١ رُّوسُولْ ذ ثَاوْمَاثْ إِنِّي إِدْجَانْ ذِي يَاهُوذِييَّا سْڒِينْ بلِّي ؤُڒَا ذ ڒڭْنُوسْ قبْڒنْ وَاوَاڒْ ن أَربِّي. ٢ ڒَْامِي إِڭعّذْ شِيمْعُونْ غَارْ ؤُرْشَالِيمْ، مْشُوبّْشنْ أَكِيذسْ إِنِّي إِدْجَانْ زڭْ وخْثَانْ. ٣ نَّانْ، بلِّي نتَّا يُوذفْ-د غَارْ إِوْذَانْ إِ وَارْ إِتّْوَاخثْننْ، إِشَّا أَكِيذْسنْ. ◘11:‏3 ؤُف. 23‏:‏32؛ 34‏:‏15؛ أَعَوذ. 7‏:‏2؛ يُوح. 18‏:‏28.

٤ مَاشَا شِيمْعُونْ إِقْضعْ ذَايْسنْ ڒْْهَارْذْ، ؤُشَا إِبْذَا أَذْ أَسنْ إِعَاوذْ أَوَاڒْ إِضْفَارْ ؤُمَاسْ: ٥ ”ڒَْامِي ثُوغَا أَيِي ذِي ثنْذِينْثْ ن يَافَّا تّْژَادْجِيغْ، ژْرِيغْ ذڭْ إِجّْ ن ڒوْحِييْ أَقَا إِشْثْ ن ڒْْقشْعثْ أَمْ ثْشُوقّثْ ثَامقّْرَانْثْ ن ڒقْطنْ أَزْذَاذْ إِتّْوَاطّْفنْ زِي أَربْعَا ن ثْغمُّورَا نّسْ ثهْوَا-د زڭْ ؤُجنَّا، ثِيوضْ-د غَارِي. ◘11:‏5 ڒخ. 10‏:‏9. ٦ خْزَارغْ مْلِيحْ ؤُ ژْرِيغْ أَقَا ذَايسْ إِمُودَّارنْ ن ثمُّورْثْ س أَربْعَا ن إِضَارنْ ذ إِمُودَّارنْ إِنِّي إِتّْبُوعنْ خْ ثمُّورْثْ ؤُڒَا ذ إِجْضَاضْ ن ؤُجنَّا. ٧ سْڒِيغْ أَوَارْنِي أَيِي إِشْثْ ن ثْمِيجَّا، ثنَّا أَيِي: ’أَ شِيمْعُونْ، كَّارْ، غَارْصْ، ثشّذْ!‘ ٨ مَاشَا نشّْ نِّيغْ: ’لَّ، أَ سِيذِي،عمَّارْصْ وَارْ يُوذِيفْ عَاذْ غَارْ ؤُقمُّومْ إِنُو مِينْ وَارْ إِزْذِيڭنْ نِيغْ مِينْ إِدْجَانْ ذ ڒحْرَامْ.‘ ◘11:‏8 لَاوِي 11‏:‏4؛ أَعَوذ. 14‏:‏7. ٩ ثنَّا خَافِي ثْمِيجَّا زڭْ ؤُجنَّا عَاوذْ: ’مِينْ إِسِّيزْذڭْ أَربِّي، وَارْ د ث ثتَّارِّيذْ شَا شكْ ذ ڒحْرَامْ!‘ ١٠ مَانْ أَيَا إِمْسَارْ ثْڒَاثَا ن إِمُورنْ ؤُشَا خنِّي إِتّْوَاسّْجْبذْ مَارَّا عَاوذْ غَارْ ؤُجنَّا. ١١ ؤُ خْزَارْ، ڒخْذنِّي أَقَا ذِينْ ثْڒَاثَا ن يرْيَازنْ إِنِّي غَارِي د-إِتّْوَاسّكّنْ زِي كُورْنِيلِييُوسْ زِي قَايْصَارِييَا، بدّنْ غَارْ ثوَّارْثْ ن ڒمْرَاحْ مَانِي ذ أَيِي ثُوغَا. ١٢ إِنَّا أَيِي أَرُّوحْ أَقَا إِتّْخصَّا أَذْ كِيسنْ رَاحغْ بْڒَا مَا أَذْ شكّغْ. ثُوغَا أَكِيذِي ؤُڒَا ذ ستَّا ن وَاوْمَاثنْ ؤُ نُوذفْ غَارْ ثَادَّارْثْ ن ورْيَازْ نِّي. ◘11:‏12 ڒخ. 10‏:‏19؛ 15‏:‏7. ١٣ نتَّا إِسَّارْڭبْ أَنغْ مَامّشْ إِژْرَا إِجّْ ن لْمَالَاكْ إِ إِبدّنْ ذِي ثَادَّارْثْ نّسْ، ونِّي ذ أَسْ إِنَّانْ: ’سكّْ إِجّْ ن ورْيَازْ غَارْ يَافَّا، ثْعَارْضذْ خْ شِيمْعُونْ ونِّي ؤُمِي تّْكنَّانْ بُوطْرُوسْ. ١٤ نتَّا أَذْ أَشْ إِسِّيوڒْ أَوَاڒنْ إِ زِي غَا ثطّْفذْ ثُوذَارْثْ، شكْ ذ مَارَّا ثَادَّارْثْ نّشْ.‘ ١٥ ؤُمِي قِّيمغْ سِّيوْڒغْ، إِهْوَا-د أَرُّوحْ إِقدّْسنْ خَاسنْ أَمْ مَامّشْ خَانغْ د-إِهْوَا عَاوذْ غَارْ ؤُمزْوَارُو. ١٦ تّْوَاسّْعقْڒغْ خْ وَاوَاڒْ ن سِيذِيثْنغْ، مَامّشْ إِنَّا: ’يُوحَانَّا ثُوغَا إِسّغْضَاصْ س وَامَانْ مَاشَا كنِّيوْ أَذْ تّْوَاسّْغضْصمْ س أَرُّوحْ إِقدّْسنْ.‘ ◘11:‏16 إِشا. 44‏:‏3؛ يُووِ. 3‏:‏1؛ مت. 3‏:‏11؛ مك. 1‏:‏8؛ لك. 3‏:‏16؛ يُوح. 1‏:‏26؛ ڒخ. 1‏:‏5؛ 2‏:‏4؛ 19‏:‏4. ١٧ مَاڒَا أَربِّي إِوْشَا ثَاموْشِي-يَا إِ ڒڭْنُوسْ نِّي يُومْننْ ذِي سِيذِيثْنغْ يَاسُوع لْمَاسِيحْ أَمْ مَامّشْ ذ أَنغْ ت إِوْشَا، خنِّي مِينْ عْنِيغْ نشّْ مَاحنْذْ أَذْ سّْبدّغْ أَربِّي؟“ ◘11:‏17 ڒخ. 15‏:‏9.

