أَذْلِيسْ إِقدّْسنْ ڒخْذَايمْ ن رُّوسُولْ 7

أَوَاڒْ ن سْثِيفَانُوسْ زَّاثْ إِ جْمَاعثْ ثَامقّْرَانْثْ

1 أَرَّايْسْ ن إِكهَّاننْ إِنَّا: ”مَا مَانْ أَيَا ذ ثِيذتّْ؟“ 2 خنِّي إِنَّا سْثِيفَانُوسْ:

”أَ كنِّيوْ، أَ إِرْيَازنْ، أَيْثْمَاثْنغْ ذ إِبَابَاثنْ نّغْ، سْڒمْ! أَربِّي ن ؤُعُودْجِي إِضْهَارْ إِ جذِّيثْنغْ إِبْرَاهِيمْ أَمْ ثُوغَا عَاذْ ذِي مِيسُوپُوثَامْيَا، ثنِّي ذ ثَامُّورْثْ جَارْ ثْنَاينْ ن إِغزْرَانْ، قْبڒْ مَا أَذْ إِزْذغْ ذِي حَارَانْ. 3 نتَّا إِنَّا أَسْ: ’فّغْ زِي ثمُّورْثْ نّشْ ؤُ زِي ڒَادْجْ نّشْ، رُوحْ غَارْ ثمُّورْثْ ثنِّي إِ ذ أَشْ غَا سّشْنغْ.‘ ◘ 4 ڒخْذنِّي إِفّغْ إِبْرَاهِيمْ زِي ثمُّورْثْ ن إِكَالْذَانِييّنْ ؤُشَا إِزْذغْ ذِي هَارَانْ. أَوَارْنِي ڒَامِي إِمُّوثْ بَابَاسْ، إِسّْمُوطِّييْ إِ-ث-إِ-د أَربِّي غَارْ ثمُّورْثْ-أَ إِ ذِي ثْزدّْغمْ أَسّْ-أَ. 5 نتَّا وَارْ ذ أَسْ إِوْشِي شَا ذَايسْ ڒْوَارْثْ ؤُڒَا ذ إِجّْ ن ؤُصُورِيفْ ن ؤُضَارْ، مَاشَا إِوَاعْذْ أَذْ أَسْ ت إِوْشْ ذ ڒْوَارْثْ، إِ نتَّا ؤُ إِ زَّارِيعثْ نّسْ أَوَارْنِي أَسْ، أَمْ وَارْ ثُوغِي غَارسْ عَاذْ مِّيسْ. ◘ 6 إِسِّيوڒْ أَربِّي أَكِيذسْ، إِنَّا أَسْ: ’أَذْ ثِيڒِي زَّارِيعثْ نّشْ ذ أَمْعزّبْ ذڭْ إِشْثْ ن ثمُّورْثْ ثغْرِيبْثْ، ؤُشَا نِيثْنِي أَذْ ثنْ أَرّنْ ذ إِسمْغَانْ، أَذْ ذَايْسنْغزَّانْ أَربْعَا-مْيَا ن إِسڭّْوُوسَا. ◘ 7 ؤُشَا ڒْڭنْسْ إِ ذ أَسْ غَاعبْذنْ أَمْ يِيسمْغَانْ، أَذْ ث حَاسْبغْ.‘ ؤُشَا يَارْنِي أَربِّي ذڭْ وَاوَاڒْ نّسْ، إِنَّا: ’أَوَارْنِي مَانْ أَيَا أَذْ فّْغنْ، أَذْ أَيِيعبْذنْ ذڭْ ومْشَانْ-أَ‘. ◘ 8 نتَّا إِوْشَا أَسْ ڒْعَاهْذْ ن وخْثَانْ. خَاسْ ؤُشَا إِجَّا-د إِسْحَاقْ ؤُشَا إِخْثنْ إِ-ث ذڭْ وَاسّْ وِيسّْ ثْمنْيَا ؤُشَا إِسْحَاقْ إِجَّا-د يَاعْقُوبْ، يَاعْقُوبْ إِجَّا-د ثنْعَاشْ ن ڒجْذُوذْ إِمزْوُورَا. ◘

