1 إِمْسَارْ أَوَارْنِي إِ ڒْموْثْ ن شَاوُولْ، ؤُمِي د-إِعْقبْ ذَاوُوذْ زِي ڒغْڒبْ خْ أَيْثْ ن عَامَالِيقْ، إِقِّيمْ ذَاوُوذْ ثْنَاينْ ن وُوسَّانْ ذِي صِيقْلَاغْ. ◘1:‏1 1 صم. 30‏:‏17 2 خنِّي إِمْسَارْ ذڭْ وَاسّْ وِيسّْ ثْڒَاثَا، أَقَا ذَا، يُوسَا-د إِجّْ ن ورْيَازْ زِي ڒْمَارْڭحْ ن ڒْعسْكَارْ ن شَاوُولْ س وَارُّوضْ إِشَارّڭْ ؤُ س ؤُشَاڒْ خْ ؤُزدْجِيفْ نّسْ. ؤُمِي د-يِيوضْ نتَّا غَارْ ذَاوُوذْ، إِوْضَا غَارْ ثمُّورْثْ، يُوضَارْ أَسْ. 3 ذَاوُوذْ إِنَّا أَسْ: ”مَانِيسْ إِ د-ثُوسِيذْ شكْ؟“ نتَّا يَارَّا-د خَاسْ: ”نشّْ سّْنجْمغْ-د إِخفْ إِنُو زِي ڒْمَارْڭحْ ن ڒْعسْكَارْ ن إِسْرَائِيل.“ 4 ذَاوُوذْ إِنَّا أَسْ: ”مِينْ ذِينْ ذ ڒخْبَارْ؟ إِنِي أَيِي ث!“ نتَّا يَارَّا-د خَاسْ: ”ڒْْڭنْسْ يَارْوڒْ زڭْ ؤُمنْغِي ؤُ أَطَّاسْ نْ ڒْڭنْسْ إِ وْضَانْ، مُّوثنْ. ؤُڒَا ذ شَاوُولْ ذ مِّيسْ يُونَاثَانْ مُّوثنْ.“ 5 ذَاوُوذْ إِنَّا إِ ؤُحُوذْرِي نِّي ذ أَسْ د-يِيوْينْ ڒخْبَارْ: ”مَامّشْ ثڭِّيذْ ثسّْنذْ، بلِّي شَاوُولْ ذ مِّيسْ يُونَاثَانْ مُّوثنْ؟“ 6 خنِّي إِنَّا ؤُحُوذْرِي إِ ذ أَسْ د-يِيوْينْ ڒخْبَارْ: ”نشّْ ؤُسِيغْ-د أَمنِّي وَاهَا غَارْ إِذُورَارْ ن جِيلْبُوعَا ؤُشَا ژْرِيغْ مَامّشْ إِسنّذْ شَاوُولْ خْ لَانْسَا نّسْ ؤُ إِكَارُّوثنْ ن ؤُمنْغِي ذ إِمْنَاينْ إِنِّي خَاسنْ إِنْيِينْ ضفَّارنْ ث بْڒَا قطُّو. ◼1:‏6 ’أَمْنَايْ - إِمْنَاينْ‘ - نِيغْ ’بُو-إِيْسَانْ‘ - ’أَيْثْ ن إِيْسَانْ‘. ذ ونِّي إِنْيِينْ خْ يِيجّْ ن ؤُيِيسْ ذ نتَّا ذ أَمْنَايْ. 7 نتَّا، أَمْ د-إِنّقْڒبْ، إِژْرَا أَيِي، إِڒَاغَا أَيِي-د ؤُ نشّْ نِّيغْ أَسْ: ’أَقَا-يِي ذَا!‘ 8 نتَّا إِنَّا أَيِي: ’مِينْ ثعْنِيذْ شكْ؟‘ نشّْ أَرِّيغْ-د خَاسْ: ’نشّْ زڭْ أَيْثْ ن عَامَالِيقْ.‘ 9 خنِّي إِنَّا أَيِي نتَّا: ’أَسْ-د غَارِي، نغْ أَيِي، مَاغَارْ نشّْ ثڒْقفْ أَيِي ثُوشّنْثْ، مَاشَا وَاخَّا أَمنِّي ثُوذَارْثْ أَقَا-ت ذَايِي.‘ ◼1:‏9 ’ثُوذَارْثْ‘ - س ثْعِيبْرَانِيثْ ’ڒعْمَارْ‘. 10 ڒخْذنِّي نشّْ ؤُيُورغْ ؤُ نْغِيغْ ث، مَاغَارْ نشّْ سّْنغْ، أَقَا وَارْ إِتّْغِيمِي إِدَّارْ أَوَارْنِي إِ ؤُوطُّو نّسْ. خنِّي كْسِيغْ تَّاجْ ن وعْزَاڒْ نِّي خْ ؤُزدْجِيفْ نّسْ ذ ثْمقْيَاسْثْ إِ ثُوغَا غَارسْ ذڭْ ؤُغِيڒْ، إِوْيغْ ثنْ-د ڒخُّو ذَا غَارْ سِيذِي إِنُو.“

