذِي مَارَّا ثُوذَارْثْ نّسْ خْ مَارَّا مِينْ إِ ذ أَسْ يُومُورْ نتَّا، مْغِيرْ ذِي ثْمسْڒَاشْثْ ن ؤُرِييَا، أَحِيتِّي. ◘15:‏5 2 صم. 11‏:‏4، 15؛ 12‏:‏9 ٦ ثُوغَا ذِينْ أَمنْغِي جَارْ رَاحَابْعَامْ ذ يَارُوبْعَامْ، مَارَّا ؤُسَّانْ ن ثُوذَارْثْ نّسْ.

٧ إِمزْرُوينْ إِقِّيمنْ ن أَبِييَامْ ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟ ثُوغَا ذِينْ عَاوذْ أَمنْغِي جَارْ أَبِييَامْ ذ يَارُوبْعَامْ. ٨ أَبِييَامْ إِڭَّا أَذْ يَاريّحْ جَارْ ڒجْذُوذْ نّسْ. نضْڒنْ ث ذِي ثنْذِينْثْ ن ذَاوُوذْ. مِّيسْ أَسَا إِذْوڒْ ذ أَجدْجِيذْ ذڭْ ومْشَانْ نّسْ.◘15:‏8 2 إِم. 13‏:‏23

٩ ذڭْ ؤُسڭّْوَاسْ وِيسّْ عِيشْرِينْ ن يَارُوبْعَامْ، أَجدْجِيذْ ن إِسْرَائِيل، إِذْوڒْ أَسَا ذ أَجدْجِيذْ خْ يَاهُوذَا. ◘15:‏9 [2 إِم. 14‏:‏1‏-‏2؛ 15‏:‏16؛ 16‏:‏6، 11‏-‏14] ١٠ نتَّا إِحْكمْ وَاحِيثْ ؤُ-ربْعِينْ ن إِسڭّْوُوسَا ذِي ؤُرْشَالِيمْ. حنَّاسْ قَّارنْ أَسْ مَاعْكَا، يدْجِيسْ ن أَبِيشَالُومْ. ١١ أَسَا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، أَمْ إِڭَّا بَابَاسْ ذَاوُوذْ. ١٢ نتَّا إِسُّوفّغْ إِمثْليّنْ زِي ثمُّورْثْ ؤُشَا إِحيّذْ مَارَّا إِميْضَا ن لْ-أَصْنَامْ نْسنْ إِ ثُوغَا ڭِّينْ ڒجْذُوذْ نّسْ. ◘15:‏12 1 إِج. 22‏:‏47 ١٣ نتَّا إِسّْحيّذْ ؤُڒَا ذ حنَّاسْ مَاعْكَا زِي جّهْذْ نّسْ، مَاغَارْ نتَّاثْ ثُوغَا ثڭَّا إِجّْ ن ڒخْيَاڒْ ذ جّْعِيفشْثْ إِ ثْربِّيثْ ن شْوَارْثِي. أَسَا إِقسّْ جّْعِيفشْثْ نّسْ ؤُشَا إِسّْشمْضْ إِ-ت غَارْ ثغْزَارْثْ ن قِيذْرُونْ. ◘15:‏13 2 إِم. 15‏:‏16 ١٤ وَارْ تّْوَاحيّْذنْثْ ڒڭْعُوذِي، مَاشَا ؤُڒْ ن أَسَا ثُوغَا إِشْضَارْ نِيشَانْ إِ سِيذِي، مَارَّا ؤُسَّانْ ن ثُوذَارْثْ نّسْ. ١٥ نتَّا يِيوِي ثِيوْهِيبِينْ إِقدّْسنْ ن بَابَاسْ ؤُڒَا ذ ثِيوْهِيبِينْ نِّي إِسّْقدّسْ نتَّا س يِيخفْ نّسْ ذِي ثَادَّارْثْ ن سِيذِي: نُّوقَارْثْ ذ وُورغْ ذ ڒقْشُوعْ نّغْنِي. ◘15:‏15 لَاوِي 5‏:‏15