9 ڒجْذُوذْ إِمزْوُورَا غَارّنْ زِي يُوسُوفْ ؤُشَا زّنْزنْ ث غَارْ مِيصْرَا. مَاشَا أَربِّي ثُوغَا-ث أَكِيذسْ، ◘ 10 إِسّنْجمْ إِ-ث زِي مَارَّا ڒمْحَايمْ نّسْ. نتَّا إِوْشَا أَسْ أَرْضَا ذ ثِيغِيثْ قِيبَاتْشْ إِ فِيرْعُونْ، أَجدْجِيذْ ن مِيصْرَا، ؤُشَا وَانِيثَا إِڭَّا إِ-ث ذ أَزدْجِيفْ خْ مِيصْرَا ؤُ خْ مَارَّا ثَادَّارْثْ نّسْ. ◘ 11 مَاشَا يُوسَا-د ڒَاژْ ذ إِشْثْ ن ڒْمحْنثْ ثمْغَارْ ذِي مَارَّا ثَامُّورْثْ ن مِيصْرَا ؤُ ذِي ثمُّورْثْ ن كنْعَانْ، وَارْ ثُوغِي إِ ڒجْذُوذْ نّغْ حِيمَا أَذْ جِيوْننْ. ◘ 12 مَاشَا ؤُمِي إِسْڒَا يَاعْقُوبْ بلِّي أَقَا ذِينْ عَاذْ مِينْ إِقِّيمنْ ن ڒْحبّْ ذِي مِيصْرَا، إِسّكّْ ڒجْذُوذْ نّغْ ذِينِّي إِ ؤُمُورْ أَمزْوَارُو. ◘ 13 ڒَامِي ذِينْ رُوحنْ إِ ؤُمُورْ وِيسّْ ثْنَاينْ إِسّضْهَارْ يُوسُوفْ إِخفْ نّسْ إِ يَايْثْمَاسْ ؤُشَا يَارْڭبْ فِيرْعُونْ خْ ڒَادْجْ ن يُوسُوفْ. ◘ 14 إِسّكّْ يُوسُوفْ، يُومُورْ مَاحنْذْ أَذْ د-يَاسْ بَابَاسْ يَاعْقُوبْ ذ مَارَّا ڒَادْجْ نّسْ: خمْسَا ؤُ-سبْعِينْ ن ڒعْمُورْ. 15 إِهْوَا-د يَاعْقُوبْ غَارْ مِيصْرَا، إِمُّوثْ نتَّا ذ ڒجْذُوذْ نّغْ. ◘ 16 إِوْينْ ث غَارْ شَاكِيمْ، سَّارْسنْ ث ذڭْ ونْضڒْ نِّي إِسْغَا إِبْرَاهِيمْ س يِيجّْ ن تَّامَانْ ن نُّوقَارْثْ زڭْ أَيْثْ ن حَامُورْ، بَابَاسْ ن شَاكِيمْ. ◘

17 مَاشَا أَڒَامِي د-ثِيوضْ ڒْوقْثْ إِ ثُوغَا إِوَاعْذْ زَّايسْ أَربِّي إِ إِبْرَاهِيمْ س إِشْثْ ن ثْجَادْجِيثْ، ثُوغَا إِڭَامْ ڒْڭنْسْ، إِذْوڒْ إِجْهذْ ذِي مِيصْرَا، ◘ 18 أَڒَامِي د-إِكَّارْ إِجّْ ن ؤُجدْجِيذْ نّغْنِي خْ مِيصْرَا إِ ثُوغَا وَارْ إِسِّيننْ يُوسُوفْ. ◘ 19 وَانِيثَا ثُوغَا إِتّڭّْ س ڒغْذَارْ أَكْ-ذ جَّاذِيرَا نّغْ ؤُشَا إِغزَّا خْ ڒجْذُوذْ نّغْ. يُومُورْ إِ-ثنْ مَاحنْذْ أَذْ نْضَارنْ إِسيْمَانْ نْسنْ حِيمَا وَارْ تّْغِيمِينْ أَذْ دَّارنْ.

