أَذْلِيسْ إِقدّْسنْ 1 بُوطْرُوسْ ٥

ثَاروْسَا ن ثْحِيمَارْثْ ن أَربِّي

١ تّْزَاوْڭغْ إِنِّي ذ إِمْغَارنْ جَارْ أَونْ، نشّْ ذ ونِّي ذ أَمْغَارْ أَكِيذْومْ ذ أَشهَّاذْ ن ؤُودّبْ إِ إِكِّينْ خْ لْمَاسِيحْ ؤُڒَا ذ أَمْعَاشَارْ ذڭْ ؤُعُودْجِي نّسْ إِ د غَا إِتّْوَاسّضْهَارْ: ٢ أَروْسمْ ثَاحِيمَارْثْ ن أَربِّي ثنِّي ثْحطَّامْ، وَارْ إِدْجِي س ؤُغِيڒْ مَاشَا س ڒْْخَاضَارْ، وَارْ إِدْجِي ذِي طّْمعْ ن أَرْبحْ وَارْ إِحْڒِينْ، مَاشَا س مَارَّا وُوڒْ نْومْ، ◘ ٣ وَارْ إِدْجِي أَمْ يِينِّي إِدْجَانْ خْ ثْحِيمَارْثْ، مَاشَا ؤُمِي ثدْجَامْ ذ إِجّْ ن ؤُمذْيَا إِشْنَا إِ نِيثْنِي. ◘ ٤ ؤُشَا خْمِي د غَا إِضْهَارْ ؤُمكْسَا أَمقّْرَانْ أَذْ زَّايسْ ثطّْفمْ تَّاجْ ن ؤُعُودْجِي إِ وَارْ إِفنِّينْ. ◘

٥ ؤُ كنِّيوْ، إِبْڒِيغنْ، سَارْسمْ إِخفْ نْومْ سَاذُو إِمْغَارنْ نْومْ، بيْسمْ إِخفْ نْومْ س ؤُوَاضعْ ن أَرُّوحْ إِجّْ إِ ونّغْنِي، مِينْزِي أَربِّي إِتّْعكَّاسْ إِمْعفَّارنْ، مَاشَا إِمْوَاضْعنْ إِوْشَا أَسنْ أَرْضَا. ◘ ٦ سمْژَايمْ إِخفْ نْومْ سَاذُو أَفُوسْ إِجهْذنْ ن أَربِّي، حِيمَا أَذْ كنِّيوْ إِسُّوعْڒَا ذِي ڒْْوقْثْ نّسْ نِيشَانْ. ◘ ٧ مَارَّا إِمْنُوسنْ نْومْ أَرّمْ ثنْ غَارْ أَربِّي، أَقَا نتَّا إِتّْهِيلَّا ذَايْومْ. ◘

٨ أَرّمْ-د ڒْْبَاڒْ، حْضَامْ، مِينْزِي ڒعْذُو نْومْ، شِّيطَانْ أَمقّْرَانْ، إِتّْزهَّارْ أَمْ وَايْرَاذْ ؤُ إِتّْحَامَا، يَارزُّو مِينْ إِزمَّارْ أَذْ إِسَارْضْ. ◘ ٩ مْعَاڒَامْ ث، ثْبدّمْ نِيشَانْ ذِي لْ-إِيمَانْ، أَقَا ثسّْنمْ بلِّي أَيْثْمَاثْومْ ذِي دُّونشْثْ ؤُڒَا ذ نِيثْنِي كسِّينْ أَودّبْ-أَ. ◘

١٠ مَاشَا أَربِّي ن أَرْضَا ونِّي ذ أَنغْ د-إِڒَاغَانْ غَارْ ؤُعُودْجِي نّسْ إِتّْذُومَانْ إِ ڒبْذَا س يَاسُوع لْمَاسِيحْ، أَقَا نتَّا، أَوَارْنِي ڒَْامِي نْودّبْ ڒحْصَارَاثْ-أَ ثِيمُوقْڒِيڒِينْ، أَذْ أَنغْ إِسّجْهذْ، أَذْ أَنغْ إِضْمنْ ؤُ أَذْ أَنغْ إِسدّْ إِ ڒبْذَا. ◘ ١١ غَارسْ نتَّا أَعُودْجِي ذ صُّولْطَا ذ ڒْْعزّْ إِ ڒبْذَا قَاعْ. أَمِينْ.

