1 خنِّي ثژُّودْجْ حَانَّا، ثنَّا:

”ؤُڒْ إِنُو إِتّسْڒِيوْڒِيوْ

س ڒفْرَاحثْ ذِي سِيذِي.

إِشّْ إِنُو إِتّْوَاسّْڭعّذْ ذِي سِيذِي.

أَقمُّومْ إِنُو يَارْزمْ ذ أَرْزَامْ

خْ ڒْعذْيَانْ إِنُو،

مَاغَارْ فَارْحغْ خْ ؤُسنْجمْ نّشْ.◘2:‏1 لك. 1‏:‏46.

2 ؤُڒَا ذ إِجّْ ذ أَمْقدّسْ أَمْ سِيذِي،

مَاغَارْ وَارْ ذِينْ إِدْجِي حذْ مْغِيرْ شكْ،

ؤُ وَارْ ذِينْ ثدْجِي ثصْضَارْثْ

أَمْ أَربِّي نّغْ! ◘2:‏2 أَعَوذ. 3‏:‏24؛ إِزهد. 86‏:‏8.

3 وَارْ ثَارنِّيمْ ثسَّاوَاڒمْ

أَمُّو س نّْفَاخثْ،

وَارْ د-تّفِّيغْ ؤُڒَا ذ شَا ن ثُوفّثْ

زڭْ ؤُقمُّومْ نْومْ،

مَاغَارْ سِيذِي ذ إِجّْ ن أَربِّي

إِسّنْ مَارَّا،

ثِيمڭَّا نّسْ تّْوَاوزْننْثْ.

4 ڒْْقوْسْ ن أَيْثْ ن بُو-ثغْرُوضْثْ إِتّْوَارْژَا،

مَاشَا إِنِّي إِنْقَارْضنْ

حزّْمنْ س جّْهذْ.

5 إِنِّي إِجِّيوْننْ أَرهْننْ إِخفْ نْسنْ إِ وغْرُومْ،

مَاشَا إِنِّي إِدْجُوژنْ،

وَارْ قِّيمنْ عَاذْ دْجُوزنْ.

ثنِّي وَارْ إِتِّيرْونْ

ثُورُووْ-د سبْعَا ن إِحنْجِيرنْ،

ثنِّي غَارْ إِدْجَا ؤُبَارُّو ن إِحنْجِيرنْ، ثِيسْڒَاوْ. ◘2:‏5 إِزهد. 34‏:‏11؛ إِڭجذ. 5‏:‏6؛ لك. 1‏:‏53.

6 أَربِّي إِنقّْ ؤُ إِتِّيشْ ثُوذَارْثْ،

نتَّا إِسّْهكّْوَّا غَارْ ڒَاخَارْثْ

ؤُ إِسّْڭعَّاذْ-د سّنِّي.◘2:‏6 أَعَوذ. 32‏:‏39؛ حِز. 37‏:‏11‏-‏14

7 سِيذِي إِتَّارَّا إِجّْ ذ أَمزْڒُوضْ

ؤُ إِجّْ نّغْنِي يَارَّا إِ-ث ذ بُو-وَاڭْڒَا،

إِسّْهكّْوَا ذ إِسّْڭعَّاذْ.

8 أَمُوقْڒِيڒْ إِسّكَّارْ إِ-ث زِي ثْعجَّاجْثْ،

ڒْمسْكِينْ إِجبْذْ إِ-ث-إِ-د زڭْ وفْرَاضْ،

مَاحنْذْ أَذْ ثنْ إِسّْغِيمْ

غَارْ ثَارْوَا ن ثَاصِيڒثْ،

مَاحنْذْ أَذْ إِوْشْ

إِجّْ ن ڒْكُورْسِي ن ڒْعزّْ ذ ڒْوَارْثْ،

مِينْزِي ذْسُوسَا ن ثمُّورْثْ إِدْجَانْ ن سِيذِي

ؤُ نتَّا إِسّْبدّْ خَاسنْ دُّونشْثْ.◘2:‏8 أَيُوبْ 36‏:‏15؛ إِزهد. 113‏:‏7، 8؛ لك. 1‏:‏52؛ إِزهد. 24‏:‏2؛ 102‏:‏26؛ 104‏:‏5.