20 ذِي ڒْوقْثْ نِّي إِخْڒقْ-د مُوسَا، يُوسَا أَسْ-د خْ ڒْخَاضَارْ إِ أَربِّي. سّيْمنْ ث ذِي ثَادَّارْثْ ن بَابَاسْ ثْڒَاثَا ن إِيُورنْ. ◘ 21 ڒَامِي إِتّْوَامّنْضَارْ زڭْ يمَّاسْ ذڭْ إِغْزَارْ، ثُوفَا إِ-ث يدْجِيسْ ن فِيرْعُونْ، ثسّيمْ إِ-ث أَمْ مَامّشْ إِدْجَا ذ مِّيسْ ن يِيخفْ نّسْ. 22 إِتّْوَاسّْغَارْ مُوسَا ذِي مَارَّا ثِيغِيثْ ن إِمِيصْرِييّنْ ؤُشَا ثُوغَا إِتّْقدَّا خْ وَاوَاڒْ ؤُ خْ مِينْ ثُوغَا إِتّڭّْ.

23 أَڒَامِي غَارسْ أَربْعِينْ ن إِسڭّْوُوسَا، إِضَارْ-د خَاسْ ذڭْ وُوڒْ نّسْ مَاحنْذْ أَذْ يَارْزفْ أَيْثْمَاسْ، أَيْثْ ن إِسْرَائِيل. ◘ 24 ؤُمِي إِژْرَا أَقَا ضدْجنْ إِجّنْ زڭْ أَيْثْمَاسْ زِي ثقْبِيتْشْ نّسْ، إِخْڒفْ زَّايسْ ذِي طّْوعْ نّسْ، إِڭَّا إِخفْ نّسْ ذ ڒْقَاضِي ذِي سِّيبّثْ نّسْ ؤُشَا إِنْغَا أَمِيصْرِي نِّي ث إِضدْجنْ. 25 ثُوغَا إِتّْرَاجَا بلِّي ثَاوْمَاثْ نّسْ، أَيْثْ ن إِسْرَائِيل، أَذْ فهْمنْ أَقَا أَربِّي أَذْ أَسنْ إِسِّيوِيضْ أَسنْجمْ س ؤُفُوسْ نّسْ، مَاشَا نِيثْنِي وَارْ فْهِيمنْ.

26 ذڭْ وَاسّْ أَوَارْنِي أَسْ إِضْهَارْ أَسنْ-د عَاوذْ، ڒَامِي ثُوغَا تّْمنْغَانْ. إِعْڒمْ أَسنْ مَاحنْذْ أَذْ مسّصْڒَاحنْ، إِقَّارْ: ’أَ إِرْيَازنْ، كنِّيوْ ذ أَوْمَاثنْ، مَايمِّي ثْعدَّامْ إِجّنْ خْ ونّغْنِي؟‘ 27 ونِّي ثُوغَا إِتّْعدَّانْ خْ ؤُمدُّوكّڒْ نّسْ، إِعَارّنْ إِ-ث، إِقَّارْ: ’وِي شكْ إِڭِّينْ خَانغْ ذ أَزدْجِيفْ ذ ڒْقَاضِي؟ ◘ 28 مَا أَذْ ثَاغْ أَذْ ثخْسذْ أَذْ أَيِي ثنْغذْ أَمْ مَامّشْ ثنْغِيذْ إِضنَّاضْ أَمِيصْرِي؟‘ ◘ 29 ڒخْذنِّي يَارْوڒْ مُوسَا ذِي سِّيبّثْ ن وَاوَاڒْ-أَ ؤُشَا إِذْوڒْ ذ أَمْعزّبْ ذِي ثمُّورْثْ ن مِيذْيَانْ مَانِي د-يجَّا ثْنَاينْ إِحنْجِيرنْ.