١٦ ثُوغَا ذِينْ أَمنْغِي جَارْ أَسَا ذ بَاعْشَا، أَجدْجِيذْ ن إِسْرَائِيل، مَارَّا ؤُسَّانْ نْسنْ. ١٧ بَاعْشَا، أَجدْجِيذْ ن إِسْرَائِيل، إِڭعّذْ غَارْ ؤُمنْغِي ضِيدّْ إِ يَاهُوذَا ؤُشَا إِبْنَا رَامَا، حِيمَا وَارْ إِتّجِّي ؤُڒَا ذ إِجّْ أَذْ يُويُورْ غَارْ أَسَا، حِيمَا أَذْ غَارسْ د-يَاسْ. ◘15:‏17 2 إِم. 16‏:‏1 ١٨ خنِّي إِكْسِي أَسَا مَارَّا نُّوقَارْثْ ذ وُورغْ إِ ثُوغَا إِقِّيمنْ ذڭْ إِخَّامنْ ن ثْخُوبَايْ ن ثَادَّارْثْ ن سِيذِي ؤُڒَا ذ ثْخُوبَايْ ن ثَادَّارْثْ ن ؤُجدْجِيذْ، ؤُشَا إِسلّمْ مَارَّا أَيَا إِ إِمْسخَّارنْ نّسْ. ؤُشَا أَجدْجِيذْ أَسَا إِسّكّْ إِ-ثنْ غَارْ بِينْهَاذَاذْ، مِّيسْ ن ثَابْرِيمُونْ، مِّيسْ ن حَازْيُونْ، أَجدْجِيذْ ن أَرَامْ، ونِّي ثُوغَا إِزدّْغنْ ذِي ذِيمَاشْقْ، حِيمَا أَذْ يِينِي: ◘15:‏18 1 إِج. 20‏:‏1؛ 2 إِم. 16‏:‏2‏-‏14 ١٩ ”أَقَا ذِينْ إِجّْ ن ڒْْعَاهْذْ جَارْ أَيِي ذ شكْ، جَارْ بَابَا ذ بَابَاشْ. خْزَارْ نشّْ أَذْ أَشْ د-سّكّغْ إِشْثْ ن ثرْزفْثْ ن نُّوقَارْثْ ذ وُورغْ. رُوحْ، فْسِي ڒْْعَاهْذْ نّشْ أَكْ-ذ بَاعْشَا، أَجدْجِيذْ ن إِسْرَائِيل، مَاحنْذْ أَذْ إِكَّارْ أَذْ خَافِي إِڭّْوجْ.“ ٢٠ بِينْهَاذَاذْ إِسْڒَا غَارْ ؤُجدْجِيذْ أَسَا ؤُشَا إِسّكّْ إِكُومَانْذَارنْ ن ڒْْعسْكَارْ نّسْ غَارْ ثْندَّامْ ن إِسْرَائِيل. نتَّا إِغْڒبْ خْ عِييُونْ ذ ذَانْ ذ أَبَالْ-بَايْثْ-مَاعْكَا ذ مَارَّا كِينَّارُوثْ. أَقَا إِسّكّْ إِ-ثنْ غَارْ مَارَّا ثَامُّورْثْ ن نَافْثَالِي. ٢١ ؤُمِي بَاعْشَا إِسْڒَا خْ ؤُيَا، إِمْسَارْ، أَقَا نتَّا إِسّْبدّْ ذِي ڒبْنِي ن رَامَا ؤُشَا إِقِّيمْ إِزدّغْ ذِي ثِيرْصَا. ٢٢ أَجدْجِيذْ أَسَا إِجَّا أَذْ بَارّْحنْ ذِي مَارَّا يَاهُوذَا، وَارْ إِتّْغِيمِي حذْ، حِيمَا نِيثْنِي أَذْ كّْسنْ إِژْرَا زِي رَامَا ذ ؤُكشُّوضْ إِ زِي ثُوغَا إِبنَّا بَاعْشَا. ؤُ س مَانْ أَيَا إِبْنَا ؤُجدْجِيذْ أَسَا ثَانْذِينْثْ ن جِيبْعَا ذِي بِينْيَامِينْ ذ مِيصْفَا.

٢٣ إِمزْرُوينْ إِقِّيمنْ ن أَسَا، مَارَّا ثِيمڭَّا نّسْ إِمحْضنْ ذ مَارَّا مِينْ إِڭَّا ؤُڒَا ذ ثِيندَّامْ نِّي إِبْنَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟ مَاشَا ؤُمِي إِوْسَارْ، إِهْڒشْ نتَّا زڭْ إِضَارنْ نّسْ س ثْنَاينْ. ٢٤ أَسَا إِڭَّا أَذْ يَاريّحْ جَارْ ڒجْذُوذْ نّسْ. نتَّا إِتّْوَانْضڒْ جَارْ ڒجْذُوذْ نّسْ ذِي ثنْذِينْثْ ن بَابَاسْ ذَاوُوذْ. مِّيسْ يَاهُوشَافَاطْ إِذْوڒْ ذ أَجدْجِيذْ ذڭْ ومْشَانْ نّسْ. ◘15:‏24 2 إِم. 16‏:‏13؛ 17‏:‏1