9 نتَّا إِ إِسّْڒقَّانْ

خْ إِصُورَافْ ن إِمْثِيقَّانْ نّسْ،

مَاشَا إِعفَّاننْ

أَذْ تّْوَاسّْبكْمنْ ذِي ثَادْجسْثْ،

مِينْزِي أَرْيَازْ وَارْ إِتِّيڒِي شَا ذ بُو ثغْرُوضْثْ

زِي جّهْذْ ن يِيخفْ نّسْ.

10 ونِّي إِتّمْشُوبُّوشنْ أَكْ-ذ سِيذِي،

أَذْ إِتّْوَارْژْ.

أَذْ خَاسنْ إِسّْهمْهمْ ذڭْ ؤُجنَّا.

سِيذِي أَذْ إِحْكمْ ثِينڭُّورَا ن دُّونشْثْ،

أَذْ إِوْشْ ثِيزمَّارْ إِ ؤُجدْجِيذْ

ؤُشَا أَذْ إِسّْڭعّذْ إِشّْ ن لْمَاسِيحْ نّسْ.“◘2:‏10 1 صم. 7‏:‏10؛ إِزهد. 2‏:‏6؛ 89‏:‏25.

11 إِعْقبْ إِلْقَانَا عَاوذْ غَارْ ثَادَّارْثْ نّسْ غَارْ رَامَا، مَاشَا أَحنْجِيرْ إِسخَّارْ إِ سِيذِي زَّاثْ إِ وُوذمْ ن ؤُكهَّانْ عَالِي. 12 مَاشَا ثَارْوَا ن عَالِي ثُوغَا ذ ثَارْوَا إِ وَارْ إِسكّْوِينْ. نِيثْنِي وَارْ سِّيننْ شَا سِيذِي. 13 إِكهَّاننْ نُّومنْ أَذْ ڭّنْ أَكْ-ذ ڒْڭنْسْ أَمُّو: مَاڒَا يِيوِي إِجّْ ن ورْيَازْ إِشْثْ ن ثْغَارْصْثْ، خنِّي، ؤُمِي ثُوغَا أَيْسُومْ عَاذْ إِتّْننَّا، يُوسَا-د إِجّْ ن ؤُمْسخَّارْ ن إِكهَّاننْ أَكْ-ذ إِشْثْ ن فُورْشِيثَا ن ثْڒَاثَا ن إِشُوكْضَانْ ذڭْ ؤُفُوسْ نّسْ، 14 إِجُّو ت ذِي ڒْبُورْمثْ نِيغْ ذڭْ ؤُطنْجِيرْ نِيغْ ذِي مَارْمِيثَا نِيغْ ذِي ثيْذُورْثْ ؤُ مَارَّا مِينْ غَا ثكْسِي فُورْشِيثَا، إِكْسِي ث ؤُكهَّانْ إِ يِيخفْ نّسْ. أَمُّو إِ ث ڭِّينْ غَارْ مَارَّا أَيْثْ ن إِسْرَائِيل إِنِّي د-يُوسِينْ غَارْ شِيلُو. 15 أَمُّو عَاوذْ، قْبڒْ غَا بخَّارنْ ثَاذُونْثْ، يُوسَا-د إِجّْ ن ؤُمْسخَّارْ ن إِكهَّاننْ، إِنَّا إِ ورْيَازْ نِّي د-إِوْينْ ثَاغَارْصْثْ: ”أوْشْ أَيِي أَيْسُومْ حِيمَا أَذْ ث قْڒِيغْ إِ ؤُكهَّانْ، مِينْزِي نتَّا وَارْ خَاكْ إِكْسِي شَا أَيْسُومْ إِتّْوَاننَّانْ، مَاشَا مْغِيرْ أَزِيزَا.“ ◼2:‏15 ’أَزِيزَا‘ - نِيغْ ’وَارْ إِتّْوَاننِّينْ‘. 16 مَاڒَا يَارَّا-د خَاسْ ورْيَازْ: ”أَمزْوَارْ إِتّْخصَّا أَذْ بخَّارنْ ثَاذُونْثْ مَارَّا، خنِّي كْسِي مِينْ إِخْسْ وُوڒْ نّشْ إِ يِيخفْ نّشْ!“، إِنَّا أَسْ ؤُمْسخَّارْ ن ؤُكهَّانْ: ”لَّ، إِتّْخصَّا أَذْ ث ثوْشذْ ڒخُّو، مَاڒَا لَّا، أَذْ ث كْسِيغْ س ؤُغِيڒْ!“ 17 دّنْبْ ن إِمْسخَّارنْ ثُوغَا إِمْغَارْ أَطَّاسْ زَّاثْ إِ وُوذمْ ن سِيذِي، مَاغَارْ إِرْيَازنْ سّحْقَارنْ ثَاوْهِيبْثْ ن ڒْغِيدْجثْ ن سِيذِي.