11 ڒخْذنِّي إِطّفْ ذَاوُوذْ أَرُّوضْ نّسْ، إِشَارّڭْ إِ-ث. أَمُّو إِ ت ڭِّينْ ؤُڒَا ذ مَارَّا إِرْيَازنْ إِ ثُوغَا غَارسْ إِدْجَانْ. ◘1:‏11 2 صم. 3‏:‏31؛ 13‏:‏31 12 نِيثْنِي وْثِينْ أَڭجْذُورْ، رُونْ ؤُ ژُومّنْ أَڒْ ثَامذِّيثْ خْ شَاوُولْ، خْ مِّيسْ يُونَاثَانْ، خْ ڒْڭنْسْ ن سِيذِي ؤُ خْ ثَادَّارْثْ ن إِسْرَائِيل، مِينْزِي وْضَانْ س سِّيفْ.

13 خنِّي إِنَّا ذَاوُوذْ إِ ؤُحُوذْرِي نِّي ثُوغَا إِ ذ أَسْ-د-يِيوْينْ ڒخْبَارْ: ”زِي مَانِيسْ د-ثُوسِيذْ شكْ؟“ نتَّا إِنَّا أَسْ: ”نشّْ ذ مِّيسْ ن إِجّْ ن ؤُبَارَّانِي، ن إِجّْ ن ورْيَازْ زڭْ أَيْثْ ن عَامَالِيقْ.“ 14 ذَاوُوذْ إِنَّا أَسْ: ”مَامّشْ ثڭِّيذْ، شكْ وَارْ ثڭّْوِيذذْ شَا أَذْ ثسّْوِيژّْضذْ س ؤُفُوسْ حِيمَا أَذْ ثَاردّْدْجذْ أَمذْهُونْ ن سِيذِي؟“ 15 خَاسْ ؤُشَا إِڒَاغَا-د ذَاوُوذْ خْ إِجّنْ زڭْ إِمْسخَّارنْ إِنَّا: ”قَارّبْ-د، حيّحْ خَاسْ!“ ؤُ نتَّا إِحيّحْ خَاسْ أَڒَامِي ث إِنْغَا. 16 ذَاوُوذْ إِنَّا أَسْ: ”إِذَامّنْ نّشْ أَذْ إِڒِينْ خْ ؤُزدْجِيفْ نّشْ، مَاغَارْ أَقمُّومْ نّشْ إِشْهذْ خَاكْ ؤُمِي ثنِّيذْ: ’نشّْ نْغِيغْ أَمذْهُونْ ن سِيذِي.‘ “

17 إِغنّجْ ذَاوُوذْ إِزْڒِي-يَا ن وشْضَانْ خْ شَاوُولْ ؤُ خْ مِّيسْ يُونَاثَانْ. 18 نتَّا إِنَّا: ”أَذْ ڒمْذنْ أَيْثْ ن يَاهُوذَا إِزْڒِي ن ڒْقوْسْ.“ خْزَارْ، يُورَا ذڭْ وذْلِيسْ ن ؤُمْسڭّذْ. ◘1:‏18 ياش. 10‏:‏13

19 ”ثَالْوِيزْثْ ن إِسْرَائِيل إِتّْوَانغْ

خْ ڒڭْعُوذِي نّشْ.

