١ أَقَا نتّْزَاوڭْ كنِّيوْ، أَ أَيْثْمَا، زِي جِّيهثْ ن ثْوَاسِيثْ ن سِيذِيثْنغْ يَاسُوع لْمَاسِيحْ ذ وسْمُونِي نّغْ غَارسْ، ٢ أَقَا وَارْ ثتّْنخْڒِيعمْ نِيغْ ثسْحِيسّْفمْ شَا ذغْيَا، وَارْ إِدْجِي س إِجّْ ن وَاوَاڒْ نِيغْ س شَا ن أَرُّوحْ نِيغْ س إِشْثْ ن ثبْرَاثْ أَخْمِي زَّايْنغْ، إِ إِقَّارنْ: ”خْزَارْ، أَسّْ ن سِيذِيثْنغْ يُوسَا-د!“ ◘2:‏2 إِرْم. 29‏:‏8؛ مت. 24‏:‏4؛ أَفا. 5‏:‏6؛ كُول. 2‏:‏18؛ 1 يُوح. 4‏:‏1. ٣ وَارْ تّجِّي ؤُڒَا ذ إِجّْ أَذْ كنِّيوْ إِغْوَا س شَا ن وبْرِيذْ، مِينْزِي أَسّْ نِّي وَارْ د-إِتِّيسْ قْبڒْ  إِ د غَا يَاسْ ؤُغوّغْ ؤُشَا أَذْ د-إِبَانْ بْنَاذمْ ن دّْنُوبْ، أَقَا-ث ذ مِّيسْ ن ثهْلِيكثْ. ◼2:‏3 ’مِّيسْ ن ثهْلِيكثْ‘ - نِيغْ: ’مِّيسْ ن ڒخْصَارثْ‘ نِيغْ ’مِّيسْ ن ڒفْنَا‘.  ◘2:‏3 مت. 24‏:‏23؛ 1 تِيم. 4‏:‏1؛ 1 يُوح. 2‏:‏18. ٤ نتَّا إِتّمْعَاڒَا ؤُ إِسّْعُودْجْ إِخفْ نّسْ خْ مَارَّا مِينْ إِتّْوَاسمَّانْ ’أَربِّي‘ نِيغْ ’أَعْبَاذْ‘، أَڒْ غَا إِقِّيمْ ذِي زَّاوشْثْ ثَامقّْرَانْثْ ن أَربِّي أَمشْنَاوْ نتَّا ذ أَربِّي إِ يدْجَا، ؤُشَا أَذْ إِسّْشنْ إِ يِيخفْ نّسْ، أَقَا نتَّا أَخْمِي أَربِّي. ◘2:‏4 دَان. 11‏:‏36.