18 مَاشَا شَامْوِيلْ ثُوغَا إِتّْسخَّارْ زَّاثْ إِ وُوذمْ ن سِيذِي، أَقَا-ث ذ إِجّْ ن ؤُحنْجِيرْ إِحزّْمنْ س يِيجّْ ن ؤُپَالْطُو ن ؤُكهَّانْ ن ڒقْطنْ. 19 يمَّاسْ ثڭَّا أَسْ إِجّْ ن ؤُسڒْهَامْ ؤُشَا ثتَّاوْيِي أَسْ ث-إِ-د زڭْ ؤُسڭّْوَاسْ غَارْ ؤُسڭّْوَاسْ، خْمِي ثتّْڭعّذْ أَكْ-ذ ورْيَازْ نّسْ حِيمَا أَذْ ثَاوِي ذِينْ ثَاغَارْصْثْ ن كُوڒْ أَسڭّْوَاسْ. 20 إِڭَّا عَالِي لْبَارَاكَا ذِي إِلْقَانَا ذ ثمْغَارْثْ نّسْ، إِنَّا: ”إِڒِي أَذْ أَشْ إِوْشْ سِيذِي زِي ثمْغَارْثْ-أَ إِجّْ ن ؤُحنْجِيرْ ذڭْ ومْشَانْ ن ؤُحنْجِيرْ إِ ثْسلّمْ نتَّاثْ، ذڭْ ومْشَانْ ن ؤُحنْجِيرْ إِ إِمّوْشنْ إِ سِيذِي.“ خنِّيعقْبنْ نِيثْنِي غَارْ ومْشَانْ ن ثْزذِّيغْثْ نّسْ. ◼2:‏20 ’إِجّْ ن ؤُحنْجِيرْ‘ - س ثْعِيبْرَانِيثْ ’إِشْثْ ن زَّارِيعثْ‘. ’ذڭْ ومْشَانْ ن ؤُحنْجِيرْ‘ - س ثْعِيبْرَانِيثْ ’ذڭْ ومْشَانْ ن ثُوثْرَا‘. 21 سِيذِي مَاشَا إِخْزَارْ غَارْ حَانَّا ؤُ نتَّاثْ ثكْسِي س دّيْسثْ ؤُشَا ثُورُووْ-د ثْڒَاثَا ن إِحنْجِيرنْ ذ ثْنَاينْ ن ثْحنْجِيرِينْ، أَمْ ثُوغَا إِمقَّارْ شَامْوِيلْ أَمژْيَانْ غَارْ سِيذِي.