١٢ ؤُرِيغْ أَومْ-د شَا ن ثْمسْڒَايِينْ ذِي ثِيرَا ثَاقُوضَاضْثْ س ؤُفُوسْ ن سِيلْوَانُوسْ، ؤُمَا ذ أَمْثِيقِّي، ؤُ نشّْ قنْعغْ ؤُ شهّْذغْ، أَقَا مَانْ أَيَا ذِي مِينْ ذِي ثْبدّمْ نِيشَانْ، أَقَا-ث ذ أَرْضَا ن أَربِّي ذ ثِيذتّْ.

١٣ ثَامسْمُونْثْ إِتّْوَافَارْزنْ إِ إِدْجَانْ ذِي بَابِيلْ، ثْسدْجَامْ خَاومْ س ڒهْنَا، ؤُڒَا ذ مِّي مَارْكُوسْ.

١٤ سدْجْممْ خْ وَايَاوْيَا س ڒهْنَا ؤُ س ؤُسُوذمْ إِقدّْسنْ. ڒهْنَا أَذْ كِيومْ يِيڒِي مَارَّا إِذْومْ إِ إِدْجَانْ ذِي لْمَاسِيحْ. أَمِينْ. ◘

◘٥:٢ 5:‏2 ڒخ. 20‏:‏28؛ 1 تِيم. 3‏:‏3؛ ثِيث. 1‏:‏7.

◘٥:٣ 5:‏3 2 كُور. 1‏:‏24؛ فِيل. 3‏:‏17؛ 1 تِيم. 4‏:‏12؛ ثِيث. 2‏:‏7.

◘٥:٤ 5:‏4 إِشا. 40‏:‏11؛ حِز. 34‏:‏23؛ يُوح. 10‏:‏11؛ 1 كُور. 9‏:‏25؛ عبر. 13‏:‏20؛ 2 تِيم. 4‏:‏8؛ يَاع. 1‏:‏12؛ 1 بُط. 1‏:‏4؛ 2‏:‏25.

◘٥:٥ 5:‏5 أَوڒن. 3‏:‏34؛ رُوم. 12‏:‏10؛ فِيل. 2‏:‏3؛ يَاع. 4‏:‏6.

◘٥:٦ 5:‏6 أَيُوبْ 22‏:‏29؛ أَوڒن. 29‏:‏23؛ مت. 23‏:‏12؛ لك. 14‏:‏11؛ يَاع. 4‏:‏10.

◘٥:٧ 5:‏7 إِزهد. 55‏:‏23؛ مت. 6‏:‏25؛ لك. 12‏:‏22؛ 1 كُور. 9‏:‏9؛ فِيل. 4‏:‏6؛ عبر. 13‏:‏5؛ 1 تِيم. 6‏:‏8.

◘٥:٨ 5:‏8 أَيُوبْ 1‏:‏7؛ لك. 22‏:‏31؛ 1 تس. 5‏:‏6؛ 1 بُط. 1‏:‏13؛ 4‏:‏7.

◘٥:٩ 5:‏9 أَفا. 4‏:‏27؛ يَاع. 4‏:‏7.

◘٥:١٠ 5:‏10 عبر. 10‏:‏37؛ 1 بُط. 1‏:‏6.

◘٥:١٤ 5:‏14 رُوم. 16‏:‏16؛ 1 كُور. 16‏:‏20؛ 2 كُور. 13‏:‏12؛ 1 تس. 5‏:‏26.