مَامّشْ وْضَانْ أَيْثْ ن بُو-ثغْرُوضْثْ!

20 وَارْ ت تّْحَاجَامْ ذِي جَاثْ،

وَارْ تّْسِيوْضمْ ڒخْبَارْ

ذڭْ إِبْرِيذنْ ن أَشْقَالُونْ،

مَاحنْذْ يسِّيسْ ن إِفِيلِيسْطِينِييّنْ

وَارْ فَارّْحنْثْ،

مَاحنْذْ يسِّيسْ ن يِينِّي وَارْ إِتّْوَاخثْننْ

وَارْ سّْڒِيوْڒِيونْثْ. ◘1:‏20 مِيخَا 1‏:‏10

21 أَ إِذُورَارْ ن جِيلْبُوعَا،

وَارْ خَاومْ إِتِّيڒِي نّْذَا نِيغْ أَنْژَارْ،

وَارْ خَاومْ تِّيڒِينْ إِيَّارنْ

مَاحنْذْ أَذْ زَّايْسنْ تّْوَاكّْسنْثْ

ثِيوْهِيبِينْ ن ؤُسْڭعّذْ،

مَاغَارْ ذِينْ إِتّْوَابقّضْ

ثْسدَّارْثْ ن أَيْثْ ن بُو-ثغْرُوضْثْ س ڒْعَارْ،

ثَاسدَّارْثْ ن شَاوُولْ،

أَخْمِي نتَّا وَارْ إِدْجِي ذ أَمذْهُونْ س زّشْثْ.

22 زڭْ إِذَامّنْ ن يِينِّي إِتّْوَانْغنْ،

زِي ثَاذُونْثْ ن أَيْثْ ن بُو-ثغْرُوضْثْ

وَارْ ذ إِمْنِيعْ ڒْقوْسْ ن يُونَاثَانْ،

ؤُ سِّيفْ ن شَاوُولْ وَارْ د-إِعْقِيبْ بَاطڒْ.

23 شَاوُولْ ذ يُونَاثَانْ تّْوَاعِيزّنْ

ذ إِغْڒَانْ غَارْ إِوْذَانْ ذِي ثُوذَارْثْ نْسنْ،

ؤُ ذِي ڒْموْثْ نْسنْ وَارْ مّْسبْضِينْ.

نِيثْنِي ثُوغَا أَثنْ فْسُوسنْ خْ إِڭِيذَارنْ

ذ جهْذنْ خْ وَايْرَاذنْ.

24 أَ يسِّيسْ ن إِسْرَائِيل، رُونْثْ خْ شَاوُولْ،

ونِّي كنِّينْثْ إِسّْيَارْضنْ س ؤُزڭّْوَاغْ،

س ڒقْشُوعْ إِغْڒَانْ،

ذ ونِّي إِڭِّينْ ثَالْوِيزْثْ ن وُورغْ

خْ وَارُّوضْ نْكنْثْ.

25 مَامّشْ إِ وْضَانْ أَيْثْ ن بُو-ثغْرُوضْثْ

ذِي ڒْوسْطْ ن ؤُمنْغِي!

أَ، يُونَاثَانْ، ثتّْوَانْغذْ خْ ڒڭْعُوذِي نّشْ.

26 ذِي سِّيبّثْ نّشْ تّْوَاحْصَارغْ،

أَ ؤُمَا يُونَاثَانْ!

شكْ ثُوغَا ثتّْوَاعِيزّذْ غَارِي أَطَّاسْ.

ثُوغَا ثَايْرِي نّشْ غَارِي ذ سَّارْ كْثَارْ

خْ ثَايْرِي ن ثمْغَارِينْ.

27 مَامّشْ وْضَانْ أَيْثْ ن بُو-ثغْرُوضْثْ،

مَامّشْ ودَّارنْ ڒسْنَاحْ ن ؤُمنْغِي!“