22 إِذْوڒْ عَالِي إِوْسَارْ أَطَّاسْ. نتَّا إِسْڒَا خْ مَارَّا مِينْ ڭِّينْ إِحنْجِيرنْ نّسْ إِ مَارَّا إِسْرَائِيل ؤُشَا إِسْڒَا عَاوذْ أَقَا نِيثْنِي طّْصنْ أَكْ-ذ ثمْغَارِينْ إِ ثُوغَا تّْسخَّارنْثْ غَارْ وَاذَافْ ن ؤُقِيضُونْ ن ؤُمْسَاڭَارْ. ◘2:‏22 ؤُف. 38‏:‏8 23 نتَّا إِنَّا أَسنْ: ”مَايمِّي ثتّڭّمْ أَيَا أَمُّو، أَڒَامِي إِ تّسْڒِيغْ زِي مَارَّا ڒْڭنْسْ-أَ خْ ثْمڭَّا نْومْ ثِيعفَّانِينْ؟ 24 لَّ، أَ إِحنْجِيرنْ إِنُو، أَيَا وَارْ إِدْجِي ذ إِجّْ ن ڒخْبَارْ إِحْڒَا إِ سْڒِيغْ. كنِّيوْ ثتَّارَّامْ ڒْڭنْسْ-أَ ن سِيذِي أَذْ إِوْضَا ذِي خطُّو. 25 مَاڒَا إِجّْ ن بْنَاذمْ إِخْضَا أَكْ-ذ إِجّْ بْنَاذمْ نّغْنِي، خنِّي أَذْ خَاسْ إِحْكمْ أَربِّي، مَاشَا مَاڒَا إِجّْ ن بْنَاذمْ أَذْ إِخْضَا خْ سِيذِي، وِي خَاسْ غَا إِوْثنْ؟“ وَاخَّا أَمنِّي نِيثْنِي وَارْ سْڒِينْ شَا غَارْ بَابَاثْسنْ، مَاغَارْ سِيذِي ثُوغَا إِخْسْ أَذْ ثنْ إِنغْ. ◼2:‏25 ’غَارْ بَابَاثْسنْ‘ - س ثْعِيبْرَانِيثْ ’غَارْ ثْمِيجَّا ن بَابَاثْسنْ‘. 26 مَاشَا شَامْوِيلْ أَمژْيَانْ ثُوغَا إِمقَّارْ ؤُشَا يَارْنِي إِتَّاسْ-د خْ ڒْخَاضَارْ إِ سِيذِي ؤُڒَا غَارْ إِوْذَانْ. ◘2:‏26 لك. 2‏:‏52.