30 أَوَارْنِي ڒَامِي عْذُونْ إِ نتَّا أَربْعِينْ ن إِسڭّْوُوسَا، إِبَانْ أَسْ-د لْمَالَاكْ ن سِيذِي ذِي ڒخْڒَا ن وذْرَارْ ن سِينَا ذِي ثْمسِّي إِتّحْذُوذُوقنْ ذِي شْبَارْقْ أَكْ-ذ إِسنَّاننْ. ◘ 31 ؤُمِي إِژْرَا مُوسَا مَانْ أَيَا، إِثبْهثْ س ڒوْحِييْ إِ إِژْرَا، ؤُشَا ؤُمِي د-إِقَارّبْ حِيمَا أَذْ إِژَارْ، إِنَّا أَسْ سِيذِي س إِشْثْ ن ثْمِيجَّا: 32 ’أَقَا ذ نشّْ، أَربِّي ن ڒجْذُوذْ نْومْ، أَربِّي ن إِبْرَاهِيمْ، ن إِسْحَاقْ ؤُ ن يَاعْقُوبْ!‘ إِبْذَا مُوسَا إِتَّارْجِيجِي أَطَّاسْ، وَارْ إِزْعِيمْ أَذْ إِخْزَارْ غَارْ ڒوْحِييْ. ◘ 33 إِنَّا أَسْ سِيذِي: ’كّسْ سَانْذَالِييَاثْ نّشْ زڭْ إِضَارنْ نّشْ، مِينْزِي ثَامُّورْثْ مِيخفْ ثْبدّذْ ثْقدّسْ إِ ثدْجَا.‘ ◘ 34 أَقَا ژْرِيغْ ڒْمحْنثْ ن ڒْڭنْسْ إِنُو ذِي مِيصْرَا ؤُشَا سْڒِيغْ إِ ؤُزهَّارْ نْسنْ، هْوِيغْ-د حِيمَا أَذْ ثنْ سّْنجْمغْ. ؤُشَا ڒخُّو، أَسْ-د ذَا، أَذْ د شكْ سّكّغْ غَارْ مِيصْرَا.‘ ◘

35 مُوسَا وَانِيثَا، ونِّي إِنْضَارنْ نِيثْنِي ؤُمِي نَّانْ: ’وِي شكْ إِڭِّينْ خَانغْ ذ أَزدْجِيفْ ذ ڒْقَاضِي؟‘، وَانِيثَا إِسّكّْ إِ-ث إِ-د أَربِّي غَارْسنْ ذ أَزدْجِيفْ ذ ؤُمْسنْجمْ س ؤُفُوسْ ن لْمَالَاكْ نِّي ذ أَسْ د-إِضْهَارنْ ذِي شْبَارْقْ أَكْ-ذ إِسنَّاننْ. 36 وَانِيثَا إِسُّوفّغْ إِ-ثنْ زِي مِيصْرَا أَمْ إِڭَّا ڒعْڒَامَاثْ ذ ڒعْجَايبْ ذ ثْمڭَّا ثِيمقّْرَانِينْ ذِي ثمُّورْثْ ن مِيصْرَا، غَارْ ڒبْحَارْ ن ؤُغَانِيمْ ؤُ ذِي ڒخْڒَا ڒْمِيجَاڒْ ن أَربْعِينْ ن إِسڭّْوُوسَا. ◘ 37 وَا ذ مُوسَا ونِّي إِنَّانْ إِ أَيْثْ ن إِسْرَائِيل: ’سِيذِي، أَربِّي نْومْ، أَذْ أَومْ د-إِسّْڭعّذْ إِجّْ ن ؤُنَابِي أَمْ نشّْ زِي ثَاوْمَاثْ نْومْ. إِ نتَّا ؤُمِي إِتّْخصَّا أَذْ ثسْڒَامْ!‘ ◘ 38 وَانِيثَا ثُوغَا-ث ذِي ثْمسْمُونْثْ ن ڒْڭنْسْ ذِي ڒخْڒَا أَكْ-ذ لْمَالَاكْ ونِّي ثُوغَا أَكِيذسْ إِسَّاوَاڒنْ خْ وذْرَارْ ن سِينَا ؤُڒَا أَكْ-ذ ڒجْذُوذْ نّغْ. أَقَا نتَّا ثُوغَا إِتّطّفْ أَوَاڒنْ ن ثُوذَارْثْ حِيمَا أَذْ أَنغْ ثنْ يوْشْ. ◘ 39 مَاشَا ڒجْذُوذْ نّغْ وَارْ خْسنْ أَذْ أَسْ مَّارْسنْ إِخفْ نْسنْ، مَاشَا سّْثوّْجنْ ث خَاسنْ ؤُشَاعقْبنْ غَارْ مِيصْرَا ذڭْ وُوڒَاونْ نْسنْ. 40 مَاغَارْ نَّانْ إِ هَارُونْ: ’أڭّْ أَنغْ إِربِّيثنْ إِنِّي ذ أَنغْ إِ غَا إِزْوَارنْ، مِينْزِي مُوسَا وَانِيثَا ونِّي ذ أَنغْ إِڭوّْذنْ زِي ثمُّورْثْ ن مِيصْرَا، وَارْ نسِّينْ مِينْ ذ أَسْ إِمْسَارنْ.‘ ◘ 41 ڭِّينْ إِجّْ ن ؤُفُونَاسْ ن صَّانَامْ إِ يِيخفْ نْسنْ ذڭْ وُوسَّانْ نِّي، سّْڭعّْذنْ ثِيغَارْصَا إِ لْ-أَصْنَامْ ؤُشَا فَارْحنْ س مِينْ ڭِّينْ إِفَاسّنْ نْسنْ. 42 أَربِّي إِوْشَا أَسنْ س وعْرُورْ ؤُشَا يَارَّا إِ-ثنْ أَذْعبْذنْ ڒْعسْكَارَاثْ ن ؤُجنَّا أَمْ مَامّشْ ثُوغَا ثُورَا ذڭْ وذْلِيسْ ن إِنَابِييّنْ:

