١ بُولُوسْ، رَّاسُولْ ن يَاسُوع لْمَاسِيحْ عْلَاحْسَابْ ڒْْخَاضَارْ ن أَربِّي، ذ ثَاوْمَاثْ ثِيمُوثِييُو، إِ ثْمسْمُونْثْ ن أَربِّي إِ إِدْجَانْ ذِي كُورِينْثُوسْ ؤُ إِ مَارَّا إِمْقدَّاسنْ إِنِّي إِدْجَانْ ذِي مَارَّا أَخَايَا: ◼1:‏1 ’رَّاسُولْ‘ - نِيغْ ’أَمَازَانْ‘.  ◘1:‏1 فِيل. 1‏:‏1. ٢ أَذْ كِيذْومْ يِيڒِي أَرْضَا ذ ڒهْنَا ن أَربِّي، بَابَاثْنغْ، ؤُ ن سِيذِيثْنغْ يَاسُوع لْمَاسِيحْ. ◘1:‏2 رُوم. 1‏:‏7؛ 1 كُور. 1‏:‏3؛ أَفا. 1‏:‏2؛ 1 بُط. 1‏:‏2.

٣ لْبَارَاكَا أَقَا-ت إِ أَربِّي، بَابَاسْ ن سِيذِيثْنغْ يَاسُوع لْمَاسِيحْ، بَابَاسْ ن أَرّحْمثْ ذ أَربِّي ن مَارَّا أَفوّجْ. ◘1:‏3 أَفا. 1‏:‏3؛ 1 بُط. 1‏:‏3. ٤ نتَّا إِسّْفوَّاجْ أَنغْ ذِي مَارَّا ڒْْمحْنثْ نّغْ، حِيمَا ؤُڒَا ذ نشِّينْ نْقدّْ أَذْ نسّْفوّجْ خْ يِينِّي إِدْجَانْ ذِي مَامّشْ مَا ثدْجَا ڒْْمحْنثْ أَمْ نشِّينْ، س ؤُفوّجْ إِ زِي نتّْوَاسّْفوّجْ زِي أَربِّي. ◘1:‏4 2 كُور. 7‏:‏6. ٥ مِينْزِي أَمنْ إِفيّضْ ذَايْنغْ أَودّبْ ن لْمَاسِيحْ، أَمُّو إِفيّضْ عَاوذْ ؤُفوّجْ نّغْ س لْمَاسِيحْ. ◘1:‏5 إِزهد. 34‏:‏20؛ 94‏:‏19. ٦ مَاشَا عَاوذْ مَاڒَا حْصَارنْ أَنغْ، أَقَا نتّْوَاحْسَارْ إِ ؤُفوّجْ نْومْ ؤُ إِ ثُوذَارْثْ نْومْ. ؤُ مَاڒَا نتّْوَافوّجْ، أَقَا ذ مَانْ أَيَا حِيمَا أَذْ ثتّْوَاسّْفوّْجمْ ؤُڒَا ذ كنِّيوْ، مَاحنْذْ أَذْ غَارْومْ يِيڒِي صَّابْرْ أَڒَامِي ثْزمَّارمْ عَاوذْ أَذْ ثكْسِيمْ أَودّبْ أَمْ نكْسِي ؤُڒَا ذ نشِّينْ أَودّبْ. ◘1:‏6 2 كُور. 4‏:‏17. ٧ أَسِيثمْ نّغْ إِ كنِّيوْ إِمْثنْ، مِينْزِي نسّنْ مَاڒَا ثْشَارّْشمْ ذڭْ ؤُودّبْ، أَذْ ثْشَارْشمْ ؤُڒَا ذڭْ ؤُفوّجْ.

٨ أَ كنِّيوْ، أَيْثْمَاثْنغْ، نشِّينْ نخْسْ أَذْ ثسّْنمْ خْ ڒْْمحْنثْ إِ خَانغْ د-إِكِّينْ ذِي أَسِييَا، أَقَا ثكَّا-د خَانغْ ڒْْمحْنثْ سنّجْ خْ ثْزمَّارْ نّغْ، أَڒَامِي عْڒَاحَاڒْ نقْضعْ ڒَْايَاسْ زِي ثُوذَارْثْ نّغْ. ◘1:‏8 ڒخ. 19‏:‏23. ٩ أَقَا نحْكمْ خْ يِيخفْ نّغْ س ڒْْموْثْ، حِيمَا وَارْ نتِّيقِّي شَا ذڭْ إِخفْ نّغْ، مَاشَا ذِي أَربِّي ونِّي د-إِسّْنكَّارَانْ إِمتِّيننْ. ◘1:‏9 إِرْم. 17‏:‏5، 7. ١٠ نتَّا أَقَا إِفكّْ أَنغْ زِي ڒْْموْثْ إِنقّنْ ؤُشَا نتّْرَاجَا أَذْ أَنغْ إِفكّْ ثْوَاڒَا نّغْنِي ◘1:‏10 1 كُور. 15‏:‏31. ١١ س ؤُعَاونْ ن ثْژَادْجِيثِينْ نْومْ خَانغْ، مَاحنْذْ أَذْ ثِيڒِي ثَاوْهِيبْثْ نّسْ إِ نشِّينْ ذ لْبَارَاكَا إِ وَاطَّاسْ، حِيمَا أَطَّاسْ أَذْ أَسْ قَاذَانْ زِي سِّيبّثْ نّغْ. ◘1:‏11 رُوم. 15‏:‏30؛ 2 كُور. 4‏:‏15؛ فِيل. 1‏:‏19.