27 ؤُشَا يُوسَا-د إِجّْ ن ورْيَازْ ن سِيذِي غَارْ عَالِي، إِنَّا أَسْ: ”أَمُّو إِ إِقَّارْ سِيذِي: ’مَا وَارْ إِ ذ سّشْنغْ إِخفْ إِنُو نِيشَانْ إِ ثَادَّارْثْ ن بَابَاشْ ؤُمِي ثنْ ثُوغَا ذِي مِيصْرَا، ذِي ثَادَّارْثْ ن فِيرْعُونْ؟ ◘2:‏27 ڒخ. 7‏:‏25. 28 نشّْ فَارْزغْ ث زِي مَارَّا ثِيقبَّاڒْ ن إِسْرَائِيل ذ أَكهَّانْ إِ نشّْ مَاحنْذْ أَذْ إِڭعّذْ غَارْ ؤُعَالْطَارْ إِنُو حِيمَا أَذْ ذِينْ إِسَّارْغْ ڒبْخُورْ ؤُ مَاحنْذْ أَذْ يَارْضْ أَپَالْطُو ن ؤُكهَّانْ زَّاثْ إِ وُوذمْ إِنُو. نشّْ وْشِيغْ عَاوذْ إِ ثَادَّارْثْ ن بَابَاشْ مَارَّا ثِيغَارْصَا ن ثْمسِّي ن أَيْثْ ن إِسْرَائِيل. ◘2:‏28 لَاوِي 10‏:‏14. 29 مَايمِّي ثْعفّْسمْ كنِّيوْ خْ ثْغَارْصْثْ إِنُو ذ ثوْهِيبْثْ ن ڒْغِيدْجثْ إِ زِي ؤُمُورغْ مَاحنْذْ أَذْ ثنْثْ ثْوهّْبمْ ذِي ثْزذِّيغْثْ إِنُو، ؤُ مَايمِّي ثتّْوقَّارمْ إِحنْجِيرنْ نْومْ أَطَّاسْ خَافِي ؤُمِي ثْمسْڒمْ كنِّيوْ إِخفْ نْومْ س مُومُّو ن مَارَّا ثِيوْهِيبِينْ ن ڒْغِيدْجثْ ن ڒْڭنْسْ إِنُو إِسْرَائِيل؟‘ ◘2:‏29 أَعَوذ. 32‏:‏15. 30 س ؤُيَا إِقَّارْ سِيذِي، أَربِّي ن إِسْرَائِيل: ’نشّْ نِّيغْ نِيشَانْ: ثَادَّارْثْ نّشْ ذ ثَادَّارْثْ ن بَابَاشْ أَذْ ؤُيُورنْثْ زَّاثْ إِ وُوذمْ إِنُو إِ ڒبْذَا!‘، مَاشَا ڒخُّو إِقَّارْ سِيذِي: ’أَيَا أَقَا إِڭّْوجْ خَافِي، مَاغَارْ إِنِّي ذ أَيِي إِتّْوقَّارنْ، أَذْ ثنْ وقَّارغْ، مَاشَا إِنِّي إِ ذ أَيِي إِسّحْقَارَانْ، أَذْ تّْوَاحسْبنْ ذ إِمُوقْڒِيڒنْ. ◘2:‏30 ؤُف. 28‏:‏43؛ 29‏:‏9. 31 خْزَارْ أَذْ أَسنْ وُوسَّانْ، أَذْ قضْعغْ أَغِيڒْ نّشْ ذ ؤُغِيڒْ ن ثَادَّارْثْ ن بَابَاشْ أَڒَامِي وَارْ إِتِّيڒِي عَاذْ ذ أَوسَّارْ ذِي ثَادَّارْثْ نّشْ. 32 شكْ أَذْ ثخْزَارذْ بلِّي أَذْ د-يَاسْ إِجّْ ن وغْرِيمْ ن ثْزذِّيغْثْ، وَاخَّا نتَّا إِتّڭّْ ثْشُونِي-يَا مَارَّا إِ إِسْرَائِيل، ؤُشَاعمَّارْصْ أَذْ يِيڒِي عَاذْ إِجّْ ن ؤُوسَّارْ ذِي ثَادَّارْثْ نّشْ، مَارَّا ؤُسَّانْ. 33 وَارْ قطّْعغْ شَا كُوڒْ أَرْيَازْ إِ غَاركْ إِدْجَانْ خْ ؤُعَالْطَارْ إِنُو، أَڒَامِي غَا ؤُحْڒنْثْ ثِيطَّاوِينْ نّشْ قَاعْ، أَذْ ثفْنَا ڒعْمَارْ نّشْ ؤُشَا مَارَّا أَرَّاوْ ن ثَادَّارْثْ نّشْ أَذْ مّْثنْ ذ إِرْيَازنْ. 34 ذ ثَا إِ ذ أَكْ غَا ثِيڒِي ذ ڒعْڒَامثْ نِّي د غَا ثَاسْ خْ ثْنَاينْ ن إِحنْجِيرنْ نّشْ، حُوفْنِي ذ فِينَاحَاسْ: أَذْ مّْثنْ س ثْنَاينْ ذڭْ إِجّْ ن وَاسّْ. ◘2:‏34 1. Sm. 4‏:‏11 35 نشّْ مَاشَا أَذْ ڭّغْ إِ إِخفْ إِنُو إِجّْ ن ؤُكهَّانْ ذ أَمْثِيقِّي. نتَّا أَذْ إِڭّْ عْلَاحْسَابْ ؤُڒْ ذ ڒعْمَارْ إِنُو. نشّْ أَذْ أَسْ سّْبدّغْ إِشْثْ ن ثَادَّارْثْ ثمْثنْ ؤُشَا نتَّا أَذْ يُويُورْ ڒبْذَا زَّاثْ إِ وُوذمْ ن لْمَاسِيحْ إِنُو. 36 ؤُشَا أَذْ إِمْسَارْ، بلِّي مَارَّا وِي غَا إِقِّيمنْ زِي ثَادَّارْثْ نّشْ، أَذْ د-يَاسْ أَذْ أَسْ إِبنْذقْ إِ يِيشْثْ ن ثُوقِييَّاثْ ن نُّوقَارْثْ نِيغْ إِ يِيشْثْ ن ثشْنِيفْثْ ن وغْرُومْ، أَذْ يِينِي: ’أَرْنِي أَيِي مْغِيرْ غَارْ إِشْثْ ن ڒْخذْمثْ ن ثْسخَّارْثْ ن إِكهَّاننْ، مَاحنْذْ أَذْ غَارِي يِيڒِي إِجّْ ن ؤُڒقِّيمْ ن وغْرُومْ إِ مَاشَّا.‘ “