’مَايمِّي ثِيوْيمْ أَيِي-د

زعْمَا إِمُّوذَارنْ ذ ثِيغَارْصَا

أَربْعِينْ ن إِسڭّْوُوسَا ذِي ڒخْڒَا،

أَ أَيْثْ ن إِسْرَائِيل؟ ◘

43 أَقَا ثِيوْيمْ-د ثَازذِّيغْثْ ن مَالْكُومْ،

ذ إِثْرِي ن أَربِّي رِيمْفَانْ،

ڒخْيَاڒَاثْ إِ ثڭِّيمْ حِيمَا أَذْ ثنْثْ ثْعبْذمْ.

نشّْ أَذْ كنِّيوْ سّْبعّْذغْ

أَغِيرِينْ قَاعْ إِ بَابِيلْ.‘ ◘

44 ثَازذِّيغْثْ ن شّْهَاذثْ ن ڒجْذُوذْ نّغْ ثُوغَا-ت ذِي ڒخْڒَا أَمْ مَامّشْ ثُوغَا يُومُورْ نتَّا ونِّي ثُوغَا إِسَّاوَاڒْ أَكْ-ذ مُوسَا مَاحنْذْ أَذْ ت إِڭّْ خْ ؤُمذْيَا إِ ذ أَسْ إِسّْشنْ. ◘ 45 ڒجْذُوذْ نّغْ أَكْ-ذ يَاشُووَا سِّيذْفنْ ثَازذِّيغْثْ-أَ غَارْ ثمُّورْثْ نِّي ذ أَسنْ إِوْشَا أَربِّي ذ ڒْوَارْثْ زِي ڒڭْنُوسْ، ڒڭْنُوسْ نِّي إِسُّوفّغْ إِ-ثنْ أَربِّي قِيبَاتْشْ إِ ؤُغمْبُوبْ نْسنْ، ؤُ نِيثْنِي أَرْبُونْ ت أَڒْ وُوسَّانْ ن ذَاوُوذْ. ◘ 46 وَانِيثَا يُوفَا أَرْضَا غَارْ أَربِّي ؤُشَا إِتَّارْ أَسْ أَذْ يَافْ إِشْثْ ن ثْزذِّيغْثْ إِ أَربِّي ن يَاعْقُوبْ. ◘ 47 مَاشَا سُولِيمَانْ إِبْنَا أَسْ ثَادَّارْثْ. ◘ 48 مَاشَا أَمْعُودْجِي خْ كُوڒْشِي وَارْ إِزدّغْ ذڭْ إِشْثْ ن ثْزذِّيغْثْ إِ إِتّْوَاڭّنْ س إِفَاسّنْ ن إِوْذَانْ أَمْ مَامّشْ إِقَّارْ ؤُنَابِي: ◘

49 ’أَجنَّا ذ ڒْعَارْشْ إِنُو

ؤُ ثمُّورْثْ ذ ثَانبْذَاثْ سَاذُو إِضَارنْ إِنُو.