٢٥ نَاذَابْ، مِّيسْ ن يَارُوبْعَامْ، إِذْوڒْ ذ أَجدْجِيذْ خْ إِسْرَائِيل ذڭْ ؤُسڭّْوَاسْ وِيسّْ ثْنَاينْ ن أَسَا، أَجدْجِيذْ ن يَاهُوذَا. نتَّا إِحْكمْ ثْنَاينْ ن إِسڭّْوُوسَا خْ إِسْرَائِيل. ٢٦ نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي ؤُشَا يُويُورْ ذڭْ وبْرِيذْ ن بَابَاسْ ؤُ ذِي دّْنُوبْ نّسْ إِ زِي يَارَّا إِسْرَائِيل أَذْ إِخْضَا.

٢٧ بَاعْشَا، مِّيسْ ن أَبِييَا، زِي ثَادَّارْثْ ن إِسَّاكَارْ، إِڭَّا خَاسْ إِشْثْ ن ثْمعْمُوتْشْ ؤُ بَاعْشَا إِغْڒبْ خَاسْ ذِي جِيبَّاثُونْ نِّي إِدْجَانْ ن إِفِيلِيسْطِينِييّنْ، ؤُمِي نَاذَابْ ذ مَارَّا إِسْرَائِيل ثُوغَا إِنّْضنْ إِ جِيبَّاثُونْ. ٢٨ إِنْغَا إِ-ث بَاعْشَا ذڭْ ؤُسڭّْوَاسْ وِيسّْ ثْڒَاثَا ن أَسَا، أَجدْجِيذْ ن يَاهُوذَا، ؤُ نتَّا إِذْوڒْ ذ أَجدْجِيذْ ذڭْ ومْشَانْ نّسْ. ٢٩ ؤُمِي إِذْوڒْ نتَّا ذ أَجدْجِيذْ، إِمْسَارْ، أَقَا إِقْضَا خْ مَارَّا ثَادَّارْثْ ن يَارُوبْعَامْ. ؤُڒَا ذ شَا ن يَارُوبْعَامْ نِّي يَارِّينْ نّفْسْ، وَارْ ث إِجِّي أَذْ إِقِّيمْ إِدَّارْ، أَڒَامِي ث إِثحَّا عْلَاحْسَابْ أَوَاڒْ ن سِيذِي نِّي ثُوغَا إِسِّيوڒْ س ؤُقمُّومْ ن ؤُمْسخَّارْ نّسْ أَخِييَا، أَشِيلُونِي، ◘15:‏29 1 إِج. 14‏:‏10، 14 ٣٠ ذِي سِّيبّثْ ن دّْنُوبْ ن يَارُوبْعَامْ إِ زِي إِخْضَا نتَّا ؤُ إِ زِي يَارَّا إِسْرَائِيل أَذْ إِخْضَا س ثْمڭَّا نّسْ إِخوّْجنْ إِ زِي إِسْعَارْ سِيذِي، أَربِّي ن إِسْرَائِيل.

٣١ إِمزْرُوينْ إِقِّيمنْ ن نَاذَابْ، ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟ ٣٢ ثُوغَا ذِينْ أَمنْغِي جَارْ أَسَا ذ بَاعْشَا، أَجدْجِيذْ ن إِسْرَائِيل، مَارَّا ؤُسَّانْ نْسنْ.

٣٣ ذڭْ ؤُسڭّْوَاسْ وِيسّْ ثْڒَاثَا ن ؤُجدْجِيذْ أَسَا، أَجدْجِيذْ ن يَاهُوذَا، إِذْوڒْ بَاعْشَا، مِّيسْ ن أَخِييَا، ذ أَجدْجِيذْ خْ مَارَّا إِسْرَائِيل ذِي ثِيرْصَا، ؤُ نتَّا إِحْكمْ أَربْعَا ؤُ-عِيشْرِينْ ن إِسڭّْوُوسَا. ٣٤ نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي ؤُ يُويُورْ ذڭْ وبْرِيذْ ن يَارُوبْعَامْ ؤُ ذِي دّْنُوبْ نّسْ إِ زِي يَارَّا إِسْرَائِيل أَذْ إِخْضَا.