١٨ ؤُمِي سْڒِينْ أَوَاڒنْ-أَ، هدّْننْ، سّمْغَارنْ أَربِّي، نَّانْ: ”أَذْ ثَاغْ إِوْشَا أَربِّي ؤُڒَا إِ ڒڭْنُوسْ مَاحنْذْ أَذْ د-ذوْڒنْ أَذْ ثُوبنْ إِ ثُوذَارْثْ.“

١٩ إِنِّي إِتّْوَازُوزَّارنْ زِي سِّيبّثْ ن ڒْْمحْنثْ إِ إِمْسَارنْ س سِّيبّثْ ن سْثِيفَانُوسْ، ژْوَانْ غَارْ فِينِيقِييَا ؤُ غَارْ جّْوَايهْ ن قُوبْرُوسْ ؤُ غَارْ أَنْثِييُوخِييَا، أَمْ وَارْ سِّيوِيڒنْ أَكْ-ذ حذْ س وَاوَاڒْ مْغِيرْ أَكْ-ذ وُوذَاينْ وَاهَا. ◘11:‏19 ڒخ. 8‏:‏1، 4. ٢٠ ثُوغَا ذِينْ جَارْ أَسنْ شَا ن يرْيَازنْ زِي قُوبْرُوسْ ؤُ زِي قَايْرَاوَانْ إِنِّي، أَڒَامِي د-ؤُسِينْ غَارْ أَنْثِييُوخِييَا، ثُوغَا إِسَّاوَاڒنْ أَكْ-ذ إِيُونَانِييّنْ، بَارّْحنْ أَسنْ س ڒخْبَارْ أَصبْحَانْ ن سِيذِيثْنغْ يَاسُوع. ٢١ ثُوغَا أَفُوسْ ن سِيذِي أَكِيذْسنْ ؤُشَا أَطَّاسْ ؤُمْننْ، ذوْڒنْ-د غَارْ سِيذِي. ◘11:‏21 ڒخ. 2‏:‏47؛ 5‏:‏14.