٥ مَا وَارْ ثعْقِيڒمْ شَا ؤُمِي ثُوغَا أَيِي كِيومْ، أَقَا نِّيغْ أَومْ-ث؟ ٦ مَاشَا ڒخُّو ثِيوْضمْ ثسّْنمْ مِينْ ذ أَسْ إِبدّنْ عَاذْ ذڭْ وبْرِيذْ، حِيمَا أَذْ د-إِبَانْ ذِي ڒْْوقْثْ نّسْ. ٧ سِّيرّْ ن ڒْْمُوعْصِييّثْ أَقَا إِخدّمْ ڒخُّو. مَاشَا مَاڒَا إِمّكْسِي زِي ڒْْوسْطْ مِينْ ذ أَسْ إِسّْبدّنْ عَاذْ ذڭْ وبْرِيذْ ڒخُّو، ٨ أَذْ د-إِضْهَارْ بَابْ ن ڒْْمُوعْصِييّثْ، ونِّي غَا إِسّْهلّكْ سِيذِيثْنغْ يَاسُوع س ثْوَارِّيثْ ن نّفْسْ زڭْ ؤُقمُّومْ نّسْ، أَذْ ث إِسّبْضڒْ خْمِي د غَا ثْبَانْ ثْوَاسِيثْ نّسْ. ◘2:‏8 أَيُوبْ 4‏:‏9؛ إِشا. 11‏:‏4. ٩ مَاغَارْ ثَاوَاسِيثْ ن بَابْ نِّي ن ڒْْمُوعْصِييّثْ أَذْ ثْرَاحْ جْمِيعْ أَكْ-ذ ڒْْخذْمثْ ن شِّيطَانْ س مَارَّا جّهْذْ ذ ڒعْڒَامَاثْ ذ لْمُوعْجِيزَاثْ إِسّْخَارِّيقنْ، ◘2:‏9 أَعَوذ. 13‏:‏2؛ يُوح. 8‏:‏41؛ 2 كُور. 4‏:‏4؛ أَفا. 2‏:‏2؛ أَسَا. 13‏:‏13. ١٠ ؤُ س مَارَّا ڒْْغشّْ ن ڒْْمُوعْصِييّثْ ذڭْ يِينِّي إِ غَا إِهلّْكنْ، مِينْزِي نِيثْنِي وَارْ قْبِيڒنْ شَا ثَايْرِي ن ثِيذتّْ حِيمَا أَذْ زَّايسْ أَفنْ ثُوذَارْثْ. ◘2:‏10 2 كُور. 2‏:‏15؛ 4‏:‏3. ١١ س ؤُينِّي أَربِّي أَذْ غَارْسنْ د-إِسّكّْ مِينْ ثنْ غَا يَارّْ س جّهْذْ غَارْ ؤُودَّارْ، أَڒْ غَا يَامْننْ ذڭْ ؤُخَارِّيقْ. ◘2:‏11 رُوم. 1‏:‏24؛ 1 تِيم. 4‏:‏1. ١٢ مَارَّا إِنِّي وَارْ يُومِيننْ شَا ذِي ثِيذتّْ، مَاشَا إِخْسنْ ڒْْمُوعْصِييّثْ كْثَارْ، أَذْ تّْوَاحَاكْمنْ.

١٣ مَاشَا إِشُووَّارْ أَنغْ أَذْ نْقَاذَا أَربِّي ڒبْذَا خَاومْ، أَ أَوْمَاثنْ نّغْ، إِنِّي خفْ إِعِيزّْ سِيذِيثْنغْ، أَقَا أَربِّي إِخْضَارْ إِ كنِّيوْ زڭْ ؤُمزْوَارُو إِ ثُوذَارْثْ، س ثْقدَّاسْثْ زِي أَرُّوحْ ؤُ س لْ-إِيمَانْ ن ثِيذتّْ. ١٤ أَقَا إِڒَاغَا-د خَاومْ إِ مَانْ أَيَا س ؤُبَارّحْ نّغْ س ڒخْبَارْ أَصبْحَانْ، حِيمَا أَذْ ثِيڒِيمْ إِ ؤُعُودْجِي ن سِيذِيثْنغْ يَاسُوع لْمَاسِيحْ.

١٥ س ؤُينِّي، أَ أَيْثْمَا، بدّمْ نِيشَانْ ؤُشَا طّْفمْ ذِي ثْوصَّا إِ ذ أَومْ إِتّْوَاسّْڒمْذنْ زَّايْنغْ، مَا س وَاوَاڒْ نِيغْ س ثبْرَاثْ نّغْ. ◘2:‏15 2 تس. 3‏:‏6.

١٦ مَاشَا نتَّا، سِيذِيثْنغْ يَاسُوع لْمَاسِيحْ، ؤُ أَربِّي، بَابَاثْنغْ، ونِّي ذ أَنغْ إِخْسنْ ذ ونِّي ذ أَنغْ إِوْشنْ أَفوّجْ إِتّْذُومَانْ ذ ؤُسِيثمْ إِشْنَانْ س أَرْضَا نّسْ، ١٧ أَذْ إِسّْفوّجْ ؤُڒَاونْ نْومْ ؤُشَا أَذْ كنِّيوْ إِسّجْهذْ ذِي مَارَّا أَوَاڒْ ؤُ ذِي مَارَّا ڒْْخذْمثْ ثَاصبْحَانْثْ. ◘2:‏17 1 تس. 3‏:‏13.