١٢ مِينْزِي وَا ذ أَسمْغَارْ نّغْ، شّْهَاذثْ ن ثْنفْسشْثْ نّغْ، بلِّي أَقَا أَنغْ نڭُّورْ ذِي دُّونشْثْ س صْفَا ذ ثَازْذُوڭِي، وَارْ إِدْجِي س ثِيغِيثْ ن بْنَاذمْ، مَاشَا ذِي أَرْضَا ن أَربِّي، ذ أَمزْوَارُو إِ كنِّيوْ. ١٣ مِينْزِي وَارْ ذ أَومْ نُورِي ؤُڒَا ذ إِشْثْ ن ثْمسْڒَاشْثْ مْغِيرْ مِينْ ثسّْنمْ ؤُ أَذْ أَسْ ثْفهْممْ، إِوَا سِّيثِيمغْ أَذْ ثْفهْممْ أَڒْ أَنڭَّارُو، ١٤ أَمْ مَامّشْ عَاوذْ ثْفهْممْ زَّايْنغْ ذْرُوسْ بلِّي أَقَا أَنغْ ذ أَسمْغَارْ نْومْ، أَمْ مَامّشْ ؤُڒَا ذ كنِّيوْ ذ أَسمْغَارْ نّغْ ذڭْ وَاسّْ ن سِيذِيثْنغْ يَاسُوع لْمَاسِيحْ.

١٥ ذِي ڒَْامَانْ-أَ ثُوغَا خْسغْ أَذْ غَارْومْ د-أَسغْ قْبڒْ، حِيمَا أَذْ غَارْومْ يِيڒِي أَرْضَا ثْنَاينْ ن ثْسقَّارْ. ◘1:‏15 1 كُور. 16‏:‏5. ١٦ ثُوغَا خْسغْ أَذْ غَارْومْ د-ؤُسِيغْ ذڭْ وبْرِيذْ غَارْ مَاكِيذُونِييَا. أَوَارْنِي مَانْ أَيَا ثُوغَا خْسغْ أَذْ غَارْومْ د -عقْبغْ عَاوذْ زِي مَاكِيذُونِييَا، حِيمَا كنِّيوْ أَذْ أَيِي ثسّْقبّْضمْ غَارْ يَاهُوذِييَّا. ١٧ ڒَْامِي ثُوغَاعوّْڒغْ أَذْ ڭّغْ مَانْ أَيَا، مَا قدْجْقغْ؟ نِيغْ مِينْ خَارْصغْ أَذْ ث ڭّغْ، مَا خَارْصغْ ث عْلَاحْسَابْ أَيْسُومْ إِنُو، أَڒَامِي ذَايسْ إِتّْوَافْ ’وَاهْ، وَاهْ!‘ ؤُڒَا ذ ’لَّ، لَّا‘؟ ١٨ مَاشَا أَربِّي ذ أَمْثِيقِّي إِ يدْجَا، أَڒَامِي أَوَاڒْ نّغْ إِ كنِّيوْ وَارْ إِدْجِي ’وَاهْ!‘ ؤُڒَا ذ ’لَّ!‘ ◘1:‏18 مت. 5‏:‏37؛ يَاع. 5‏:‏12. ١٩ مِينْزِي مِّيسْ ن أَربِّي، يَاسُوع لْمَاسِيحْ، ونِّي إِ زِي إِتّْوَابَارّحْ جَارْ أَومْ زَّايْنغْ، زَّايِي ؤُ زِي سِيلْوَانُوسْ ؤُ زِي ثِيمُوثِييُو، أَقَا نتَّا وَارْ إِدْجِي ذ ’وَاهْ!‘ ؤُڒَا ذ ’لَّ!‘، مَاشَا ’وَاهْ‘ ذَايسْ إِ يدْجَا. ٢٠ مِينْزِي مَارَّا لْوُوعُوذْ ن أَربِّي، أَقَا أَثنْ ذ ’وَاهْ!‘ ذَايسْ، ذِي لْمَاسِيحْ. س ؤُينِّي نقَّارْ زَّايسْ عَاوذْ ’أَمِينْ!‘ إِ ؤُعُودْجِي ن أَربِّي. ٢١ مَاشَا أَربِّي ذ ونِّي ذ أَنغْ إِضْمنْ أَكِيذْومْ ذِي لْمَاسِيحْ، أَقَا-ث ذ أَمذْهُونْ، نِّي إِ ذ أَنغْ إِذْهنْ. ٢٢ إِڭَّا خَانغْ أَشمِّيعْ نّسْ ؤُشَا إِوْشَا أَنغْ أَرُّوحْ ذ ڒْْعَارْبُونْ ذڭْ وُوڒَاونْ نّغْ. ◘1:‏22 رُوم. 8‏:‏16؛ 2 كُور. 5‏:‏5؛ أَفا. 1‏:‏13؛ 4‏:‏30.

٢٣ مَاشَا نشّْ شهّْذغْ زَّاثْ إِ أَربِّي خْ يِيخفْ إِنُو، أَقَا ثُوغَا أَيِي ذ أَحْنِينْ خَاومْ، ڒَْامِي وَارْ د-ؤُسِيغْ غَارْ كُورِينْثُوسْ. ◘1:‏23 رُوم. 1‏:‏9؛ 9‏:‏1؛ 2 كُور. 11‏:‏31؛ ڭال. 1‏:‏20؛ فِيل. 1‏:‏8؛ 1 تس. 2‏:‏5؛ 1 تِيم. 5‏:‏21؛ 2 تِيم. 4‏:‏1. ٢٤ وَارْ إِدْجِي مِينْزِي نتّْصلّطْ خْ لْ-إِيمَانْ نْومْ، مَاشَا نشِّينْ ذ إِمْسخَّارنْ إِ ڒفْرَاحثْ نْومْ، مِينْزِي زِي لْ-إِيمَانْ ثْبدّمْ ثْمثْنمْ. ◘1:‏24 1 بُط. 5‏:‏3.