٢٢ إِكَّا-د ڒخْبَارْ خَاسنْ خْ إِمزُّوغنْ ن أَيْثْ ن ثْمسْمُونْثْ ذِي ؤُرْشَالِيمْ. نِيثْنِي سّكّنْ بَارْ-نَابَا غَارْ أَنْثِييُوخِييَا. ٢٣ أَڒَامِي د-يِيوضْ ذِينْ، إِژْرَا أَرْضَا ن أَربِّي، ؤُشَا إِفَارْحْ، إِعْڒمْ أَسنْ حِيمَا أَذْ قِّيمنْ تّْشبَّارنْ ذِي سِيذِيثْنغْ س مَارَّا ؤُڒْ نْسنْ. ◘11:‏23 ڒخ. 13‏:‏43؛ 14‏:‏22. ٢٤ مِينْزِي ثُوغَا-ث ذ أَرْيَازْ إِسڭّذْ، إِشُّورْ س أَرُّوحْ إِقدّْسنْ ذ لْ-إِيمَانْ، ؤُشَا إِجّْ ن ؤُبَارُّو ذ أَمقّْرَانْ ن إِوْذَانْ إِمَّارْنِي-د غَارْ سِيذِيثْنغْ. ◘11:‏24 ڒخ. 4‏:‏36؛ 6‏:‏5. ٢٥ خنِّي إِرُوحْ غَارْ ثَارْسُوسْ حِيمَا أَذْ يَارْزُو خْ شَاوُولْ، ◘11:‏25 ڒخ. 9‏:‏27. ٢٦ ؤُشَا أَڒَامِي ث يُوفَا، يِيوِي إِ-ث أَكِيذسْ غَارْ أَنْثِييُوخِييَا. ؤُشَا إِمْسَارْ أَقَا نِيثْنِي مُوننْ ذِي ثْمسْمُونْثْ أَسڭّْوَاسْ إِكْمڒْ ؤُشَا سّْڒمْذنْ إِجّْ ن ڒْْغَاشِي ذ أَمقّْرَانْ. زِي  ڒْوقْثْ نِّي تّْوَاسمَّانْ إِمحْضَارنْ ذ ’إِمَاسِيحِييّنْ‘ إِ ؤُمُورْ أَمزْوَارُو. ◼11:‏26 ’ثَامسْمُونْثْ‘ - نِيغْ: ’جْمَاعثْ نْ ڒْمُومِينِينْ‘.

٢٧ ذڭْ وُوسَّانْ نِّي هْوَانْ-د شَا ن إِنَابِييّنْ زِي ؤُرْشَالِيمْ غَارْ ذِينْ. ٢٨ ؤُشَا إِكَّارْ إِجّْ ن زَّايْسنْ قَّارنْ أَسْ أَغابُوسْ، إِعْڒمْ أَسنْ س أَرُّوحْ بلِّي إِجّْ ن ڒَْاژْ إِمْغَارْ أَذْ يكّْ خْ مَارَّا ثَامُّورْثْ. ؤُشَا يُوسَا-د ڒَْاژْ-أَ ذڭْ وُوسَّانْ ن قَايْصَارْ كْلُوذِييُوسْ. ◘11:‏28 ڒخ. 21‏:‏10. ٢٩ خنِّي ڭِّينْ إِمحْضَارنْ أَقَا كُوڒْ إِجّْ زَّايْسنْ أَذْ إِڭّْ شَا ن ثْوِيزَا غَارْ ؤُغزْذِيسْ عْلَاحْسَابْ ثِيزمَّارْ نّسْ إِ وَاوْمَاثنْ إِ إِزدّْغنْ ذِي يَاهُوذِييَّا. ٣٠ ؤُشَا أَمنِّي إِ ڭِّينْ نِيثْنِي، ؤُشَا سّكّنْ ث ذِينْ غَارْ إِمْغَارنْ ن ڒْْڭنْسْ إِ ذِينْ إِدْجَانْ س ؤُفُوسْ ن بَارْ-نَابَا ذ شَاوُولْ. ◘11:‏30 ڒخ. 12‏:‏25.