مَانِي ثَادَّارْثْ إِ ذ أَيِي غَا ثبْنَامْ،

إِقَّارْ سِيذِي،

نِيغْ مَانِي أَمْشَانْ ن أَرَّاحثْ إِنُو؟ ◘

50 مَا وَارْ إِڭِّي ؤُفُوسْ إِنُو مَانْ أَيَا مَارَّا؟‘ ◘

51 أَ كنِّيوْ إِنِّي إِتّْغنَّانْ ذ يِينِّي وَارْ إِتّْوَاخثْننْ ن وُوڒْ ذ ؤُثسْڒِي، ڒبْذَا ثتّمْعَاڒَامْ خْ أَرُّوحْ إِقدّْسنْ. أَمْ مَامّشْ ڭِّينْ ڒجْذُوذْ نْومْ، أَمُّو إِ ثتّڭّمْ ؤُڒَا ذ كنِّيوْ. ◘ 52 مَانْ ونْ زڭْ إِنَابِييّنْ وَارْ ثنْ مَارّْثنْ ؤُ وَارْ ثنْ نْغِينْ ڒجْذُوذْ نْومْ، أَقَا إِنِّي إِزْوَارنْ بَارّْحنْ خْ ثْوَاسِيثْ ن ؤُمْسڭَّاذْ، ونِّي ثْسلّْممْ، ثنْغِيمْ ث كنِّيوْ، ◘ 53 كنِّيوْ إِنِّي إِكْسِينْ شَّارِيعَا س ڒُومُورْ ن لْمَالَاكَاثْ مَاشَا وَارْ ذَايسْ ثطِّيفمْ.“ ◘

54 ؤُمِي سْڒِينْ أَيَا، دُّوقّْزنْ نِيثْنِي س ؤُخيّقْ،غژّنْ ثِيغْمَاسْ نْسنْ غَارسْ. 55 مَاشَا أَمْ ثُوغَا إِشُّورْ س لْ-إِيمَانْ ذ أَرُّوحْ إِقدّْسنْ، إِكسِّي نتَّا ثِيطَّاوِينْ نّسْ ذڭْ ؤُجنَّا، إِژْرَا أَعُودْجِي ن أَربِّي، ذ يَاسُوع إِبدّْ غَارْ يفُوسْ ن أَربِّي، 56 إِنَّا: ”خْزَارْ، تّْوَاڒِيغْ إِجنْوَانْ أَرْزْمنْ ؤُ مِّيسْ ن بْنَاذمْ إِبدّْ غَارْ يفُوسْ ن أَربِّي.“ 57 مَاشَا نِيثْنِي، أَمْ سْغُويُّونْ س إِشْثْ ن ثْمِيجَّا ذ ثَامقّْرَانْثْ، قّْننْ إِمجَّانْ نْسنْ ؤُشَا هجْمنْ خَاسْ مَارَّا. 58 ثْطْفنْ ث، سُّوفّْغنْ ث بَارَّا إِ ثنْذِينْثْ، بْذَانْ تّْحجَّارنْ ث ؤُ ڒشْهُوذْ سَّارْسنْ أَرُّوضْ نْسنْ غَارْ إِضَارنْ ن إِجّْ ن ؤُبْڒِيغْ قَّارنْ أَسْ شَاوُولْ. ◘ 59 ثُوغَا تّْحجَّارنْ سْثِيفَانُوسْ أَمْ إِتّْڒَاغَا، إِقَّارْ: ”أَ سِيذِيثْنغْ يَاسُوع، طّفْ أَرُّوحْ إِنُو.“ ◘ 60 خنِّي إِوْضَا خْ إِفَادّنْ نّسْ، إِسْغُويْ س إِشْثْ ن ثْمِيجَّا ثجْهذْ، إِنَّا: ”أَ سِيذِيثْنغْ، وَارْ ذ أَسنْ تّْحَاسَابْ دّْنُوبْ-أَ!“ أَوَارْنِي ڒَامِي إِنَّا أَيَا، إِطّصْ س يِيضسْ ن ڒْموْثْ. ◘

◘7:3 7:‏3 أَمز. 12‏:‏1.

◘7:5 7:‏5 أَمز. 12‏:‏7؛ 13‏:‏15.

◘7:6 7:‏6 أَمز. 15‏:‏13‏-‏14، 16؛ ؤُف. 12‏:‏40؛ ڭال. 3‏:‏17.

◘7:7 7:‏7 أَمز. 15‏:‏16؛ ؤُف. 3‏:‏12.

◘7:8 7:‏8 أَمز. 21‏:‏2؛ 25‏:‏24؛ 29‏:‏32؛ 30‏:‏5؛ 35‏:‏23.

◘7:9 7:‏9 أَمز. 37‏:‏3، 28؛ إِزهد. 105‏:‏17.

◘7:10 7:‏10 أَمز. 41‏:‏40.

◘7:11 7:‏11 أَمز. 41‏:‏54؛ إِزهد. 105‏:‏16.

◘7:12 7:‏12 أَمز. 42‏:‏1.

◘7:13 7:‏13 أَمز. 45‏:‏4.

◘7:15 7:‏15 أَمز. 46‏:‏5؛ 49‏:‏33.

◘7:16 7:‏16 أَمز. 23‏:‏16؛ 50‏:‏13؛ ؤُف. 13‏:‏19؛ ياش. 24‏:‏32.

◘7:17 7:‏17 ؤُف. 1‏:‏7؛ إِزهد. 105‏:‏24.

◘7:18 7:‏18 ؤُف. 1‏:‏8

◘7:20 7:‏20 ؤُف. 2‏:‏2؛ 6‏:‏19؛ ڒخْڒ. 26‏:‏59؛ 1 إِم. 23‏:‏13؛ عبر. 11‏:‏23.

◘7:23 7:‏23 ؤُف. 2‏:‏11‏-‏15.

◘7:27 7:‏27 مت. 21‏:‏23؛ ڒخ. 7‏:‏35؛ 4‏:‏7.

◘7:28 7:‏28 ؤُف. 2‏:‏14.

◘7:30 7:‏30 ؤُف. 3‏:‏2

◘7:32 7:‏32 ؤُف. 3‏:‏6؛ مت. 22‏:‏32؛ عبر. 11‏:‏16.

◘7:33 7:‏33 ؤُف. 3‏:‏5، 7، 8، 10؛ ياش. 5‏:‏15.

◘7:34 7:‏34 ؤُف. 3‏:‏2‏-‏10.

◘7:36 7:‏36 ؤُف. 7؛ 8؛ 9؛ 10؛ 11؛ 13؛ 14؛ 16‏:‏1؛ أَعَوذ. 1‏:‏3.

◘7:37 7:‏37 أَعَوذ. 18‏:‏15، 18؛ يُوح. 1‏:‏46؛ ڒخ. 3‏:‏22؛ مت. 17‏:‏5.

◘7:38 7:‏38 ؤُف. 19‏:‏3؛ ڭال. 3‏:‏19.

◘7:40 7:‏40 ؤُف. 32‏:‏1، 23.

◘7:42 7:‏42 عَام. 5‏:‏25.

◘7:43 7:‏43 عَام. 5‏:‏26، 27.

◘7:44 7:‏44 ؤُف. 25‏:‏40؛ عبر. 8‏:‏5.

◘7:45 7:‏45 ياش. 3‏:‏14.

◘7:46 7:‏46 1 صم. 16‏:‏1؛ 2 صم. 7‏:‏2؛ 1 إِم. 17‏:‏1؛ إِزهد. 89‏:‏21؛ 132‏:‏5؛ ڒخ. 13‏:‏22.

◘7:47 7:‏47 1 إِج. 6‏:‏1؛ 1 إِم. 17‏:‏12.

◘7:48 7:‏48 1 إِج. 8‏:‏27؛ ڒخ. 17‏:‏24.

◘7:49 7:‏49 2 إِم. 6‏:‏33؛ إِشا. 66‏:‏1، 2؛ مت. 5‏:‏34؛ 23‏:‏22.

◘7:50 7:‏50 إِشا. 66‏:‏1‏-‏2؛ أَمز. 1‏:‏4.

◘7:51 7:‏51 نَاح. 9‏:‏16، 17؛ إِرْم. 6‏:‏1.

◘7:52 7:‏52 ڒخ. 22‏:‏14؛ رُوم. 3‏:‏26؛ 1 بُط. 3‏:‏18؛ 1 يُوح. 2‏:‏1

◘7:53 7:‏53 ؤُف. 19‏:‏3؛ 24‏:‏3؛ يُوح. 7‏:‏19؛ ڭال. 3‏:‏19؛ عبر. 2‏:‏2.

◘7:58 7:‏58 1 إِج. 21‏:‏13؛ لك. 4‏:‏29.

◘7:59 7:‏59 إِزهد. 31‏:‏6؛ لك. 23‏:‏46.

◘7:60 7:‏60 مت. 5‏:‏44؛ لك. 23‏:‏34؛ 1 كُور. 4‏:‏12.